Lɛvitikɔso 14:1-57
14 Gyihova doale zo zele Mosisi kɛ:
2 “Mɛla mɔɔ kokobɛvolɛ bali zo wɔ kenle mɔɔ ɔbade ɔ nwo, wɔ mekɛ mɔɔ ɔwɔ kɛ bɛfa ye bɛba ɛsɔfo ne ɛkɛ+ la ɛne.
3 Ɛsɔfo ne bahɔ azokoɛleɛ ne anzi lɔ na yeanleɛnlea ɔ nwo. Saa kokobɛ ne ɛhɔ a,
4 ɛsɔfo ne bamaa yeava nloma mɔɔ anwo te la nwiɔ anyewɔzo, sida baka, ɛdanlɛ kɔkɔlɛ yɛɛ nyinlanyinla yeara kɛ ɔfa yeade ɔ nwo.+
5 Ɛsɔfo ne bamaa bɛahu aloma ne ko wɔ buakɛ mɔɔ nzukpa wɔ nu la azo.
6 Noko ɔwɔ kɛ ɔfa aloma anyewɔzo ne nee sida baka ne, ɛdanlɛ kɔkɔlɛ ne nee nyinlanyinla ne ɔbɔ aloma ne mɔɔ bɛhunle ye wɔ nzukpa ne azo la mogya ne anu.
7 Akee ɔbava yeakponde ahenle mɔɔ ɛlɛte ɔ nwo avi kokobɛ ne anwo la anwo fane nsuu na yeaha kɛ ɔ nwo te, na yeagyakyi aloma anyewɔzo ne yeamaa yeahɔ.+
8 “Ɔwɔ kɛ ahenle mɔɔ ɛlɛte ɔ nwo la kpo ye adɛladeɛ na ɔkpa ɔ nwo enrinli ne amuala na ɔbia nzule nu na ɔ nwo ade. Ɛhye anzi, ɔbahola yeara azokoɛleɛ ɛkɛ, noko ɔnrɛdɛnla ye ɛdanlɛsua ne anu too kenle nsuu.
9 Kenle nsuu ne azo, ɔwɔ kɛ ɔkpa ɔ ti zo nee ɔ kɛsa yɛɛ ɔ nye anzi enrinli ne amuala. Saa ɔkpa ye enrinli ne amuala ɔwie a, ɔbakpo ye adɛladeɛ na yeabia nzule nu na ɔ nwo ade.
10 “Kenle mɔtwɛ ne azo, ɔbava mboane mralɛ nyinli nwiɔ mɔɔ te kpɔkɛ, boaneralɛ belɛ ko+ mɔɔ te kpɔkɛ mɔɔ yeli ɛvolɛ ko, esamo motoo yifa ngyɛnu bulu anu nsa* mɔɔ bɛva nwole bɛfɔtɔ kɛ ma afɔlebɔdeɛ,+ yɛɛ nwole lɔgo ɛzuzudeɛ ko* yeara;+
11 na ɛsɔfo ne mɔɔ baha kɛ ɔ nwo ɛde la bava ahenle mɔɔ ɛlɛte ɔ nwo la nee afɔlebɔdeɛ ne mɔ ara Gyihova anyunlu wɔ nyianu ɛdanlɛsua ne anuhɔlɛ.
12 Ɛsɔfo ne bava boaneralɛ nyinli ne ko nee nwole lɔgo ɛzuzudeɛ ko ne abɔ fɔlɛlilɛ afɔle,+ na yeado ye ehono kɛ ehono afɔlebɔlɛ wɔ Gyihova anyunlu.+
13 Akee ɔbahu boane ne wɔ ɛleka mɔɔ bɛta bɛku ɛtane afɔlebɔdeɛ ne nee ɛyelalɛ afɔlebɔdeɛ ne la,+ wɔ ɛleka mɔɔ le nwuanzanwuanza la, ɔluakɛ fɔlɛlilɛ afɔlebɔdeɛ ne le ɛsɔfo ne ɛdeɛ+ kɛ ɛtane afɔlebɔdeɛ ne la. Ɔle debie nwuanzanwuanza kpalɛ.+
14 “Akee ɛsɔfo ne bava fɔlɛlilɛ afɔlebɔdeɛ ne mogya ne bie aha ahenle mɔɔ ɛlɛte ɔ nwo la anzo fema ne yɛɛ ɔ sa fema kokotile ne nee ɔ gyakɛ fema kokotile ne azo.
15 Ɛsɔfo ne bava nwole+ ne bie agua ɔdaye mumua ne ɔ sa bɛne ne anu.
16 Akee ɛsɔfo ne bava ɔ sa fema ɛrɛlɛsɛka abɔ nwole ne mɔɔ wɔ ɔ sa bɛne ne anu la anu na yeava nwole ne bie yeakponde Gyihova anyunlu ɛkɛ ne fane nsuu.
17 Ɛsɔfo ne bava nwole ne mɔɔ ɛha ɔ sa nu la bie aha ahenle mɔɔ ɛlɛte ɔ nwo la anzo fema ne yɛɛ ɔ sa fema kokotile ne nee ɔ gyakɛ fema kokotile ne azo wɔ ɛleka mɔɔ ɔvale fɔlɛlilɛ afɔlebɔdeɛ mogya ne ɔhehanle la.
18 Ɛsɔfo ne bava nwole ne mɔɔ ɛha ɔ sa nu la agua ahenle mɔɔ ɛlɛte ɔ nwo la ati zo, na yeali ɔ ti mgbɔdalɛ wɔ Gyihova anyunlu.+
19 “Ɛsɔfo ne babɔ ɛtane afɔle+ na yeali ahenle mɔɔ ɛlɛte ɔ nwo avi ye evinli ne anwo la ati mgbɔdalɛ, na akee yeahu ɛyelalɛ afɔlebɔdeɛ ne.
20 Na ɛsɔfo ne babɔ ɛyelalɛ afɔle nee ma afɔle+ wɔ afɔlemokyea ne azo na ɛsɔfo ne ali ɔ ti mgbɔdalɛ,+ na ɔ nwo ade.+
21 “Noko saa ɔle ehyianli na ɔnlɛ bie a, ɔbava boaneralɛ nyinli ko yeabɔ fɔlɛlilɛ afɔle yeamaa bɛado ye ehono amaa bɛali ɔ ti mgbɔdalɛ, yɛɛ ɔbava esamo motoo yifa ngyɛnu bulu anu ko* mɔɔ bɛva nwole bɛfɔtɔ la yeabɔ ma afɔle, nwole lɔgo ɛzuzudeɛ ko,
22 yɛɛ abubule nwiɔ anzɛɛ mɔlɔnoma mralɛ nwiɔ kɛ mɔɔ ɔkɛhola la. Ɔbava ko yeabɔ ɛtane afɔle na yeava ko yeabɔ ɛyelalɛ afɔle.+
23 Kenle mɔtwɛ ne azo,+ ɔbava ninyɛne ɛhye mɔ yearɛlɛ ɛsɔfo ne wɔ nyianu ɛdanlɛsua ne anuhɔlɛ wɔ Gyihova anyunlu yeava yeahile kɛ ɔlɛte ɔ nwo.+
24 “Ɛsɔfo ne bava boane ne mɔɔ ɔfa yeabɔ fɔlɛlilɛ afɔle ne+ la nee nwole ne na yeado ye ehono kɛ ehono afɔlebɔlɛ wɔ Gyihova anyunlu.+
25 Akee ɔbahu boane ne mɔɔ bɛfa bɛabɔ fɔlɛlilɛ afɔle ne la, na ɛsɔfo ne bava fɔlɛlilɛ afɔlebɔdeɛ mogya ne bie aha ahenle mɔɔ ɛlɛte ɔ nwo la anzo fema ne nee ɔ sa fema kokotile yɛɛ ɔ gyakɛ fema kokotile ne azo.+
26 Ɛsɔfo ne bava nwole ne bie agua ɔdaye mumua ne ɔ sa bɛne ne anu,+
27 akee ɔbava ɔ sa fema ɛrɛlɛsɛka yeakponde nwole ne mɔɔ wɔ ɔ sa bɛne ne anu la bie wɔ Gyihova anyunlu ɛkɛ ne fane nsuu.
28 Ɛsɔfo ne bava nwole ne mɔɔ wɔ ɔ sa nu la bie aha ahenle mɔɔ ɛlɛte ɔ nwo la anzo fema ne yɛɛ ɔ sa fema kokotile ne nee ɔ gyakɛ fema kokotile ne azo wɔ ɛleka mɔɔ ɔvale fɔlɛlilɛ afɔlebɔdeɛ mogya ne ɔhehanle la.
29 Ɛsɔfo ne bava nwole ne mɔɔ ɛha ɔ sa nu la agua ahenle mɔɔ ɛlɛte ɔ nwo la ati zo, na yeali ɔ ti mgbɔdalɛ wɔ Gyihova anyunlu.
30 “Ɔbava abubule ko anzɛɛ mɔlɔnoma ralɛ ko, kɛ mɔɔ ɔkɛhola la yeara,+
31 ɔbava ko yeabɔ ɛtane afɔle na yeava ko noko yeabɔ ɛyelalɛ afɔle+ yeaboka ma afɔlebɔlɛ ne anwo; na ɛsɔfo ne bali ahenle mɔɔ ɛlɛte ɔ nwo la ati mgbɔdalɛ wɔ Gyihova anyunlu.+
32 “Awie mɔɔ kokobɛ ɛgua ye noko ɔnlɛ ninyɛne mɔɔ ɔbava yeara wɔ mekɛ mɔɔ ɔlɛte ɔ nwo la anwo mɛla ɛne.”
33 Akee Gyihova zele Mosisi nee Aalɔn kɛ:
34 “Saa bɛdwu Keena azɛlɛ ne+ mɔɔ melɛfa meamaa bɛ kɛ bɛ agyapadeɛ la azo,+ na memaa kokobɛ tɔ sua bie anu wɔ bɛ azɛlɛ ne azo a,+
35 ɔwɔ kɛ ahenle mɔɔ sua ne le ye ɛdeɛ la baka kile ɛsɔfo ne kɛ, ‘Ewule bie ɛdɔ me sua ne anu.’
36 Ɛsɔfo ne bamaa bɛayeye sua ne anu ninyɛne kolaa na yeahɔnlea ɛkɛ, amaa yeanga kɛ debie biala mɔɔ wɔ sua ne anu la anwo ɛnde; akee ɛsɔfo ne bahɔnlea sua ne anu.
37 Ɔbanlea ɛleka mɔɔ ewule ne ɛdɔ la, na saa ewule ne wɔ sua ne bane ne mɔ anwo na ɔ nye le yɛlo nee amunli anzɛɛ kɔkɔlɛ, na ɔzɔho kɛ yedidi yehɔ bane ne anu a,
38 ɛsɔfo ne balua sua ne anlenkɛ ne anu avinde na yeado sua ne anu too kenle nsuu.+
39 “Kenle nsuu ne azo, ɛsɔfo ne bazia ahɔnlea ɛkɛ. Saa ewule ne ɛdɛlɛ sua ne bane ne mɔ anwo a,
40 ɛsɔfo ne bamaa bɛayeye awolɛ ne mɔɔ ewule ne ɛha bɛ la na bɛavuandi bɛ bɛagua sua ne kandiba ɛleka mɔɔ ɛkɛ ne ɛnde la.
41 Akee ɔbamaa bɛahwɔlɔhwɔlɔ sua ne anu bɔkɔɔ, na bɛavuandi ndɛtɛlɛ ne nee mɔta ne mɔɔ bɛyeye la bɛagua sua ne kandiba ɛleka mɔɔ ɛkɛ ne ɛnde la.
42 Akee bɛbava awolɛ gyɛne bɛawulowula awolɛ ne mɔɔ bɛyeye la abo zo, na yeava mɔta gyɛne yeamaa bɛpelaseta sua ne anu.
43 “Noko saa bɛyeye awolɛ ne na bɛtwɔlɔhwɔlɔ sua ne anu na bɛpelaseta ye fofolɛ na ewule ne sia ba bieko a,
44 ɛsɔfo ne bahɔnlea. Saa ewule ne ɛdɛlɛ sua ne anu a, ɛnee kokobɛ nzane+ ɛha sua ne. Sua ne anwo ɛnde.
45 Ɔbamaa bɛabubu sua ne—awolɛ ne mɔ, nuhua mbaka, sua ne anu ndɛtɛlɛ nee mɔta kɔsɔɔti—na bɛava bɛahɔgua sua ne kandiba ɛleka mɔɔ ɛkɛ ne ɛnde la.+
46 Noko awie biala mɔɔ bawolo sua ne anu wɔ mekɛ ala mɔɔ bɛdo nu la+ anwo ɛnrɛde kɔkpula nɔsolɛ nu;+
47 awie biala mɔɔ bala sua ne anu la, ɔwɔ kɛ ɔkpo ye adɛladeɛ, yɛɛ awie biala mɔɔ bali aleɛ wɔ sua ne anu la ɔwɔ kɛ ɔkpo ye adɛladeɛ.
48 “Noko saa ɛsɔfo ne banea na ɔnwu kɛ bɛpelasetale sua ne anu fofolɛ bɛwiele la, ewule ne ɛtɛtɛlɛle a, ɛsɔfo ne baha kɛ sua ne anwo te, ɔluakɛ ewule ne ɛhɔ.
49 Amaa bɛade sua ne anwo bɛavi evinli* ne anwo la, ɔwɔ kɛ ɔfa nloma nwiɔ, sida baka, ɛdanlɛ kɔkɔlɛ yɛɛ nyinlanyinla ɔba.+
50 Ɔwɔ kɛ ɔku aloma ne ko wɔ buakɛ mɔɔ nzukpa wɔ nu la azo.
51 Akee ɔbava sida baka ne, nyinlanyinla ne, ɛdanlɛ kɔkɔlɛ ne nee aloma anyewɔzo ne yeabɔ aloma ne mɔɔ bɛhunle ye wɔ nzukpa ne azo la mogya ne anu, na yeava yeakponde sua ne anwo fane nsuu.+
52 Na ɔbava aloma ne mogya ne, nzukpa ne, aloma anyewɔzo ne, sida baka ne, nyinlanyinla ne yɛɛ ɛdanlɛ kɔkɔlɛ ne yeade sua ne anwo yeavi evinli* ne anwo.
53 Ɔbagyakyi aloma anyewɔzo ne wɔ sua ne kandiba yeamaa yeahɔ, na yeali sua ne ati mgbɔdalɛ, na nwolɛ ade.
54 “Ɛhye a le mɛla mɔɔ fale kokobɛ ewule biala, ewule mɔɔ gua bɛ ti zo anzɛɛ bɛ kɛsa anwo,+
55 kokobɛ mɔɔ gua tɛladeɛ nu,+ anzɛɛ mɔɔ tɔ sua nu,+
56 yɛɛ debie mɔɔ nwu awie, kabonra, anzɛɛ debie mɔɔ gua bɛ nwo la anwo la ɛne,+
57 amaa bɛahola bɛanwu mekɛ mɔɔ debie nwo te+ nee mekɛ mɔɔ debie nwo ɛnde la. Kokobɛ nwo mɛla ɛne.”+
