Lɛvitikɔso 21:1-24
21 Gyihova doale zo zele Mosisi kɛ: “Tendɛ kile ɛsɔfo ne mɔ, Aalɔn amra mrenyia ne mɔ, na se bɛ kɛ, ‘Ɔnle kɛ bɛ nuhua biala maa awie* mɔɔ ɛwu la gua ɔ nwo evinli wɔ ye menli ne anu.+
2 Noko ɔbahola yeayɛ zɔ yeamaa awie mɔɔ nee ye le mogya ko la, ye mame, ye papa, ɔ ra nrenyia, ɔ ra raalɛ, ɔ diema nrenyia,
3 yɛɛ ɔ diema raalɛ mɔɔ bikye ye mɔɔ ɛnze nrenyia na bɛtɛgyale ye la bahola amaa yeagua ɔ nwo evinli.
4 Ɔnle kɛ ɔmaa raalɛ mɔɔ lɛ ɔ hu wɔ ye menli ne anu la gua ɔ nwo evinli na ɔmaa ɔyɛ awie mɔɔ ɔ nwo ɛnde a.
5 Ɔnle kɛ bɛkpa bɛ ti+ anzɛɛ bɛpepɛ bɛ kɛsa enrinli ne anloa anzɛɛ bɛfa debie bɛpepɛ bɛ nwo.+
6 Ɔwɔ kɛ bɛyɛ nwuanzanwuanza bɛmaa bɛ Nyamenle ne+ yɛɛ ɔnle kɛ bɛgua bɛ Nyamenle ne duma ne anwo evinli,+ ɔluakɛ bɛdabɛ a bɛfa senle bɛbɔ afɔle bɛmaa Gyihova, bɛfa bɛ Nyamenle ne aleɛ* ne bɛbɛlɛ ye a, na ɔwɔ kɛ bɛyɛ nwuanzanwuanza.+
7 Ɔnle kɛ bɛgya tuutuunli,+ raalɛ mɔɔ anwo ɛgua evinli, anzɛɛ raalɛ mɔɔ ɔ hu ɛbɔ ye ewole la,+ ɔluakɛ ɛsɔfo ne le nwuanzanwuanza maa ye Nyamenle ne.
8 Ɔwɔ kɛ ɛte ɔ nwo,+ ɔluakɛ ɔdaye a ɔfa wɔ Nyamenle ne aleɛ ne ɔba a. Ɔwɔ kɛ ɔyɛ nwuanzanwuanza ɔmaa bɛ, ɔluakɛ medame Gyihova mɔɔ melɛte bɛ nwo la, mele nwuanzanwuanza.+
9 “‘Saa ɛsɔfo bie ara raalɛ bɔ tuutuu ɛbɛla na ɔgua ɔ nwo evinli a, ɛnee yegua ye papa anwo evinli. Ɔwɔ kɛ bɛyela ye wɔ senle nu.+
10 “‘Ɛsɔfo kpanyinli ne mɔɔ wɔ ɔ mediema ne mɔ anu mɔɔ bɛwola ɛkpokpalɛ nwole ne bɛgua ɔ ti zo+ na bɛkpa ye* kɛ ɔwula ɛsɔfo adɛladeɛ ne mɔ la,+ ɔnle kɛ ɔyɛ ɔ ti zo sesakaa anzɛɛ ɔsuosua ye adɛladeɛ nu.+
11 Ɔnle kɛ ɔbikye funli biala;*+ ɔnle kɛ ɔmaa ye papa anzɛɛ ye mame bɔbɔ gua ɔ nwo evinli.
12 Ɔnle kɛ ɔfi ɛleka nwuanzanwuanza ne ɔfinde yɛɛ ɔnle kɛ ɔgua ye Nyamenle ne ɛleka nwuanzanwuanza ne anwo evinli,+ ɔluakɛ bɛnwozoyilalɛ sɛkɛlɛneɛ ne, ye Nyamenle ne ɛkpokpalɛ nwole ne wɔ ɔ nwo zo.+ Medame a mele Gyihova a.
13 “‘Ɔwɔ kɛ ɔgya raalɛ mɔɔ ɛnze nrenyia la.+
14 Ɔnle kɛ ɔgya kunlavolɛ, raalɛ mɔɔ bɛbɔ ye ewole, raalɛ mɔɔ anwo ɛgua evinli anzɛɛ tuutuunli; emomu ɔwɔ kɛ ɔgya raalɛ mɔɔ ɛnze nrenyia la wɔ ye menli ne anu.
15 Ɔnle kɛ ɔgua ɔ mra nwo evinli wɔ ye menli ne anu,+ ɔluakɛ medame a mele Gyihova mɔɔ melɛte ɔ nwo a.’”
16 Gyihova doale zo zele Mosisi kɛ:
17 “Ka kile Aalɔn kɛ, ‘Wɔ bɛ awolɛndoazo kɔsɔɔti anu, ɔnle kɛ ɔ bo zo amra ne anu biala mɔɔ anwo lɛ dɛne la ba kɛ ɔfa ye Nyamenle ne aleɛ yearɛlɛ ye.
18 Saa awie anwo lɛ dɛne a, ɔnle kɛ ɔba me nyunlu: anyenzinliravolɛ anzɛɛ abubura anzɛɛ awie mɔɔ anyunlu ɛzɛkye,* anzɛɛ ɔ sa anzɛɛ ɔ gyakɛ ko wale bo zo,
19 awie mɔɔ ɔ gyakɛ anzɛɛ ɔ sa ɛbu,
20 awie mɔɔ le afu anzɛɛ adwola* anzɛɛ ɔlɛ ɛnyelɛ ewule, anzɛɛ ehuluke anzɛɛ ɛyane ɛgua ɔ nwo, anzɛɛ ɔ ndɔma ɛbɔ la.+
21 Ɔnle kɛ ɛsɔfo Aalɔn abozoamra ne anu biala mɔɔ anwo lɛ dɛne la ba kɛ ɔbava senle yeabɔ afɔle yeamaa Gyihova. Kɛ mɔɔ ɔ nwo lɛ dɛne la ati, ɔnrɛra kɛ ɔfa ye Nyamenle ne aleɛ yearɛlɛ ye.
22 Ɔbahola yeali ye Nyamenle ne aleɛ ne bie, ninyɛne nwuanzanwuanza kpalɛ ne+ nee ninyɛne nwuanzanwuanza ne mɔ.+
23 Noko ɔnle kɛ ɔbikye mgbɛnudanlɛ ne+ yɛɛ ɔnle kɛ ɔbikye afɔlemokyea ne,+ ɔluakɛ ɔ nwo lɛ dɛne; yɛɛ ɔnle kɛ ɔgua me ɛleka nwuanzanwuanza ne anwo evinli,+ ɔluakɛ medame a mele Gyihova mɔɔ melɛte bɛ nwo a.’”+
24 Yemɔti Mosisi dendɛle hilele Aalɔn nee ɔ mra mrenyia ne mɔ yɛɛ Yizilayɛma amuala.
Ɔbodwɛkɛ
^ Anzɛɛ “ɛkɛla.”
^ Hibulu aneɛ nu, “paano.” Ɔkile afɔlebɔlɛ ne mɔ.
^ Hibulu aneɛ nu, “na bɛva tumi bɛwula ɔ sa.”
^ Anzɛɛ “ɛkɛla biala mɔɔ ɛwu la.” Hibulu edwɛkɛkpɔkɛ ne′phesh mɔɔ wɔ ɛke la nee Hibulu edwɛkɛkpɔkɛ mɔɔ kile “mɔɔ ɛwu la” le ko.
^ Hibulu aneɛ nu, “ɔ bonyi nu ɛhyɛ.”
^ Anzɛɛ ɔkola ɔkile, “ɛyɛ kamgbaanwo.”
