Ndɛnebuavolɛma 16:1-31
16 Mekɛ bie Samesɛn hɔle Gaza na ɔnwunle tuutuunli bie wɔ ɛkɛ na ɔhɔle ye ɛkɛ.
2 Bɛhanle bɛhilele Gazama ne kɛ: “Samesɛn ɛra ɛke.” Ɔti bɛbɛngale bɛyiale ye aledwolɛ ne amuala na bɛbule bɛziale ye wɔ suakpole ne anlenkɛ kpole ne anloa. Bɛyɛle koonwu aledwolɛ ne amuala, na bɛhanle bɛhilele bɛ nwo kɛ: “Saa aleɛ kye a, yɛbahu ye.”
3 Noko Samesɛn lale ɛkɛ too nɔe ne.* Akee ɔdwazole nɔe ne na ɔzɔle suakpole ne anlenkɛ kpole ne nee ye felɛmo nwiɔ ne anu na ɔdule ye nee ɔ nzi bulalɛ ne. Ɔvale ɔguale ɔ kɔme zo na ɔzoale ɔhɔle boka ne mɔɔ nee Hibulɔn anye bɔ zolɛ la azo.
4 Ɛhye anzi, ɔnwunle raalɛ bie mɔɔ bɛfɛlɛ ye Dɛlaela+ la wɔ Sɔlɛke Bɔnza ne anu* na ɔhulole ye.
5 Yemɔti Filisitia arelemgbunli ne mɔ rale raalɛ ne anwo ɛkɛ na bɛzele ye kɛ: “Bɛlɛbɛla ye*+ na nwu deɛ mɔɔ maa ye anwosesebɛ kpole zɛhae la nee kɛzi yɛbahola yɛahye ye na yɛakyekye ye na yɛabɛlɛ ye aze la. Saa ɛyɛ ɛhye a, yɛ nuhua ko biala bamaa wɔ dwɛtɛ fufule 1,100.”
6 Nzinlii Dɛlaela zele Samesɛn kɛ: “Mesɛlɛ wɔ, ka ɛleka mɔɔ wɔ anwosesebɛ kpole ne vi la kile me nee deɛ mɔɔ bɛbahola bɛava bɛakyekye wɔ na bɛabɛlɛ wɔ aze la.”
7 Samesɛn zele ye kɛ: “Saa bɛfa ɛda nyɛma* amolɛ nsuu mɔɔ bɛtɛrɛlɛle la bɛkyekye me a mebayɛ bɛtɛɛ kɛ nrenyia biala la.”
8 Ɔti Filisitia arelemgbunli ne mɔ vale ɛda nyɛma amolɛ nsuu mɔɔ bɛtɛrɛlɛle la rɛlɛle ye na ɔvale ɔkyekyele ye.
9 Bɛmaanle menli hɔveale suakunlu ɛkɛ ne, na ɔdeanle nu ɔvɛlɛle ye kɛ: “Samesɛn, Filisitiama ɛra ɛ nwo zo!” Na ɔtetele ɛda nyɛma ne mɔ anu ndɛndɛ kɛ bolɔfodɔ* nyɛma mɔɔ senle ɛha ye la.+ Bɛannwu ɛleka mɔɔ ye anwosesebɛ ne vi la.
10 Akee Dɛlaela zele Samesɛn kɛ: “Nea! Wɔyɛ me koasea,* yɛɛ wɔanga nɔhalɛ wɔangile me. Mesɛlɛ wɔ, ka deɛ mɔɔ bɛbahola bɛava bɛakyekye wɔ la kile me.”
11 Yemɔti ɔzele ye kɛ: “Saa bɛfa nyɛma fofolɛ mɔɔ bɛtɛfale bɛtɛyɛle gyima biala la bɛkyekye me a, mebayɛ bɛtɛɛ kɛ nrenyia biala la.”
12 Ɔti Dɛlaela vale nyɛma fofolɛ kyekyele ye na ɔdeanle nu kɛ: “Samesɛn, Filisitiama ɛra ɛ nwo zo!” (Mekɛ zɔhane ɛnee menli vea suakunlu ɛkɛ.) Na Samesɛn tetele nyɛma ne vile ɔ sa kɛ asɛɛ nyɛma gyɛne bie la.+
13 Akee Dɛlaela zele Samesɛn kɛ: “Wɔyɛ me koasea, yɛɛ wɔanga nɔhalɛ wɔangile me badwu mekɛ ɛhye.+ Ka deɛ mɔɔ bɛbahola bɛava bɛakyekye wɔ la kile me.” Akee ɔzele ye kɛ: “Fa nyɛma nwo me ti enrinli amɛsa nsuu ne bɔ nu.”
14 Yemɔti ɔyɛle ye zɔ na ɔvale pini ɔbɔle nu na ɔdeanle nu ɔvɛlɛle ye kɛ: “Samesɛn, Filisitiama ɛra ɛ nwo zo!” Yemɔti ɔvi nafelɛ nu ɔdwazole na ɔyele pini ne nee nyɛma ne.
15 Akee ɔzele ye kɛ: “Kɛzi ɛka kɛ, ‘Mekulo wɔ,’+ wɔ mekɛ mɔɔ ɛtɛfale wɔ ahonle ɛtɛmaanle me la ɛ? Fane nsa mɔɔ wɔyɛ me koasea la ɛne, yɛɛ ɛtɛkanle ɛleka mɔɔ wɔ anwosesebɛ kpole ne vi la ɛtɛkilele me.”+
16 Kɛmɔ alehyenlɛ biala ɔkɔ zo ɔbiza ye na ɔgyinla ɔ kɔme zo la ati, ɔyɛle ye* ɛvɛlɛ mɔɔ ɔ kunlu a anrɛɛ yewu bɔbɔ.+
17 Yemɔti akee ɔhanle ye ahonle nu edwɛkɛ ɔhilele ye kɛ: “Biledi* ɛtɛkanle me ti enrinli ɛlɛ, ɔluakɛ ɔvi me awolɛ nu,* mele Nazalaenli memaa Nyamenle.+ Saa bɛkpa me ti a, me anwosesebɛ ne bavi me nu na meayɛ kɛ mrenyia kɔsɔɔti la.”
18 Mɔɔ Dɛlaela nwunle kɛ yeha ye ahonle nu edwɛkɛ yehile ye la, ndɛndɛ ne ala ɔvɛlɛle Filisitia arelemgbunli ne mɔ+ na ɔzele bɛ kɛ: “Mekɛ ɛhye ɛdeɛ bɛrɛla, ɔluakɛ yeha ye ahonle nu edwɛkɛ yehile me.” Ɔti Filisitia arelemgbunli ne mɔ vale ezukoa ne na bɛrale ye ɛkɛ.
19 Ɔmaanle ɔlale ɔ gyakɛ azo; na ɔvɛlɛle nrenyia ne ɔmaanle ɔpepɛle ɔ ti zo enrinli amɛsa nsuu ne. Akee raalɛ ne homonle ɔ nwo zo, ɔluakɛ ɛnee ye anwosesebɛ ne ɛlɛfi ye nu.
20 Akee ɔdeanle nu kɛ: “Samesɛn Filisitiama ɛra ɛ nwo zo!” Ɔvi nafelɛ nu ɔdwazole na ɔhanle kɛ: “Mebavinde alienwo na meahɔlie me nwo kɛ mɔɔ meyɛ ye dɛba la.”+ Noko ɛnee ɔnze kɛ Gyihova ɛhwe ɔ nwo ɛvi ɔ nwo.
21 Ɔti Filisitiama hyele ye na bɛdudule ɔ nye. Bɛ nee ye hɔle Gaza na bɛvale kɔbele kyeenyi bɛkyekyele ye, na ɛnee bɛmaa ɔti hwiiti wɔ efiade ɛkɛ ne.
22 Noko bɛpepɛle ɔ ti enrinli ne la, ɔbɔle ɔ bo kɛ ɔfifi bieko.+
23 Filisitia arelemgbunli ne mɔ boɔboale bɛ nloa kɛ bɛbɔ afɔle kpole bie bɛamaa bɛ nyamenle Deegɔn+ na bɛalie bɛ nye ɔluakɛ bɛhanle kɛ: “Yɛ nyamenle ne ɛva yɛ kpɔvolɛ Samesɛn ɛwula yɛ sa nu!”
24 Mɔɔ bɛnwunle ye la bɛyele bɛ nyamenle ne ayɛlɛ na bɛhanle kɛ: “Yɛ nyamenle ne ɛva yɛ kpɔvolɛ ne ɛwula yɛ sa nu, yemɔ a ɔzɛkyele yɛ azɛlɛ ne+ na ɔhunle yɛ nuhua dɔɔnwo la.”+
25 Kɛmɔ ɛnee bɛlɛdi fɛlɛko wɔ bɛ ahonle nu la ati, bɛhanle kɛ: “Bɛva Samesɛn bɛrɛla bɛmaa ɔralielie yɛ nye.” Yemɔti bɛhɔyele Samesɛn bɛvile efiade ne kɛ ɔralielie bɛ nye; bɛmaanle ɔgyinlanle mpila nwiɔ ne avinli.
26 Akee Samesɛn zele kakula nrenyia ne mɔɔ lɛ ɔ sa la kɛ: “Maa menzɔ mpila ne mɔ mɔɔ sua ne gyi zolɛ la anu na meahola meadudu meahisa bɛ.”
27 (Ɛnee mrenyia nee mraalɛ ɛyi sua ne tɛkɛɛ. Filisitia arelemgbunli ne mɔ kɔsɔɔti wɔ ɛkɛ yɛɛ mrenyia nee mraalɛ kɛyɛ 3,000 gua sua ne ati zo mɔɔ bɛ nye gyi Samesɛn anwo wɔ mekɛ mɔɔ ɔlɛdielie bɛ nye la.)
28 Akee Samesɛn+ vɛlɛle Gyihova kɛ: “Tumivolɛ Awulae Gyihova, mesɛlɛ wɔ kakye me na maa me anwosesebɛ,+ O Nyamenle, mesɛlɛ wɔ, mekɛ ɛhye anu ala, na maa menli Filisitiama nzenralɛ wɔ me nye nwiɔ ne anu ko anwo.”+
29 Akee Samesɛn sosɔle avinli mpila nwiɔ ne mɔɔ sua ne gyi zo la anu na ɔdudule ɔhisale bɛ, ɔ sa fema ne lɛ ko anu yɛɛ bɛne ne noko lɛ ko anu.
30 Samesɛn deanle nu kɛ: “Maa me* nee Filisitiama ɛwu!” Akee ɔvale ye anwosesebɛ ne amuala ɔzuhunle mpila ne mɔ na sua ne bule guale arelemgbunli ne mɔ nee menli kɔsɔɔti mɔɔ wɔ nu la anwo zo.+ Yemɔti menli mɔɔ ɔhunle bɛ wɔ ye ewule nu la zonle tɛla mɔɔ ɔhunle bɛ wɔ ye ngoane mekɛ nu la.+
31 Nzinlii, ɔ mediema mrenyia ne mɔ nee ye papa abusua ne ravale ye hɔle. Bɛhɔziele ye wɔ Zola+ nee Ɛhyetayɔlo avinli wɔ ye papa Manowa+ nla ne anu. Ɔbuale Yizilayɛma ndɛne ɛvolɛ 20.+
Ɔbodwɛkɛ
^ Anzɛɛ “alevinli mu nwiɔ avinli.”
^ Anzɛɛ “Azudenle ne anwo.”
^ Anzɛɛ “Di ye adwenle.”
^ Anzɛɛ “ndinli.”
^ Ɔle kɛ fiene la.
^ Anzɛɛ “Wɔgolo me nwo.”
^ Anzɛɛ “ye ɛkɛla.”
^ Hibulu aneɛ nu, “ɔvi me mame awodeɛ nu.”
^ Anzɛɛ “Dadeɛ dɛma.”
^ Anzɛɛ “me ɛkɛla.”
