Ndɛnebuavolɛma 12:1-15
12 Akee Yifelaem mrenyia boɔboale bɛ nloa, na bɛpɛle nu bɛhɔle Zeefɔn* na bɛzele Gyɛfeta kɛ: “Duzu ati a ɛ nee Amɔnoma kaho mɔɔ wɔanvɛlɛ yɛ a?+ Yɛbayela wɔ nee wɔ sua ne yeabɔ nu.”
2 Noko Gyɛfeta zele bɛ kɛ: “Konle kpole bie dɔle medame nee me menli ne nee Amɔnoma avinli. Menvɛlɛle bɛ kɛ bɛboa me, noko bɛanlie me bɛanvi bɛ sa nu.
3 Mɔɔ menwunle kɛ bɛnrɛlie me la, menzile kpɔkɛ kɛ mebava me ngoane meado esiane nu* me nee Amɔnoma ahɔho,+ na Gyihova vale bɛ wulale me sa nu. Ɔti duzu ati a ɛnɛ bɛra kɛ bɛ nee me baho a?”
4 Akee Gyɛfeta boɔboale Geleade mrenyia kɔsɔɔti anloa+ na bɛ nee Yifelaemma honle; Geleadema lile Yifelaemma anwo zo konim. Yifelaemma hanle kɛ: “Bɛmɛ Geleadema mɔɔ bɛwɔ Yifelaem nee Manasɛ, bɛle Yifelaemma mɔɔ ɛnriandilɛ ɛdɔ bɛ nwo.”
5 Geleadema limoale Yifelaemma anyunlu hɔziale Dwɔdan ne ɛleka mɔɔ bɛwudwu bɛpɛ la;+ saa Yifelaemma ɛlɛbɔ mɔdenle kɛ bɛnriandi a, bɛka bɛkile bɛ kɛ, “Bɛmaa mempɛ nu mengɔ”; akee Geleadema biza bɛ nuhua ko biala kɛ, “Ɛle Yifelaemenli ɔ?” Saa ɔbua kɛ, “Kyɛkyɛ!” a,
6 bɛka bɛkile ye kɛ, “Yesɛlɛ wɔ, ka kɛ Hyebɔlɛte.” Na kɛmɔ ɔngola ɔmbɔ edwɛkɛkpɔkɛ ne kpalɛ la ati, ɔka kɛ “Sebɔlɛte.” Akee bɛkye ye na bɛku ye wɔ Dwɔdan ne ɛleka mɔɔ bɛwudwu bɛpɛ la. Ɔti bɛhunle Yifelaemma 42,000 wɔ mekɛ zɔhane.
7 Gyɛfeta buale Yizilayɛma ndɛne ɛvolɛ nsia, ɛhye anzi, Geleadenli Gyɛfeta wule na bɛziele ye wɔ ye sua zo Geleade.
8 Gyɛfeta wule la, Yebezan mɔɔ vi Bɛtelɛhɛm la buale Yizilayɛma ndɛne.+
9 Ɔwole mralɛ mrenyia 30 yɛɛ mralɛ mraalɛ 30. Ɔmaanle ɔ mra mraalɛ ne mɔ gyale mrenyia mɔɔ bɛnvi ye abusua ne anu la, na ɔmaanle mraalɛ 30 ragyale ɔ mra mrenyia ne mɔ. Ɔbuale Yizilayɛma ndɛne ɛvolɛ nsuu.
10 Akee Yebezan wule, na bɛziele ye wɔ Bɛtelɛhɛm.
11 Ɔwule la, Zɛbulɛnenli Yilɔn buale Yizilayɛma ndɛne ɛvolɛ bulu.
12 Akee Zɛbulɛnenli Yilɔn wule na bɛziele ye wɔ Ayegyalɔn wɔ Zɛbulɛn azɛlɛ zo.
13 Ɔwule la, Pilatɔnonli Helɛle ara Abedɔn buale Yizilayɛma ndɛne.
14 Ɔwole mralɛ mrenyia 40 yɛɛ ɛnee ɔlɛ nlɔnra 30 mɔɔ bɛtɛnla asoaso 70 azo a. Ɔbuale Yizilayɛma ndɛne ɛvolɛ mɔtwɛ.
15 Akee Pilatɔnonli Helɛle ara Abedɔn wule na bɛziele ye wɔ Pilatɔn wɔ Yifelaem azɛlɛ zo wɔ Amalɛkema+ boka ne azo.
