Lɛvitikɔso 2:1-16
-
Ma afɔlebɔlɛ (1-16)
2 “‘Saa awie* fa ma afɔlebɔdeɛ+ arɛlɛ Gyihova a, ɔwɔ kɛ ye afɔlebɔdeɛ ne yɛ esamo motoo, na ɔwɔ kɛ ɔwola nwole ɔgua zolɛ na ɔfa ɛyɛlɛvuanlɛ ɔboka nwo.+
2 Akee ɔbava yearɛlɛ Aalɔn amra ɛsɔfo ne mɔ, na ɛsɔfo ne bavula esamo motoo ne mɔɔ nwole wɔ nu la ɔ sa ko nee ye ɛyɛlɛvuanlɛ ne amuala na yeamaa yeakpu wɔ afɔlemokyea ne azo kɛ ngakyelɛ afɔlebɔdeɛ,*+ afɔlebɔlɛ evuanlɛ mɔɔ Gyihova anye die nwolɛ* mɔɔ bɛva senle bɛbɔ la.
3 Ma afɔlebɔdeɛ ne mɔɔ kɛha la le Aalɔn nee ɔ mra mrenyia ne mɔ ɛdeɛ,+ ɔle afɔle mɔɔ bɛva senle bɛbɔ bɛmaa Gyihova la anu debie nwuanzanwuanza kpalɛ.+
4 “‘Saa ɛfa ma afɔlebɔdeɛ mɔɔ bɛdo ye wɔ fonlomo nu la wɔara a, ɔwɔ kɛ ɔyɛ esamo motoo, paano mɔɔ mgbɔvonle ɛnle nu mɔɔ bɛva nwole bɛfete na bɛbɔ ye kɛ ngɛba la, anzɛɛ paano ndɛbandɛba mɔɔ mgbɔvonle ɛnle nu mɔɔ bɛva nwole bɛha ɔ nyunlu la.+
5 “‘Saa wɔ afɔlebɔdeɛ ne le ma afɔlebɔdeɛ mɔɔ bɛdo ye wɔ kyɛnze ɛdɛbaa nu la a,+ ɔwɔ kɛ ɔyɛ esamo motoo mɔɔ mgbɔvonle ɛnle nu na bɛva nwole bɛfete la.
6 Ɔwɔ kɛ ɛbubu nu na ɛgua nwole zo.+ Ɔle ma afɔlebɔdeɛ.
7 “‘Saa wɔ afɔlebɔdeɛ ne le ma afɔlebɔdeɛ mɔɔ bɛdo ye wɔ kyɛnze nu a, ɔwɔ kɛ ɛfa esamo motoo nee nwole ɛyɛ.
8 Ɔwɔ kɛ ɛfa ma afɔlebɔdeɛ mɔɔ bɛva ninyɛne ɛhye mɔ bɛyɛ la ɛbɛlɛ Gyihova, na bɛbava bɛamaa ɛsɔfo ne na yeava yeahɔ afɔlemokyea ne anwo.
9 Akee ɛsɔfo ne bava ma afɔlebɔdeɛ ne bie ayɛ ngakyelɛ afɔlebɔdeɛ*+ yeamaa yeakpu wɔ afɔlemokyea ne azo kɛ afɔlebɔlɛ evuanlɛ mɔɔ Gyihova anye die nwolɛ*+ mɔɔ bɛva senle bɛbɔ la.
10 Ma afɔlebɔdeɛ ne mɔɔ kɛha la le Aalɔn nee ɔ mra mrenyia ne mɔ ɛdeɛ, ɔle afɔle mɔɔ bɛva senle bɛbɔ bɛmaa Gyihova la anu debie nwuanzanwuanza kpalɛ.+
11 “‘Ɔnle kɛ bɛfa mgbɔvonle bɛwula ma afɔlebɔdeɛ biala mɔɔ bɛfa bɛarɛlɛ Gyihova la anu,+ ɔluakɛ ɔnle kɛ bɛkpu ɛdɔkɛ mɔɔ nyinyia anzɛɛ wolɛ biala kɛ afɔle mɔɔ bɛva senle bɛbɔ bɛmaa Gyihova la.
12 “‘Bɛbahola bɛava bɛarɛlɛ Gyihova kɛ bɛ ma mɔɔ limoa la afɔlebɔlɛ,+ noko ɔnle kɛ bɛfa bɛba afɔlemokyea ne azo kɛ debie evuanlɛ mɔɔ ɔ nye die nwolɛ.*
13 “‘Ɔwɔ kɛ bɛfa ngyenle bɛwula bɛ ma afɔlebɔdeɛ biala anu; na ɔnle kɛ bɛmaa ngyenle mɔɔ maa bɛkakye Nyamenle ngyekyeleɛ ne la kpa bɛ ma afɔlebɔdeɛ nu. Bɛva ngyenle bɛboka bɛ afɔlebɔdeɛ biala anwo.+
14 “‘Saa ɛfa wɔ ma mɔɔ limoa la wɔarɛlɛ Gyihova kɛ wɔ ma afɔlebɔdeɛ a, ɔwɔ kɛ ɛfa ma fofolɛ* mɔɔ bɛva senle bɛhyehye na bɛgelegele nu la ɛba kɛ wɔ ma mɔɔ limoa la afɔlebɔdeɛ.+
15 Ɔwɔ kɛ ɛgua nwole zo na ɛfa ɛyɛlɛvuanlɛ ɛboka nwo. Ɔle ma afɔlebɔdeɛ.
16 Ɛsɔfo ne bayela ma ne mɔɔ bɛgelegele nu la nee nwole ne bie yɛɛ ɛyɛlɛvuanlɛ ne amuala kɛ ngakyelɛ afɔlebɔdeɛ,*+ ɔle afɔle mɔɔ bɛva senle bɛbɔ bɛmaa Gyihova.
Ɔbodwɛkɛ
^ Anzɛɛ “ɛkɛla bie.”
^ Anzɛɛ “foa mɔɔ gyi ɛkɛ ne maa afɔlebɔlɛ ne amuala.”
^ Hibulu aneɛ nu, “akunlu dwo nwolɛ.”
^ Hibulu aneɛ nu, “akunlu dwo nwolɛ.”
^ Anzɛɛ “ayɛ foa mɔɔ gyi ɛkɛ ne maa afɔlebɔlɛ ne amuala.”
^ Hibulu aneɛ nu, “ɔ kunlu dwo nwolɛ.”
^ Anzɛɛ “ma amolɛ.”
^ Anzɛɛ “kɛ foa mɔɔ gyi ɛkɛ ne maa afɔlebɔlɛ ne amuala.”
