Nɔmbɛse 3:1-51
3 Ɛhye mɔ a le Aalɔn nee Mosisi abusua ɛlɔnwɔne* ne wɔ kenle mɔɔ Gyihova dendɛle hilele Mosisi wɔ Saenae Boka ne azo la.+
2 Aalɔn amra mrenyia ne mɔ aluma ɛne: Needabe le belamunli ralɛ, akee Abaehu,+ Ɛlieza+ yɛɛ Yetamaa.+
3 Ɛhye mɔ a le Aalɔn amra mrenyia ne mɔ mɔɔ bɛkpokpale bɛ na bɛkpale bɛ* kɛ ɛsɔfoma la.+
4 Noko Needabe nee Abaehu wule wɔ Gyihova anyunlu wɔ mekɛ mɔɔ bɛvale senle mɔɔ tia mɛla la bɛhɔle Gyihova anyunlu+ wɔ Saenae fienemgbole ne anu la, na bɛanwo mralɛ. Noko Ɛlieza+ nee Yetamaa+ yɛɛ bɛ papa Aalɔn hɔle zo yɛle ɛsɔfo gyima ne.
5 Akee Gyihova zele Mosisi kɛ:
6 “Fa Livae abusua ne+ bɛla ɛsɔfo Aalɔn anyunlu, na bɛbayɛ gyima bɛaboa ye.+
7 Bɛbayɛ ɛdanlɛsua ne anwo gyima ne amuala wɔ nyianu ɛdanlɛsua ne anyunlu bɛamaa ɔdaye nee menli ne amuala.
8 Bɛbanlea nyianu ɛdanlɛsua ne anu ninyɛne ne amuala azo+ na bɛayɛ ɛdanlɛsua ne anwo gyima ne bɛamaa Yizilayɛma.+
9 Ɛbava Livaema wɔamaa Aalɔn nee ɔ mra mrenyia ne mɔ. Bɛle menli mɔɔ bɛye bɛ bɛvi Yizilayɛma anu bɛva bɛmaa ye a.+
10 Ɔwɔ kɛ ɛkpa Aalɔn nee ɔ mra mrenyia ne mɔ ɛmaa bɛyɛ bɛ ɛsɔfo gyima ne,+ na awie biala mɔɔ ɛnlɛ adenle* mɔɔ ɔkɛbikye ɛkɛ la, ɔwɔ kɛ bɛku ye.”+
11 Gyihova doale zo zele Mosisi kɛ:
12 “Nea! Meye Livaema mevi Yizilayɛma avinli meva mezie Yizilayɛma belamunli mralɛ* kɔsɔɔti agyakɛ anu,+ na Livaema bayɛ me ɛdeɛ.
13 Ɔluakɛ belamunli ralɛ biala le me ɛdeɛ.+ Kenle mɔɔ mengunle belamunli ralɛ biala mɔɔ wɔ Yigyibiti azɛlɛ zo la,+ mendele belamunli ralɛ biala mɔɔ wɔ Yizilayɛ la anwo memaanle me nwo, ɔvi sonla nwo zo kɔdwu nane nwo zo.+ Bɛbayɛ me ɛdeɛ. Medame a mele Gyihova a.”
14 Gyihova zele Mosisi wɔ Saenae fienemgbole ne anu bieko+ kɛ:
15 “Tia Livaema wɔ bɛ papa mɔ mbusua nee bɛdabɛ bɛ mbusua nu. Tia nrenyia biala mɔɔ ɛli siane ko mɔɔ kɔ la.”+
16 Yemɔti Mosisi dianle bɛ kɛ mɔɔ Gyihova hanle hilele ye la pɛpɛɛpɛ.
17 Livae amra mrenyia ne mɔ aluma ɛne: Gɛhyɔn, Kohate yɛɛ Mɛlɛlae.+
18 Gɛhyɔn amra mrenyia ne mɔ nee bɛ mbusua ɛne: Lebenae nee Hyemɛyae.+
19 Kohate amra mrenyia ne mɔ nee bɛ mbusua ɛne: Amelam, Yezehaa, Hibulɔn yɛɛ Ɛzeɛle.+
20 Mɛlɛlae amra mrenyia ne mɔ nee bɛ mbusua ɛne: Maalae+ nee Muhyae.+
Ɛhye mɔ a le Livaema nee bɛ papa mɔ mbusua ne.
21 Lebenaema nee Hyemɛyaema mbusua ne vi Gɛhyɔn anu.+ Gɛhyɔnoma mbusua ne mɔ ɛne.
22 Mrenyia mɔɔ ɛli siane ko mɔɔ kɔ mɔɔ bɛdianle bɛ la amuala dodo le 7,500.+
23 Gɛhyɔnoma mbusua ne mɔ yɛle bɛ azokoɛleɛ wɔ ɛdanlɛsua ne anzi+ wɔ adɔleɛ.
24 Gɛhyɔnoma abusua kpanyinli a le Leeyɛle ara Yilayasafe.
25 Ɛnee Gɛhyɔnoma gyima+ mɔɔ bɛyɛ wɔ nyianu ɛdanlɛsua ne anu la a le kɛ bɛbanlea ɛdanlɛsua ne,+ ɛdanlɛ mɔɔ heda zolɛ,+ ɛdanlɛ* ne mɔɔ henda+ nyianu ɛdanlɛsua ne anuhɔlɛ ne,
26 ndanlɛ mɔɔ henda+ alienwo ɛkɛ, ɛdanlɛsua ne nee afɔlemokyea ne alienwo ɛkɛ ne anuhɔlɛ ɛdanlɛ* ne,+ ye nyɛma ne mɔ yɛɛ nwolɛ gyima ne amuala azo.
27 Amelamma, Yezehaama, Hibulɔnoma yɛɛ Ɛzeɛlema mbusua ne mɔ vi Kohate anu. Kohatema mbusua ne mɔ ɛne.+
28 Mrenyia mɔɔ ɛli siane ko mɔɔ kɔ mɔɔ bɛdianle bɛ la amuala dodo le 8,600; bɛdabɛ a bɛyɛ nwuanzanwuanza ɛleka ne ɛkɛ ne gyima a.+
29 Kohate mbusua ne mɔ yɛle bɛ azokoɛleɛ wɔ ɛdanlɛsua ne nyiakɛ.+
30 Kohatema abusua kpanyinli a le Ɛzeɛle ara Ɛlezeefan.+
31 Bɛ gyima a le kɛ bɛbanlea Ɛlɛka ne,+ ɛkponle ne,+ kɛnlaneɛbaka ne,+ afɔlemokyea ne mɔ,+ ninyɛne mɔɔ bɛfa bɛyɛ gyima+ wɔ ɛleka nwuanzanwuanza ne, anlenkɛnudanlɛ* ne+ yɛɛ nwolɛ gyima kɔsɔɔti azo.+
32 Livaema abusua kpanyinli a le ɛsɔfo Aalɔn ara Ɛlieza+ mɔɔ nea menli mɔɔ yɛ gyima wɔ nwuanzanwuanza ɛleka ne la anwo zo la.
33 Maalaema nee Muhyaema mbusua ne mɔ vi Mɛlɛlae anu. Mɛlɛlae mbusua ne mɔ ɛne.+
34 Mrenyia mɔɔ ɛli siane ko mɔɔ kɔ mɔɔ bɛdianle bɛ la amuala dodo le 6,200.+
35 Mɛlɛlaema abusua kpanyinli a le Abeheli ara Zuleɛle. Bɛyɛle bɛ azokoɛleɛ wɔ ɛdanlɛsua ne sɔlɔ.+
36 Mɛlɛlaema nea ɛdanlɛsua ne felɛmo ne mɔ,+ ye meɛbeanu mbaka,+ ye mpila ne mɔ,+ ye adiabo ne mɔ, nwolɛ ninyɛne kɔsɔɔti+ yɛɛ nwolɛ gyima kɔsɔɔti azo,+
37 eza bɛnea alienwo ɛkɛ ne mpila ne mɔ kɔsɔɔti nee bɛ adiabo ne mɔ,+ bɛ adakola yɛɛ bɛ nyɛma ne mɔ azo.
38 Mosisi nee Aalɔn yɛɛ ɔ mra mrenyia ne mɔ yɛle bɛ azokoɛleɛ wɔ ɛdanlɛsua ne anyunlu wɔ aduduleɛ afoa nu, mɔɔ le nyianu ɛdanlɛsua ne aduduleɛ la. Ɛnee bɛ gyima a le kɛ bɛbanlea nwuanzanwuanza ɛleka ne azo bɛamaa Yizilayɛma. Awie biala mɔɔ ɛnlɛ adenle* mɔɔ kɛbikye nwolɛ la, bɛbahu ye.+
39 Livae mrenyia kɔsɔɔti mɔɔ ɛli siane ko mɔɔ kɔ, mɔɔ Gyihova maanle Mosisi nee Aalɔn dianle bɛ wɔ bɛ mbusua ne mɔ anu la le 22,000.
40 Akee Gyihova zele Mosisi kɛ: “Kɛlɛ Yizilayɛma belamunli mralɛ mrenyia kɔsɔɔti mɔɔ ɛli siane ko mɔɔ kɔ la aluma,+ tia bɛ na kɛlɛ bɛ dodo ne.
41 Fa Livaema sie Yizilayɛma belamunli mralɛ kɔsɔɔti agyakɛ anu,+ na fa Livaema nyɛmoa sie Yizilayɛma nyɛmoa belamunli mralɛ kɔsɔɔti agyakɛ anu. Medame a mele Gyihova a.”+
42 Akee Mosisi dianle Yizilayɛma belamunli mralɛ kɔsɔɔti kɛ mɔɔ Gyihova zele ye la.
43 Belamunli mralɛ mrenyia kɔsɔɔti mɔɔ ɛli siane ko mɔɔ kɔ mɔɔ ɔdianle bɛ la dodo le 22,273.
44 Gyihova doale zo zele Mosisi kɛ:
45 “Fa Livaema sie Yizilayɛma belamunli mralɛ kɔsɔɔti agyakɛ anu, na fa Livaema nyɛmoa sie Yizilayɛma nyɛmoa belamunli mralɛ kɔsɔɔti agyakɛ anu, na Livaema ne bayɛ me ɛdeɛ. Medame a mele Gyihova a.
46 Na Yizilayɛma belamunli mralɛ 273 ne mɔɔ bole Livaema ne anwo zo la+ ɛkpɔnelɛ ezukoa ne ɛdeɛ,+
47 ɔwɔ kɛ ɛdie sonla ko biala ati bolɛ hyikɛle* nnu,+ kɛ mɔɔ bɛsuzu hyikɛle wɔ ɛleka nwuanzanwuanza ne la.* Hyikɛle ko le gilaa* 20.+
48 Ɛbava ezukoa ne wɔamaa Aalɔn nee ɔ mra mrenyia ne mɔ kɛ menli mɔɔ bole zolɛ la ɛkpɔnelɛ ezukoa ɔ.”
49 Ɔti Mosisi liele ɛkpɔnelɛ ezukoa ne na ɔvale ɔkpɔnenle bɛdabɛ mɔɔ bɛbole Livaema ne anwo zo la.
50 Ɔliele ezukoa ne ɔvile Yizilayɛma belamunli mralɛ ne mɔ ɛkɛ, ɔle hyikɛle 1,365 kɛ mɔɔ bɛsuzu hyikɛle wɔ ɛleka nwuanzanwuanza ne la.
51 Akee Mosisi vale ɛkpɔnelɛ ezukoa ne maanle Aalɔn nee ɔ mra mrenyia ne mɔ kɛ mɔɔ Gyihova hanle la,* na Mosisi yɛle mɔɔ Gyihova hanle la pɛpɛɛpɛ.
Ɔbodwɛkɛ
^ Hibulu aneɛ nu, “awolɛndoazo ne mɔ.”
^ Hibulu aneɛ nu, “na bɛvale tumi bɛwulale bɛ sa nu.”
^ Hibulu aneɛ nu, “ɛyɛvolɛ biala,” ɛhye kile, awie mɔɔ ɛnvi Aalɔn abusua ne anu la.
^ Hibulu aneɛ nu, “belamunli ralɛ biala mɔɔ kɛde awodeɛ ne anloa la.”
^ Anzɛɛ “mgbɛnudanlɛ.”
^ Anzɛɛ “mgbɛnudanlɛ.”
^ Anzɛɛ “mgbɛnudanlɛ.”
^ Hibulu aneɛ nu, “Ɛyɛvolɛ biala,” ɛhye kile, awie mɔɔ ɛnle Livaenli la.
^ Anzɛɛ “kɛ mɔɔ nwuanzanwuanza ɛkɛ ne hyikɛle ne de la.”
^ Hibulu aneɛ nu, “anloa edwɛkɛ de la.”
