Edwɛne 141:1-10
Devidi ayɛlɛyelɛ edwɛne.
141 O Gyihova, mesu mefɛlɛ wɔ.+
Ka ɛ nwo baboa me.+
Saa mesu mefɛlɛ wɔ a, yɛ ɛnzolɛ tie me.+
2 Maa me asɔneyɛlɛ ɛyɛ kɛ ayilevuanlɛ+ mɔɔ bɛziezie ye wɔ ɛ nyunlu la,+Me sa mɔɔ memaa ye zo la ɛyɛ kɛ nɔsolɛ nu ma afɔlebɔlɛ.+
3 O Gyihova, ye sinzavolɛ maa ɔzinza me nloa,Maa ɔzinza me nloa babonle ne anlenkɛ ne.+
4 Mmamaa me ahonle kɔ debie ɛtane biala azo,+Amaa me nee amumuyɛma anyɛ ninyɛndane;Mmamaa medi bɛ aleɛ sosɔɔ ne mɔ bie ɛlɛ.
5 Saa tenlenenli bɔ me a, ɔbahile ɛlɔlɛ kpundii;+Saa ɔtwi me nyunlu a, ɔbayɛ kɛ nwole la wɔ me ti zo,+Na me ti ɛnrɛkpo.+
Wɔ bɛ amaneɛnwunlɛ nu bɔbɔ, mebahɔ zo meayɛ asɔne meamaa bɛ.
6 Bɛvuandi bɛ ndɛnebuavolɛma bɛvi bodane zo bɛgua aze ɛdeɛ,Noko menli ne badie me edwɛkɛ, ɔluakɛ me edwɛkɛ yɛ fɛ.
7 Kɛ mɔɔ sonla fundu azɛlɛ na ɔsande nuhua la,Zɔhane ala a bɛzande yɛ mbowule nu wɔ Nla* anuhɔlɛ ne a.
8 Noko me nye la ɛ nwo zo, O Tumivolɛ Awulae Gyihova.+
Wɔ nu a menriandi meravea a.
Mmaye me ngoane ɛfi ɛkɛ.*
9 Bɔ me nwo bane fi ɛhane mɔɔ bɛzua me la anwo,Amumuyɛma ngane ne mɔ anwo.
10 Amumuyɛma kɔsɔɔti badɔ bɛdabɛ mumua ne bɛ avonle ne mɔ anu+Na mebaze nwolɛ mɔɔ debie biala ɛnrɛyɛ me a.
Ɔbodwɛkɛ
^ Anzɛɛ “Sheol,” ɛhye kile, alesama nla. Nea Edwɛkɛbohilelɛ.
^ Anzɛɛ “Mmawola me ɛkɛla ɛgua.”
