Ndɛnebuavolɛma 18:1-31
18 Mekɛ zɔhane ɛnee belemgbunli biala ɛnle Yizilayɛ.+ Na mekɛ zɔhane anu ɛnee Dan abusua ne+ ɛlɛkpondɛ azɛlɛ adɛnla zo, ɔluakɛ badwu zɔhane mekɛ ne ɛnee bɛtɛnyianle agyapadeɛ biala wɔ Yizilayɛ mbusua ne mɔ avinli.+
2 Danema zoanle bɛ abusua ne anu mrenyia nnu mɔɔ lɛ akɛnrasesebɛ mɔɔ bɛvi Zola nee Ɛhyetayɔlo+ la kɛ bɛhɔli busia na bɛnleɛnlea azɛlɛ ne azo. Bɛhanle bɛhilele bɛ kɛ: “Bɛhɔ na bɛhɔnleɛnlea azɛlɛ ne azo.” Mɔɔ bɛdwule Maeka sua nu+ wɔ Yifelaem awoka ne mɔ azo la, bɛlale ɛkɛ ne nɔe ne.
3 Mekɛ mɔɔ bɛbikyele Maeka sua ne la, bɛdele Livae kpavolɛ ne ane,* ɔti bɛhɔle ɔ nwo ɛkɛ na bɛbizale ye kɛ: “Nwane a vale wɔ rale ɛke a? Duzu a ɛlɛyɛ ye wɔ ɛke a? Duzu a ɛmaa wɔha ɛke a?”
4 Ɔbuale bɛ kɛ: “Ɛhye a Maeka ɛyɛ ɛmaa me a, na yebɔ me ɛkpa kɛ menyɛ ye ɛsɔfo.”+
5 Akee bɛzele ye kɛ: “Yɛsɛlɛ wɔ, biza Nyamenle saa yɛ adendulɛ ne bahɔ ye boɛ a.”
6 Ɛsɔfo ne zele bɛ kɛ: “Bɛhɔ anzodwolɛ nu. Gyihova boka bɛ nwo wɔ bɛ adendulɛ ne anu.”
7 Ɔti mrenyia nnu ne doale zo na bɛhɔdwule Leeyehye.+ Bɛnwunle kɛzi menli mɔɔ wɔ ɛkɛ ne la ɛngyia awie moalɛ biala kɛ mɔɔ Saedɛnema de la. Ɛnee bɛde ɛkɛ ne koonwu mɔɔ bɛndwenle ɛhwee nwo,+ yɛɛ atisesebɛ sonla biala ɛtɛfale konle ɛtɛbale azɛlɛ ne azo kɛ ɔfa yeagyegye bɛ. Bɛ nee Saedɛnema avinli twe, yɛɛ bɛ nee awie biala ɛnlɛ ngitanwolilɛ biala.
8 Mɔɔ bɛziale bɛrale bɛ mediema ne mɔ anwo ɛkɛ wɔ Zola nee Ɛhyetayɔlo+ la, bɛ mediema ne mɔ bizale bɛ kɛ: “Kɛzi ɔhɔle ye ɛ?”
9 Bɛbuale kɛ: “Bɛmaa yɛhɔ bɛ nwo zo, ɔluakɛ yɛnwu kɛ azɛlɛ ne le kpalɛ. Duzu ati a bɛlɛtwenlehwenle bɛ bo aze a? Bɛmmakyɛ nwolɛ fee kɛ bɛbahɔ bɛahɔva azɛlɛ ne.
10 Saa bɛkɔ a, bɛbanwu kɛ menli ne ɛndwenle ɛhwee nwo,+ yɛɛ azɛlɛ ne le kpole. Nyamenle ɛva ɛwula bɛ sa nu, debie biala ɛnle azɛlɛ ye azo mɔɔ bie ɛnle ɛkɛ a.”+
11 Akee Dan abusua ne anu mrenyia 600 mɔɔ bɛziezie bɛ nwo bɛmaa konle la vi Zola nee Ɛhyetayɔlo hɔle.+
12 Bɛhɔle na bɛhɔyɛle bɛ azokoɛleɛ wɔ Keleate-gyialem+ mɔɔ wɔ Dwuda la. Ɛhye ati a bɛfɛlɛ ɛleka zɔhane mɔɔ wɔ Keleate-gyialem adɔleɛ la Meehana-dan*+ badwu ɛnɛ la.
13 Bɛvi ɛkɛ ne bɛhɔle Yifelaem awoka ne mɔ azo na bɛhɔle Maeka sua nu ɛkɛ.+
14 Akee mrenyia nnu ne mɔɔ hɔnleɛnleanle Leeyehye azɛlɛ ne azo la+ zele bɛ mediema ne mɔ kɛ: “Asoo bɛze kɛ yifɔdo, tɛlafem ananze,* ananze mɔɔ bɛze yɛɛ ananze mɔɔ bɛgua la wɔ azua ɛhye mɔ anu ɔ?+ Bɛdwenle mɔɔ ɔwɔ kɛ bɛyɛ la anwo.”
15 Ɔti bɛgyinlanle ɛkɛ ne na bɛhɔle Livae kpavolɛ ne+ mɔɔ de Maeka sua nu la ɛkɛ na bɛbizale ye kɛzi ye akpɔkɛ nu de la.
16 Mekɛ zɔhane, ɛnee Dan mrenyia 600+ mɔɔ bɛziezie bɛ nwo bɛmaa konle la gyi anlenkɛ kpole ne anloa.
17 Mrenyia nnu ne mɔɔ hɔnleɛnleanle azɛlɛ ne azo la+ wolole ɛkɛ na bɛhɔsesale ananze ne mɔɔ bɛze, yifɔdo ne,+ tɛlafem ananze ne mɔ*+ yɛɛ bulalɛ ananze ne.+ (Ɛnee ɛsɔfo ne+ nee mrenyia 600 ne mɔɔ bɛziezie bɛ nwo bɛmaa konle la gyi anlenkɛ kpole ne anloa.)
18 Bɛhɔle Maeka sua nu na bɛhɔsesale ananze ne mɔɔ bɛze, yifɔdo ne, tɛlafem ananze ne mɔ* yɛɛ bulalɛ ananze ne. Ɛsɔfo ne bizale bɛ kɛ: “Duzu a bɛlɛyɛ la?”
19 Noko bɛzele ye kɛ: “Yɛ koonwu. Ka ɛ nloa to nu na bɛla bayɛ yɛ papa* nee yɛ ɛsɔfo. Boni a le kpalɛ a—kɛ ɛbayɛ ɛsɔfo wɔ sonla ko sua nu+ anzɛɛ ɛbayɛ ɛsɔfo wɔamaa abusua ekpunli yɛɛ abusua bie wɔ Yizilayɛ?”+
20 Ɔti ɛsɔfo ne akunlu dwole nwo, na ɔvale yifɔdo ne, tɛlafem ananze ne mɔ* yɛɛ ananze ne mɔɔ bɛze la+ na ɔ nee menli ne hɔle.
21 Akee bɛhakyile bɛ nwo kɛ bɛkɔ, bɛvale ngakula ne mɔ, nyɛmoa nee ninyɛne mɔɔ sonle bolɛ la bɛlimoale bɛ nyunlu.
22 Mɔɔ bɛvile Maeka sua nu ɛkɛ ne bɛhɔle moa ekyii la, mrenyia mɔɔ bɛ azua bikye Maeka sua ne la boɔboale bɛ nloa na bɛdoale Danema ne.
23 Mekɛ mɔɔ bɛdeanle nu bɛvɛlɛle Danema ne la, bɛhakyile bɛ nye wɔ bɛ nwo zo na bɛzele Maeka kɛ: “Duzu edwɛkɛ ɔ? Duzu ati a bɛboɔboa bɛ nloa a?”
24 Ɔti ɔzele bɛ kɛ: “Bɛsesa me nyamenle ne mɔ mɔɔ meyɛ la, na eza bɛva ɛsɔfo ne bɛhɔ. Duzu a ɛha me sa nu a? Ɔti kɛzi bɛbiza me kɛ, ‘Duzu a ɛlɛgyegye wɔ a?’”
25 Danema ne buale ye kɛ: “Mmateɛdea yɛ nu; saa tɛ ye zɔ a, mrenyia mɔɔ ɛva ɛya* la bara bɛ nwo zo, na ɛbava wɔ ngoane* nee wɔ sua nu amra ngoane* wɔado esiane nu.”
26 Ɔti Danema hɔle bɛ ɛleka bie; na mɔɔ Maeka nwunle kɛ bɛ nwo yɛ se tɛla ye la, ɔhakyile ɔ nwo ɔziale ɔhɔle ye sua nu.
27 Mɔɔ bɛvale ninyɛne mɔɔ Maeka ɛyɛ nee ye ɛsɔfo ne bɛhɔle la anzi, bɛhɔle Leeyehye,+ menli mɔɔ de ye koonwu na bɛndwenle ɛhwee nwo la ɛkɛ.+ Bɛvale konle dadeɛ bɛhunle bɛ na bɛyelale bɛ sua ne.
28 Bɛannyia awie biala bɛammaa yeanlie bɛ, ɔluakɛ bɛ nee Saedɛn avinli twe yɛɛ bɛ nee awie biala ɛnlɛ ngitanwolilɛ biala; ɛnee sua ne wɔ Bɛte-rilihɔbo bɔnza ne anu.+ Akee bɛkyekyele sua ne bieko na bɛdɛnlanle ɛkɛ.
29 Eza bɛvale bɛ papa Dan+ mɔɔ le Yizilayɛ+ ara la duma bɛdonle sua ne, noko dɛba ne ɛnee bɛfɛlɛ ye Leeyehye.+
30 Ɛhye anzi, Danema vale ananze ne mɔɔ bɛze la+ ziele ɛkɛ maanle bɛ nwo, na Mosisi ara Gɛhyɔm+ ara Dwɔnatan+ nee ɔ mra ne mɔ yɛle Dan abusua ne ɛsɔfoma hɔkpulale kenle mɔɔ bɛvale menli mɔɔ de azɛlɛ ne azo la bɛhɔle akɛlɛzonlenlɛ nu la.
31 Na bɛvale ananze ne mɔɔ Maeka zele la bɛziele ɛkɛ, na ɔgyinlanle ɛkɛ ne mekɛ kɔsɔɔti mɔɔ ɛnee nɔhalɛ Nyamenle ne sua ne wɔ Hyaelo la.+
Ɔbodwɛkɛ
^ Anzɛɛ “ɛdendɛlɛ.”
^ Ɔ bo kile “Dan Azokoɛleɛ.”
^ Anzɛɛ “abusua nyamenle.”
^ Anzɛɛ “abusua nyamenle.”
^ Anzɛɛ “abusua nyamenle.”
^ Anzɛɛ “folɛtuvolɛ.”
^ Anzɛɛ “abusua nyamenle.”
^ Anzɛɛ “ɛkɛla.”
^ Anzɛɛ “ɛkɛla.”
^ Anzɛɛ “mrenyia mɔɔ bɛ ɛkɛla ɛva ɛya.”
