Gyɛnɛsese 25:1-34
25 Ebileham gyale raalɛ bieko, bɛfɛlɛ ye Kɛtula.
2 Nzinlii ɔ nee ye wole Zemelan, Dwɔkohyan, Midan, Medean,+ Yehyebake yɛɛ Hyuaa.+
3 Dwɔkohyan wole Hyiba nee Didan.
Didan amra a le Ahyulem, Lɛtuhyem yɛɛ Lɛamem.
4 Medean amra a le Yifaa, Yifɛ, Heenɔko, Abaeda yɛɛ Ɛledeeya.
Ɛhye mɔ amuala le Kɛtula amra.
5 Nzinlii Ebileham vale debie biala mɔɔ ɔlɛ la maanle Ayezeke,+
6 noko Ebileham vale ahyɛlɛdeɛ maanle ye nwewe* ne mɔ amra mrenyia ne mɔ. Na mɔɔ ɛnee ɔtɛwule la, ɔmaanle bɛbɔle bɛ ti wɔ aduduleɛ nehane, bɛhwenle bɛ nwo bɛvile ɔ ra Ayezeke anwo+ bɛhɔle Aduduleɛ azɛlɛ zo.
7 Ebileham dɛnlanle aze lile ɛvolɛ 175.
8 Akee Ebileham gule ye ɛnwomenle mɔɔ li awieleɛ na ɔwule mɔɔ ɛnee yeyɛ kpanyinli kpalɛ, ɔyɛle ɛrelera na ɔ kunlu dwole ɔ nwo, na bɛziele ye kɛ ye menli ne la.*
9 Ɔ mra mrenyia Ayezeke nee Yehyemɛle ziele ye wɔ Makepilaa bolɛ bɔne ne anu, wɔ Hɛtenli Zohaa ara nrenyia Yifolɔn azɛlɛ ne mɔɔ la Mameli anyunlu la azo,+
10 azɛlɛ ne mɔɔ Ebileham dɔle vile Hɛtema ɛkɛ ne la. Ɛkɛ ne a bɛziele Ebileham nee ɔ ye Sɛla a.+
11 Ebileham wule la anzi, Nyamenle hɔle zo yilale Ayezeke,+ na Ayezeke dɛnlanle ɛleka mɔɔ bikye Biyɛ-leehae-lɔe.+
12 Ebileham ara Yehyemɛle+ mɔɔ ɔ nee Yigyibitinli Heega,+ Sɛla sonvolɛ ne, wole ye la anwo tetedwɛkɛ ɛne.
13 Yehyemɛle amra mrenyia ne mɔ aluma nee ɛleka mɔɔ bɛ mbusua ne mɔ abo vi la ɛne: Yehyemɛle ara kpanyinli a le Nɛbeeyɔto,+ akee Kidaa,+ Adebili, Mebesam,+
14 Mehyema, Dumaa, Masa,
15 Heedade, Tima, Gyitɛ, Neefehye yɛɛ Kɛdɛma.
16 Yehyemɛle amra mrenyia ne mɔ aluma ɛne, kɛ mɔɔ ɛleka mɔɔ bɛdɛnlanle nee bɛ azokoɛleɛ* kile la, bɛle mbusua mgbanyinli 12 kɛ mɔɔ bɛ mbusua ne mɔ de la.+
17 Yehyemɛle dɛnlanle aze lile ɛvolɛ 137. Ɔgule ye ɛnwomenle mɔɔ li awieleɛ na ɔwule, na bɛziele ye kɛ ye menli ne la.*
18 Na bɛdɛnlanle Havelaa+ mɔɔ bikye Hyɔɔ,+ mɔɔ wɔ Yigyibiti anwo ɛkɛ la too kɔdwu Aselea. Ɔdɛnlanle ɔbikyele ɔ mediema ne mɔ kɔsɔɔti.*+
19 Ebileham ara Ayezeke anwo tetedwɛkɛ ɛne.+
Ebileham wole Ayezeke.
20 Ayezeke lile ɛvolɛ 40 la yɛɛ ɔgyale Elamenli Bɛtuwɛle mɔɔ de Padan-elam la ara raalɛ Relebɛka a.+ Ɔle Elamenli Leeban adiema raalɛ.
21 Na Ayezeke hɔle zo zɛlɛle Gyihova maanle ɔ ye ɔluakɛ ɛnee ɔle mota; yemɔti Gyihova diele ye nzɛlɛlɛ na ɔ ye Relebɛka nrenzɛle.
22 Na ngakula ne mɔ mɔɔ gua ɔ kunlu la bɔle ɔ bo kɛ bɛko,+ ɔti ɔhanle kɛ: “Saa zɛhae a ɔde a, ɛnee duzu ati a ɔwɔ kɛ mekɔ zo metɛnla ngoane nu a?” Yemɔti ɔbizale Gyihova nwolɛ edwɛkɛ.
23 Na Gyihova zele ye kɛ: “Maanle nwiɔ a wɔ ɛ kunlu a,+ yɛɛ menli nwiɔ bavi ɛ kunlu avinde na bɛ avinli bakpakye;+ na maanle ko anwo bayɛ se adɛla ko ne,+ yɛɛ kpanyinli ne bazonle ekyi ne.”+
24 Mɔɔ ɔ ko hanle ye la, nea! ɛnee ndalɛ a wɔ ɔ kunlu a.
25 Kpanyinli ne vindele la, ɛnee ɔle kɔkɔlɛ yɛɛ ɔ nwo le enrinli ngome,*+ yemɔti bɛdonle ye Yisɔ.*+
26 Ɛhye anzi, ɔ diema ne vindele na ɛnee ɔlɛ Yisɔ agyakɛ anzi,+ yemɔti ɔdonle ye Gyekɔbo.*+ Relebɛka wole bɛ la ɛnee Ayezeke ɛli ɛvolɛ 60.
27 Mɔɔ ngakula ne mɔ ɛlɛnyi la, Yisɔ nwunle ɛbɔlɛ di kpalɛ,+ yɛɛ ɛnee ɔkɔ ɛbɔ nu, noko Gyekɔbo ɛdeɛ ɛnee edwɛkɛ biala ɛnle ɔ nwo yɛɛ ɔde ɛdanlɛ azua nu.+
28 Ayezeke hulole Yisɔ ɔluakɛ ɛnee ɔmaa ɔnyia ɛbɔ nu nane ɔdi yɛɛ Relebɛka noko hulole Gyekɔbo.+
29 Kenle ko bie ɛnee Gyekɔbo ɛlɛyɛ sutulu na Yisɔ vi ɛbɔ nu rale la ɛnee yevɛ.
30 Ɔti Yisɔ zele Gyekɔbo kɛ: “Mesɛlɛ wɔ, maa me wɔ sutulu kɔkɔlɛ ne bie* ndɛndɛ ɔluakɛ mewie fɛ!”* Ɛhye ati a bɛvɛlɛle ye Yidɔm* la.+
31 Ɔti Gyekɔbo zele ye kɛ: “Dimoa tɔne wɔ awolɛ kpanyinli gyinlabelɛ ne maa me!”+
32 Na Yisɔ doale zo kɛ: “Asɛɛ mewu! Duzu a mefa awolɛ kpanyinli gyinlabelɛ ne meayɛ a?”
33 Na Gyekɔbo zele ye kɛ: “Dimoa ka ndane kile me!” Yemɔti ɔhanle ndane ɔhilele ye na ɔdɔnenle ye awolɛ kpanyinli gyinlabelɛ ne ɔmaanle Gyekɔbo.+
34 Akee Gyekɔbo maanle Yisɔ paano nee aluba sutulu na ɔlile na ɔnlonle na ɔdwazole ɔhɔle. Ɛhye ati Yisɔ ambu awolɛ kpanyinli gyinlabelɛ ne bie.
Ɔbodwɛkɛ
^ Hibulu aneɛ nu, “na bɛvale ye bɛhɔbokale ye menli ne anwo.”
^ Anzɛɛ “bɛ azokoɛleɛ mɔɔ bɛlie nwolɛ bane.”
^ Hibulu aneɛ nu, “na bɛvale ye bɛhɔbokale ye menli ne anwo.”
^ Anzɛɛ ɔkola ɔkile, “Ɔdwazole ɔtiale ɔ mediema ne mɔ amuala.”
^ Hibulu aneɛ nu, “ɔ nwo le kɛ tɛladeɛ mɔɔ bɛva enrinli bɛnwo la.”
^ Ɔ bo kile “Ɔ Nwo Le Enrinli.”
^ Ɔ bo kile “Awie Mɔɔ Sɔ Bɛ Gyakɛ Anzi; Ɔdie Awie Gyinlabelɛ.”
^ Anzɛɛ “maa me bie menli.”
^ Anzɛɛ “ɔluakɛ ɛhɔne ɛlɛku me.”
^ Ɔ bo kile “Kɔkɔlɛ.”
