Lɛvitikɔso 24:1-23
24 Gyihova doale zo zele Mosisi kɛ:
2 “Ka kile Yizilayɛma kɛ bɛva ɔlivi nwole kpalɛ mɔɔ bɛbava bɛagua ahɛnlaneɛ ne mɔ anu la bɛrɛlɛ wɔ, amaa ahɛnlaneɛ ne mɔ agyinla zo dahuu.+
3 Ɔwɔ kɛ Aalɔn nea maa ahɛnlaneɛ ne mɔ sɔ gyinla zolɛ wɔ mgbɛnudanlɛ ne mɔɔ bikye Daselɛlilɛ ne mɔɔ wɔ nyianu ɛdanlɛsua ne anu la anyunlu, ɔvi nɔsolɛ kɔdwu nwonlomɔ wɔ Gyihova anyunlu dahuu. Ɔle mɛla mɔɔ wɔ ɛkɛ ne dahuu wɔ bɛ awolɛndoazo kɔsɔɔti anu a.
4 Ɔwɔ kɛ ɔsiezie ahɛnlaneɛ ne mɔ boɛ wɔ nvutuke tagyee kɛnlaneɛbaka ne azo+ wɔ Gyihova anyunlu dahuu.
5 “Ɛbava esamo motoo wɔado paano mɔɔ bɛbɔ ye kɛ ngɛba la 12. Ɔwɔ kɛ ɛfa esamo yifa* ngyɛnu bulu anu nwiɔ ɛto paano ko biala.
6 Ɛbagua bɛ ekpunli nwiɔ, ekpunli ko biala ɛdeɛ nsia,+ wɔ nvutuke tagyee ɛkponle ne mɔɔ gyi Gyihova anyunlu la azo.+
7 Ɛbava ɛyɛlɛvuanlɛ kpalɛ wɔagua ekpunli ko biala azo, na ɔbayɛ ngakyelɛ afɔlebɔlɛ* paano,+ afɔle mɔɔ bɛva senle bɛbɔ bɛmaa Gyihova la.
8 Ɛnwomenlelielɛ kenle biala, ɔwɔ kɛ ɔfa ɔgua Gyihova anyunlu ɛkɛ dahuu.+ Ɔle ngyekyeleɛ mɔɔ wɔ ɛkɛ ne dahuu mɔɔ me nee Yizilayɛma ɛyɛ a.
9 Ɔbayɛ Aalɔn nee ɔ mra mrenyia ne mɔ ɛdeɛ,+ na bɛbali ye wɔ ɛleka mɔɔ le nwuanzanwuanza la,+ ɔluakɛ ɔle afɔle mɔɔ bɛva senle bɛbɔ bɛmaa Gyihova la anu debie nwuanzanwuanza kpalɛ ɔmaa ye, ɔle mɛla mɔɔ wɔ ɛkɛ ne dahuu.”
10 Ɛnee Yizilayɛnli raalɛ bie ara nrenyia mɔɔ ye papa le Yigyibitinli la wɔ Yizilayɛma avinli,+ na konle dɔle ɔdaye nee Yizilayɛnli bie avinli wɔ azokoɛleɛ ɛkɛ ne.
11 Yizilayɛnli raalɛ ne ara ne dendɛle tiale Duma* ne na ɔhanle nwolɛ munzule edwɛkɛ.+ Yemɔti bɛvale ye bɛhɔmaanle Mosisi.+ Bɛfɛlɛ ye mame Hyɛlomete, ɔle Debelae mɔɔ vi Dan abusua nu la ara raalɛ.
12 Bɛvale ye bɛziele kɛ bɛkendɛ kpɔkɛ mɔɔ Gyihova kɛbɔ wɔ nwolɛ la.+
13 Gyihova zele Mosisi kɛ:
14 “Fa ahenle mɔɔ hanle munzule edwɛkɛ ne la kɔ azokoɛleɛ ne anzi lɔ, na menli kɔsɔɔti mɔɔ dele ye edwɛkɛ ne la ɛva bɛ sa ɛgua ɔ ti zo, na akee menli ne amuala ɛzi ye awolɛ.+
15 Na ka kile Yizilayɛma kɛ, ‘Saa awie ka munzule edwɛkɛ tia ye Nyamenle ne a, ɔbali ye ɛtane ne anwo ɛzonle.
16 Ɔti ɔwɔ kɛ bɛku ahenle mɔɔ dendɛle tiale Gyihova duma ne la.+ Ɔwɔ kɛ menli ne amuala si ye awolɛ. Awie biala mɔɔ kɛdendɛ kɛtia Duma ne la, ɛyɛvolɛ o, ekulomeni o, ɔwɔ kɛ bɛku ye.
17 “‘Saa awie ku sonla* a, ɔwɔ kɛ bɛku ye.+
18 Awie biala mɔɔ kɛbɔ ayɛmoa kɛhu ye* la, ɔwɔ kɛ ɔfa bie ɔsie ɔ bo zo, ngoane ɛzie ngoane bo zo.*
19 Saa awie boda ɔ gɔnwo a, ɔwɔ kɛ bɛfa mɔɔ ɔyɛle la bie bɛyɛ ye.+
20 Bowule ɛzie bowule bo zo,* ɛnyelɛ ɛzie ɛnyelɛ bo zo na egyele ɛzie egyele bo zo, kɛzi yeboda awie la, ɔwɔ kɛ bɛboda ye bie bɛsie ɔ bo zo.+
21 Awie mɔɔ kɛbɔ nane kɛhu ye la, ɔwɔ kɛ ɔfa bie ɔsie ɔ bo zo,+ noko awie mɔɔ kɛhu sonla la, ɔwɔ kɛ bɛku ye.+
22 “‘Mɛla ko ne ala a wɔ ɛkɛ maa ekulomeni nee ɛyɛvolɛ a,+ ɔluakɛ medame a mele Gyihova bɛ Nyamenle ne a.’”
23 Akee Mosisi dendɛle hilele Yizilayɛma, na bɛvale ahenle mɔɔ hanle munzule edwɛkɛ ne la bɛhɔle azokoɛleɛ ne anzi lɔ na bɛzile ye awolɛ.+ Yemɔti Yizilayɛma yɛle mɔɔ Gyihova hanle hilele Mosisi la pɛpɛɛpɛ.
Ɔbodwɛkɛ
^ Anzɛɛ “foa mɔɔ gyi ɛkɛ ne maa afɔlebɔlɛ ne amuala.”
^ Ɛhye kile, duma Gyihova ne, kɛ mɔɔ ngyh. 15 nee 16 kile la.
^ Anzɛɛ “awie bɔ ɛkɛla bie ku ye.”
^ Anzɛɛ “kɛbɔ ayɛmoa ɛkɛla kɛhu ye.”
^ Anzɛɛ “ɛkɛla ɛzie ɛkɛla bo zo.”
^ Anzɛɛ “Ɛbu awie bowule a bɛbu wɔ ɛdeɛ bɛzie ɔ bo zo.”
