Gyɛlɛmaya 24:1-10
-
Feege kpalɛ nee feege mɔɔ ɛnle kpalɛ (1-10)
24 Mɔɔ Babelɔn Belemgbunli Nɛbukadenɛza vale Gyɛhɔyakem+ ara Gyɛkonaya,*+ Dwuda belemgbunli ne nee Dwuda mgbanyima, dwinvolɛma nee mbulalɛ dwinvolɛma* vile Gyɛlusalɛm hɔle akɛlɛzonlenlɛ nu wɔ Babelɔn la, Gyihova maanle menwunle feege ahɛndɛne nwiɔ wɔ Gyihova ɛzonlenlɛsua ne anyunlu ɛkɛ.+
2 Ɛnee kɛndɛne ko anu feege ne mɔ le kpalɛ bɔkɔɔ, bɛle kɛ feege mɔɔ kɛlimoa kɛbolo la, noko ɛnee kɛndɛne ko ne mɔɔ ɛha la anu feege ɛdeɛ ne ɛnle kpalɛ fee, yemɔti bɛdi a ɔnyɛ boɛ.
3 Akee Gyihova bizale me kɛ: “Gyɛlɛmaya, duzu a ɛnwu ye a?” Ɔti membuale kɛ: “Feege ɔ; feege kpalɛ ne mɔ le kpalɛ bɔkɔɔ, noko mɔɔ ɛnle kpalɛ la, ɛnle kpalɛ fee, yemɔti bɛdi a ɔnyɛ boɛ.”+
4 Akee Gyihova edwɛkɛ ne rale me ɛkɛ ne kɛ:
5 “Mɔɔ Gyihova, Yizilayɛ Nyamenle ne ɛha la ɛne, ‘Kɛ mɔɔ feege kpalɛ ɛhye mɔ de la, zɔhane ala noko a mebabu Dwudama mɔɔ wɔ akɛlɛzonlenlɛ nu, mɔɔ memaanle bɛvile ɛke bɛhɔle Kaledeama azɛlɛ zo la kɛ bɛle kpalɛ a.
6 Mebamaa me nye ahɔ bɛ nwo na meayɛ bɛ boɛ, na meamaa bɛazia bɛara azɛlɛ ɛhye azo.+ Mebava bɛ meazie ɛkɛ, na menrɛbubu bɛ menrɛgua; mebalua bɛ, na menrɛdudu bɛ menrɛgua.+
7 Na mebamaa bɛ ahonle mɔɔ bamaa bɛanwu me, kɛ medame a mele Gyihova a.+ Bɛbayɛ me menli na medame noko meayɛ bɛ Nyamenle,+ ɔluakɛ bɛbava bɛ ahonle kɔsɔɔti bɛazia bɛara me ɛkɛ.+
8 “Mɔɔ Gyihova ɛha la ɛne, ‘Kɛ mɔɔ feege ne mɔ mɔɔ ɛnle kpalɛ fee na yemɔti bɛdi a ɔnyɛ boɛ la de la:+ “Zɔhane ala noko a mebabu Dwuda Belemgbunli Zɛdikaya,+ ye mgbanyima, Gyɛlusalɛmma mɔɔ ɛha wɔ azɛlɛ ɛhye azo nee bɛdabɛ mɔɔ bɛde Yigyibiti azɛlɛ zo la a.+
9 Mebamaa bɛahakyi debie ɛzulolɛ bie nee munzule debie bɛamaa azɛlɛ ye azo arelemgbunlililɛ kɔsɔɔti,+ menli bagua bɛ nyunlu aze, bɛava bɛ bɛabu ɛrɛlɛ, bɛagolo bɛ nwo na bɛawa bɛ amonle+ wɔ ɛleka biala mɔɔ mebabɔ bɛ asande meahɔ la.+
10 Mebava konle dadeɛ,+ ɛhɔne nee ewulenzane*+ meara bɛ nwo zo, kɔkpula kɛ bɛ bo zo babɔ wɔ azɛlɛ ne mɔɔ menvale memaanle bɛ nee bɛ nenyia mɔ la azo.”’”
Ɔbodwɛkɛ
^ Eza bɛfɛlɛ ye Gyɛhɔyakɛn yɛɛ Konaya.
^ Anzɛɛ ɔkola ɔkile, “menli mɔɔ bɛdie bane.”
^ Anzɛɛ “ewule.”
