Ndɛnebuavolɛma 19:1-30
-
Bɛngyamanema nla ɛbɛlatane ne mɔɔ bɛbɔle wɔ Gebeya la (1-30)
19 Mekɛ zɔhane, ɛnee belemgbunli biala ɛnle Yizilayɛ,+ na Livaenli bie mɔɔ de Yifelaem awoka ne mɔ azo ɛleka bie mɔɔ wɔ moamoa la+ vale nwewe* bie mɔɔ vi Bɛtelɛhɛm+ mɔɔ wɔ Dwuda la kɛ ɔ ye.
2 Noko ye nwewe ne anli nɔhalɛ ammaa ye, na ɔgyakyile ye ɛkɛ ne ɔhɔle ye papa sua zo wɔ Bɛtelɛhɛm mɔɔ wɔ Dwuda la. Ɔdɛnlanle ɛkɛ ne too siane nna.
3 Akee ɔ hu hɔdendɛle hilele ye kɛ ɔzia ɔrɛla; ɔvale ye sonvolɛ nrenyia ne nee asoaso nwiɔ ɔbokale ɔ nwo ɔhɔle. Ɔti raalɛ ne vale ye rale ye papa sua nu. Mɔɔ raalɛ ne papa nwunle ye la, ɔvale anyelielɛ ɔhɔyiale ye.
4 Ɔti ye ase ne, mɔɔ le bɛlɛra ne papa la maanle ɔdɛnlanle ɔ nwo ɛkɛ ne kenle nsa na bɛlile bɛnlonle, na ɔlale ɛkɛ ne nɔe ne.
5 Kenle nna ne azo mɔɔ bɛdwazole nwonlomɔ mangyee ne kɛ bɛkɔ la, bɛlɛra ne papa zele ye ase ne kɛ: “Di debie na nyia anwosesebɛ* na akee wɔahɔ.”
6 Yemɔti bɛdɛnlanle aze, na bɛ muala bɛbɔle nu bɛlile na bɛnlonle; ɛhye anzi, bɛlɛra ne papa zele nrenyia ne kɛ: “Mesɛlɛ wɔ, da maa aleɛ ɛhye na die ɛ nye.”*
7 Mɔɔ nrenyia ne dwazole kɛ ɔkɔ la, ye ase ne hɔle zo kpale ye kyɛlɛ, ɔti ɔlale ɛkɛ ne ɔmaanle aleɛ hyenle bieko.
8 Mɔɔ ɔdwazole ndɛ nwonlomɔ ne wɔ kenle mɔɔ tɔ zolɛ nnu la azo kɛ ɔkɔ la, bɛlɛra ne papa hanle kɛ: “Mesɛlɛ wɔ, di debie na nyia anwosesebɛ.”* Na bɛdɛnlanle ɛkɛ ne too mekɛ hɔle bie, na bɛ mu nwiɔ bɛhɔle zo bɛlile debie.
9 Mɔɔ nrenyia ne dwazole kɛ ɔ nee ye nwewe ne nee ye sonvolɛ ne kɔ la, bɛlɛra ne papa zele ye kɛ: “Nea! Kɛkala asɛɛ aleɛ ɛdwo. Mesɛlɛ wɔ, da maa aleɛ ɛhye. Maanle nu ɛlɛmua. Da maa aleɛ ɛhye na die ɛ nye. Ɛhyema ɛbahola wɔadwazo ndɛ wɔadoa wɔ adendulɛ ne azo na wɔahɔ sua nu.”*
10 Noko ɛnee nrenyia ne ɛngulo kɛ ɔbala yeamaa aleɛ ahye bieko, ɔti ɔdwazole ɔdoale ye adendulɛ ne azo too ɔhɔdwule Gyibɛse, mɔɔ le Gyɛlusalɛm la.+ Ɔdaye nee ye asoaso nwiɔ ne mɔɔ bɛziezie zolɛ la, ye nwewe ne yɛɛ ye sonvolɛ ne.
11 Mɔɔ bɛbikyele Gyibɛse la, ɛnee asɛɛ aleɛ ɛdwo. Ɔti sonvolɛ ne zele ɔ menle ne kɛ: “Yɛgyinla Gyibɛsema suakpole ɛhye azo na yɛla ɛkɛ ɔ?”
12 Noko ɔ menle ne zele ye kɛ: “Ɔnle kɛ yɛgyinla nyɛvolɛ mɔɔ bɛnle Yizilayɛma la suakpole zo. Yɛbadoa zo too yɛahɔdwu Gebeya.”+
13 Akee ɔzele ye sonvolɛ ne kɛ: “Bɛla maa yɛbɔ mɔdenle kɛ yɛbadwu ɛleka ɛhye mɔ ko azo; bie a yɛbala Gebeya anzɛɛ Releema.”+
14 Yemɔti bɛdoale zo bɛhɔle, na mɔɔ bɛbikyele Gebeya, mɔɔ le Bɛngyamanema sua la azo la, ɛnee sɛnzɛne ne ɛlɛkɔ ahɔdɔ.
15 Ɔti bɛgyinlanle Gebeya kɛ bɛkala. Mɔɔ bɛhɔle ɛkɛ ne la, bɛhɔdɛnlanle suakpole ne gua ne azo, noko awie biala ammaa bɛangɔnla ye sua nu nɔe ne.+
16 Nzinlii, nrenyia kpanyinli bie vi ye ɛya nu rale zɔhane nɔsolɛ ne. Ɔvi Yifelaem awoka ne mɔ azo+ yɛɛ yeradɛnla Gebeya mekɛ ekyi a; noko bɛdabɛ mɔɔ bɛwɔ suakpole ne azo la le Bɛngyamanema.+
17 Mekɛ mɔɔ ɔmaanle ɔ nye zo na ɔnwunle adendulɛnli ne wɔ suakpole ne gua ne azo la, nrenyia kpanyinli ne bizale ye kɛ: “Nienwu a ɛvi a, yɛɛ nienwu a ɛlɛkɔ a?”
18 Ɔbuale kɛ: “Yɛvi Bɛtelɛhɛm mɔɔ wɔ Dwuda la yɛlɛse yɛahɔ Yifelaem awoka ne mɔ azo ɛleka bie mɔɔ wɔ moamoa la, ɛkɛ ne a mevi a. Mengɔle Bɛtelɛhɛm mɔɔ wɔ Dwuda la,+ na melɛkɔ Gyihova sua nu,* noko awie biala ɛnva me ɛngɔ ye sua nu.
19 Yɛlɛ ndile nee aleɛ mɔɔ yɛbava yɛamaa yɛ asoaso ne mɔ,+ yɛɛ yɛlɛ aleɛ+ nee nwanye mɔɔ medame, raalɛ ne nee yɛ sonvolɛ ne bali a. Yɛngyia debie biala anwo.”
20 Noko nrenyia kpanyinli ne hanle kɛ: “Anzodwolɛ ɛha bɛ! Mebava debie biala mɔɔ bɛhyia nwolɛ la meamaa bɛ. Noko bɛmmada gua ye azo nɔe.”
21 Ɔti ɔvale ye ɔrale ye sua nu na ɔmaanle ye asoaso ne mɔ aleɛ.* Akee bɛwowole bɛ gyakɛ anwo na bɛlile na bɛnlonle.
22 Mɔɔ bɛlɛdie bɛ nye la sonlamgbanema bie mɔ mɔɔ wɔ sua ne azo la rabɛngale sua ne yiale na bɛbɔle anlenkɛ ne anu na bɛhɔle zo bɛzele nrenyia kpanyinli ne mɔɔ lɛ sua ne la kɛ: “Fa nrenyia ne mɔɔ rale wɔ sua nu ɛke la finde maa yɛ nee ye ɛla.”+
23 Ɔti sua menle ne vindele na ɔzele bɛ kɛ: “Kyɛkyɛ, me mediema, bɛmmabɔ amumuyɛ ɛbɛla ɛhye. Mesɛlɛ bɛ, nrenyia ɛhye le ɛyɛvolɛ wɔ me sua nu ɛke. Bɛmmabɔ anyiemgba ɛbɛla ɛhye.
24 Me ra raalɛ mɔɔ ɛnze nrenyia la nee nrenyia ɛhye nwewe ɛne. Bɛmaa menva bɛ menvinde na bɛyɛ bɛ debie biala mɔɔ bɛkulo la.*+ Noko ɔnle kɛ bɛbɔ anyiemgba ɛbɛla ɛhye bɛkile nrenyia ne.”
25 Noko mrenyia ne mɔ andie ye, ɔti Livaenli ne hwenle ye nwewe+ ne vindele alienwo maanle bɛ. Bɛ nee ye lale na bɛyɛle ye basabasa nɔe ne amuala hɔkpulale alehyenlɛ nu. Mekɛ mɔɔ maanle nu ɛlɛtete la, bɛgyakyile ye kɛ ɔhɔ.
26 Nwonlomɔ mangyee ne, raalɛ ne rapɛle finle nrenyia ne sua ne anuhɔlɛ, ɛleka mɔɔ ɛnee ɔ menle ne wɔ la, na ɔlale ɛkɛ ne too maanle nu tetele.
27 Mekɛ mɔɔ ɔ menle ne dwazole nwonlomɔ ne na ɔbukele anlenkɛ ne kɛ ɔtoa ye adendulɛ ne azo la, ɔnwunle ye nwewe ne kɛ ɔla sua ne anuhɔlɛ ne na ɔ sa gua anlenkɛ ne anloa.
28 Ɔti nrenyia ne zele ye kɛ: “Dwazo maa yɛhɔ.” Noko yeandendɛ. Akee nrenyia ne vale ye dole asoaso ne azo na ɔzile nu kɛ ɔkɔ ye sua nu.
29 Mɔɔ ɔdwule sua nu la, ɔvale dadeɛ na ɔpepɛle ye nwewe ne anu azinli azinli 12 na ɔvale ko ɔhɔle Yizilayɛ azɛlɛ ne ko biala azo.
30 Bɛdabɛ mɔɔ bɛnwunle ye la amuala hanle kɛ: “Debie zɛhae bie ɛtɛsile yɛɛ yɛtɛnwunle bie ɛlɛ ɔvi mekɛ mɔɔ Yizilayɛma vi Yigyibiti azɛlɛ zo rale la too badwu ɛnɛ. Bɛdwenle nwo,* bɛzuzu nwo,+ na bɛha mɔɔ ɔwɔ kɛ yɛyɛ la bɛhile yɛ.”
Ɔbodwɛkɛ
^ Anzɛɛ “fa sɔ wɔ ahonle.”
^ Anzɛɛ “na maa wɔ ahonle ɛli fɛlɛko.”
^ Anzɛɛ “na fa sɔ wɔ ahonle.”
^ Hibulu aneɛ nu, “wɔ ɛdanlɛsua nu.”
^ Anzɛɛ ɔkola ɔkile, “na mesonle wɔ Gyihova sua nu.”
^ Anzɛɛ “ndile ngakyile.”
^ Anzɛɛ “bɛ nee bɛ ɛla na bɛyɛ mɔɔ bɛnea a ɔle kpalɛ wɔ bɛ nye zo la.”
^ Anzɛɛ “Bɛva bɛ ahonle bɛzie zo.”
