Lɛvitikɔso 4:1-35
-
Ɛtane afɔlebɔlɛ (1-35)
4 Gyihova doale zo zele Mosisi kɛ:
2 “Ka kile Yizilayɛma kɛ, saa awie* anye ɛnla nwo na ɔyɛ ɛtane,+ na ɔyɛ ninyɛne mɔɔ Gyihova ɛha kɛ bɛmmayɛ la bie a, mɔɔ ɔwɔ kɛ ɔyɛ la ɛne:
3 “‘Saa ɛsɔfo ne mɔɔ bɛkpokpa ye+ la yɛ ɛtane+ na ɔmaa menli ne di fɔlɛ a, ɔwɔ kɛ ɔfa ɛnlankɛ ralɛ nyinli mɔɔ te kpɔkɛ la ɔbɔ ye ɛtane ne mɔɔ yeyɛ la anwo afɔle ɔmaa Gyihova.+
4 Ɔbava ɛnlankɛ ne yeara nyianu ɛdanlɛsua ne anuhɔlɛ+ wɔ Gyihova anyunlu na yeava ɔ sa yeado ɛnlankɛ ne ati zo, na yeahu ɛnlankɛ ne wɔ Gyihova anyunlu.+
5 Akee ɛsɔfo ne mɔɔ bɛkpokpa ye+ la bava ɛnlankɛ ne mogya ne bie ahɔ nyianu ɛdanlɛsua ne anu;
6 na ɛsɔfo ne bava ɔ sa ɛrɛlɛsɛka abɔ mogya ne anu+ na yeakponde mogya ne bie fane nsuu+ wɔ Gyihova anyunlu wɔ ɛleka nwuanzanwuanza ne mgbɛnudanlɛ ne anyunlu.
7 Eza ɛsɔfo ne bava mogya ne bie aheha ayilevuanlɛ afɔlemokyea ne+ mɔɔ wɔ Gyihova anyunlu wɔ nyianu ɛdanlɛsua ne anu la mɛne ne mɔ anwo, na yeawola ɛnlankɛ ne mogya ne mɔɔ ɛha la amuala yeagua ɛyelalɛ afɔlebɔlɛ afɔlemokyea ne mɔɔ wɔ nyianu ɛdanlɛsua ne anuhɔlɛ la abo.+
8 “‘Akee ɔbayeye ɛnlankɛ ne mɔɔ bɛfa bɛabɔ ɛtane afɔle ne la ɛnlome ne amuala, ɔ kunlu ninyɛne ne anwo ɛnlome ne nee anyalɛ ne anwo ɛnlome ne,
9 yɛɛ kilenzia nwiɔ ne mɔɔ kɔne ɔ nze zo la nee nwolɛ ɛnlome ne. Ɔbaye ɛbolɛ ne anwo ɛnlome ne yeaboka kilenzia ne anwo.+
10 Ɔbayɛ ye kɛ mɔɔ bɛyeye bɛfi ɛnlankɛ mɔɔ bɛfa bɛabɔ anzodwolɛ afɔle ɛdeɛ ne anu la.+ Na ɛsɔfo ne bayela ye wɔ ɛyelalɛ afɔlebɔlɛ afɔlemokyea ne azo.
11 “‘Noko ɛnlankɛ ne nwoma ne nee ye nane ne nee ɔ ti, ɔ gyakɛ, ye anyalɛ nee ye ebinli ne+—
12 ɛnlankɛ mumua ne—ɔbava yeahɔ azokoɛleɛ ne anzi ɛleka bɔkɔbɔkɔ mɔɔ bɛgua nzonle* ne la, na yeayela ye wɔ senle ne anu ɛyɛne ne azo.+ Ɔwɔ kɛ bɛyela ye wɔ ɛleka mɔɔ bɛgua nzonle ne la.
13 “‘Akee saa Yizilayɛma amuala anye ɛnla nwo na bɛyɛ ɛtane+ na bɛdi nwolɛ fɔlɛ, na menli ne ɛnze kɛ bɛyɛ debie mɔɔ Gyihova ɛha kɛ bɛmmayɛ la bie,+
14 na bɛnwu bɛ ɛtane ne a, ɔwɔ kɛ menli ne amuala fa ɛnlankɛ ralɛ nyinli babɔ ɛtane afɔle wɔ nyianu ɛdanlɛsua ne anyunlu.
15 Bɛ mgbanyima ne mɔ bava bɛ sa agua ɛnlankɛ ne ati zo wɔ Gyihova anyunlu, na bɛahu ɛnlankɛ ne wɔ Gyihova anyunlu.
16 “‘Akee ɛsɔfo ne mɔɔ bɛkpokpa ye la bava ɛnlankɛ ne mogya ne bie ahɔ nyianu ɛdanlɛsua ne anu.
17 Ɛsɔfo ne bava ɔ sa ɛrɛlɛsɛka abɔ mogya ne anu na yeakponde mogya ne bie fane nsuu wɔ Gyihova anyunlu wɔ mgbɛnudanlɛ ne anyunlu.+
18 Eza ɛsɔfo ne bava mogya ne bie aheha afɔlemokyea ne mɔɔ wɔ Gyihova anyunlu wɔ nyianu ɛdanlɛsua ne anu la mɛne ne mɔ anwo,+ na yeawola ɛnlankɛ ne mogya ne mɔɔ ɛha la amuala yeagua ɛyelalɛ afɔlebɔlɛ afɔlemokyea ne mɔɔ wɔ nyianu ɛdanlɛsua ne anuhɔlɛ la abo.+
19 Ɔbayeye ye ɛnlome ne amuala na yeayela ye wɔ afɔlemokyea ne azo.+
20 Ɔbayɛ ye kɛ mɔɔ ɔyɛle ɛnlankɛ nyinli ne mɔɔ bɛvale bɛbɔle ɛtane afɔle ne la. Kɛ ɔbayɛ ye la ɛne, na ɛsɔfo ne bali bɛ ti mgbɔdalɛ,+ na bɛava bɛahyɛ bɛ.
21 Ɔbava ɛnlankɛ ne yeahɔ azokoɛleɛ ne anzi lɔ na yeayela ye, kɛ mɔɔ ɔyelale ɛnlankɛ ne mɔɔ limoa la.+ Ɔle menli ne amuala ɛtane afɔlebɔlɛ.+
22 “‘Saa kpanyinli bie+ anye ɛnla nwo na ɔyɛ ɛtane na ɔyɛ ninyɛne mɔɔ Gyihova ɛha kɛ bɛmmayɛ la bie na ɔdi nwolɛ fɔlɛ,
23 anzɛɛ saa ɔnwu ɛtane mɔɔ yeyɛ la a, ɛnee ɔwɔ kɛ ɔfa abɔnkye ralɛ nyinli mɔɔ te kpɔkɛ la ɔba kɛ ye afɔlebɔdeɛ.
24 Ɔbava ɔ sa yeado abɔnkye ralɛ ne ati zo na yeahu ye wɔ ɛleka mɔɔ bɛku ɛyelalɛ afɔlebɔdeɛ ne la wɔ Gyihova anyunlu.+ Ɔle ɛtane afɔlebɔlɛ.
25 Ɛsɔfo ne bava ɔ sa ɛrɛlɛsɛka abɔ ɛtane afɔlebɔdeɛ ne mogya ne anu na yeava yeaheha ɛyelalɛ afɔlebɔlɛ afɔlemokyea ne mɛne ne mɔ anwo,+ na yeawola mogya ne mɔɔ ɛha la amuala yeagua ɛyelalɛ afɔlebɔlɛ afɔlemokyea ne abo.+
26 Ɔbayela ye ɛnlome ne amuala wɔ afɔlemokyea ne azo kɛ anzodwolɛ afɔlebɔdeɛ+ ne ɛnlome ne la; na ɛsɔfo ne bali ye ɛtane ne anwo mgbɔdalɛ, na bɛava bɛahyɛ ye.
27 “‘Saa menli* mɔɔ wɔ azɛlɛ ne azo la bie anye ɛnla nwo na ɔyɛ ɛtane na ɔyɛ ninyɛne mɔɔ Gyihova ɛha kɛ bɛmmayɛ la bie na ɔdi nwolɛ fɔlɛ,+
28 anzɛɛ saa ɔnwu ɛtane mɔɔ yeyɛ la a, ɔwɔ kɛ ɔfa abɔnkye ralɛ belɛ mɔɔ te kpɔkɛ la ɔba kɛ ye ɛtane mɔɔ yeyɛ la anwo afɔlebɔdeɛ.
29 Ɔbava ɔ sa yeado ye ɛtane afɔlebɔdeɛ ne ati zo na yeahu ye wɔ ɛleka mɔɔ bɛku ɛyelalɛ afɔlebɔdeɛ ne la.+
30 Ɛsɔfo ne bava ɔ sa ɛrɛlɛsɛka abɔ ɛtane afɔlebɔdeɛ ne mogya ne anu na yeava yeaheha ɛyelalɛ afɔlebɔlɛ afɔlemokyea ne mɛne ne mɔ anwo, na yeawola mogya ne mɔɔ ɛha la amuala yeagua ɛyelalɛ afɔlebɔlɛ afɔlemokyea ne abo.+
31 Ɔbayeye ye ɛnlome ne amuala,+ kɛ mɔɔ bɛyeye bɛfi nane mɔɔ bɛfa bɛabɔ anzodwolɛ afɔle ɛdeɛ ne anu la,+ na ɛsɔfo ne bayela ye wɔ afɔlemokyea ne azo kɛ debie evuanlɛ mɔɔ Gyihova anye die nwolɛ* la; na ɛsɔfo ne bali ɔ ti mgbɔdalɛ, na bɛava bɛahyɛ ye.
32 “‘Noko saa ɔfa boaneralɛ yeabɔ ɛtane afɔle a, ɔwɔ kɛ ɔfa belɛ mɔɔ te kpɔkɛ la.
33 Ɔbava ɔ sa yeado ɛtane afɔlebɔdeɛ ne ati zo na yeahu ye wɔ ɛleka mɔɔ bɛku ɛyelalɛ afɔlebɔdeɛ ne la.+
34 Ɛsɔfo ne bava ɔ sa ɛrɛlɛsɛka abɔ ɛtane afɔlebɔdeɛ ne mogya ne anu na yeava yeaheha ɛyelalɛ afɔlebɔlɛ afɔlemokyea ne mɛne ne mɔ anwo,+ na yeawola mogya ne mɔɔ ɛha la amuala yeagua afɔlemokyea ne abo.
35 Ɔbayeye ye ɛnlome ne amuala, kɛ mɔɔ bɛyeye bɛfi boane ne mɔɔ bɛfa bɛabɔ anzodwolɛ afɔle ɛdeɛ ne anu la, na ɛsɔfo ne bayela ye wɔ afɔlemokyea ne azo aboka afɔle ne mɔɔ bɛva senle bɛbɔ bɛmaa Gyihova la anwo;+ na ɛsɔfo ne bali ye ɛtane mɔɔ yeyɛ la anwo mgbɔdalɛ, na bɛava bɛahyɛ ye.+
Ɔbodwɛkɛ
^ Anzɛɛ “ɛkɛla bie.”
^ Anzɛɛ “ɛnlome nzonle,” ɛhye kile, nzonle mɔɔ nane mɔɔ bɛva bɛbɔ afɔle la ɛnlome ɛfonla ye la.
^ Anzɛɛ “ɛkɛla.”
^ Hibulu aneɛ nu, “akunlu dwo nwolɛ.”
