Mrɛlɛbulɛ 8:1-36
8 Asoo tɛ nrɛlɛbɛ a ɛlɛtea nu avɛlɛ la?
Asoo tɛ adwenlenunwunlɛ a ɛlɛmaa ɔ ne zo avɛlɛ la?+
2 Ɔgyinla anwuma+ wɔ adehane,Ɔgyinla nwɔnda ne mɔ azo.
3 Ɔtea nu kpoleWɔ suakpole ne nlenkɛ mgbole ne mɔ anloa,Wɔ anuhɔlɛ ne nlenkɛ ne mɔ anloa kɛ:+
4 “O menli, bɛmɛ a melɛfɛlɛ bɛ a;Memaa me ne zo mefɛlɛ awie biala.*
5 Bɛmɛ mɔɔ bɛnlɛ anwubielɛ la, bɛzukoa nrɛlɛbɛ;+Bɛmɛ ahoasea, bɛnyia ndelebɛbo ahonle.
6 Bɛdie, ɔluakɛ mɔɔ meka la anwo hyia,Me nloa ka mɔɔ le kpalɛ la;
7 Ɔluakɛ meka me ne aze mefa me nloa meka nɔhalɛ ne,Na me nloa babonle ne kyi amumuyɛ edwɛkɛ.
8 Edwɛkɛ mɔɔ vi me nloa anu la kɔsɔɔti le tenlene.
Nuhua biala ɛtɛkyibale anzɛɛ ɛtɛkyeale.
9 Bɛ muala bɛtenrɛ fɔɔnwo bɛmaa mɔɔ lɛ adwenlenunwunlɛ laYɛɛ bɛle kpalɛ bɛmaa bɛdabɛ mɔɔ bɛnwu nrɛlɛbɛ la.
10 Fa me ɛdenrɛdenrɛlɛ na gyakyi dwɛtɛ fufule,Yɛɛ nrɛlɛbɛ na gyakyi nvutuke tagyee,+
11 Ɔluakɛ nrɛlɛbɛ le kpalɛ tɛla ezukoa bolɛ kɔkɔlɛ;*Debie gyɛne biala mɔɔ sonla kulo la nee ye ɛnzɛ.
12 Medame nrɛlɛbɛ, me nee badwema a de a;Melɛ ndelebɛbo nee adwenlenubukelɛ.+
13 Gyihova ɛzulolɛ le ɛtane ɛhyilɛ.+
Mekyi adubɛnwo nee anwomemaazo+ nee amumuyɛ adenle yɛɛ mɛlɛbɛla ɛdendɛlɛ.+
14 Melɛ folɛdulɛ kpalɛ yɛɛ nrɛlɛbɛ kpalɛ;+Ndelebɛbo+ nee tumi+ le me ɛdeɛ.
15 Me nwo zo a arelemgbunli dua di tumi a,Yɛɛ suakunlu mgbanyima dua me nwo zo di tenleneyɛlɛ nwo mɛla.+
16 Me nwo zo a tumivolɛma dua di tumi a,Yɛɛ menli titili dua me nwo zo bua ndɛne fɔɔnwo.*
17 Mekulo bɛdabɛ mɔɔ bɛkulo me la,Na bɛdabɛ mɔɔ bɛkpondɛ me bo zo la banwu me.+
18 Anwonyia nee anyunlunyia le me ɛdeɛ,Agyapadeɛ mɔɔ wɔ ɛkɛ ne dahuu la nee tenleneyɛlɛ.
19 Ma mɔɔ meso la le kpalɛ tɛla nvutuke, bɔbɔ nvutuke mɔɔ bɛdu nuhua evinli la,Yɛɛ ninyɛne mɔɔ mefa memaa la le kpalɛ tɛla dwɛtɛ fufule.+
20 Medua tenleneyɛlɛ adenle nu,Medua pɛlepɛlelilɛ ndenle avinli;
21 Mefa agyapadeɛ kpalɛ memaa bɛdabɛ mɔɔ bɛkulo me la,Yɛɛ memaa bɛ ninyɛnezielɛ ɛleka ne mɔ yi tetɛkɛɛ.
22 Gyihova bɔle me kɛ ye adenle ne mɔlebɛbo,+Ye tete gyima ne mɔ anu mɔɔ limoa.+
23 Ɔvale me ɔziele ɛkɛ ɔvi tete,+Ɔvi mɔlebɛbo ne, kolaa na bava azɛlɛ ne bazie ɛkɛ.+
24 Mekɛ mɔɔ ɛnee azule kuma ɛnle ɛkɛ ne la,+ yɛɛ bɛwole me a,Mekɛ mɔɔ ɛnee nzubula mɔɔ maa nzule se ɛnle ɛkɛ ne la.
25 Kolaa na bɛava awoka bɛaziezie ɛkɛ,Kolaa na awoka ngyikyi ara la, ɛnee bɛwo me,
26 Mekɛ mɔɔ ɛnee ɔtɛyɛle azɛlɛ ne nee zolɛ kpɔkɛAnzɛɛ azɛlɛ ne azo ndɛtɛlɛ mɔɔ limoa la.
27 Mekɛ mɔɔ ɔzieziele anwuma ne la,+ ɛnee mewɔ ɛkɛ;Mekɛ mɔɔ ɔpɛle kutukpunli wɔ nzule ne mɔ anye la,+
28 Mekɛ mɔɔ ɔvale amungu ne mɔ ɔhendanle anwuma,Mekɛ mɔɔ ɔyɛle azule kuma ne mɔ ɛvileka la,
29 Mekɛ mɔɔ ɔgyale nyevile ne ɛweɛneAmaa nuhua nzule ne mɔ ambulu ye mɛla zo,+Mekɛ mɔɔ ɔwulale azɛlɛ ne adiabo ne mɔ aze la,
30 Ɛnee mewɔ ɔ nwo ɛkɛ ne kɛ gyimayɛvo mɔɔ ɛbe.+Ɛnee medame a ɔkulo me edwɛkɛ kpalɛ alehyenlɛ biala a;+Ɛnee me nye die wɔ ɔ nyunlu mekɛ biala;+
31 Me nye liele ye azɛlɛ ne mɔɔ menli badɛnla zolɛ la anwo,Na ɛnee mekulo alesama edwɛkɛ kpalɛ.
32 Na kɛkala, me mra, bɛdie me;Ɛhɛe, anyelielɛ a le bɛdabɛ mɔɔ bɛdua me ndenle ne mɔ azo la.
33 Tie ɛdenrɛdenrɛlɛ+ na nwu nrɛlɛbɛ,Na mmabu ɛ nye ɛgua zolɛ ɛlɛ.
34 Anyelielɛ a le sonla ne mɔɔ tie meNa ɔba me nlenkɛ ne mɔ anwo ndɛ alehyenlɛ biala,Na ɔkendɛ me wɔ me nlenkɛ felɛmo ne mɔ anloa* la;
35 Ɔluakɛ mɔɔ kɛnwu me la banyia ngoane,+Na ɔbanyia Gyihova anyunlu ɛlolɛ.*
36 Noko mɔɔ kpo me la sɛkye ɔ nwo,*Yɛɛ bɛdabɛ mɔɔ bɛkyi me la kulo ewule.”+
Ɔbodwɛkɛ
^ Hibulu aneɛ nu, “alesama.”
^ Nea Edwɛkɛbohilelɛ.
^ Anzɛɛ “tenlene.”
^ Anzɛɛ “me anuhɔlɛ ne.”
^ Anzɛɛ “ɔbalie ye yeado nu.”
^ Anzɛɛ “ye ɛkɛla.”
