Mrɛlɛbulɛ 29:1-27
29 Sonla mɔɔ bɛtwi ɔ nyunlu fane dɔɔnwo a ɔyɛ ɔ kɔme ketee* la,+Bɛbazɛkye ye arɛlevilɛ nu mɔɔ bɛnrɛhola bɛnrɛyɛ ye ayile a.+
2 Saa tenlenema anwo so a, menli ne di fɛlɛko,Noko saa amumuyɛnli ɛlɛdi tumi a, menli ne kponle.+
3 Sonla mɔɔ kulo nrɛlɛbɛ la maa ye papa di fɛlɛko,+Noko sonla mɔɔ nee tuutuuma tu la sɛkye ye anwonyia.+
4 Belemgbunli dua pɛlepɛlelilɛ zo maa ye maanle ne gyinla,+Noko sonla mɔɔ die belaebo la sɛkye ye.
5 Sonla mɔɔ kanvo ɔ gɔnwo adalɛ nu laFa avonle sua ɔ gɔnwo ne agyakɛ ɛhane.+
6 Ɛtanevolɛ mɛladonlɛ sua ye ɛhane,+Noko tenlenenli tea nu anyelielɛ nu na ɔdi fɛlɛko.+
7 Ehyianli edwɛkɛ hyia tenlenenli,+Noko ɛhye ɛnvale amumuyɛnli anwo.+
8 Menli mɔɔ tu bɛ nloa anu la maa senle tɔ suakpole zo,+Noko nrɛlɛbɛvolɛma si ɛyavalɛ adenle.+
9 Saa nrɛlɛbɛvolɛ nee koasea su kpolera a,Koasea ne teɛdea nu na ɔgolo ɔ nwo, noko nrɛlɛbɛvolɛ ne ɛnnyia debie kpalɛ biala ɛnvi nu.+
10 Ahodiawu kyi awie biala mɔɔ ɛnze nwolɛ bie la,*+Yɛɛ bɛkpondɛ kɛ bɛpɛ sonla mɔɔ le tenlene la ngoane* zo.*
11 Koasea sonla da ye nganeɛdelɛ* kɔsɔɔti ali,+Noko nrɛlɛbɛvolɛ komo ɔ nwo zo.*+
12 Saa tumivolɛ tie adalɛ edwɛkɛ a,Ye sonvolɛma kɔsɔɔti bayɛ amumuyɛma.+
13 Ehyianli nee nzisi sonla le ko:*
Gyihova a maa bɛ mu nwiɔ bɛ nye nwu wienyi a.*
14 Saa belemgbunli bua ehyianli ndɛne fɔɔnwo a,+Ye belemgbunli ebia ne bagyinla dahuu.+
15 Baka* nee ahwibɛnyunlu maa bɛnwu nrɛlɛbɛ,+Noko kakula mɔɔ bɛkɛdu ɔ nwo bɛkɛhyɛ ye la gua ye mame anyunlu aze.
16 Saa amumuyɛma anwo so a, mɛladonlɛ noko so,Noko tenlenema banwu bɛ azedɔlɛ.+
17 Tenrɛdenrɛ ɛ ra na ɔbamaa ɛ nzo nu adwo wɔ;Yɛɛ ɔbamaa ɛ nye* alie kpalɛ.+
18 Ɛleka mɔɔ ɛnyelɛzodeɛnwunlɛ* ɛnle la, menli ne yɛ debie biala mɔɔ bɛkulo la,+Noko anyelielɛ a le bɛdabɛ mɔɔ bɛdi mɛla ne azo la.+
19 Sonvolɛ ɛmmaa bɛnlua edwɛkɛ zo ala bɛndenrɛdenrɛ ye,Ɔluakɛ ɔte ɔ bo ɛdeɛ, noko ɔnli zo.+
20 Wɔnwu sonla mɔɔ pele ɔ nwo wɔ ye edwɛkɛ nwo la ɔ?+
Anyelazo wɔ ɛkɛ ne maa koasea bɔbɔ tɛla ye.+
21 Saa bɛdɛfɛdɛfɛ sonvolɛ bɛfi ye ngakula nu a,Nzinlii ɔbayɛ boniayɛ.*
22 Sonla mɔɔ ɛngyɛ na yeava ɛya la twehwe konle ba,+Awie biala mɔɔ fa ɛya mgbane mgbane la to mɛla dɔɔnwo.+
23 Sonla anwomemaazo babɛlɛ ye aze,+Noko mɔɔ le bɛlɛvo* la banyia anyunlunyia.+
24 Mɔɔ le awule agɔnwo la kpɔ ɔ nwo.*
Ɔbade ɛvɛlɛlɛ ne kɛ ɔrali nwolɛ daselɛ,* noko ɔnrɛha ɛhwee.+
25 Sonla nwo ɛzulolɛ le* ɛhane,+Noko bɛbabɔ mɔɔ fa ɔ nwo to Gyihova anwo zo la anwo bane.+
26 Menli dɔɔnwo kpondɛ kɛ tumivolɛ tie bɛ edwɛkɛ na ɔboa bɛ,*Noko Gyihova ɛkɛ ne a sonla nyia pɛlepɛlelilɛ fi a.+
27 Tenlenenli kyibadeɛ a le sonla mɔɔ ɛnli pɛlepɛle la,+Noko amumuyɛnli kyibadeɛ a le sonla mɔɔ ye ndenle le fɔɔnwo la.+
Ɔbodwɛkɛ
^ Anzɛɛ “ɔkɔ zo ɔyɛ anzosesebɛ.”
^ Anzɛɛ “edwɛkɛ ɛnle ɔ nwo la.”
^ Anzɛɛ “ɛkɛla.”
^ Anzɛɛ ɔkola ɔkile, “Noko tenlenenli kpondɛ kɛ ɔbɔ ye ngoane nwo bane.”
^ Hibulu aneɛ nu, “ye sunsum.”
^ Anzɛɛ “sɔ ɔ nwo.”
^ Hibulu aneɛ nu, “bɔ nu yia.”
^ Ɛhye kile, Ɔmaa bɛ ngoane.
^ Anzɛɛ “Ɛdenrɛdenrɛlɛ; Anzohwenlɛ.”
^ Anzɛɛ “wɔ ɛkɛla anye.”
^ Anzɛɛ “ngapezo ɛnyelɛzodeɛnwunlɛ; yekile.”
^ Anzɛɛ “anzeayɛlɛ.”
^ Hibulu aneɛ nu, “mɔɔ ye sunsum le bɛlɛvo.”
^ Anzɛɛ “ɔdaye ye ɛkɛla.”
^ Anzɛɛ “amowa ndane ne.”
^ Anzɛɛ “sua.”
^ Anzɛɛ ɔkola ɔkile, “kpondɛ ɔ nyunlu ɛlolɛ.” Hibulu aneɛ nu, “kpondɛ ɔ nyunlu.”
