Ndɛnebuavolɛma 4:1-24
4 Noko mekɛ mɔɔ Yihɛde wule la, Yizilayɛma eza yɛle ɛtane wɔ Gyihova anye zo.+
2 Ɔti Gyihova vale bɛ wulale Keena Belemgbunli Gyeeben+ mɔɔ lile tumi wɔ Heezɔ la asa anu. Ɛnee ye ɛlɔnema kpanyinli a le Sesɛla mɔɔ dɛnlanle Halohyɛte-ha-goyɛm+ la.
3 Yizilayɛma zunle vɛlɛle Gyihova,+ ɔluakɛ ɛnee Gyeeben lɛ* konle ehwili 900 mɔɔ dadeɛ wɔ nwolɛ la,*+ na ɔhilele Yizilayɛma nyane too ɛvolɛ 20.+
4 Mekɛ zɔhane, ɛnee ngapezonli raalɛ+ Dɛbola mɔɔ ɔ hu a le Lapedɔto la a bua ndɛne wɔ Yizilayɛ a.
5 Ɛnee dahuu ɔtɛnla Dɛbola arɛlɛ ne mɔɔ wɔ Releema+ nee Bɛtɛle+ mɔɔ wɔ Yifelaem awoka ne mɔ azo la avinli la abo; ɛnee Yizilayɛma kɔ ye ɛkɛ kɔtie Nyamenle ndɛnebualɛ.
6 Ɔmaanle bɛhɔvɛlɛle Abenoam ara Balake+ bɛvile Kidɛhye-nafetalae+ bɛrale na ɔzele ye kɛ: “Asoo Gyihova, Yizilayɛ Nyamenle ne ɛtɛsoanle wɔ ɔ? ‘Kɔ na kɔva Nafetalae nee Zɛbulɛn mrenyia 10,000 boka ɛ nwo na bɛhɔ Teebɔ Boka ne azo.
7 Mebava Sesɛla, Gyeeben ɛlɔnema kpanyinli ne, nee ye konle ehwili ne mɔ yɛɛ ye sogyama ne mearɛlɛ wɔ wɔ Kaehyɔn azudenle*+ ne anloa na meava ye meawula ɛ sa nu.’”+
8 Ɔti Balake zele ye kɛ: “Saa ɛ nee me bahɔ a, ɛnee mebahɔ, noko saa ɛ nee me ɛnrɛhɔ a, menrɛhɔ.”
9 Na ɔzele ye kɛ: “Me nee wɔ bahɔ. Noko akee, konle ne mɔɔ ɛlɛkɔ la, ɛnrɛnyia nwolɛ anyunlunyia, ɔluakɛ Gyihova bava Sesɛla+ awula raalɛ sa nu.” Akee Dɛbola dwazole na ɔ nee Balake hɔle Kidɛhye.+
10 Balake boɔboale Zɛbulɛn nee Nafetalae anloa+ wɔ Kidɛhye, na mrenyia 10,000 lile ɔ nzi. Dɛbola noko nee ye hɔle.
11 Noko ɛnee Kinanli Hibɛ ɛhwe ɔ nwo ɛvi Kinama+ mɔɔ bɛle Mosisi ase+ Hobabe abozoamra la anwo, na ɔzile ye ɛdanlɛsua ne wɔ baka kpole ne mɔɔ wɔ Zeeyananem mɔɔ wɔ Kidɛhye la anwo.
12 Bɛhanle bɛhilele Sesɛla kɛ Abenoam ara Balake ɛhɔ Teebɔ Boka ne azo.+
13 Ɛkɛ ne ala Sesɛla boɔboale ye konle ehwili 900 ne mɔɔ dadeɛ wɔ nwolɛ la* nee ye sogyama mɔɔ boka ɔ nwo la amuala anloa vile Halohyɛte-ha-goyɛm kɛ bɛkɔ Kaehyɔn azudenle* ne+ anloa.
14 Dɛbola zele Balake kɛ: “Dwazo, ɔluakɛ ɛnɛ a le kenle mɔɔ Gyihova bava Sesɛla awula ɛ sa nu a. Asoo Gyihova ɛnli ɛ nyunlu ɔ?” Na Balake nee mrenyia 10,000 ne mɔɔ li ɔ nzi la vi Teebɔ Boka ne azo dwule aze.
15 Akee Gyihova maanle Sesɛla nee ye konle ehwili ne mɔ yɛɛ ye sogyama ne amuala anye zo danle bɛ+ wɔ Balake konle dadeɛ ne anyunlu. Akee Sesɛla vi ye konle ehwili ne anu dwule aze na ɔnriandile.
16 Balake doale konle ehwili ne mɔ nee sogyama ne too ɔhɔdwule Halohyɛte-ha-goyɛm. Ɔti Sesɛla ɛlɔne ne kɔsɔɔti dɔle dadeɛ nloa; ko bɔbɔ anga.+
17 Noko Sesɛla nriandile hɔle Kinanli Hibɛ+ aye Gyeeyɛle+ ɛdanlɛsua ne anu, ɔluakɛ ɛnee anzodwolɛ wɔ Heezɔ Belemgbunli Gyeeben+ nee Kinanli Hibɛ abusua ne avinli.
18 Akee Gyeeyɛle yiale Sesɛla na ɔzele ye kɛ: “Me menle, bɛla, wolo bɛla. Mmasulo.” Ɔti ɔwolole ye ɛdanlɛsua ne anu, na Gyeeyɛle vale kundu hedale ɔ nwo.
19 Sesɛla zele ye kɛ: “Mesɛlɛ wɔ, maa me nzule ekyi meno na nzuhɔne ɛlɛku me.” Ɔti ɔdule meleke nwoma kodoku zo na ɔmaanle ye bie ɔnlonle,+ ɛhye anzi, ɔvale kundu ne ɔhedale ɔ nwo bieko.
20 Ɔhanle ɔhilele ye kɛ: “Gyinla ɛdanlɛsua ne anuhɔlɛ, na saa awie biala babiza wɔ kɛ, ‘Nrenyia wɔ ɛke ɔ?’ a, ka kɛ ‘Kyɛkyɛ!’”
21 Noko Hibɛ aye Gyeeyɛle hɔvale ɛdanlɛsua takola nee hamenle. Mekɛ mɔɔ ɛnee Sesɛla ɛvɛ na yelafe botoo la, ɔyɛle nyaa ɔbikyele ye na ɔvale takola ne ɔwɔle ɔ nzo tɛbanu na ɔbɔle zolɛ ɔmaanle ɔwolole azɛlɛ ne anu, na ɔwule.+
22 Balake hɔle ɛkɛ ne kɛ ɔkakpondɛ Sesɛla, na Gyeeyɛle vindele rayiale ye na ɔhanle kɛ: “Bɛla maa mengile wɔ nrenyia ne mɔɔ ɛlɛkpondɛ ye la.” Ɔ nee ye hɔle na ɔnwunle kɛ Sesɛla ɛwu la ɛkɛ na takola ne zia ɔ nzo tɛbanu.
23 Ɔti kenle zɔhane, Nyamenle bɛlɛle Keena Belemgbunli Gyeeben aze wɔ Yizilayɛma anyunlu.+
24 Yizilayɛma asa homonle Keena+ Belemgbunli Gyeeben anwo zo hɔkpulale kɛ bɛzɛkyele Keena Belemgbunli Gyeeben bɔkɔɔ la.+
Ɔbodwɛkɛ
^ Hibulu aneɛ nu, “ɔlɛ.”
^ Hibulu aneɛ nu, “lɛ mbulalɛ ehwili.”
^ Anzɛɛ “bɔnza.”
^ Hibulu aneɛ nu, “mbulalɛ ehwili.”
^ Anzɛɛ “bɔnza.”
