Nɔmbɛse 10:1-36
10 Akee Gyihova zele Mosisi kɛ:
2 “Fa hamenle bolo dwɛtɛ fufule yɛ aweɛne ndendenle nwiɔ,+ na bɔ fɛlɛ menli ne maa bɛyia na eza bɛdu bɛ bo.
3 Saa ɛbɔ aweɛne nwiɔ ne a, ɔwɔ kɛ menli ne amuala bayia ɛ nwo ɛkɛ wɔ nyianu ɛdanlɛsua ne anuhɔlɛ.+
4 Saa ɛbɔ kokye ala a, ɔwɔ kɛ mgbanyima ne mɔ mɔɔ deda Yizilayɛma apenle apenle anloa la ala a bayia ɛ nwo ɛkɛ a.+
5 “Saa ɛbɔ aweɛne ne ɛmaa ɔ ne kɔ anwuma ba aze a, ɔwɔ kɛ bɛdabɛ mɔɔ bɛ azokoɛleɛ wɔ aduduleɛ la tu bɛ bo.+
6 Saa ɛbɔ aweɛne ne ɛmaa ɔ ne kɔ anwuma ba aze fane nwiɔ a, ɔwɔ kɛ bɛdabɛ mɔɔ bɛ azokoɛleɛ wɔ nyiakɛ la+ tu bɛ bo. Mekɛ biala mɔɔ bɛ nuhua ko ɛlɛtu ɔ bo la, ɔwɔ kɛ bɛbɔ aweɛne ne wɔ adenle ɛhye azo.
7 “Saa bɛfɛlɛ menli ne bɛamaa bɛayia a, ɔwɔ kɛ bɛbɔ aweɛne ne mɔ,+ noko ɔnle kɛ bɛmaa ɔ ne kɔ anwuma ba aze.
8 Ɔwɔ kɛ Aalɔn amra mrenyia ɛsɔfo ne mɔ a bɔ aweɛne ne mɔ a,+ na ɛhye le mɛla mɔɔ wɔ ɛkɛ ne dahuu wɔ bɛ awolɛndoazo kɔsɔɔti anu a.
9 “Saa ɔwɔ kɛ bɛ nee awie mɔɔ ɛlɛsisi bɛ wɔ bɛ azɛlɛ ne azo na ɔlɛgyegye bɛ la kɔ konle a, bɛbɔ aweɛne ne mɔ bɛhile kɛ bɛkɔ konle,+ na Gyihova bɛ Nyamenle ne bahakye bɛ na yealie bɛ yeavi bɛ kpɔvolɛma asa anu.
10 “Eza saa bɛlɛdie bɛ nye a+—bɛ ɛvoyia ne mɔ+ yɛɛ mekɛ mɔɔ bɛlɛbɔ siane fofolɛ bo la—bɛbɔ aweɛne ne mɔ wɔ bɛ ɛyelalɛ afɔlebɔlɛ+ nee bɛ anzodwolɛ afɔlebɔlɛ ne mɔ anwo;+ bɛbayɛ ngakyelɛ bɛamaa bɛ wɔ bɛ Nyamenle ne anyunlu. Medame a mele Gyihova bɛ Nyamenle ne a.”+
11 Akee wɔ ɛvolɛ nwiɔ ne anu siane mɔɔ tɔ zo nwiɔ la kenle 20 ne azo,+ amungu ne maanle ɔ nwo zo wɔ Daselɛlilɛ ɛdanlɛsua ne azo.+
12 Yemɔti Yizilayɛma vi Saenae fienemgbole ne anu dule bɛ bo kɛ mɔɔ bɛhyehyɛ bɛmaa bɛ la,+ na amungu ne hɔgyinlanle Peelan fienemgbole ne anu.+
13 Ɛhye a le mekɛ mɔɔ limoa mɔɔ bɛluale edwɛkɛ mɔɔ Gyihova hanle hilele Mosisi la azo bɛdule bɛ bo a.+
14 Ɔti mbusua ekpunli nsa ɛlɔne ne* mɔɔ Dwudama la bɛ nloa la limoale dule bɛ bo, Amenadabe ara Nahyɔn+ a li ye ɛlɔne ne ati a.
15 Zuwaa ara Nɛtanɛle+ a li Yesakaa abusua ne ɛlɔne ne ati a.
16 Hilɔn ara Ɛlayabe+ a li Zɛbulɛn abusua ne ɛlɔne ne ati a.
17 Mɔɔ bɛdudule ɛdanlɛsua ne la,+ Gɛhyɔnoma+ nee Mɛlɛlaema+ mɔɔ soa ɛdanlɛsua ne la dule bɛ bo.
18 Akee mbusua ekpunli nsa ɛlɔne ne* mɔɔ Wulubɛn abusua ne la bɛ nloa la dule bɛ bo, Hyɛdiyɛ ara Ɛlaezɛ+ a li ye ɛlɔne ne ati a.
19 Zulehyadae ara Hyɛlɛmeɛle a li Semɛyɔn abusua ne ɛlɔne ne ati a.+
20 Duwɛle ara Yilayasafe+ a li Gaade abusua ne ɛlɔne ne ati a.
21 Akee Kohatema mɔɔ soa ɛleka nwuanzanwuanza ne ninyɛne ne mɔ la+ dule bɛ bo. Ɔwɔ kɛ bɛkadwu ɛkɛ ne la ɛnee bɛhyehyɛ ɛdanlɛsua ne bɛwie.
22 Akee mbusua ekpunli nsa ɛlɔne ne* mɔɔ Yifelaemma la bɛ nloa la dule bɛ bo, Amehɛde ara Ɛlehyama+ a li ye ɛlɔne ne ati a.
23 Pɛdaazɛ ara Gameeleɛle a li Manasɛ abusua ne ɛlɔne ne ati a.+
24 Gedɛyonae ara Abaedan a li Bɛngyaman abusua ne ɛlɔne ne ati a.+
25 Akee mbusua ekpunli nsa ɛlɔne ne* mɔɔ Dan abusua ne la bɛ nloa la dule bɛ bo, na bɛlile ɛlɔne ne amuala anzi, na Amehyadae ara Ahayizɛ+ a li ye ɛlɔne ne ati a.
26 Ɔkelan ara Peegeɛle+ a li Ahya abusua ne ɛlɔne ne ati a.
27 Yinan ara Ahaela+ a li Nafetalae abusua ne ɛlɔne ne ati a.
28 Ɛhye a le ngyehyɛleɛ mɔɔ ɛnee Yizilayɛma nee bɛ ɛlɔne ne* dua zo tu bɛ bo a.+
29 Akee Mosisi zele Medeanenli Riliwɛle*+ mɔɔ le Mosisi ase la ara Hobabe kɛ: “Yɛlɛkɔ ɛleka mɔɔ Gyihova hanle kɛ, ‘Mebava meamaa bɛ’ la.+ Maa yɛhɔ+ na yɛbayɛ wɔ boɛ, ɔluakɛ Gyihova ɛva ninyɛne mgbalɛ ɛbɔ Yizilayɛma ɛwɔkɛ.”+
30 Noko ɔzele ye kɛ: “Menrɛhɔ. Mesia meahɔ me maanle nu nee me mbusuafoɔ anwo lɔ.”
31 Na Mosisi hanle kɛ: “Mesɛlɛ wɔ, mmagyakyi yɛ ɛkɔ, ɔluakɛ wɔmɔ a ɛze ɛleka mɔɔ ɔwɔ kɛ yɛyɛ azokoɛleɛ wɔ fienemgbole ye anu a, na ɛbahola wɔahile yɛ adenle.*
32 Saa ɛmaa yɛkɔ a,+ kpalɛ biala mɔɔ Gyihova bayɛ amaa yɛ la, yɛbayɛ bie yɛamaa wɔ.”
33 Yemɔti bɛvile Gyihova boka ne+ anwo bɛdiale kenle nsa adenle, na bɛzoale Gyihova ngyekyeleɛ ɛlɛka ne+ bɛlile bɛ nyunlu kenle nsa ne kɛ bɛkakpondɛ ɛleka mɔɔ bɛbadɛnla la.+
34 Mekɛ mɔɔ bɛvi azokoɛleɛ ne bɛdule bɛ bo la, ɛnee Gyihova amungu ne+ wɔ bɛ nwo zo alehyenlɛ nu.
35 Mekɛ biala mɔɔ bɛ nee Ɛlɛka ne ɛlɛkɔ la, Mosisi ka kɛ: “O Gyihova,+ dwazo na maa wɔ kpɔvolɛma ɛbɔ asande na maa menli mɔɔ kyi wɔ la ɛnriandi ɛvi ɛ nyunlu.”
36 Noko saa bɛsie ye aze a, ɔka kɛ: “O Gyihova, sia bɛla Yizilayɛma apenle apenle* dɔɔnwo ne anwo ɛke.”+
Ɔbodwɛkɛ
^ Hibulu aneɛ nu, “kɛ mɔɔ bɛ konle ɛlɔne ne mɔ de la.”
^ Hibulu aneɛ nu, “kɛ mɔɔ bɛ konle ɛlɔne ne mɔ de la.”
^ Hibulu aneɛ nu, “kɛ mɔɔ bɛ konle ɛlɔne ne mɔ de la.”
^ Hibulu aneɛ nu, “kɛ mɔɔ bɛ konle ɛlɔne ne mɔ de la.”
^ Hibulu aneɛ nu, “kɛ mɔɔ bɛ konle ɛlɔne ne mɔ de la.”
^ Ɛhye kile, Gyɛtulo.
^ Anzɛɛ “wɔayɛ yɛ nye.”
^ Anzɛɛ “mgbe mgbe.”
