Edwɛne 68:1-35
Kɔmaa edwɛndolɛma kpanyinli ne. Devidi edwɛne. Ayɛlɛyelɛ edwɛne. Edwɛne.
68 Maa Nyamenle ɛdwazo, maa ye kpɔvolɛma ɛbɔ asande,Na maa bɛdabɛ mɔɔ bɛkyi ye la ɛnriandi ɛvi ɔ nyunlu.+
2 Kɛ mɔɔ anwoma bɔ esike kɔ la, zɔhane ala a foa bɛ maa bɛhɔ a;Kɛ mɔɔ senle kolo wolɛ ndɛlamoa la,Zɔhane ala a maa amumuyɛma ɛminli Nyamenle anyunlu a.+
3 Noko maa tenlenema anye ɛlie;+Maa bɛli fɛlɛko kpole wɔ Nyamenle anyunlu;Maa bɛ nye ɛlie na bɛli fɛlɛko.
4 Bɛdo edwɛne bɛmaa Nyamenle; bɛdo ayɛlɛyelɛ edwɛne bɛmaa ye duma ne.+
Bɛdo edwɛne bɛmaa Mɔɔ lua ɛsɛlɛ* ne azo la.
Ye duma a le Gyaa!*+ Bɛli fɛlɛko wɔ ɔ nyunlu!
5 Nrisa ɛ papa nee ahunlanvolɛ ndɛnebuavolɛ+A le Nyamenle mɔɔ de ye nwuanzanwuanza ɛleka ne la.+
6 Nyamenle maa bɛdabɛ mɔɔ yeha bɛ ngome la awuke ɔmaa bɛtɛnla nu;+Ɔye pilizama ɔfi efiade na ɔmaa bɛkpazi.+
Noko ɔwɔ kɛ anzosesebɛma* tɛnla azɛlɛ mɔɔ ɛyɛ ketekete la azo.+
7 O Nyamenle, mekɛ mɔɔ ɛlile wɔ menli ne anyunlu,+Mekɛ mɔɔ ɛ nee bɛ lua ɛsɛlɛ ne azo la, (Sila)
8 Azɛlɛ ne kpusule;+Nyamenle ati, anwuma dɔle ezule;Nyamenle, Yizilayɛ Nyamenle ne ati, Saenae ɛhye kpusule.+
9 O Nyamenle, ɛmaanle ezule dɔle kpalɛ;Ɛmaanle wɔ menli* ne mɔɔ ɛvɛ la nyianle anwosesebɛ bieko.
10 Bɛdɛnlanle ɛdanlɛ azua nu wɔ wɔ azokoɛleɛ ne;+O Nyamenle, wɔ kpalɛyɛlɛ ne ati, ɛmaanle ehyiavolɛma nyianle mɔɔ bɛhyianle nwolɛ la.
11 Gyihova ɛha kɛ;Mraalɛ mɔɔ ɛlɛbɔ edwɛkpa ne nolo la le ɛlɔne kpole.+
12 Arelemgbunli nee bɛ ɛlɔnema nriandi,+ bɛnriandi!
Raalɛ mɔɔ de sua nu bɔbɔ la nyianle ninyɛne mɔɔ bɛvenle la bie.+
13 Bɛlale senle nwo wɔ alienwo* ɛdeɛ,Noko bɛbanyia abubule ndɛbalɛ mɔɔ bɛholo dwɛtɛ fufule bɛgua nwo,Yɛɛ ndɛkɛ mɔɔ bɛholo ezukoa nvutuke tagyee* bɛgua nwo la wɔ ɛkɛ.
14 Mekɛ mɔɔ Tumivolɛ Bedevinli Ko ne bɔle azɛlɛ ne azo arelemgbunli* asande la,+Ezukɔtweaba dɔle wɔ Zalemɔn.*
15 Beehyan+ boka ne le Nyamenle boka;Beehyan boka ne le boka tendenle.
16 Bɛmɛ awoka ndendenle, duzu ati a bɛ nye ɛboloBoka ne mɔɔ Nyamenle ɛkpa* kɛ ɔtɛnla zo la ɛ?+
Nɔhalɛ nu, Gyihova badɛnla ɛkɛ ne dahuu.+
17 Nyamenle konle ehwili ne mɔ le apenle apenle bulu bulu, apenle apenle mɔnwo apenle apenle.+
Gyihova vi Saenae ɛra ɛleka nwuanzanwuanza ne.+
18 Ɛvole ɛhɔle anwuma;+Ɛvale ngɛkɛlɛ ɛhɔle;Ɛvale menli ɛmaanle kɛ ahyɛlɛdeɛ,+Ɛhɛe, anzosesebɛma bɔbɔ,+ kɛ ɛbadɛnla bɛ avinli, O Gyaa Nyamenle.
19 Maa bɛye Gyihova mɔɔ ɔsoa yɛ adesoa ne alehyenlɛ biala la ayɛlɛ,+Yɛ ngoanedievolɛ, nɔhalɛ Nyamenle ne. (Sila)
20 Nɔhalɛ Nyamenle ne le Nyamenle mɔɔ die yɛ ngoane;+Na Gyihova, Tumivolɛ Awulae ne die menli fi ewule nu.+
21 Ɛhɛe, Nyamenle bagelegele ye kpɔvolɛma ati,Awie biala mɔɔ kɔ zo yɛ ɛtane la ati kanrɛlɛ ne.+
22 Gyihova ɛha kɛ: “Me nee bɛ vi Beehyan bazia ara;+Me nee bɛ vi nyevile ne abo lɔ bazia ara,
23 Amaa ɛ gyakɛ anwo ayɛ kpɔvolɛma mogya ngome+Na wɔ ahwea ne mɔ atafinlima atafe bɛ mogya.”
24 O Nyamenle, bɛnwu wɔ ɛlɔnwɔnedolɛ ne,Me Nyamenle, me Belemgbunli ne ɛlɔnwɔnedolɛ ne mɔɔ kɔ ɛleka nwuanzanwuanza ne la.+
25 Edwɛndolɛma li bɛ nyunlu, bɛdabɛ mɔɔ bɛbɔ getaa* la li bɛ nzi;+Mbɛlɛra mɔɔ ɛlɛwoso akɛya la li bɛ avinli.+
26 Bɛye Nyamenle ayɛlɛ wɔ asafo dɔɔnwo anu;*Bɛmɛ mɔɔ bɛvi Yizilayɛ Ɛvileka ne la, bɛye Gyihova ayɛlɛ.+
27 Ɛkɛ ne a Bɛngyaman+ mɔɔ le kakula la ɛlɛdi tumi wɔ bɛ nwo zo a,Dwuda mgbanyima nee bɛ menli dɔɔnwo ne mɔ mɔɔ bɛyɛ dede la noko,Yɛɛ Zɛbulɛn mgbanyima nee Nafetalae mgbanyima.
28 Wɔ Nyamenle ne ɛha kɛ ɛ nwo bayɛ se.
Kile wɔ anwosesebɛ ne, O Nyamenle, kɛ mɔɔ wɔyɛ wɔmaa yɛ la.+
29 Wɔ ɛzonlenlɛsua ne mɔɔ wɔ Gyɛlusalɛm la ati,+Arelemgbunli bava ahyɛlɛdeɛ arɛlɛ wɔ.+
30 Tea nanemgbole mɔɔ wɔ ndɔ ne mɔ anu la,Nlankɛ nyinli+ nee bɛ nlankɛ mralɛ ekpunli,Kɔkpula kɛ menli ne mɔ babɔ bɛ ti aze ava dwɛtɛ fufule ara.
Noko ɔbɔ menli mɔɔ anye die konle nwo la asande.
31 Bɛ nee kɔbele ninyɛne* vi Yigyibiti bara;+Kuhye baha ɔ nwo ava ahyɛlɛdeɛ arɛlɛ Nyamenle.
32 O azɛlɛ ye azo arelemgbunlililɛ, bɛdo edwɛne bɛmaa Nyamenle,+Bɛdo ayɛlɛyelɛ edwɛne bɛmaa Gyihova, (Sila)
33 Bɛdo edwɛne bɛmaa mɔɔ lua anwuma anwuma kpalɛ na ɔwɔ ɛkɛ ɔvi tete la.+
Nea! Ɔ ne kulu, ye tumi ɛnelɛ ne.
34 Bɛlie Nyamenle anwosesebɛ ne bɛdo nu.+
Ye anyunlunyia wɔ Yizilayɛ anwo zo,Yɛɛ ye anwosesebɛ ne wɔ anwomanyunlu.
35 Nyamenle anwo yɛ ɛzulolɛ wɔ ye ɛzonlenlɛsua kpole ne anu.+
Ɔle Yizilayɛ Nyamenle,Ɔfa anwosesebɛ nee tumi ɔmaa menli ne.+
Ayɛlɛyelɛ ɛha Nyamenle.
Ɔbodwɛkɛ
^ Anzɛɛ ɔkola ɔkile, “amungu.”
^ “Gyaa” le Gyihova duma ne mɔɔ bɛpɛ ye sinli.
^ Anzɛɛ “atuadelɛma.”
^ Anzɛɛ “agyapadeɛ.”
^ Anzɛɛ ɔkola ɔkile, “mboane tunli nu.”
^ Anzɛɛ “mɔɔ le yɛlo nee amunli afonla la.”
^ Hibulu aneɛ nu, “arelemgbunli mɔɔ bɛwɔ zo.”
^ Anzɛɛ “Ɔle kɛ asɛɛ ezukɔtweaba dɔle wɔ Zalemɔn la.”
^ Anzɛɛ “kulo.”
^ Hibulu aneɛ nu, “wɔ ayia dɔɔnwo abo.”
^ Anzɛɛ ɔkola ɔkile, “Agyakɛnugyinlavolɛma.”
