Ndɛnebuavolɛma 3:1-31
3 Maanle maanle ɛhye mɔ a Gyihova maanle bɛhale ɛkɛ amaa bɛahola bɛazɔ Yizilayɛma kɔsɔɔti mɔɔ ɛtɛnwunle Keena konle ne bie ɛlɛ la bɛanlea a+
2 (ɔyɛle ye zɔ amaa Yizilayɛma awolɛndoazo ne mɔ mɔɔ li bɛ nzi mɔɔ bɛtɛnwunle ninyɛne ɛhye mɔ bie la anwu konle deɛ holɛ):
3 Filisitiama arelemgbunli nnu ne+ nee Keenama, Saedɛnema+ yɛɛ Havaema+ kɔsɔɔti mɔɔ bɛde Lɛbanɔn Boka ne azo la,+ ɔvi Beeyale-hɛmɔn Boka ne azo too kɔdwu Libo-heemate.*+
4 Bɛrayɛle sɔnea bɛmaanle Yizilayɛma amaa Yizilayɛma ahile kɛ saa bɛbali Gyihova mɛla ne mɔ mɔɔ ɔluale Mosisi anwo zo ɔvale ɔmaanle bɛ papa mɔ la azo a.+
5 Ɔti Yizilayɛma dɛnlanle Keenama,+ Hɛtema, Amɔlema, Pilɛzema, Havaema yɛɛ Gyibɛsema avinli.
6 Yizilayɛma gyale bɛ mra mraalɛ, na bɛdabɛ noko bɛvale bɛ mra mraalɛ bɛmaanle bɛ mra mrenyia na bɛbɔle ɔ bo bɛzonlenle bɛ nyamenle ne mɔ.+
7 Ɔti Yizilayɛma yɛle ɛtane wɔ Gyihova anye zo, na bɛ rɛle vile Gyihova bɛ Nyamenle ne na bɛzonlenle Beeyale ananze ne mɔ+ nee ɛzonlenlɛ mbaka* ne mɔ.+
8 Ɛhye ati Gyihova vale Yizilayɛma anwo ɛya kpole na ɔvale bɛ ɔwulale Mɛsɔpɔteemea* Belemgbunli Kuhyan-relehyateeyem asa anu. Yizilayɛma zonlenle Kuhyan-relehyateeyem too ɛvolɛ mɔtwɛ.
9 Mekɛ mɔɔ Yizilayɛma zunle vɛlɛle Gyihova kɛ ɔboa bɛ la,+ Gyihova maanle bɛ dievolɛ mɔɔ ɔbalie Yizilayɛma la,+ yemɔ a le Kinaze mɔɔ le Keelɛbe adiema kakula la ara Ɔteneɛle.+
10 Gyihova sunsum ne rale ɔ nwo zo+ na ɔrayɛle Yizilayɛma ndɛnebuavolɛ. Mekɛ mɔɔ ɔhɔle konle la, Gyihova vale Mɛsɔpɔteemea* Belemgbunli Kuhyan-relehyateeyem wulale ɔ sa nu na ɔlile Kuhyan-relehyateeyem anwo zo konim.
11 Akee azɛlɛ ne liele ɔ menle* ɛvolɛ 40. Nzinlii Kinaze ara Ɔteneɛle wule.
12 Na Yizilayɛma bɔle ɔ bo kɛ bɛyɛ ɛtane wɔ Gyihova anye zo bieko.+ Yemɔti Gyihova maanle Mowabe+ Belemgbunli Ɛgelɔn lile Yizilayɛma anwo zo konim, ɔluakɛ bɛyɛle ɛtane wɔ Gyihova anye zo.
13 Eza ɔmaanle Amɔnoma+ nee Amalɛkema+ rale bɛ nwo zo. Bɛ nee Yizilayɛma honle na bɛvale mrɛlɛ suakpole ne.+
14 Yizilayɛma zonlenle Mowabe Belemgbunli Ɛgelɔn ɛvolɛ 18.+
15 Akee Yizilayɛma zunle vɛlɛle Gyihova kɛ ɔboa bɛ,+ ɔti Gyihova maanle bɛ dievolɛ,+ yemɔ a le Bɛngyamanenli+ Gila ara Yihɛde+ mɔɔ ɔ sa le bɛne la.+ Nzinlii, Yizilayɛma vale adwule maanle Yihɛde kɛ ɔva ɔhɔmaa Mowabe Belemgbunli Ɛgelɔn.
16 Yihɛde yɛle dadeɛ anye nwiɔ mɔɔ ye tendenle le kubit ko* la na ɔvale ɔkyekyele ye ɛzɔlɛ fema ne anwo wɔ ye tɛladeɛ ne abo.
17 Akee ɔvale adwule ne ɔmaanle Mowabe Belemgbunli Ɛgelɔn. Ɛnee Ɛgelɔn le sonla belane kpalɛ.
18 Mekɛ mɔɔ Yihɛde vale adwule ne maanle ye wiele la, ɔmaanle menli mɔɔ zoale adwule ne hɔle la vile ɛkɛ.
19 Noko mɔɔ ɔdwule ananze ne mɔ* mɔɔ wɔ Gelegale la+ anwo ɛkɛ la, ɔdaye mumua ne ɔziale ɔ nzi na ɔhanle kɛ: “O belemgbunli, maa menga nrɛlaleɛ bie mɔɔ ɔnle kɛ awie biala te bie la mengile wɔ.” Ɔti belemgbunli ne hanle kɛ: “Bɛyɛ koonwu!” Akee ye azonvolɛ ne mɔ kɔsɔɔti vile ɔ nwo ɛkɛ.
20 Yemɔti Yihɛde rale ɔ nwo ɛkɛ wɔ mekɛ mɔɔ ɔde ye anwuma ekpumgbunli anu weɛlɛkɔkɔ ne anu la. Na Yihɛde hanle kɛ: “Melɛ nrɛlaleɛ mɔɔ vi Nyamenle ɛkɛ la memaa wɔ.” Ɔti ɔvi ye belemgbunli ebia ne anu ɔdwazole.
21 Akee Yihɛde vale ɔ sa bɛne hwenle ye dadeɛ ne vile ye ɛzɔlɛ fema ne anwo na ɔvale ɔwɔle ɔ kunlu.
22 Dadeɛ ne fia ne wolole ɔ kunlu na ɛnlome ne hedale dadeɛ ne azo, ɔluakɛ yeanye dadeɛ ne yeanvi ɔ kunlu, na tiefi vi ɛkɛ ne vindele.
23 Yihɛde vale abenlana* ne anu vindele na ɔtotole anwuma ekpumgbunli ne nlenkɛ ne mɔ anu.
24 Mɔɔ ɔvile ɛkɛ ne la, ye azonvolɛ ne mɔ rale na bɛnwunle kɛ bɛtoto anwuma ekpumgbunli ne anu. Ɔti bɛhanle kɛ: “Ɔbayɛ kɛ ɔlɛsɔho ɔ gyakɛ* wɔ anwuma ekpumgbunli anu weɛlɛkɔkɔ ne anu.”
25 Bɛhendɛle too ɔyɛle bɛ anyiemgba, noko mekɛ mɔɔ bɛnwunle kɛ ɔmbuke anwuma ekpumgbunli ne anlenkɛ ne la, bɛvale sanvɛ ne na bɛbukele na bɛnwunle kɛ bɛ belemgbunli ne ɛwu la azɛlɛ ne anwo!
26 Mekɛ mɔɔ bɛtɛgyigyi ɛkɛ ne la, Yihɛde hɔvale ananze ne mɔ*+ anwo ɛkɛ na ɔnriandile ɔhɔle Siayela.
27 Mɔɔ ɔhɔdwule la, ɔbɔle aweɛne ne+ wɔ Yifelaem awoka ne mɔ azo;+ na Yizilayɛma vi awoka ne mɔ azo dwule aze na bɛdoale ye.
28 Akee ɔzele bɛ kɛ: “Bɛdoa me, ɔluakɛ Gyihova ɛva bɛ agbɔvolɛ, Mowabema, ɛwula bɛ sa nu.” Ɔti bɛdoale ye na bɛhɔziale Mowabema wɔ Dwɔdan ne ɛleka mɔɔ bɛkola bɛwudwu bɛpɛ la, na bɛammaa awie biala adenle bɛammaa yeampɛ nu.
29 Mekɛ zɔhane, bɛhunle Mowabema 10,000+ mɔɔ bɛ nwo yɛ se na bɛze konle nye zo la; kokye bɔbɔ anvi bɛ sa.+
30 Yemɔti kenle zɔhane, Yizilayɛma lile Mowabema anwo zo konim, na azɛlɛ ne liele ɔ menle* ɛvolɛ 80.+
31 Yihɛde vile ɛkɛ la, Enate ara Hyamega+ noko vale kpɔma mɔɔ bɛfa bɛka nlankɛ la+ hunle Filisitiama 600;+ ɔdaye noko ɔliele Yizilayɛma.
Ɔbodwɛkɛ
^ Anzɛɛ “Heemate adenle zo.”
^ Nea Edwɛkɛbohilelɛ.
^ Hibulu aneɛ nu, “Elam-nahaleeyem.”
^ Hibulu aneɛ nu, “Elam.”
^ Anzɛɛ “anzodwolɛ rale azɛlɛ ne azo.”
^ Anzɛɛ ɔkola ɔkile, “ahuma mɔɔ bɛtu awolɛ nu.”
^ Anzɛɛ ɔkola ɔkile, “nvɛnzɛlɛ.”
^ Hibulu aneɛ nu, “ɔlɛkeda ɔ gyakɛ anwo.”
^ Anzɛɛ ɔkola ɔkile, “ahuma mɔɔ bɛtu awolɛ nu.”
^ Anzɛɛ “na anzodwolɛ rale azɛlɛ ne azo.”
