Gyɛlɛmaya 1:1-19
1 Helekaya ara Gyɛlɛmaya* mɔɔ le Anatɔto+ ɛsɔfoma mɔɔ bɛwɔ Bɛngyaman azɛlɛ zo la anu ko la, anloa edwɛkɛ ɛne.
2 Gyihova edwɛkɛ ne rale ye ɛkɛ wɔ Emɔn ara Dwosaya,+ Dwuda belemgbunli ne mekɛ zo wɔ ye tumililɛ ɛvolɛ 13 ne anu.
3 Eza ɔrale ye ɛkɛ wɔ Dwuda Belemgbunli Dwosaya ara Gyɛhɔyakem+ mekɛ zo too ɔhɔdwule Dwuda Belemgbunli Dwosaya ara Zɛdikaya+ tumililɛ ɛvolɛ 11 ne awieleɛ, hɔkpulale kɛ Gyɛlusalɛm hɔle akɛlɛzonlenlɛ nu wɔ siane nnu ne anu.+
4 Gyihova edwɛkɛ ne rale me ɛkɛ ne kɛ:
5 “Kolaa na meanwo wɔ wɔ ɛkolɛ nu la, ɛnee meze* wɔ,+Yɛɛ kolaa na bɛawo wɔ* la, mendele ɛ nwo.*+
Menyɛle wɔ ngapezonli memaanle maanle maanle ne mɔ.”
6 Noko menganle kɛ: “O Tumivolɛ Awulae Gyihova!
Menze tendɛ,+ ɔluakɛ mele kakula.”+
7 Na Gyihova zele me kɛ:
“Mmaka kɛ, ‘Mele kakula.’
Ɔluakɛ ɔwɔ kɛ ɛkɔ bɛdabɛ mɔɔ mebazoa wɔ bɛ nwo ɛkɛ ne la amuala ɛkɛ,Yɛɛ ɔwɔ kɛ ɛka edwɛkɛ biala mɔɔ mekɛha mekɛhile wɔ la.+
8 Mmasulo bɛ,+Ɔluakɛ ‘me nee wɔ lua kɛ medie wɔ,’+ kɛ Gyihova se la ɛne.”
9 Akee Gyihova dendenle ɔ sa na ɔvale ɔhanle me nloa.+ Na Gyihova zele me kɛ: “Meva me edwɛkɛ ne mewula ɛ nloa anu.+
10 Nea, ɛnɛ memaa wɔ tumi wɔ maanle maanle nee arelemgbunlililɛ nwo zo, kɛ ɛdudu na ɛhwe ɛgua ye aze, ɛzɛkye na ɛbubu ɛgua ye aze, ɛzi na ɛlua.”+
11 Gyihova edwɛkɛ ne rale me ɛkɛ ne bieko kɛ: “Gyɛlɛmaya, duzu a ɛnwu ye a?” Ɔti menganle kɛ: “Menwu alemɔndo baka asa ngane.”
12 Gyihova zele me kɛ: “Wɔnwu ye boɛ bɔkɔɔ, ɔluakɛ melɛsinza amaa meali me edwɛkɛ zo.”
13 Gyihova edwɛkɛ ne rale me ɛkɛ ne fane nwiɔ ne azo kɛ: “Duzu a ɛnwu ye a?” Ɔti menganle kɛ: “Menwu buakɛ* bie mɔɔ debie mɔɔ wɔ nu la ɛlɛwu na bɛhyea ɔ nloa ne bɛvi sɔlɔ la.”
14 Na Gyihova zele me kɛ:
“Munzule vi sɔlɔ baraMenli mɔɔ dede azɛlɛ ne azo la kɔsɔɔti anwo zo.”+
15 Ɔluakɛ ‘melɛfɛlɛ mbusua mɔɔ bɛwɔ sɔlɔ arelemgbunlililɛ ne anu la kɔsɔɔti,’ kɛ Gyihova se la ɛne,+‘Bɛbara; na bɛ nuhua ko biala bava ye belemgbunli ebia ne arazieGyɛlusalɛm nlenkɛ mgbole ne mɔ anloa,+Wɔ ye bane ne mɔ kɔsɔɔti anwoNee Dwuda azuamgbole kɔsɔɔti azo.+
16 Na mebaha me ndɛnebualɛ mɔɔ tia bɛ wɔ bɛ ninyɛndane kɔsɔɔti anwo la meahile bɛ,Ɔluakɛ bɛkpo me,+Yɛɛ bɛbɔ afɔle bɛmaa bɛ esike ne kɔ nyamenle gyɛne ɛkɛ+Na bɛkoto bɛ sa anloa gyima.’+
17 Noko ɔwɔ kɛ ɛsiezie ɛ nwo ɛyɛ gyima,Na ɔwɔ kɛ ɛdwazo na ɛka edwɛkɛ biala mɔɔ mekɛha mekɛhile wɔ la ɛkile bɛ.
Mmasulo bɛ,+Anrɛɛ mebamaa ɛzulolɛ aha wɔ wɔ bɛ nyunlu.
18 Ɔluakɛ ɛnɛ meyɛ wɔ suakpole mɔɔ bɛlie nwolɛ bane,Bulalɛ pila nee kɔbele bane metia azɛlɛ ye kɔsɔɔti,+Memaa Dwuda arelemgbunli nee ye mgbanyima,Memaa ɛsɔfoma nee menli mɔɔ de azɛlɛ ne azo la.+
19 Na bɛ nee wɔ baho ɛdeɛ,Noko bɛnrɛhola wɔ,Ɔluakɛ ‘me nee wɔ lua kɛ medie wɔ,’+ kɛ Gyihova se la ɛne.”
Ɔbodwɛkɛ
^ Ɔkola ɔkile “Gyihova Wula Anyunlunyia.”
^ Anzɛɛ “mekpa.”
^ Hibulu aneɛ nu, “kolaa na ɛvi awodeɛ ne anu wɔavinde.”
^ Anzɛɛ “menyele wɔ menziele ahane.”
^ Anzɛɛ “buakɛ anloa kpole.”
