Lɛvitikɔso 7:1-38
7 “‘Fɔlɛlilɛ afɔlebɔlɛ ne+ anwo mɛla ɛne: Ɔle debie nwuanzanwuanza kpalɛ.
2 Bɛbahu fɔlɛlilɛ afɔlebɔdeɛ ne wɔ ɛleka mɔɔ bɛku ɛyelalɛ afɔlebɔdeɛ ne la, na ɔwɔ kɛ bɛkponde ye mogya ne+ wɔ afɔlemokyea ne anwo amuala.+
3 Ɔbayeye ye ɛnlome ne amuala,+ ɔ dua ne mɔɔ ɛlɔ la, anyalɛ ne anwo ɛnlome ne,
4 yɛɛ kilenzia nwiɔ ne mɔɔ kɔne ɔ nze zo la nee nwolɛ ɛnlome ne. Eza ɔbayeye ɛbolɛ ne anwo ɛnlome ne yeaboka kilenzia ne anwo.+
5 Ɛsɔfo ne bayela ye wɔ afɔlemokyea ne azo kɛ afɔle mɔɔ bɛva senle bɛbɔ bɛmaa Gyihova.+ Ɔle fɔlɛlilɛ afɔlebɔlɛ.
6 Nrenyia biala mɔɔ le ɛsɔfo la bali bie,+ na ɔwɔ kɛ bɛdi ye wɔ ɛleka mɔɔ le nwuanzanwuanza la. Ɔle debie nwuanzanwuanza kpalɛ.+
7 Ɛtane afɔlebɔlɛ ne anwo mɛla ne nee fɔlɛlilɛ afɔlebɔlɛ ɛdeɛ ne le ko; ɔle ɛsɔfo ne mɔɔ bava ali mgbɔdalɛ la ɛdeɛ.+
8 “‘Saa ɛsɔfo ne bɔ ɛyelalɛ afɔle maa awie a, ɛyelalɛ afɔlebɔdeɛ ne nwoma ne+ bayɛ ɛsɔfo ne ɛdeɛ.
9 “‘Ma afɔlebɔdeɛ biala mɔɔ bɛkɛdo ye wɔ fonlomo anzɛɛ kyɛnze anzɛɛ kyɛnze ɛdɛbaa nu+ la le ɛsɔfo ne mɔɔ kɛva kɛbɔ afɔle la ɛdeɛ.+
10 Noko ma afɔlebɔdeɛ biala mɔɔ bɛva nwole bɛfɔtɔ+ anzɛɛ ɔle resee+ la bayɛ Aalɔn amra mrenyia ne mɔ amuala ɛdeɛ; bɛbahyɛ ye pɛpɛɛpɛ.
11 “‘Saa awie bɔ anzodwolɛ afɔle+ amaa Gyihova a, nwolɛ mɛla ɛne:
12 Saa moyɛlɛ ti a ɔfa yeara a,+ ɔwɔ kɛ ɔfa paano mɔɔ mgbɔvonle ɛnle nu mɔɔ bɛva nwole bɛfete na bɛbɔ ye kɛ ngɛba, paano ndɛbandɛba mɔɔ mgbɔvonle ɛnle nu mɔɔ bɛva nwole bɛha ɔ nyunlu yɛɛ esamo motoo paano mɔɔ bɛva nwole bɛfɔtɔ ye kpalɛ na bɛbɔ ye kɛ ngɛba la ɔboka moyɛlɛ afɔlebɔdeɛ ne anwo ɔba.
13 Eza ɔbava paano mɔɔ mgbɔvonle wɔ nu mɔɔ bɛbɔ ye kɛ ngɛba la yeaboka ye anzodwolɛ afɔlebɔdeɛ ne anwo yeara kɛ moyɛlɛ afɔlebɔlɛ.
14 Ɔbaye paano ngakyile ɛhye mɔ biala ko yeamaa Gyihova kɛ afɔlebɔdeɛ nwuanzanwuanza; ɔbayɛ ɛsɔfo ne mɔɔ bava anzodwolɛ afɔlebɔdeɛ mogya ne akponde afɔlemokyea ne anwo la ɛdeɛ.+
15 Ɔwɔ kɛ bɛdi ye anzodwolɛ afɔlebɔdeɛ ne mɔɔ bɛbava bɛabɔ moyɛlɛ afɔle ne la nane ne kenle ko ne ala. Ɔnle kɛ ɔfa bie ɔsie ɔmaa aleɛ kye zo.+
16 “‘Saa ɛwɔkɛbɔlɛ ti a ɔbɔ afɔle ne+ anzɛɛ ɔfi ye ɛhulolɛ nu+ a yeabɔ a, ɔwɔ kɛ bɛdi afɔlebɔdeɛ ne kenle ko ne mɔɔ ɔbabɔ ye afɔle ne la, na bie ka na aleɛ kye zo a, bɛbahola bɛali.
17 Na saa nane ne bie ka na ɔdi kenle nsa a, ɔwɔ kɛ bɛfa senle bɛyela ye.+
18 Noko saa afɔlebɔdeɛ ne bie ka na ɔdi kenle nsa na bɛdi a, bɛnrɛlie ahenle mɔɔ vale rale la bɛnrɛdo nu. Ɔnrɛnyia nwolɛ ɛlolɛ; ɔle kyibadeɛ, na awie* mɔɔ kɛli bie la bali ye ɛtane ne anwo ɛzonle.+
19 Ɔnle kɛ bɛdi nane biala mɔɔ kɛha debie mɔɔ anwo ɛnde la. Ɔwɔ kɛ bɛfa senle bɛyela ye. Awie biala mɔɔ anwo ɛtɛguale evinli la bahola ali nane ne mɔɔ anwo te la bie.
20 “‘Noko awie* biala mɔɔ anwo ɛgua evinli na ɔkɛli anzodwolɛ afɔlebɔdeɛ ne mɔɔ le Gyihova ɛdeɛ la nane ne bie la, ɔwɔ kɛ bɛye* zɔhane sonla* ne bɛfi ye menli ne avinli.+
21 Saa awie* anwo ka debie biala mɔɔ anwo ɛnde, sonla o,+ nane o,+ anzɛɛ kyibadeɛ debie biala+ na ɔdi anzodwolɛ afɔlebɔdeɛ ne mɔɔ le Gyihova ɛdeɛ la nane ne bie a, ɔwɔ kɛ bɛye* zɔhane sonla* ne bɛfi ye menli ne avinli.’”
22 Gyihova doale zo zele Mosisi kɛ:
23 “Ka kile Yizilayɛma kɛ, ‘Bɛmmadi ɛnlankɛ anzɛɛ boane anzɛɛ abɔnkye biala ɛnlome.+
24 Bɛbahola bɛava nane mɔɔ ɛwu nee nane mɔɔ ɔ gɔnwo nane ɛhu ye la ɛnlome bɛayɛ debie gyɛne, noko ɔnle kɛ bɛdi bie fee.+
25 Ɔluakɛ awie biala mɔɔ kɛli nane mɔɔ yeva yera kɛ bɛva senle bɛyela bɛbɔ afɔle bɛmaa Gyihova la ɛnlome la, ɔwɔ kɛ bɛye* ye bɛfi ye menli ne avinli.
26 “‘Ɔnle kɛ bɛdi mogya+ biala wɔ ɛleka biala mɔɔ bɛkɛdɛnla la, aloma o, nane o, bɛmmadi ye mogya.
27 Awie* biala mɔɔ kɛli mogya la, ɔwɔ kɛ bɛye*+ ye bɛfi ye menli ne avinli.’”
28 Gyihova doale zo zele Mosisi kɛ:
29 “Ka kile Yizilayɛma kɛ, ‘Awie biala mɔɔ bɔ anzodwolɛ afɔle amaa Gyihova la ɛva ye anzodwolɛ afɔlebɔdeɛ ne bie ɛrɛlɛ Gyihova.+
30 Ɔdaye mumua ne ɔbava ɛnlome ne+ nee ɔ kɛnra ne yealɛ ɔ sa nu yeara kɛ afɔle mɔɔ bɛva senle bɛbɔ bɛmaa Gyihova la, na yeado ye ehono kɛ ehono afɔlebɔdeɛ+ wɔ Gyihova anyunlu.
31 Ɛsɔfo ne bayela ɛnlome ne wɔ afɔlemokyea ne azo,+ noko ɔ kɛnra ne bayɛ Aalɔn nee ɔ mra mrenyia ne mɔ ɛdeɛ.+
32 “‘Bɛbava bɛ anzodwolɛ afɔlebɔdeɛ ne agyakɛ fema ne bɛamaa ɛsɔfo ne kɛ afɔlebɔdeɛ nwuanzanwuanza.+
33 Aalɔn ara nrenyia ne mɔɔ bava anzodwolɛ afɔlebɔdeɛ ne mogya ne nee ɛnlome ne abɔ afɔle la bava ɔ gyakɛ fema ne kɛ ye kyɛfoa.+
34 Ɔluakɛ meye ɔ kɛnra ne mɔɔ bɛdo ye ehono nee ɔ gyakɛ ne mɔɔ le afɔlebɔdeɛ nwuanzanwuanza la mevi Yizilayɛma anzodwolɛ afɔlebɔlɛ ne anu na meva memaa ɛsɔfo Aalɔn nee ɔ mra mrenyia ne mɔ, ɔle mɛla mɔɔ wɔ ɛkɛ ne dahuu maa Yizilayɛma.+
35 “‘Ɛhye le afɔle mɔɔ bɛva senle bɛbɔ bɛmaa Gyihova la anu kyɛfoa mɔɔ bɛva bɛmaa Aalɔn nee ɔ mra ɛsɔfo ne mɔ wɔ kenle mɔɔ bɛyele bɛ kɛ Gyihova ɛsɔfoma la.+
36 Gyihova hanle hilele Yizilayɛma kɛ bɛva foa ɛhye bɛmaa bɛ wɔ kenle mɔɔ bɛkpokpale bɛ la.+ Ɔle mɛla mɔɔ wɔ ɛkɛ ne dahuu wɔ bɛ awolɛndoazo kɔsɔɔti anu a.’”
37 Ɛyelalɛ afɔlebɔlɛ,+ ma afɔlebɔlɛ,+ ɛtane afɔlebɔlɛ,+ fɔlɛlilɛ afɔlebɔlɛ,+ ɛsɔfo ɛkpalɛ afɔlebɔlɛ+ yɛɛ anzodwolɛ afɔlebɔlɛ+ ne mɔ anwo mɛla
38 mɔɔ Gyihova vale maanle Mosisi wɔ Saenae Boka ne azo+ wɔ kenle mɔɔ ɔhanle ɔhilele Yizilayɛma kɛ bɛva bɛ afɔlebɔdeɛ bɛrɛlɛ Gyihova wɔ Saenae fienemgbole ne anu+ la ɛne.
Ɔbodwɛkɛ
^ Anzɛɛ “ɛkɛla.”
^ Anzɛɛ “ɛkɛla.”
^ Anzɛɛ “bɛku.”
^ Anzɛɛ “ɛkɛla.”
^ Anzɛɛ “ɛkɛla.”
^ Anzɛɛ “bɛku.”
^ Anzɛɛ “ɛkɛla bie.”
^ Anzɛɛ “bɛku.”
^ Anzɛɛ “Ɛkɛla.”
^ Anzɛɛ “bɛku.”
