Edwɛne 51:1-19
Kɔmaa edwɛndolɛma kpanyinli ne. Devidi ayɛlɛyelɛ edwɛne, mekɛ mɔɔ Devidi nee Bate-hyiba lale na ngapezonli Neetan rale Devidi anwo ɛkɛ ne la.+
51 O Nyamenle, maa menyia ɛ nyunlu ɛlolɛ, kɛ mɔɔ wɔ ɛlɔlɛ kpundii ne de la.+
Wɔ anwunvɔnezelɛ kpole ne ati, kyikyi me mɛladonlɛ ne mɔ.+
2 Wowo me nvonleɛ fi me nwo bɔkɔɔ,+Na te me nwo fi me ɛtane nwo.+
3 Ɔluakɛ meze me mɛladonlɛ ne mɔ kpalɛ,Yɛɛ me ɛtane wɔ me nyunlu* dahuu.+
4 Wɔmɔ* ala a meyɛ ɛtane metia wɔ a;+Meyɛ mɔɔ le ɛtane wɔ ɛ nye zo la.+
Ɛhye ati saa ɛtendɛ a ɛdi benle,Wɔ ndɛnebualɛ le fɔɔnwo.+
5 Nea! Bɛwole me amumuyɛ nu,Yɛɛ ɛtane nu a me mame nrenzɛle me a.+
6 Nea! Ɛ nye die ahonle nu nɔhalɛlilɛ nwo;+Kilehile me ahonle nɔhalɛ nrɛlɛbɛ.
7 Fa nyinlanyinla te me nwo fi me ɛtane nwo, amaa me nwo ade;+Bia me, amaa meayɛ nwohyee meadɛla ezukɔtweaba.+
8 Maa mende fɛlɛkolilɛ nee anyelielɛ ɛnelɛ,Amaa mbowule ne mɔ mɔɔ ɛbubule nu la ali fɛlɛko.+
9 Ye ɛ nye fi me ɛtane ne mɔ anwo,+Na kyikyi me nvonleɛ ne mɔ amuala.+
10 O Nyamenle, bɔ ahonle mɔɔ anu te la wula me nu,+Na maa menyia sunsum fofolɛ+ mɔɔ gyi kpundii la.
11 Mmafuandi me ɛfi ɛ nye zo ɛto;Yɛɛ mmaye wɔ sunsum nwuanzanwuanza ne ɛfi me nwo zo.
12 Maa menyia wɔ ngoanelielɛ nwo anyelielɛ ne bieko;+Na maa menyia ɛhulolɛ kɛ mebadie wɔ.*
13 Mebahilehile mɛladonlɛma wɔ ndenle ne mɔ,+Amaa ɛtanevolɛma azia ara ɛ nwo ɛkɛ.
14 O Nyamenle, me ngoanedievolɛ Nyamenle,+ die me fi mogya nwo fɔlɛlilɛ nu,+Amaa me tafinlima ava anyelielɛ abɔ wɔ tenleneyɛlɛ ne nolo.+
15 O Gyihova, buke me nloa,Amaa me nloa abɔ wɔ ayɛlɛyelɛ ne nolo.+
16 Ɔluakɛ ɛmkpondɛ afɔlebɔlɛ, anrɛɛ mebava meamaa wɔ;+Ɛ nye ɛnlie ɛyelalɛ afɔlebɔlɛ nwo.+
17 Afɔlebɔlɛ mɔɔ sɔ Nyamenle anye la a le anlubɛnwo nyɛleɛ;*O Nyamenle, ahonle mɔɔ ɛbubu na yebɛtɛ la ɛnrɛkpo.+
18 Fi atiakunlukɛnlɛma nu yɛ mɔɔ le kpalɛ la maa Zayɔn;Die Gyɛlusalɛm bane ne mɔ.
19 Akee ɛ nye balie tenleneyɛlɛ afɔlebɔlɛ nwo,Ɛyelalɛ afɔlebɔlɛ nee nane mumua afɔlebɔlɛ;Akee bɛbava nlankɛ nyinli bɛabɔ afɔle wɔ wɔ afɔlemokyea ne azo.+
Ɔbodwɛkɛ
^ Anzɛɛ “me adwenle nu.”
^ Hibulu aneɛ nu, “Ɛ ngomekye.”
^ Hibulu aneɛ nu, “Fa sunsum mɔɔ fi ye ɛhulolɛ nu yɛ debie la boa me.”
^ Hibulu aneɛ nu, “sunsum mɔɔ ɛbubu.”
