Ndɛnebuavolɛma 21:1-25
-
Bɛliele Bɛngyaman abusua ne (1-25)
21 Akee Yizilayɛma hanle ndane ɛhye wɔ Mezepa+ kɛ: “Yɛ nuhua ko biala ɛnrɛva ɔ ra raalɛ ɛnrɛmaa Bɛngyamanenli biala kɛ ɔgya ye.”+
2 Akee menli ne rale Bɛtɛle+ na bɛdɛnlanle ɛkɛ wɔ nɔhalɛ Nyamenle ne anyunlu too nɔsolɛ nu, na bɛzunle bɛlile nyane kpole.
3 Na bɛhanle kɛ: “O Gyihova, Yizilayɛ Nyamenle, duzu ati a ɛhye ɛzi wɔ Yizilayɛ a? Duzu ati a ɔwɔ kɛ abusua ko abo zo minli fi Yizilayɛma avinli ɛnɛ a?”
4 Aleɛ hyenle la menli ne dwazole ndɛ na bɛzile afɔlemokyea wɔ ɛkɛ ne na bɛbɔle ɛyelalɛ nee anzodwolɛ afɔle.+
5 Akee Yizilayɛma bizale kɛ: “Yizilayɛ mbusua ne mɔ boni a amba Gyihova nyianu ne bie a?” ɔluakɛ bɛha ndane kpole kɛ awie biala mɔɔ amba Gyihova anyunlu wɔ Mezepa la bɛbahu ye.
6 Ɔti Yizilayɛma lile nyane wɔ mɔɔ dole bɛ diema Bɛngyaman la anwo. Bɛhanle kɛ: “Ɛnɛ abusua ko ɛminli ɛvi Yizilayɛ.
7 Duzu a ɔwɔ kɛ yɛyɛ na bɛdabɛ mɔɔ bɛha la anyia mraalɛ agya, wɔ mekɛ mɔɔ yɛva Gyihova duma yɛha ndane+ kɛ yɛnrɛmaa bɛnrɛgya yɛ mra mraalɛ ne mɔ bie la ɛ?”+
8 Bɛbizale kɛ: “Yizilayɛ mbusua ne mɔ boni a amba Gyihova anyunlu wɔ Mezepa a?”+ Bɛnwunle kɛ awie biala vi Gyeebɛhye-geleade amba ɛleka mɔɔ menli ne yiale la.
9 Mɔɔ bɛdianle menli ne la, bɛnwunle kɛ menli mɔɔ wɔ Gyeebɛhye-geleade la anu ko bɔbɔ ɛnle ɛkɛ.
10 Ɔti menli ne zoanle mrenyia mɔɔ anwo yɛ se kpalɛ la anu 12,000. Bɛhanle bɛhilele bɛ kɛ: “Bɛva konle dadeɛ bɛhɔhu menli mɔɔ wɔ Gyeebɛhye-geleade la, mraalɛ nee ngakula kɔsɔɔti.+
11 Mɔɔ ɔwɔ kɛ bɛyɛ la ɛne: Bɛhu nrenyia biala yɛɛ raalɛ biala mɔɔ nee nrenyia ɛla ɛlɛ la.”
12 Wɔ Gyeebɛhye-geleadema anu, bɛnwunle ngakula mraalɛ 400 mɔɔ bɛnze mrenyia la. Ɔti bɛ nee bɛ rale Hyaelo azokoɛleɛ+ ne mɔɔ wɔ Keena azɛlɛ zo la.
13 Akee menli ne amuala vale nrɛlaleɛ hɔmaanle Bɛngyamanema mɔɔ wɔ Relemɔn bodane+ ne azo la na bɛ nee bɛ hanle anzodwolɛ nwo edwɛkɛ.
14 Yemɔti Bɛngyamanema ziale rale mekɛ zɔhane. Bɛvale Gyeebɛhye-geleade+ mraalɛ ne mɔ mɔɔ bɛangu bɛ la bɛmaanle bɛ, noko tɛ bɛ muala a bɛnyianle bie a.
15 Na menli ne lile nyane wɔ mɔɔ dole Bɛngyamanema la anwo,+ ɔluakɛ Gyihova ɛmaa mgbakyemgbakyenu ɛra Yizilayɛ mbusua ne mɔ anu.
16 Menli ne mgbanyima ne mɔ bizale kɛ: “Kɛmɔ bɛhu mraalɛ kɔsɔɔti mɔɔ wɔ Bɛngyaman abusua nu la ati, duzu a ɔwɔ kɛ yɛyɛ na yɛanyia mraalɛ yɛamaa menli mɔɔ ɛha la ɛ?”
17 Bɛbuale kɛ: “Ɔwɔ kɛ Bɛngyamanema mɔɔ bɛangu bɛ la nyia agyapadeɛ, amaa abusua bie abo zo amminli anvi Yizilayɛ.
18 Noko yɛnrɛhola yɛnrɛva yɛ mra mraalɛ yɛnrɛmaa bɛ agyalɛ, ɔluakɛ Yizilayɛma ɛha ndane kɛ: ‘Munzule ɛha awie biala mɔɔ kɛva raalɛ kɛmaa Bɛngyamanenli kɛgya ye la.’”+
19 Akee bɛhanle kɛ: “Bɛnlea! Ɛvolɛ biala bɛdi Gyihova ɛvoyia wɔ Hyaelo.+ Hyaelo wɔ Bɛtɛle sɔlɔ nee ademgbole ne mɔɔ vi Bɛtɛle kɔ Hyikɛm la aduduleɛ wɔ Lɛbona nyiakɛ.”
20 Ɔti bɛzele Bɛngyamanema kɛ: “Bɛhɔzia vanye egyinli ne mɔ anu.
21 Na saa bɛnwu kɛ Hyaelo mbɛlɛra* ne mɔ ɛvinde kɛ bɛbazi agole a, ɔwɔ kɛ bɛ nuhua ko biala fi vanye egyinli ne mɔ anu finde na ɔbakye Hyaelo mbɛlɛra ne mɔ ko ɔfa ɔyɛ ɔ ye, na bɛsia bɛkɔ Bɛngyaman azɛlɛ zo.
22 Na saa bɛ papa mɔ anzɛɛ bɛ mediema mrenyia babiza yɛ nwolɛ edwɛkɛ a, yɛbaha yɛahile bɛ kɛ, ‘Bɛdabɛ ti, bɛnwu yɛ anwunvɔne, ɔluakɛ yɛangola yɛannyia mraalɛ wɔ konle nu yɛammaa bɛ nuhua ko biala+ yɛɛ yɛfa mraalɛ yɛmaa bɛgya bɛ a, yɛbali fɔlɛ.’”+
23 Yemɔti Bɛngyamanema yɛle ye zɔhane pɛpɛɛpɛ, na bɛ nuhua ko biala hyele mraalɛ ne mɔ mɔɔ bɛlɛsi agole ne la ko yɛle ɔ ye na ɔ nee ye hɔle. Ɛhye anzi bɛziale bɛhɔle bɛ azɛlɛ zo na bɛhɔkyekyele bɛ azua ne mɔ+ na bɛdɛnlanle nu.
24 Na Yizilayɛma zandele wɔ mekɛ zɔhane na bɛ nuhua ko biala hɔle ye abusua ekpunli nee ye sua nu, akee bɛvile ɛkɛ ne na bɛ nuhua ko biala hɔle ye azɛlɛ zo.
25 Mekɛ zɔhane ɛnee belemgbunli biala ɛnle Yizilayɛ.+ Ɛnee awie biala yɛ mɔɔ le kpalɛ wɔ ɔdaye ɔ nye zo la.*
