Lɛvitikɔso 18:1-30
18 Gyihova doale zo zele Mosisi kɛ:
2 “Ka kile Yizilayɛma kɛ, ‘Medame a mele Gyihova bɛ Nyamenle ne a.+
3 Ɔnle kɛ bɛyɛ nyɛleɛ mɔɔ bɛyɛ wɔ Yigyibiti azɛlɛ zo, ɛleka mɔɔ ɛnee bɛde la bie, yɛɛ bɛmmayɛ mɔɔ bɛyɛ ye wɔ Keena azɛlɛ zo, ɛleka mɔɔ me nee bɛ ɛlɛkɔ la bie.+ Yɛɛ bɛmmadi bɛ amaamuo ne anzi.
4 Ɔwɔ kɛ bɛdi me mɛla nee me ngyehyɛleɛ ne mɔ azo na bɛfa bɛbɔ bɛ ɛbɛla.+ Medame a mele Gyihova bɛ Nyamenle ne a.
5 Ɔwɔ kɛ bɛdi me ngyehyɛleɛ nee me mɛla ne mɔ azo; awie biala mɔɔ bali zo la balua zo anyia ngoane.+ Medame a mele Gyihova a.
6 “‘Ɔnle kɛ bɛ nuhua biala nee ɔ nwo sonla da.*+ Medame a mele Gyihova a.
7 Ɔnle kɛ ɛ nee wɔ papa da, yɛɛ ɔnle kɛ ɛ nee wɔ mame da. Ɔle wɔ mame, na ɔnle kɛ ɛ nee ye da.
8 “‘Ɔnle kɛ ɛ nee wɔ papa aye da.+ Ɛbabɔ wɔ papa anyiemgba.*
9 “‘Ɔnle kɛ ɛ nee ɛ diema raalɛ da, wɔ papa ara raalɛ o, wɔ mame ara raalɛ o, saa bɛwole ye wɔ sua nu ɛkɛ o, bɛanwo ye wɔ ɛkɛ o.+
10 “‘Ɔnle kɛ ɛ nee ɛ ra nrenyia ara raalɛ anzɛɛ ɛ ra raalɛ ara raalɛ da, ɔluakɛ ɛbabɔ ɛ nwo anyiemgba.
11 “‘Ɔnle kɛ ɛ nee wɔ papa aye ara raalɛ, mɔɔ le wɔ papa ara la da, ɔluakɛ ɔle ɛ diema raalɛ.
12 “‘Ɔnle kɛ ɛ nee wɔ papa adiema raalɛ da. Ɔ nee wɔ papa le mogya ko.+
13 “‘Ɔnle kɛ ɛ nee wɔ mame adiema raalɛ da, ɔluakɛ ɔ nee wɔ mame le mogya ko.
14 “‘Ɔnle kɛ ɛ nee wɔ papa adiema nrenyia aye da na ɛbɔ ye anyiemgba.* Ɔluakɛ ɔle ɛ nwo sonla.+
15 “‘Ɔnle kɛ ɛ nee wɔ ase raalɛ da.+ Ɔle ɛ ra nrenyia aye, na ɔnle kɛ ɛ nee ye da.
16 “‘Ɔnle kɛ ɛ nee ɛ diema nrenyia aye da,+ ɔluakɛ ɛbabɔ ɛ diema ne anyiemgba.*
17 “‘Ɔnle kɛ ɛ nee raalɛ nee ɔ ra raalɛ da.+ Ɔnle kɛ ɛ nee ɔ ra nrenyia ara raalɛ anzɛɛ ɔ ra raalɛ ara raalɛ da. Bɛle ɔ nwo amra; ɔle ɛbɛla ɛtane.*
18 “‘Ɔnle kɛ ɛgya raalɛ ɛboka ɔ diema raalɛ anwo ɛmaa bɛyɛ mɔhola+ na ɛ nee ye da wɔ mekɛ mɔɔ ɔ diema ne de ngoane nu la.
19 “‘Ɔnle kɛ ɛ nee raalɛ mɔɔ ɛhɔ amozi na evinli ɛha ye la da.+
20 “‘Ɔnle kɛ ɛ nee ɛ gɔnwo* aye da na ɛgua ɛ nwo evinli.+
21 “‘Ɔnle kɛ ɛmaa bɛfa ɛ ra biala bɛbɔ afɔle bɛmaa* Molɛke.+ Ɔnle kɛ ɛgua wɔ Nyamenle ne duma ne anwo evinli+ wɔ zɔhane adenle ne azo. Medame a mele Gyihova a.
22 “‘Ɔnle kɛ ɛ nee nrenyia da kɛ mɔɔ ɛ nee raalɛ da la.+ Ɔle kyibadeɛ.
23 “‘Ɔnle kɛ nrenyia nee nane da na ɔmaa ɔgua ɔ nwo evinli; yɛɛ ɔnle kɛ raalɛ maa adenle maa nane nee ye da.+ Ɔle kyibadeɛ kpole.
24 “‘Bɛmmamaa ninyɛne ɛhye mɔ bie gua bɛ nwo evinli, ɔluakɛ ninyɛne ɛhye mɔ kɔsɔɔti a maanle maanle mɔɔ melɛfoa bɛ meavi bɛ nyunlu la ɛva ɛgua bɛ nwo evinli a.+
25 Ɛhye ati, azɛlɛ ne anwo ɛgua evinli, na mebava ye ɛtane ne anwo anzohwenlɛ meara ɔ nwo zo, na azɛlɛ ne bave menli mɔɔ de zo la agua bɛ lɔ.+
26 Noko bɛmɛ, ɔwɔ kɛ bɛdi me ngyehyɛleɛ nee me mɛla ne mɔ azo,+ na ɔnle kɛ ekulomeni o, ɛyɛvolɛ mɔɔ de bɛ avinli la o, yɛ kyibadeɛ ɛhye mɔ bie.+
27 Ɔluakɛ menli mɔɔ limoale bɛ nyunlu wɔ azɛlɛ ne azo la yɛle kyibadeɛ ɛhye mɔ amuala bie,+ na kɛkala azɛlɛ ne anwo ɛgua evinli.
28 Saa bɛangua azɛlɛ ne anwo evinli a, ɔnrɛve bɛ ɔnrɛgua bɛ lɔ kɛ mɔɔ ɔbave maanle maanle ne mɔ mɔɔ limoale bɛ nyunlu la.
29 Saa awie yɛ kyibadeɛ ɛhye mɔ bie a, ɔwɔ kɛ bɛye* ahenle* mɔɔ bayɛ zɔ la bɛfi ye menli ne avinli.
30 Ɔwɔ kɛ bɛdi me edwɛkɛ zo na bɛanyɛ amaamuo ɛhye mɔ mɔɔ ɛnle kpalɛ na menli mɔɔ limoale bɛ nyunlu la yɛle la bie,+ amaa yeangua bɛ nwo evinli. Medame a mele Gyihova bɛ Nyamenle ne a.’”
Ɔbodwɛkɛ
^ Hibulu aneɛ nu, “ye ɔ nwo sonla nwo to zo,” ɛke nee ɛlɛka gyɛne mɔɔ ɔbavinde la.
^ Hibulu aneɛ nu, “Ɛbaye wɔ papa anwo wɔado zo.”
^ Hibulu aneɛ nu, “na ɛye wɔ papa adiema nrenyia ne anwo ɛto zo.”
^ Hibulu aneɛ nu, “ɛbaye ɛ diema nrenyia ne anwo wɔado zo.”
^ Anzɛɛ “anyiemgba ɛbɛla.”
^ Anzɛɛ “ɛ nee awie mɔɔ ɛ nee ye tu la.”
^ Anzɛɛ “ɛmaa bɛtu ɛ ra biala bɛmaa.”
^ Anzɛɛ “bɛku.”
^ Anzɛɛ “ɛkɛla.”
