Lɛvitikɔso 10:1-20
10 Nzinlii Aalɔn amra Needabe nee Abaehu+ vale bɛ senlevalɛ ahyɛnze ne mɔ na bɛguale senle nu na bɛvale ayilevuanlɛ+ bɛguale zolɛ. Akee bɛvale senle mɔɔ tia mɛla la+ bɛbɔle afɔle wɔ Gyihova anyunlu wɔ mekɛ mɔɔ yeanga kɛ bɛyɛ zɔ la.
2 Na senle vi Gyihova ɛkɛ rayelale bɛ,+ yemɔti bɛwule Gyihova anyunlu ɛkɛ.+
3 Akee Mosisi zele Aalɔn kɛ: “Edwɛkɛ mɔɔ Gyihova ɛha la ɛne, ‘Ɔwɔ kɛ menli mɔɔ bikye me la nwu kɛ mele nwuanzanwuanza,+ na bɛwula me anyunlunyia wɔ menli kɔsɔɔti anyunlu.’” Na Aalɔn yɛle koonwu.
4 Ɔti Mosisi vɛlɛle Aalɔn papa adiema Ɛzeɛle+ amra Mehyeeyɛle nee Ɛlezeefan na ɔzele bɛ kɛ: “Bɛrɛla bɛraye bɛ mediema ne mɔ bɛvi ɛleka nwuanzanwuanza ne anyunlu bɛhɔ azokoɛleɛ ne anzi lɔ.”
5 Yemɔti bɛrayele bɛ mɔɔ ɛnee bɛwulowula bɛ adɛladeɛ ndendenle ne mɔ la bɛhɔle azokoɛleɛ ne anzi lɔ, kɛ mɔɔ Mosisi hanle hilele bɛ la.
6 Akee Mosisi zele Aalɔn nee ɔ mra mrenyia ne mɔ mɔɔ ɛha la, Ɛlieza nee Yetamaa kɛ: “Bɛmmamaa bɛ ti zo yɛ sesakaa yɛɛ bɛmmasuosua bɛ adɛladeɛ nu,+ amaa bɛanwu na Nyamenle anva menli ne amuala anwo ɛya. Bɛ mediema Yizilayɛma bazu menli mɔɔ Gyihova ɛva senle ne ɛhu bɛ la.
7 Bɛmmafi nyianu ɛdanlɛsua ne anuhɔlɛ bɛkɔ ɛleka biala, anrɛɛ bɛkɛwu, ɔluakɛ Gyihova ɛkpokpalɛ nwole ne wɔ bɛ nwo zo.”+ Yemɔti bɛyɛle mɔɔ Mosisi hanle la.
8 Akee Gyihova zele Aalɔn kɛ:
9 “Mekɛ biala mɔɔ ɛ nee ɛ mra mrenyia ne mɔ ɛlɛkɔ nyianu ɛdanlɛsua ne anu la, bɛmmano nwanye+ anzɛɛ nza biala amaa bɛanwu. Ɔle mɛla mɔɔ bɛbali zo dahuu wɔ bɛ awolɛndoazo kɔsɔɔti anu a.
10 Ɛhye bamaa bɛanwu ngakyile mɔɔ wɔ debie mɔɔ le nwuanzanwuanza nee debie mɔɔ anwo ɛgua evinli yɛɛ debie mɔɔ anwo te nee mɔɔ anwo ɛnde la avinli,+
11 na bɛahilehile Yizilayɛma mɛla kɔsɔɔti mɔɔ Gyihova ɛlua Mosisi anwo zo ɛva ɛmaa la.”+
12 Akee Mosisi zele Aalɔn nee Ɛlieza yɛɛ Yetamaa, ɔ mra mrenyia ne mɔɔ ɛha la kɛ: “Bɛva ma afɔlebɔdeɛ ne mɔɔ bɛva senle bɛbɔ bɛmaa Gyihova mɔɔ ɛha la na bɛli ye kɛ paano mɔɔ mgbɔvonle ɛnle nu la wɔ afɔlemokyea ne anwo,+ ɔluakɛ ɔle debie nwuanzanwuanza kpalɛ.+
13 Bɛli ye wɔ ɛleka mɔɔ le nwuanzanwuanza la,+ ɔluakɛ ɔle ɛdawɔ nee ɛ mra ne mɔ kyɛfoa mɔɔ bɛye bɛvi afɔle mɔɔ bɛva senle bɛbɔ bɛmaa Gyihova la anu bɛmaa bɛ a, ɔluakɛ mɔɔ bɛha bɛhile me la ɛne.
14 Eza ɛdawɔ nee ɛ mra mrenyia yɛɛ ɛ mra mraalɛ ne mɔ+ bali nane ne akɛnra ne mɔɔ bɛdo ye ehono la yɛɛ egyakɛ ne mɔɔ le afɔlebɔdeɛ nwuanzanwuanza ne la+ wɔ ɛleka mɔɔ le bɔkɔbɔkɔ la, ɔluakɛ bɛye ninyɛne ɛhye mɔ bɛvi Yizilayɛma anzodwolɛ afɔlebɔdeɛ ne mɔ anu bɛmaa ɛdawɔ nee ɛ mra mrenyia ne mɔ kɛ bɛ kyɛfoa.
15 Bɛbava egyakɛ ne mɔɔ le afɔlebɔdeɛ nwuanzanwuanza ne nee nane ne akɛnra ne mɔɔ bɛdo ye ehono la bɛaboka ɛnlome ne mɔɔ bɛva senle bɛyela bɛbɔ afɔle la anwo bɛara, amaa bɛado ye ehono wɔ Gyihova anyunlu; na ɔbayɛ ɛdawɔ nee ɛ mra mrenyia ne mɔ kyɛfoa dahuu,+ kɛ mɔɔ Gyihova ɛha la.”
16 Na Mosisi kpondɛle abɔnkye ne mɔɔ bɛvale bɛbɔle ɛtane afɔle ne la kpalɛ,+ na ɔnwunle kɛ bɛyela ye. Yemɔti ɔvale Aalɔn amra mrenyia ne mɔ mɔɔ ɛha, Ɛlieza nee Yetamaa anwo ɛya na ɔhanle kɛ:
17 “Duzu ati a bɛanli ɛtane afɔlebɔdeɛ ne wɔ ɛleka nwuanzanwuanza ne ɛ?+ Ɔluakɛ ɔle debie nwuanzanwuanza kpalɛ yɛɛ yeva yemaa bɛ, amaa bɛali menli ne ɛtane ne anwo ɛzonle na bɛali bɛ ti mgbɔdalɛ wɔ Gyihova anyunlu.
18 Nea! Bɛanva mogya ne bɛamba ɛleka nwuanzanwuanza ne.+ Anrɛɛ ɔwɔ kɛ bɛdi ye wɔ ɛleka nwuanzanwuanza ne, kɛ mɔɔ ɔhanle ɔhilele me la.”
19 Aalɔn buale Mosisi kɛ: “Nea! Ɛnɛ bɛvale bɛ ɛtane afɔlebɔdeɛ nee bɛ ɛyelalɛ afɔlebɔdeɛ bɛrale Gyihova anyunlu,+ noko nea edwɛkɛ mɔɔ ɛdo me la. Saa menlile ɛtane afɔlebɔdeɛ ne ɛnɛ a, anrɛɛ Gyihova anye balie nwo ɔ?”
20 Mɔɔ Mosisi dele ɛhye la, ɔ kunlu dwole.
