Ndɛnebuavolɛma 10:1-18
10 Abemɛlɛke wule la, Dodo ara Pua ara Tola mɔɔ ɔvi Yesakaa abusua ne anu la dwazole kɛ ɔdie Yizilayɛma.+ Ɔdɛnlanle Hyeemɛ mɔɔ wɔ Yifelaem awoka ne mɔ azo la.
2 Ɔbuale Yizilayɛma ndɛne ɛvolɛ 23. Akee ɔwule na bɛziele ye wɔ Hyeemɛ.
3 Mɔɔ ɔwule la Geleadenli Gyeeyɛ rale na ɔbuale Yizilayɛ ndɛne ɛvolɛ 22.
4 Ɛnee ɔlɛ mralɛ mrenyia 30 mɔɔ bɛtɛnla asoaso 30 azo yɛɛ ɛnee bɛlɛ azua 30 mɔɔ bɛfɛlɛ bɛ Havɔto-gyeeyɛ too badwu ɛnɛ la;+ bɛwɔ Geleade azɛlɛ zo.
5 Nzinlii Gyeeyɛ wule na bɛziele ye wɔ Keemɔn.
6 Yizilayɛma yɛle ɛtane wɔ Gyihova anye+ zo bieko, na bɛzonlenle Beeyale ne mɔ,+ Ahyetɔlɛte ananze ne mɔ, Elam* nyamenle ne mɔ, Saedɛn nyamenle ne mɔ, Mowabe nyamenle ne mɔ,+ Amɔnoma nyamenle ne mɔ+ yɛɛ Filisitiama nyamenle ne mɔ.+ Bɛkpole Gyihova na bɛanzonle ye.
7 Gyihova vale Yizilayɛma anwo ɛya kpole na ɔdɔnenle bɛ ɔwulale Filisitiama nee Amɔnoma asa anu.+
8 Ɔti bɛhilele Yizilayɛma nyane na bɛsisile bɛ kpole wɔ zɔhane ɛvolɛ ne anu—bɛsisile Yizilayɛma kɔsɔɔti mɔɔ de Amɔlema azɛlɛ zo wɔ Geleade wɔ Dwɔdan ne anzi lɔ la ɛvolɛ 18.
9 Ɛnee Amɔnoma eza pɛ Dwɔdan ne na bɛ nee Dwuda nee Bɛngyaman yɛɛ Yifelaem abozoamra kɔko; na Yizilayɛma nwunle amaneɛ kpole.
10 Akee Yizilayɛma zunle vɛlɛle Gyihova kɛ ɔboa bɛ,+ na bɛhanle kɛ: “Yɛyɛ ɛtane yɛtia wɔ, ɔluakɛ yɛkpo yɛ Nyamenle ne na yɛzonle Beeyale ne mɔ.”+
11 Na Gyihova zele Yizilayɛma kɛ: “Meanlie bɛ meanvi Yigyibiti+ nee Amɔlema,+ Amɔnoma, Filisitiama,+
12 Saedɛnema, Amalɛkema yɛɛ Medeanema asa anu wɔ mekɛ mɔɔ ɛnee bɛlɛsisi bɛ la ɔ? Mekɛ mɔɔ bɛzunle bɛvɛlɛle me la menliele bɛ menvile bɛ sa nu.
13 Noko bɛkpole me na bɛzonlenle nyamenle gyɛne.+ Ɛhye ati a menrɛlie bɛ bieko la.+
14 Bɛdoa nyamenle ne mɔ mɔɔ bɛnyia bɛ la bɛhɔkpondɛ moalɛ.+ Bɛmaa bɛlie bɛ wɔ bɛ amaneɛnwunlɛ nu.”+
15 Noko Yizilayɛma zele Gyihova kɛ: “Yɛyɛ ɛtane. Debie biala mɔɔ le kpalɛ wɔ ɛ nye zo la fa yɛ yɛ. Noko yɛsɛlɛ wɔ, ɛnɛ kenle ye ɛdeɛ, die yɛ.”
16 Na bɛyele adalɛ nyamenle ne mɔ bɛvile bɛ avinli na bɛzonlenle Gyihova,+ yemɔti yeangola* yeannea Yizilayɛma amaneɛnwunlɛ ne bieko.+
17 Nzinlii, Amɔnoma+ boɔboale bɛ nloa na bɛyɛle bɛ azokoɛleɛ wɔ Geleade. Ɔti Yizilayɛma noko boɔboale bɛ nloa na bɛyɛle bɛ azokoɛleɛ wɔ Mezepa.
18 Na Geleade mgbanyima nee menli ne bizale bɛ nwo ngoko kɛ: “Nwane a bali yɛ nyunlu ahɔho atia Amɔnoma a?+ Maa ahenle zɔhane ɛnlea Geleadema kɔsɔɔti anwo zo.”
