Gyɛlɛmaya 2:1-37
2 Gyihova edwɛkɛ ne rale me ɛkɛ ne kɛ:
2 “Kɔ na kɔha gua Gyɛlusalɛm anzo nu kɛ, ‘Mɔɔ Gyihova ɛha la ɛne:
“Mekakye wɔ ngakula nu ɛlɔlɛ kpundii ne,+Ɛlɔlɛ ne mɔɔ ɛlale ye ali wɔ mekɛ mɔɔ menvale me nloa mendole ɛ nwo zo kɛ mebagya wɔ la kpalɛ,+Kɛzi ɛdoale me wɔ fienemgbole ne anu,Wɔ azɛlɛ mɔɔ bɛtɛduale ma biala wɔ zolɛ la azo.+
3 Ɛnee Yizilayɛ le nwuanzanwuanza maa Gyihova,+ ye ɛya nu ma mɔɔ limoa.”’
‘Awie biala mɔɔ bame ye la bali fɔlɛ.
Munzule bado bɛ,’ Gyihova a se a.”+
4 O Gyekɔbo abozoamra nee bɛmɛ Yizilayɛ mbusua kɔsɔɔtiBɛdie Gyihova edwɛkɛ.
5 Mɔɔ Gyihova ɛha la ɛne:
“Nvonleɛ boni a bɛ nenyia mɔ nwunle ye wɔ me nwo,+Mɔɔ ɔdaye ti bɛhwenle bɛ nwo bɛvile me nwo bɔkɔɔ,Na bɛlile ananze mɔɔ nvasoɛ ɛnle bɛ nwo zo+ la anzi na ɔmaanle bɛyɛle mgbane a?+
6 Bɛambiza kɛ, ‘Gyihova wɔ nienwu,Ahenle mɔɔ yele yɛ vile Yigyibiti azɛlɛ zo,+Ahenle mɔɔ lile yɛ nyunlu wɔ fienemgbole ne anu,Azɛlɛ mɔɔ le ɛsɛlɛ+ nee ahuma ahuma,Azɛlɛ mɔɔ nzule ɛnle zo+ na awozinli kabii wɔ zo,Azɛlɛ mɔɔ dasanli biala ɛnva zoNa awie biala ɛndɛnla zolɛ la?’
7 Akee menvale bɛ membale azɛlɛ mɔɔ kye aleɛ* la azo,Kɛ bɛli zolɛ mbakama nee zolɛ ninyɛne mgbalɛ ne mɔ bie.+
Noko bɛrale na bɛguale me azɛlɛ ne anwo evinli;Bɛmaanle me agyapadeɛ ne yɛle kyibadeɛ.+
8 Ɛsɔfoma ne ambiza kɛ, ‘Gyihova wɔ nienwu?’+
Bɛdabɛ mɔɔ bɛnea Mɛla ne azo la ɛnze me,Mboaneneavolɛma ne dwazole tiale me,+Ngapezoma ne hanle ngapezo wɔ Beeyale duma nu,+Na bɛdoale bɛdabɛ mɔɔ bɛammaa bɛannyia nvasoɛ biala la.
9 ‘Ɔti me nee bɛ bazie ye zo bieko,’+ Gyihova a se a,‘Na me nee bɛ mra ne mɔ amra noko bazie ye zo.’
10 ‘Noko bɛpɛ nu bɛhɔ Kitem+ ɛnweazo* bɛhɔnlea.
Ɛhɛe, bɛzoa bɛmaa bɛhɔ Kidaa+ na bɛdwenle nwolɛ kpalɛ;Bɛnlea saa debie zɛhae bie ɛzi ɛlɛ a.
11 Asoo maanle bie ɛva ye nyamenle ɛhɔlie debie mɔɔ ɛnle nyamenle la ɛlɛ ɔ?
Noko me menli ne ɛva me anyunlunyia ɛhɔlie debie mɔɔ nvasoɛ ɛnle zo la.+
12 Bɛmɛ anwuma, bɛnlea ɛhye azibɛnwo nu;Ɛzulolɛ kpole ɛmaa bɛ nwo ɛwoso bɛ, Gyihova a se a,
13 ‘Ɔluakɛ me menli ne ɛyɛ ɛtane nwiɔ;
Bɛkpo medame mɔɔ mele ngoane nzule ɛvileka la,+Na bɛdabɛ bɛhɔbɔ* bɛ bula,Bula mɔɔ ɛgyigya mɔɔ nzule ɛngola ɛngyinla nu la.’
14 ‘Asoo Yizilayɛ le sonvolɛ? Ɔle akɛlɛ mɔɔ bɛwole ye wɔ ɔ menle sua nu ɔ?
Ɛnee duzu ati a menli fa ye kɔ akɛlɛzonlenlɛ nu a?
15 Awenade ngyikyi* kpo ye;+Bɛmaa bɛ ne zo.
Bɛmaa ye azɛlɛ ne ɛhakyi debie ɛzulolɛ bie.
Bɛdo senle wɔ ye azuamgbole ne mɔ azo, yemɔti awie biala ɛnde ɛkɛ.
16 Nɔfoma+ nee Tapanehizima+ bɛadidi ɛ ti kanrɛlɛ ne azo too bɛamaa zolɛ adu.
17 Asoo tɛ ɛdawɔ a wɔmaa ɛhye ɛdo wɔ a,Ɔluakɛ wɔkpo Gyihova wɔ Nyamenle ne+Wɔ mekɛ mɔɔ ɛnee ɔlɛkile wɔ adenle la ɔ?
18 Duzu ati a ɔwɔ kɛ ɛfa Yigyibiti adenle zo+Kɛ ɛkanlo Hyaehɔ anu nzule ne bie a?
Duzu ati a ɔwɔ kɛ ɛfa Aselea adenle zo+Kɛ ɛkanlo Yufileti ne anu nzule ne bie a?
19 Ɔwɔ kɛ wɔ amumuyɛ ne tenrɛdenrɛ wɔ,Na nɔhalɛ mɔɔ wɔanli la twi ɛ nyunlu.
Nea na nwu kɛzi ɔle ɛtane na ɔyɛ ɛnwonle+Kɛ ɛbakpo Gyihova wɔ Nyamenle ne la;Wɔanzulo me fee,’+ Tumivolɛ Awulae, ɛlɔne Gyihova a se a.
20 ‘Mekɛ tendenle mɔɔ ɛze ɛhɔ la, membubule wɔ gyɛnvayile ne anu+Na mentetele wɔ nyɛma ne anu.
Noko ɛhanle kɛ: “Menrɛzonle wɔ,”
Ɔluakɛ wɔ boka tendenle biala azo nee baka buzuu biala abo+Ɛlale ɛbɔle tuutuu ɛbɛla.+
21 Menluale wɔ kɛ vanye kɔkɔlɛ mɔɔ le kpalɛ,+ bɛ muala bɛle ma kpalɛ;Noko akee, kɛ ɔyɛle mɔɔ wɔhakyi vanye nyinli wɔ me nye zo ɛ?’+
22 ‘Saa ɛfa soda nee saminla dɔɔnwo ebia bɔbɔ a,Wɔ ɛtane ne bamaa ɛ nwo ayɛ evinli dahuu wɔ me nye zo,’+ Tumivolɛ Awulae Gyihova a se a.
23 Kɛ ɔkɛyɛ na wɔaha kɛ, ‘Metɛguale me nwo evinli,
Metɛdile Beeyale ne mɔ anzi’ ɛ?
Nea adenle mɔɔ ɛluale nu wɔ bɔnza ne anu la.
Suzu mɔɔ wɔyɛ la anwo.
Ɛle kɛ afunlumu belɛ kakula mɔɔ anwo yɛ ndɛ,Mɔɔ ɛlɛnriandi basabasa ali akɔneaba wɔ ye ndenle nu la,
24 Ɛbɔ nu asoaso mɔɔ fienemgbole nee ɔ nwo ɛli,Ye atiakunluwɔzo maa ɔfunvua ɔkpondɛ nyinli.
Saa ɔsɔ a nwane a kɛhola kɛzi ye adenle a?
Ɔngyia kɛ bɛdabɛ mɔɔ bɛkpondɛ ye la kɛfonla bɛ nwo.
Ye mekɛ* dwu a bɛ sa baha ye.
25 Nea na wɔangua ɛ gyakɛ azeNea ɛ komenzia na nzuhɔne angu wɔ.
Noko ɛhanle kɛ: ‘Anyelazo biala ɛnle ɛkɛ!+
Kyɛkyɛ! Mekulo nyɛvolɛ,*+Na mebadoa bɛ.’+
26 Kɛ mɔɔ bɛkye awule a ɔbɔ anyiemgba la,Zɔhane ala a bɛbɔ Yizilayɛma anyiemgba a,Bɛdabɛ, bɛ arelemgbunli nee bɛ mgbanyima,Bɛ ɛsɔfoma nee bɛ ngapezoma.+
27 Bɛka bɛkile baka kɛ, ‘Ɛle me papa,’+
Yɛɛ bolɛ noko kɛ, ‘Ɛdawɔ a ɛwole me a.’
Na mame, bɛkakyi bɛ nzi bɛsi me na tɛ bɛ nyunlu ɔ.+
Noko wɔ bɛ anwongyelelɛ mekɛ nu bɛka kɛ,‘Dwazo na die yɛ!’+
28 Kɛkala bɛ nyamenle ne mɔ mɔɔ bɛyɛle la wɔ nienwu?+
Saa bɛbahola bɛalie bɛ wɔ bɛ anwongyelelɛ mekɛ nu a bɛmaa bɛdwazo,O Dwuda, kɛ bɛ azuamgbole ne mɔ dodo de la, zɔhane ala a bɛ nyamenle ne mɔ dodo de a.+
29 ‘Duzu ati a bɛ nee me ɛzie ye zo a?
Duzu ati a bɛ kɔsɔɔti bɛdwazo bɛtia me a?’+ Gyihova a se a.
30 Mebo bɛ mra ne mɔ mgbane.+
Bɛanlie ɛdenrɛdenrɛlɛ biala bɛando nu;+Bɛdabɛ bɛ konle dadeɛ ɛhu bɛ ngapezoma,+Kɛ awenade mɔɔ sɛkye ninyɛne la.
31 O awolɛndoazo, bɛzuzu Gyihova edwɛkɛ ne anwo.
Meyɛ kɛ fienemgbole memaa YizilayɛmaAnzɛɛ azɛlɛ mɔɔ awozinli kabii wɔ zo la ɔ?
Duzu ati a ɛhye mɔ, me menli ne, ɛha kɛ, ‘Yɛkɔ akpɔsa yɛ nwo tɔ yɛ,
Yɛnrɛra ɛ nwo ɛkɛ ne bieko’ a?+
32 Asoo bɛlɛra mɔɔ ɛnze nrenyia la arɛle bahola avi ye agudeɛ,Na atɔfolɛ raalɛ arɛle avi ye tabule* ɔ?
Noko me menli ne arɛle ɛvi me mekɛ tendenle.+
33 O raalɛ, nea kɛzi ɛdua nrɛlɛbɛ adenle zo ɛkpondɛ kulovolɛ a!
Wɔtete ɛ nwo wɔ amumuyɛ ndenle nu.+
34 Ehyiavolɛma mɔɔ ɛnze nwolɛ bie la mogya ɛheha wɔ tɛladeɛ ne anu,+Meannwu kɛ bɛlɛbu wɔ sua ne bɛawolo nu ɛdeɛ;Noko ɔwɔ wɔ adɛladeɛ ne mɔ amuala anu.+
35 Noko akee ɛka kɛ, ‘Me nwo ɛnlɛ edwɛkɛ.
Nɔhalɛ nu, ye ɛya ne ɛvi me nwo zo.’
Kɛkala melɛfa ndɛnebualɛ meara ɛ nwo zoƆluakɛ ɛka kɛ, ‘Metɛyɛle ɛtane.’
36 Duzu ati a ɛbu wɔ adenle ne mɔɔ wɔhakyi ye la debie ekyi ɛ?
Yigyibiti ati ɛ nyunlu bagua aze,+Kɛ mɔɔ Aselea ati ɛ nyunlu guale aze la.+
37 Ɛhye ati, ɛbava ɛ sa wɔagua ɛ ti zo wɔavinde wɔahɔ,+Ɔluakɛ Gyihova ɛkpo bɛdabɛ mɔɔ wɔva ɛ rɛle wɔwula bɛ nu la;Bɛnrɛmaa ɔnrɛwie wɔ boɛ.”
Ɔbodwɛkɛ
^ Anzɛɛ “tola dɔɔnwo wɔ zo.”
^ Anzɛɛ “mbɔra ne mɔ azo.”
^ Anzɛɛ “bɛhɔpɛ,” ɔbayɛ kɛ wɔ bolɛ nu.
^ Anzɛɛ “awenade ngakula mɔɔ anwo yɛ se la.”
^ Hibulu aneɛ nu, “Ye siane ne.”
^ Anzɛɛ “adalɛ nyamenle.”
^ Anzɛɛ “ye atɔfolɛ aguzo.”
