Lɛvitikɔso 1:1-17
-
Ɛyelalɛ afɔlebɔlɛ (1-17)
1 Gyihova vi nyianu ɛdanlɛsua ne anu vɛlɛle Mosisi+ na ɔzele ye kɛ:
2 “Tendɛ kile Yizilayɛma* na ka kile bɛ kɛ, ‘Saa bɛ nuhua bie kulo kɛ ɔfa ayɛmoa ɔbɔ afɔle ɔmaa Gyihova a, ɔva ɛnlankɛ anzɛɛ boane anzɛɛ abɔnkye.+
3 “‘Saa ɛnlankɛ a ɔfa yeabɔ ɛyelalɛ afɔle ne a, ɔwɔ kɛ ɔfa nyinli mɔɔ te kpɔkɛ la.+ Ɔwɔ kɛ ɔfi ye ɛhulolɛ nu+ ɔfa ɔba Gyihova anyunlu wɔ nyianu ɛdanlɛsua ne anuhɔlɛ.
4 Ɔwɔ kɛ ɔfa ɔ sa ɔto ɛyelalɛ afɔlebɔdeɛ ne ati zo, na bɛbalie bɛado nu kɛ ɔle ɔ ti mgbɔdalɛ.
5 “‘Akee ɔwɔ kɛ bɛku ɛnlankɛ ralɛ ne wɔ Gyihova anyunlu na Aalɔn amra ɛsɔfo ne mɔ+ fa mogya ne kponde afɔlemokyea ne+ mɔɔ wɔ nyianu ɛdanlɛsua ne anuhɔlɛ ne la anwo amuala.
6 Ɔwɔ kɛ bɛye ɛyelalɛ afɔlebɔdeɛ ne anwo nwoma ne na bɛpepɛ ye azinli azinli.+
7 Ɔwɔ kɛ Aalɔn amra ɛsɔfo ne mɔ wuda senle wɔ afɔlemokyea ne azo+ na bɛfa ɛyɛne bɛgua zo.
8 Aalɔn amra ɛsɔfo ne mɔ bava nane azinli ne mɔ,+ tile ne nee ɛnlome ne* agua ɛyɛne ne mɔɔ wɔ senle ne anu la azo wɔ afɔlemokyea ne azo.
9 Bɛbava nzule bɛawowo ye anyalɛ ne nee ɔ gyakɛ ne mɔ anwo, na ɛsɔfo ne bamaa ɔ muala akpu wɔ afɔlemokyea ne azo kɛ ɛyelalɛ afɔlebɔdeɛ, afɔlebɔlɛ evuanlɛ mɔɔ Gyihova anye die nwolɛ*+ mɔɔ bɛva senle bɛbɔ la.
10 “‘Saa boaneralɛ+ anzɛɛ abɔnkye a ɔfa yeabɔ ɛyelalɛ afɔle ne a, ɔwɔ kɛ ɔfa nyinli mɔɔ te kpɔkɛ la.+
11 Ɔwɔ kɛ bɛku ye wɔ afɔlemokyea ne sɔlɔ afoa nu wɔ Gyihova anyunlu na Aalɔn amra ɛsɔfo ne mɔ fa ye mogya ne kponde afɔlemokyea ne anwo amuala.+
12 Ɔbapepɛ ye azinli azinli, na yeava tile ne nee ɛnlome ne* yeaboka nwo, na ɛsɔfo ne bava agua ɛyɛne ne mɔɔ wɔ senle ne anu la azo wɔ afɔlemokyea ne azo.
13 Ɔbava nzule yeawowo ye anyalɛ ne nee ɔ gyakɛ ne mɔ anwo, na ɛsɔfo ne bayela ɔ muala wɔ afɔlemokyea ne azo. Ɔle ɛyelalɛ afɔlebɔdeɛ, afɔlebɔlɛ evuanlɛ mɔɔ Gyihova anye die nwolɛ* mɔɔ bɛva senle bɛbɔ la.
14 “‘Noko saa ɔfa nloma yeabɔ ɛyelalɛ afɔle yeamaa Gyihova a, ɔbava abubule anzɛɛ mɔlɔnoma mralɛ.+
15 Ɛsɔfo ne bava ahɔ afɔlemokyea ne anwo na yeapɛ ɔ komenzia, na yeayela ye wɔ afɔlemokyea ne azo, noko ɔwɔ kɛ ɔmaa ye mogya ne twi gua afɔlemokyea ne foa ko.
16 Ɔwɔ kɛ ɔye ye toku ne na ɔtudu ye ndɛkɛ ne na ɔfuandi ɔgua afɔlemokyea ne anwo wɔ aduduleɛ afoa nu, ɛleka mɔɔ bɛgua nzonle*+ ne la.
17 Ɔbazɔ ɔ ndɛba ne mɔ anu yeakpakye nu, noko ɔnrɛhyɛ nuhua nwiɔ. Akee ɛsɔfo ne bayela ye wɔ afɔlemokyea ne azo wɔ ɛyɛne ne mɔɔ wɔ senle ne anu la azo. Ɔle ɛyelalɛ afɔlebɔdeɛ, afɔlebɔlɛ evuanlɛ mɔɔ Gyihova anye die nwolɛ* mɔɔ bɛva senle bɛbɔ la.
Ɔbodwɛkɛ
^ Hibulu aneɛ nu, “Yizilayɛ amra mrenyia ne mɔ.”
^ Anzɛɛ “ɛnlome ne mɔɔ wɔ kilenzia ne anwo la.”
^ Hibulu aneɛ nu, “ɔ kunlu dwo nwolɛ.”
^ Anzɛɛ “ɛnlome ne mɔɔ wɔ kilenzia ne anwo la.”
^ Hibulu aneɛ nu, “akunlu dwo nwolɛ.”
^ Anzɛɛ “ɛnlome nzonle,” ɛhye kile, nzonle mɔɔ nane mɔɔ bɛva bɛbɔ afɔle la ɛnlome ɛfonla ye la.
^ Hibulu aneɛ nu, “akunlu dwo nwolɛ.”
