Gyɛlɛmaya 16:1-21
16 Gyihova edwɛkɛ ne rale me ɛkɛ ne bieko kɛ:
2 Mmagya raalɛ, yɛɛ mmawo mralɛ mrenyia nee mralɛ mraalɛ wɔ ɛke.
3 Ɔluakɛ mɔɔ Gyihova ɛha ye wɔ mralɛ mrenyia nee mralɛ mraalɛ mɔɔ bɛwo bɛ wɔ ɛke nee bɛ mame mɔ mɔɔ wole bɛ nee bɛ papa mɔ mɔɔ maanle bɛwole bɛ wɔ azɛlɛ ɛhye azo la anwo la ɛne:
4 Ewule ɛzulolɛ bie bahu bɛ,+ noko awie biala ɛnrɛzu bɛ yɛɛ bɛnrɛzie bɛ; bɛbayɛ kɛ nyɛmoa ebinli wɔ azɛlɛ ne azo.+ Konle dadeɛ nee ɛhɔne bahuhu bɛ,+ na bɛ avunli bayɛ anwomanyunlu nloma nee azɛlɛ ye azo nane aleɛ.’
5 Ɔluakɛ mɔɔ Gyihova ɛha la ɛne,‘Mmakɔ awuke mɔɔ bɛlɛto ɛzɛnema ɛkponle wɔ ɛkɛ la anu,Mmasu alɔbɔlɛ ɛzunlɛ anzɛɛ mmayɛ bɛ gyakɔ.’+
‘Ɔluakɛ meye me anzodwolɛ nee me ɛlɔlɛ kpundii yɛɛ me anwunvɔnezelɛMevi menli ɛhye mɔ anwo zo,’ Gyihova a se a.+
6 Menli mɔɔ lɛ bie nee menli mɔɔ ɛnlɛ bie la amuala bawu azɛlɛ ɛhye azo.
Bɛnrɛzie bɛ,Awie biala ɛnrɛzu bɛ,Yɛɛ awie ɛnrɛpepɛ* ɔ nwo anzɛɛ bɛmɛ bɛ ti awie ɛnrɛkpa ɔ ti.*
7 Na awie biala ɛnrɛmaa menli mɔɔ ɛlɛsu la aleɛ,Kɛ ɔfa yeakyekye bɛ rɛle wɔ bɛ menli mɔɔ ɛwu la ati;Anzɛɛ awie biala ɛnrɛmaa bɛ nza kanrɛlɛ ko bɔbɔ kɛ ɔfa yeakyekye bɛ rɛleKɛ bɛnlo ɔluakɛ bɛminli bɛ papa anzɛɛ bɛ mame.
8 Yɛɛ mmakɔ awuke biala mɔɔ bɛlɛto ɛkponle wɔ ɛkɛ ne la anuKɛ ɛ nee bɛ kadɛnla aze bɛali na bɛanlo.’
9 “Ɔluakɛ mɔɔ ɛlɔne Gyihova, Yizilayɛ Nyamenle ne ɛha la ɛne, ‘Nea, wɔ ɛke, wɔ ɛdawɔ mumua ne ɛ nye zo nee wɔ mekɛ zo, mebamaa anyelielɛ ɛnelɛ nee fɛlɛkolilɛ ɛnelɛ, atɔfolɛ nrenyia ane nee atɔfolɛ raalɛ ane agyakyi.’+
10 “Saa ɛka edwɛkɛ ɛhye mɔ amuala ɛkile menli ne a, bɛbabiza wɔ kɛ, ‘Duzu ati a Gyihova ɛha munzule mgbole ɛhye mɔ amuala ɛgua yɛ nwo zo ɛ? Nvonleɛ nee ɛtane boni a yɛyɛ yɛtia Gyihova yɛ Nyamenle ne a?’+
11 Ɛdawɔ noko bua bɛ kɛ, “Ɔluakɛ bɛ nenyia mɔ kpole me,”+ Gyihova a se a, “na bɛhɔlile nyamenle gyɛne nzi, bɛzonlenle bɛ na bɛbɔle bɛ ti aze bɛmaanle bɛ.+ Noko mame, bɛkpole me yɛɛ bɛanli me mɛla ne mɔ azo.+
12 Na bɛmɛ bɛyɛ ɛtane bɛdɛla bɛ nenyia mɔ,+ kɛ anrɛɛ bɛkɛdie me la, bɛ nuhua ko biala yɛ anzosesebɛ di ye ahonle ɛtane nzi.+
13 Ɔti mebavoa bɛ meavi azɛlɛ ɛhye azo meahɔ azɛlɛ mɔɔ bɛ nee bɛ nenyia mɔ ɛnze zolɛ la azo,+ na bɛbazonle nyamenle gyɛne alehyenlɛ nee aledwolɛ wɔ lɔ,+ ɔluakɛ menrɛze bɛ anwunvɔne.”’
14 “‘Noko, mekɛ ɛlɛba,’ Gyihova a se a, ‘mɔɔ bɛnrɛha ye bieko kɛ: “Mekɛ ala mɔɔ Gyihova mɔɔ yele Yizilayɛma vile Yigyibiti azɛlɛ zo rale la de aze la!”+
15 emomu bɛbaha kɛ: “Mekɛ ala mɔɔ Gyihova mɔɔ yele Yizilayɛma vile sɔlɔ azɛlɛ ne nee azɛlɛ mɔɔ ɔbɔle bɛ ɔkpondenle zo kɔsɔɔti azo rale la de aze la!” na mebava bɛ meazia meara bɛ azɛlɛ ne mɔɔ menvale memaanle bɛ nenyia mɔ la azo bieko.’+
16 ‘Nea melɛsoa meamaa bɛahɔvɛlɛ menli mɔɔ kye fɛlɛ la dɔɔnwo meamaa bɛara,’ Gyihova a se a,‘Na bɛbakpondɛ bɛ bɛahye bɛ.
Yemɔ anzi, mebazoa meamaa bɛahɔvɛlɛ menli mɔɔ di ɛbɔlɛ la dɔɔnwo bɛara,Na bɛbali ɛbɔlɛ bɛahye bɛ wɔ awoka mgbole nee awoka ngyikyi kɔsɔɔti azoYɛɛ awolɛ mgbole adokule nu.
17 Ɔluakɛ me nye wɔ debie biala mɔɔ bɛyɛ la anwo.*
Bɛngola bɛnva ninyɛne mɔɔ bɛyɛ la bɛnvea me,Yɛɛ me nye dua nvonleɛ biala mɔɔ bɛyɛ la.
18 Mɔɔ limoa la, mebadua bɛ kakɛ wɔ bɛ nvonleɛ nee bɛ ɛtane ne mɔ anwo,+Ɔluakɛ bɛva bɛ kyibadeɛ ananze ne mɔ mɔɔ ngoane ɛnle nu* la bɛgua me azɛlɛ ne anwo evinliNa bɛva bɛ bɛkyi ninyɛne ne bɛyi me agyapadeɛ ne tɛkɛɛ.’”+
19 O Gyihova, me anwosesebɛ nee me aranemgbole,Me feabelɛ wɔ anwongyelelɛ mekɛ nu,+Maanle maanle vi azɛlɛ ye ɛleka biala bara wɔ ɛkɛ,Na bɛbaha kɛ: “Adalɛ nee ninyɛne mgbane yɛɛ ninyɛne mɔɔ nvasoɛ ɛnle zo la ala aYɛ nenyia mɔ nyianle ye kɛ agyadeɛ a.”+
20 Asoo sonla bahola ayɛ nyamenle amaa ɔ nwoWɔ mekɛ mɔɔ bɛnle nyamenle la?+
21 “Ɔti mebamaa bɛanwu ye,Wɔ mekɛ ɛhye anu, mebamaa bɛanwu me tumi nee me anwosesebɛ ne,Na bɛbanwu kɛ me duma a le Gyihova.”
Ɔbodwɛkɛ
^ Anzɛɛ “ɛnrɛbodɛboda.”
^ Ɔle awozonle ɛzonlenlɛma mɔɔ bɛlɛsu awie mɔɔ ɛwu la amaamuo na ɔbayɛ kɛ ɛnee Yizialyɛma mɔɔ bɛkpɔkye la yɛ bie.
^ Hibulu aneɛ nu, “wɔ bɛ ndenle kɔsɔɔti anwo.”
^ Hibulu aneɛ nu, “mɔɔ bɛle kɛ avunli.”
