Gyɛlɛmaya 8:1-22
8 Kɛ Gyihova se la ɛne, “mekɛ zɔhane, bɛbasesa Dwuda arelemgbunli mbowule, mgbanyima mbowule, ɛsɔfoma mbowule, ngapezoma mbowule nee menli mɔɔ de Gyɛlusalɛm la mbowule bɛavi bɛ nla ne mɔ anu.
2 Bɛbadɛlɛdɛlɛ nu bɛahile sɛnzɛne ne, siane ne nee anwuma ɛlɔne kɔsɔɔti mɔɔ bɛhulole bɛ, bɛzonlenle bɛ, bɛlile bɛ nzi, bɛkpondɛle bɛ na bɛbɔle bɛ ti aze bɛmaanle bɛ la.+ Bɛnrɛboɔboa bɛ nloa yɛɛ bɛnrɛzie bɛ. Bɛbayɛ kɛ nyɛmoa ebinli la wɔ azɛlɛ ne azo.”+
3 “Na abusua ɛtane ɛhye anu amra mɔɔ kɛha la bahulo ewule adɛla ngoane wɔ ɛleka biala mɔɔ mebabɔ bɛ asande meahɔgua la,” ɛlɔne Gyihova a se a.
4 “Na ka kile bɛ kɛ, ‘Mɔɔ Gyihova ɛha la ɛne:
“Bɛgua aze a bɛnrɛdwazo bieko ɔ?
Saa sonla ko sia ɔ nzi a, asoo ko ne noko ɛnrɛzia ɔ nzi ɔ?
5 Duzu ati a menli ɛhye mɔ, Gyɛlusalɛmma, ɛnli nɔhalɛ fee ɛ?
Bɛdi mɛlɛbɛla nzi ɛsesebɛ;Bɛngulo kɛ bɛsia bɛ nzi.+
6 Menyɛle ɛnzolɛ na mendiele, noko kɛzi bɛdendɛle la ɛnle kpalɛ.
Sonla ko bɔbɔ annu ɔ nwo wɔ ye amumuyɛ nwo anzɛɛ ambiza kɛ, ‘Duzu a meyɛ la?’+
Bɛ nuhua ko biala yɛ mɔɔ menli dɔɔnwo ne ɛlɛyɛ la bie, kɛ ɛkpɔnwɔ mɔɔ ɛlɛnriandi ahɔ konle la.
7 Akoso mɔɔ lua anwomanyunlu bɔbɔ la ze ye mekɛ;Abubule nee nyamenleakatiba nee kɔtɔkpɔle* ze mekɛ mɔɔ ɔwɔ kɛ bɛsia bɛba la.
Noko me menli ne ɛnde Gyihova ndɛnebualɛ ne abo.”’+
8 ‘Kɛzi bɛkola bɛka kɛ: “Yɛze nrɛlɛbɛ, yɛɛ yɛlɛ Gyihova mɛla* ne ɛ”?
Nɔhalɛ nu, kɛlɛhɛlɛvolɛma ɛva bɛ adalɛ pɛne ne+ ɛhɛlɛ adalɛ edwɛkɛ ngome.
9 Nrɛlɛbɛvolɛma anyunlu ɛgua aze.+
Ɛzulolɛ ɛha bɛ na bɛbahye bɛ.
Bɛnlea! Bɛkpo Gyihova edwɛkɛ ne,Na duzu nrɛlɛbɛ a bɛze a?
10 Ɔti mebava bɛ ye mɔ meamaa mrenyia gyɛne,Bɛ ɛya ne mɔ meamaa awie mɔ gyɛne;+Ɔluakɛ ɔvi mɔɔ le ekyi kɔdwu mɔɔ le kpole la anwo zo, awie biala ɛlɛkpondɛ nvasoɛ ɛtane;+Ɔvi ngapezonli nwo zo kɔdwu ɛsɔfo nwo zo, awie biala ɛlɛsisi ɔ gɔnwo.+
11 Bɛmmiemia me menli ne nganlɛ ne mɔ boɛ, na bɛka kɛ,“Anzodwolɛ wɔ ɛkɛ! Anzodwolɛ wɔ ɛkɛ!”
Wɔ mekɛ mɔɔ anzodwolɛ biala ɛnle ɛkɛ ne la.+
12 Asoo ɔyɛle bɛ nyiane kɛ bɛyɛle bɛkyi ninyɛne la?
Yeanyɛ bɛ nyiane fee!
Bɛnze nyiane deɛ holɛ!+
Ɔti bɛbaboka menli mɔɔ ɛgua aze la anwo bɛagua aze.
Saa metwe bɛ nzo a bɛbatele bɛadɔ aze,’+ Gyihova a se a.
13 ‘Saa meboɔboa bɛ nloa a, mebazɛkye bɛ,’ Gyihova a se a.
‘Bɛnrɛgyakyi vanye ma wɔ vanye zo, yɛɛ bɛnrɛgyakyi feege ma wɔ feege baka zo, na nya ne mɔ banwosonwoso.
Na mɔɔ menvale memaanle bɛ la bavi bɛ sa.’”
14 “Duzu ati a yɛde ɛke a?
Bɛmaa yɛboɔboa yɛ nloa yɛhɔ azuamgbole mɔɔ bɛlie nwolɛ bane la azo+ na yɛwu wɔ ɛkɛ.
Ɔluakɛ Gyihova yɛ Nyamenle ne baye yɛ avi ɛkɛ,Na yemaa yɛ nzule mɔɔ pɔezen wɔ nu la kɛ yɛnlo,+Ɔluakɛ yɛyɛ ɛtane yɛtia Gyihova.
15 Ɛnee yɛ nye la anzodwolɛ ade, noko debie kpalɛ amba,Ɛnee yɛlɛkpondɛ ayileyɛlɛ, noko ɛzulolɛ a rale a!+
16 Bɛte kpɔvolɛ ne mgbɔnwɔ ne mɔ abonyi nu anwoma wɔ Dan.
Ye mgbɔnwɔ nyinli ne mɔ tea nu a,Azɛlɛ ne kɔsɔɔti woso.
Bɛba na bɛsɛkye azɛlɛ ne nee debie biala mɔɔ wɔ zo la,Suakpole ne nee menli mɔɔ dede zo la.”
17 “Nea, melɛsoa nwɔlɛ wɔ bɛ avinli,Nwɔlɛ anwo ɛzulolɛ mɔɔ awie ɛngola bɛ sili kye la,Na bɛbakeka bɛ,” Gyihova a se a.
18 Me alɔbɔlɛlilɛ ɛnlɛ ye ayile;Me ahonle ɛnde kpɔkɛ.
19 Bɛte me menli ne ane kɛ bɛlɛsu bɛakpondɛ moalɛWɔ azɛlɛ mɔɔ wɔ moamoa la azo kɛ:
“Gyihova ɛnle Zayɔn ɔ?
Anzɛɛ ye belemgbunli ne ɛnle ye nu ɔ?”
“Duzu ati a bɛva bɛ ananze ne mɔNee bɛ nyamenle gyɛne gyɛne mɔɔ nvasoɛ ɛnle bɛ nwo zo la bɛha me ɛya ɛ?”
20 “Ma ɛdelɛ mekɛ ne ɛpɛ nu, wawaa ne ɛra ye awieleɛ,Noko bɛtɛdiele yɛ ngoane!”
21 Me menli ne ɛzɛkyelɛ ne ati, me nwo ɛbubu me;+Me rɛle ɛbɔ.
Ɛzulolɛ ɛha me.
22 Asoo balesam* biala ɛnle Geleade?+
Anzɛɛ ayileyɛvolɛ biala ɛnle ɛkɛ ɔ?+
Duzu ati a me menli ne ɛtɛtele kpɔkɛ a?+
Ɔbodwɛkɛ
^ Anzɛɛ ɔkola ɔkile, “azuazuanloma.”
^ Anzɛɛ “adehilelɛ.”
^ Anzɛɛ “ayile mɔɔ bɛfa bɛkpokpa la.”
