Gyɛlɛmaya 44:1-30
44 Edwɛkɛ mɔɔ rale Gyɛlɛmaya ɛkɛ mɔɔ fale Dwuuma kɔsɔɔti mɔɔ de Yigyibiti azɛlɛ zo,+ bɛdabɛ mɔɔ bɛde Megedɔlo,+ Tapanehizi,+ Nɔfo,*+ nee Patelɔso azɛlɛ zo+ la anwo la ɛne:
2 Mɔɔ ɛlɔne Gyihova, Yizilayɛ Nyamenle ne ɛha la ɛne, ‘Bɛnwu munzule kɔsɔɔti mɔɔ meva mera Gyɛlusalɛm+ nee Dwuda azuamgbole kɔsɔɔti azo la, na ɛnɛ bɛdɔ mgbane, awie ɛnde ɛkɛ.+
3 Kɛmɔ bɛyɛle ɛtane bɛhanle me ɛya bɛhɔbɔle afɔle+ na bɛzonlenle nyamenle gyɛne mɔɔ bɛdabɛ anzɛɛ bɛ nenyia mɔ ɛnze bɛ la ati ɔ.+
4 Mengɔle zo menzoanle me azonvolɛ ngapezoma kɔsɔɔti wɔ bɛ nwo ɛkɛ, menzoanle bɛ fane dɔɔnwo* kɛ: “Mesɛlɛ bɛ, bɛmmayɛ bɛkyi ninyɛne ɛhye mɔ na mekyi.”+
5 Noko bɛandie yɛɛ bɛanyɛ ɛnzolɛ bɛanzia bɛ nzi bɛanvi bɛ ɛtane ne mɔ anwo na bɛbɔle afɔle bɛmaanle nyamenle gyɛne gyɛne.+
6 Ɔti menwolale me ɛya kpole ne nee me ɛya ne menguale na bɛzɔle bɛyelale Dwuda azuamgbole ne mɔ nee Gyɛlusalɛm awɔdenle ne mɔ, bɛdɔ mgbane na awie ɛnde zo, kɛ mɔɔ bɛde ye ɛnɛ la.’+
7 “Na kɛkala, mɔɔ Gyihova, ɛlɔne Nyamenle, Yizilayɛ Nyamenle ne ɛha la ɛne, ‘Duzu ati a bɛlɛtwehwe munzule kpole bɛara bɛ* nwo zo, bɛamaa Dwuda mrenyia nee mraalɛ, ngakula nee mbɔdɔma kɔsɔɔti abo zo abɔ mɔɔ awie ɛnrɛha ɛ?
8 Duzu ati a bɛfa bɛ sa anloa gyima bɛka me ɛya bɛbɔ afɔle bɛmaa nyamenle gyɛne wɔ Yigyibiti azɛlɛ ne mɔɔ bɛhɔdɛnla zolɛ la azo a? Bɛ bo zo babɔ na menli bawa bɛ amonle na bɛagua bɛ nyunlu aze wɔ maanle maanle kɔsɔɔti mɔɔ wɔ azɛlɛ ye azo la anu.+
9 Bɛ rɛle ɛvi bɛ nenyia mɔ amumuyɛ ne nee Dwuda arelemgbunli amumuyɛ ne+ nee bɛ ye mɔ amumuyɛ ne,+ yɛɛ bɛdabɛ mumua ne bɛ amumuyɛ ne nee bɛ ye mɔ amumuyɛ ne,+ mɔɔ bɛyɛle ye wɔ Dwuda azɛlɛ ne azo nee Gyɛlusalɛm awɔdenle ne mɔ azo la ɔ?
10 Too mɔɔ yeradwu ɛnɛ la, bɛtɛbɛlɛle bɛ nwo aze, bɛtɛsulole me,+ yɛɛ bɛtɛdile me mɛla ne mɔ mɔɔ menvale memaanle bɛ nee bɛ nenyia mɔ la azo.’+
11 “Ɛhye ati mɔɔ ɛlɔne Gyihova, Yizilayɛ Nyamenle ne ɛha la ɛne, ‘Nea, mebɔ kpɔkɛ kɛ mefa munzule meara bɛ nwo zo, meazɛkye Dwuda amuala.
12 Na mebava Dwudama mɔɔ ɛha mɔɔ bɛbɔle kpɔkɛ kɛ bɛkɔ bɛahɔdɛnla Yigyibiti azɛlɛ ne azo la, na bɛ kɔsɔɔti bɛ bo zo babɔ wɔ Yigyibiti azɛlɛ ne azo.+ Konle dadeɛ nee ɛhɔne bahuhu bɛ; ɔvi mɔɔ le ekyi kɔdwu mɔɔ le kpole la anwo zo, bɛbawu wɔ konle dadeɛ nloa nee ɛhɔne nu. Bɛbawa bɛ amonle, bɛbahakyi debie ɛzulolɛ bie, munzule bado bɛ na bɛ nyunlu agua aze.+
13 Mebava konle dadeɛ, ɛhɔne nee ewulenzane meahwe bɛdabɛ mɔɔ bɛde Yigyibiti azɛlɛ ne azo la anzo, kɛ mɔɔ mendwenle Gyɛlusalɛm anzo la.+
14 Na Dwudama mɔɔ ɛha mɔɔ bɛhɔdɛnla Yigyibiti azɛlɛ ne azo la biala ɛnrɛha anzɛɛ ɛnrɛvi nu kɛ ɔsia yeahɔ Dwuda azɛlɛ ne azo. Bɛbahulo* kɛ bɛbazia bɛahɔdɛnla lɔ, noko bɛnrɛzia bɛ nzi, kyesɛ menli ekyi ne mɔɔ bavi ɛsalɛ la ala.’”
15 Mrenyia mɔɔ ze kɛ bɛ ye mɔ bɔ afɔle maa nyamenle gyɛne nee yelɛma mɔɔ ɛnee gyigyi ɛkɛ ne la amuala, menli dɔɔnwo kpalɛ nee menli mɔɔ de Yigyibiti azɛlɛ ne azo+ wɔ Patelɔso+ la amuala, buale Gyɛlɛmaya kɛ:
16 “Yɛnrɛdie edwɛkɛ ne mɔɔ wɔha wɔhile yɛ wɔ Gyihova duma nu la.
17 Emomu, yɛbayɛ edwɛkɛ biala mɔɔ yɛva yɛ nloa yɛha la, yɛabɔ afɔle yɛamaa Anwuma Ɔbahyema* ne na yɛawola afɔlebɔlɛ nza yɛamaa ye,+ kɛ mɔɔ yɛdayɛ, yɛ nenyia mɔ, yɛ arelemgbunli nee yɛ mgbanyima yɛle ye wɔ Dwuda azuamgbole nee Gyɛlusalɛm awɔdenle ne mɔ azo wɔ mekɛ mɔɔ yɛlile aleɛ yɛ ko yile na yɛ nwo dɔle yɛ, mɔɔ yɛannwu munzule biala la.
18 Ɔvi mekɛ mɔɔ yɛgyakyile kɛ yɛbabɔ afɔle yɛamaa Anwuma Ɔbahyema* ne na yɛawola afɔlebɔlɛ nza yɛamaa ye la, yɛhyia debie biala anwo yɛɛ yɛwu konle dadeɛ nloa nee ɛhɔne nu.”
19 Mraalɛ ne mɔ vale zɔle zolɛ kɛ: “Na mekɛ mɔɔ yɛlɛbɔ afɔle yɛamaa Anwuma Ɔbahyema* ne na yɛawola afɔlebɔlɛ nza yɛamaa ye la, asoo yɛ hu mɔ anlie ando nu kɛ yɛyɛ afɔlebɔlɛ keeki mɔɔ le ye sɔhovolɛ la na yɛwola afɔlebɔlɛ nza yɛmaa ye ɔ?”
20 Akee Gyɛlɛmaya hanle hilele menli ne amuala, mrenyia ne mɔ nee bɛ ye mɔ yɛɛ menli mɔɔ bɛ nee ye dendɛle la amuala kɛ:
21 “Afɔle ne mɔ mɔɔ bɛ nenyia mɔ, bɛ arelemgbunli, bɛ mgbanyima nee menli mɔɔ wɔ azɛlɛ ne azo la bɔle ye wɔ Dwuda azuamgbole nee Gyɛlusalɛm awɔdenle ne mɔ azo la+—Gyihova hakyele na bɛrale ye ahonle nu!
22 Ɛnee akee Gyihova ɛngola ɛnnyia bɛ nwo abotane bieko wɔ bɛ ninyɛndane nee bɛkyi ninyɛne mɔɔ bɛyɛle la anwo, na bɛ azɛlɛ ne dɔle mgbane, ɔhakyile debie ɛzulolɛ bie nee amowa, awie andɛnla ɛkɛ, kɛ mɔɔ ɔde ye ɛnɛ la.+
23 Kɛmɔ bɛbɔle afɔle ɛhye mɔ na bɛyɛle ɛtane bɛtiale Gyihova na bɛandie Gyihova ane yɛɛ bɛanli ye mɛla ne mɔ nee ye ngakyelɛ ne mɔ azo la ati a, munzule ɛhye ɛdo bɛ kɛ mɔɔ ɔde ye ɛnɛ la a.”+
24 Gyɛlɛmaya doale zo zele menli ne amuala nee mraalɛ ne mɔ amuala kɛ: “Bɛmɛ Dwudama mɔɔ bɛwɔ Yigyibiti azɛlɛ zo la kɔsɔɔti, bɛdie Gyihova edwɛkɛ.
25 Mɔɔ ɛlɔne Gyihova, Yizilayɛ Nyamenle ne ɛha la ɛne, ‘Mɔɔ bɛ nee bɛ ye mɔ ɛva bɛ nloa ɛha la, bɛva bɛ sa bɛyɛ, ɔluakɛ bɛhanle kɛ: “Yɛbali yɛ ɛwɔkɛ mɔɔ yɛbɔ la azo yɛabɔ afɔle yɛamaa Anwuma Ɔbahyema* ne na yɛawola afɔlebɔlɛ nza yɛamaa ye.”+ Bɛmɛ mraalɛ, bɛbali bɛ ɛwɔkɛ ne mɔ azo na bɛaye bɛ ɛwɔkɛ ne mɔ.’
26 “Ɛhye ati bɛmɛ Dwudama mɔɔ bɛde Yigyibiti azɛlɛ ne ɛleka biala la, bɛdie Gyihova edwɛkɛ: “Nea, mefa medame mumua ne me duma kpole ne meka ndane,” Gyihova a se a, “kɛ Dwudanli biala mɔɔ de Yigyibiti azɛlɛ ne kɔsɔɔti azo la ɛnrɛva me duma ɛnrɛha ndane bieko kɛ,+ ‘Mekɛ ala mɔɔ Tumivolɛ Awulae Gyihova de aze la!’+
27 Kɛkala, melɛnea bɛ nwo zo kɛ memaa munzule ado bɛ na tɛ debie kpalɛ ɔ;+ konle dadeɛ nee ɛhɔne babɔ Dwuda mrenyia mɔɔ wɔ Yigyibiti azɛlɛ ne azo la kɔsɔɔti abo zo, kɔkpula kɛ bɛ bo zo babɔ bɔkɔɔ.+
28 Menli ekyi bie a ɛnrɛwu konle dadeɛ nloa mɔɔ bɛbavi Yigyibiti azɛlɛ ne azo bɛazia bɛahɔ Dwuda azɛlɛ ne azo a.+ Akee Dwudama mɔɔ ɛha mɔɔ bɛradɛnlanle Yigyibiti azɛlɛ ne azo la amuala banwu awie mɔɔ ye edwɛkɛ le nɔhalɛ la, medame anzɛɛ bɛdabɛ!”’”
29 “‘Ɛhye a bayɛ bɛ sɛkɛlɛneɛ a,’ Gyihova a se a, ‘kɛ mebahwe bɛ nzo wɔ ɛke, amaa bɛanwu kɛ me edwɛkɛ ne mɔɔ menganle kɛ munzule bado bɛ la bayɛ nɔhalɛ amgba.
30 Mɔɔ Gyihova ɛha la ɛne: “Nea, melɛye Falo Hɔfela, Yigyibiti belemgbunli ne meamaa ye kpɔvolɛma nee menli mɔɔ kpondɛ ye ahu ye* la, kɛ mɔɔ menyele Dwuda Belemgbunli Zɛdikaya memaanle ye kpɔvolɛ Babelɔn Belemgbunli Nɛbukadenɛza mɔɔ ɛnee ɛlɛkpondɛ ye ahu ye* la.”’”+
Ɔbodwɛkɛ
^ Anzɛɛ “Mɛmefese.”
^ Hibulu aneɛ nu, “medwazo ndɛ na mesoa bɛ.”
^ Anzɛɛ “bɛ ɛkɛla.”
^ Anzɛɛ “Bɛ ɛkɛla bɛahulo.”
^ Ɔle nyamenle raalɛ bie mɔɔ Yizilayɛma mɔɔ ɛnee ɛkpɔkye la sonle ye la amodinli; ɔkola ɔkile awolɛ nyamenle raalɛ.
^ Ɔle nyamenle raalɛ bie mɔɔ Yizilayɛma mɔɔ ɛnee ɛkpɔkye la sonle ye la amodinli; ɔkola ɔkile awolɛ nyamenle raalɛ.
^ Ɔle nyamenle raalɛ bie mɔɔ Yizilayɛma mɔɔ ɛnee ɛkpɔkye la sonle ye la amodinli; ɔkola ɔkile awolɛ nyamenle raalɛ.
^ Anzɛɛ “ye ɛkɛla.”
^ Anzɛɛ “ye ɛkɛla.”
