Edwɛne 69:1-36
Kɔmaa edwɛndolɛma kpanyinli ne; “Aloa” zo. Devidi edwɛne.
69 O Nyamenle, die me ɔluakɛ azule kpondɛ ava me.*+
2 Memi azia kpole ne anu, ɛleka mɔɔ azɛlɛ resee ɛnle la.+
Mela azule kuma nu,Yɛɛ azudenle mɔɔ ɛlɛse kpole la ɛlɛpia me ahɔ.+
3 Mevɛlɛ dedee mevɛ;+Me komenzia ɛyɛ resee.
Mehendɛ me Nyamenle ne too, me nye ɛlɛbu.+
4 Bɛdabɛ mɔɔ mgbane gyɛne nu ala bɛkpɔ me la+Anwo zonle tɛla me ti zo enrinli.
Bɛdabɛ mɔɔ bɛkpondɛ me bɛahu me,Me kpɔvolɛma mɔɔ ɛnli nɔhalɛ la anwo ɛzo.
Bɛtinlitinlinle me bɛmaanle menvale debie mɔɔ meanwua la memaanle bɛ.
5 O Nyamenle, ɛze ngoaseade mɔɔ menyɛle la,Yɛɛ me nvonleɛ ne mɔ ɛnvea wɔ.
6 Mmamaa bɛdabɛ mɔɔ bɛ nye la ɛ nwo zo la anyunlu gua aze ɔlua medame ti,O Tumivolɛ Awulae, ɛlɔne Gyihova.
Mmamaa bɛdabɛ mɔɔ bɛkpondɛ wɔ la bɔ anyiemgba ɔlua me ti,O Yizilayɛ Nyamenle.
7 Ɛdawɔ ti, bɛbɔ me aholoba;+Nyiane ɛdɔ me nye zo.+
8 Meyɛ ɛyɛvolɛ memaa me mediema,Meyɛ maanle gyɛne nu sonla memaa me mame amra.+
9 Wɔ sua ne anwo mɔdenlebɔlɛ le kɛ senle mɔɔ ɛlɛsɔ la wɔ me nu,+Yɛɛ bɛdabɛ mɔɔ bɛlɛbɔ wɔ aholoba la aholobabɔlɛ ne ɛragua me nwo zo.+
10 Mekɛ mɔɔ menluale ɛhɔnehyelɛ zo* membɛlɛle me nwo aze la,Bɛbɔle me aholoba wɔ nwolɛ.
11 Mɔɔ menvale ɛrele menyɛle me ɛdanlɛ la,Menyɛle agolobɛnwo debie* memaanle bɛ.
12 Me nwo edwɛkɛ ala a bɛdabɛ mɔɔ bɛtɛnla suakpole ne anlenkɛ kpole ne anloa la ka a,Yɛɛ nzabovoma fa me to bɛ edwɛne.
13 Noko maa me asɔneyɛlɛ ɛdwu wɔ ɛkɛ,O Gyihova, wɔ ɛlolɛ mekɛ nu.+
O Nyamenle, wɔ wɔ ɛlɔlɛ kpundii bebelebe ne anu,Dua wɔ nɔhalɛ ngoanelielɛ gyima ne mɔ azo bua me.+
14 Ye me fi moto* ne anu;Mmamaa memi mekɔ ɔ bo.
Die me fi bɛdabɛ mɔɔ bɛkpɔ me la asa anuNee azule kuma ne anu.+
15 Mmamaa azuyilɛ mɔɔ se ndɛndɛ la pia me kɔ,+Anzɛɛ mmamaa menoma azule kuma ne anu,Yɛɛ mmamaa bula* ne keda me nwo zo.+
16 Bua me, O Gyihova, ɔluakɛ wɔ ɛlɔlɛ kpundii ne le kpalɛ.+
Wɔ anwunvɔnezelɛ bebelebe ne ati, kakyi ɛ nye nea me,+
17 Mmafa ɛ nye ɛfea wɔ sonvolɛ.+
Bua me ndɛndɛ, ɔluakɛ mewɔ anwongyelelɛ nu.+
18 Bikye me na die me;*Me kpɔvolɛma ati, die me.
19 Ɛze aholoba mɔɔ bɛbɔ me nee me nyiane yɛɛ me anyiemgba.+
Ɛnwu me kpɔvolɛma kɔsɔɔti.
20 Aholoba ɛbubu me ahonle, na hanlɛ ne ɛnlɛ ye ayile.*
Ɛnee me nye la kɛ awie kɛyɛ me gyakɔ, noko meannyia bie,+Nee arɛlekyekyevolɛma, noko meannyia bie.+
21 Noko ɛhɔne ku me la, bɛmaanle me pɔezen,+Yɛɛ nzuhɔne ku me la, bɛmaanle me nza nyinyianlera kɛ meno.+
22 Maa bɛ ɛkponledolɛ ɛhakyi ɛhane ɛmaa bɛ,Na bɛ ɛkpazilɛ ɛyɛ ɛhane.+
23 Maa bɛ nye zo ɛyɛ bɛ kisii amaa bɛannwu debie,Na bɛ ɛzɔlɛ ɛwoso dahuu.
24 Wola wɔ ɛya* ne gua bɛ nwo zo,Na maa wɔ ɛya wuluwulu ne ɛhɔva bɛ.+
25 Maa bɛ azokoɛleɛ* ɛdɔ mgbane;Mmamaa awie tɛnla bɛ ɛdanlɛ azua nu.+
26 Ɔluakɛ bɛfoa mɔɔ wɔboda* ye la,Na bɛkɔ zo bɛka bɛdabɛ mɔɔ wɔboda bɛ la nyanelilɛ ne anwo edwɛkɛ.
27 Fa fɔlɛlilɛ dɔɔnwo boka bɛ fɔlɛlilɛ nwo,Na mmamaa bɛnyia wɔ tenleneyɛlɛ ne anu kyɛfoa biala.
28 Maa bɛkyikyi bɛ aluma bɛvi teasema buluku* ne anu,+Na mmamaa bɛkɛlɛ bɛ aluma bɛboka tenlenema anwo.+
29 Noko mewɔ anwongyelelɛ nu yɛɛ melɛdi nyane.+
O Nyamenle, maa wɔ ngoanelielɛ tumi ne ɛbɔ me nwo bane.
30 Mebado edwɛne meaye Nyamenle duma ne ayɛlɛ,Na meava moyɛlɛ meahanvo ye.
31 Ɛhye bazɔ Gyihova anye adɛla ɛnlankɛ nyinli,Adɛla ɛnlankɛ ralɛ nyinli mɔɔ lɛ mɛne na bɛkpakye ɔ gyakɛ taboa ne anu la.+
32 Bɛlɛvoma banwu ye na bɛali fɛlɛko.
Bɛmɛ mɔɔ bɛkpondɛ Nyamenle la, bɛzi bɛ ahonle.
33 Ɔluakɛ Gyihova tie ehyiavolɛma,+Yɛɛ ɔnrɛbu ɔ nye ɔnrɛgua ye menli mɔɔ bɛwɔ akɛlɛzonlenlɛ nu la anwo zo.+
34 Maa anwuma nee azɛlɛ ɛye ye ayɛlɛ,+Nyevile nee debie biala mɔɔ wɔ* nu la.
35 Ɔluakɛ Nyamenle balie Zayɔn+Na yeakyekye Dwuda azuamgbole ne mɔ bieko,Na bɛbadɛnla ɛkɛ na yeayɛ bɛ ɛdeɛ.*
36 Ɔbayɛ ye azonvolɛ abozoamra ɛdeɛ,+Na bɛdabɛ mɔɔ bɛkulo ye duma ne la badɛnla ɛkɛ.+
Ɔbodwɛkɛ
^ Anzɛɛ “kpondɛ ayi ava me ɛkɛla.”
^ Anzɛɛ ɔkola ɔkile, “Mekɛ mɔɔ menzunle na mengyele ɛhɔne.”
^ Anzɛɛ “ɛfenle.” Hibulu aneɛ nu, “ɛrɛlɛ.”
^ Anzɛɛ “azia.”
^ Anzɛɛ “kuma.”
^ Anzɛɛ “Bikye me ɛkɛla na die ye.”
^ Anzɛɛ “yɛɛ menlɛ anyelazo.”
^ Anzɛɛ “ɛya kpole.”
^ Anzɛɛ “azokoɛleɛ mɔɔ bɛlie nwolɛ bane la.”
^ Anzɛɛ “wɔbɔ.”
^ Anzɛɛ “ngoane buluku.”
^ Hibulu aneɛ nu, “duolua.”
^ Ɛhye kile, azɛlɛ ne.
