Ndɛnebuavolɛma 8:1-35
8 Akee Yifelaem mrenyia ne mɔ zele ye kɛ: “Duzu a wɔva wɔyɛ yɛ la? Duzu ati a ɛ nee Medeanema kaho mɔɔ wɔanvɛlɛ yɛ a?”+ Na bɛ nee ye lile butule kpole kpalɛ.+
2 Noko ɔzele bɛ kɛ: “Asoo mɔɔ bɛyɛ la ɛndɛla mɔɔ meyɛ la ɔ? Asoo Yifelaem+ ma bo zo ne mɔɔ bɛsesa la ɛnle kpalɛ ɛndɛla Abi-yizɛ+ vanye ma mɔɔ bɛde la ɔ?
3 Nyamenle a vale Medean mgbanyima Olɛbe nee Ziyɛbe wulale bɛ sa nu a,+ na mɔɔ bɛyɛ la ɛndɛla mɔɔ meyɛ la ɔ?” Mekɛ mɔɔ ɔhanle edwɛkɛ ɛhye la, bɛ ɛya ne dwole.*
4 Akee Gedɛyɔn rale Dwɔdan ne anloa na ɔpɛle. Ɛnee ɔ nee mrenyia 300 ne mɔɔ nee ye lua la ɛvɛ kpalɛ, noko bɛhɔle zo bɛvoanle bɛ ndinlizo.
5 Ɔti ɔzele menli mɔɔ wɔ Sɛkɔto la kɛ: “Mesɛlɛ bɛ, bɛmaa me paano bɛmaa menva memaa menli mɔɔ nee me lua la, ɔluakɛ bɛvɛ, na medoa Medean Arelemgbunli Ziba nee Zalemɛna.”
6 Noko Sɛkɔto mgbanyima hanle kɛ: “Wɔzɔ Ziba nee Zalemɛna asa wɔwie mɔɔ ɔti ɔwɔ kɛ yɛmaa wɔ ɛlɔne ne paano a?”
7 Ɔti Gedɛyɔn hanle kɛ: “Mɔɔ bɛha la ati, saa Gyihova fa Ziba nee Zalemɛna wula me sa nu a, mebava fienemgbole nu mbowule meabila bɛ meamaa bɛ nwo akpakyekpakye.”+
8 Na ɔvile ɛkɛ ne ɔhɔle Pɛnuwɛle na ɔhɔzɛlɛle bɛ deɛ ko ne ala bie, noko Pɛnuwɛlema buale ye kɛ mɔɔ Sɛkɔtoma buale ye la.
9 Ɔti ɔzele Pɛnuwɛlema noko kɛ: “Saa mesia meba anzodwolɛ nu a, mebabubu tawa ɛhye.”+
10 Zɔhane mekɛ ne, ɛnee Ziba nee Zalemɛna nee bɛ ɛlɔne ne, mrenyia kɛyɛ 15,000, wɔ Kakɔ. Ɛhye mɔ a le Aduduleɛ Amra ɛlɔne ne mɔɔ hale la amuala a,+ ɔluakɛ ɛnee mrenyia 120,000 mɔɔ dedɛ konle dadeɛ la ɛwu.
11 Gedɛyɔn vale menli mɔɔ de ɛdanlɛ azua nu wɔ Noba nee Dwɔgebɛhaa+ aduduleɛ la adenle ne azo na ɔhɔle bɛ nwo zo wɔ azokoɛleɛ ne mɔɔ bɛ nye ɛnla a.
12 Mekɛ mɔɔ Ziba nee Zalemɛna ɛlɛnriandi la, ɔdoale bɛ na ɔhyele Medean arelemgbunli nwiɔ ne, Ziba nee Zalemɛna, na ɔmaanle ɛzulolɛ hanle ɛlɔne ne amuala.
13 Mɔɔ Dwowahye ara Gedɛyɔn vi konle nu ɛlɛba la, ɔluale adenle ne mɔɔ kɔ Hilɛse awoka ne mɔ azo la anu.
14 Ɔlua adenle nu la, ɔhyele kpavolɛ bie mɔɔ vi Sɛkɔto la na ɔbizebizale ye edwɛkɛ. Ɔti kpavolɛ ne hɛlɛle Sɛkɔto menli titili nee ye mgbanyima 77 ne mɔ aluma maanle ye.
15 Akee ɔhɔle Sɛkɔtoma ɛkɛ na ɔhanle kɛ: “Bɛnlea, me nee Ziba nee Zalemɛna mɔɔ bɛdabɛ ti bɛdendɛle bɛtiale me kɛ, ‘Wɔzɔ Ziba nee Zalemɛna asa wɔwie mɔɔ ɔti ɔwɔ kɛ yɛmaa wɔ ɛlɔne ne mɔɔ ɛvɛ la paano a?’ la ɛra.”+
16 Akee ɔhyele Sɛkɔto mgbanyima na ɔvale fienemgbole nu mbowule ɔbilale bɛ ɔhilele bɛ nrɛlɛbɛ.+
17 Na ɔbubule Pɛnuwɛle tawa ne+ na ɔhunle mrenyia mɔɔ wɔ suakpole ne azo la.
18 Ɔbizale Ziba nee Zalemɛna kɛ: “Kɛzi menli mɔɔ bɛhunle bɛ wɔ Teebɔ la de ɛ?” Bɛhanle kɛ: “Bɛle kɛ ɛdawɔ la, bɛ nuhua ko biala zɔho belemgbunli ra.”
19 Ɔti ɔhanle kɛ: “Bɛle me mediema mrenyia, me mame amra ɔ. Mekɛ ala mɔɔ Gyihova de aze la, saa bɛangu bɛ a, anrɛɛ medame noko menrɛhu bɛ.”
20 Akee Gedɛyɔn zele ɔ ra kpanyinli Gyita kɛ: “Dwazo ku bɛ.” Noko Gyita andwe ye konle dadeɛ ne; ɛnee ɔsulo ɔluakɛ ɛnee ɔtɛde kakula kpavolɛ.
21 Ɔti Ziba nee Zalemɛna hanle kɛ: “Ɛdawɔ mumua ne dwazo na ku yɛ, ɔluakɛ nrenyia anwosesebɛ* a bɛfa bɛnwu ye a.” Ɔti Gedɛyɔn dwazole na ɔhunle Ziba nee Zalemɛna+ na ɔyeyele agudeɛ ne mɔɔ bɛyɛ ye kɛ siane mɔɔ gua bɛ afunlumu ne mɔ akɔme la.
22 Nzinlii, Yizilayɛma zele Gedɛyɔn kɛ: “Di yɛ nwo zo tumi, ɛdawɔ nee ɛ ra yɛɛ wɔ anlɔnra noko, ɔluakɛ wɔlie yɛ wɔvi Medeanema asa anu.”+
23 Noko Gedɛyɔn zele bɛ kɛ: “Menrɛli bɛ nwo zo tumi, yɛɛ me ra noko ɛnrɛli bɛ nwo zo tumi. Gyihova a bali bɛ nwo zo tumi a.”+
24 Gedɛyɔn doale zo kɛ: “Mesɛlɛ bɛ debie ko: bɛ nuhua ko biala ɛye bɛ bonyi nu nvutuke ngɛba ɛvi ye ninyɛne mɔɔ ɔnyianle wɔ konle ne anu la ɛmaa me.” (Kɛmɔ bɛle Yehyemɛlema la ati, ɛnee bɛlɛ bɛ bonyi nu nvutuke ngɛba.)+
25 Bɛbuale kɛ: “Yɛbava yɛamaa wɔ.” Akee bɛzɛle tɛladeɛ wɔ azɛlɛ ne anwo na bɛ nuhua ko biala yele bɛ bonyi nu ngɛba vile ninyɛne mɔɔ ɔnyianle la anu dole zolɛ.
26 Bɛ bonyi nu nvutuke ngɛba ne mɔ mɔɔ ɔliele la ɛlomboɛ le nvutuke hyikɛle* 1,700; agudeɛ mɔɔ bɛyɛ ye kɛ siane, asomadeɛ, adɛladeɛ buluwu nee kɔkɔlɛ afonla mɔɔ Medean arelemgbunli ne mɔ wulale yɛɛ ndweabane mɔɔ gua afunlumu ne mɔ akɔme la ɛmboka nwo.+
27 Gedɛyɔn vale yɛle yifɔdo+ na ɔvale ɔhilele menli wɔ ye sua zo Ɔfela;+ na Yizilayɛma kɔsɔɔti nee ye bɔle sunsum nu tuutuu wɔ ɛkɛ,+ na ɔrayɛle ɛhane ɔmaanle Gedɛyɔn nee ye sua nu amra.+
28 Ɔti Yizilayɛma lile Medeanema+ anwo zo konim, na bɛangola bɛangyinla bɛ nyunlu* bieko; na azɛlɛ ne liele ɔ menle* ɛvolɛ 40 wɔ Gedɛyɔn mekɛ zo.+
29 Yemɔti Dwowahye ara Gyɛlubeeyale+ ziale rale ye sua nu na ɔdɛnlanle ɛkɛ.
30 Gedɛyɔn wole mralɛ mrenyia 70* ɔluakɛ ɔgyale mraalɛ dɔɔnwo.
31 Ye nwewe* ne mɔɔ wɔ Hyikɛm la noko wole ralɛ nrenyia maanle ye, na ɔdonle ye Abemɛlɛke.+
32 Dwowahye ara Gedɛyɔn yɛle ɛrelera nwosonwoso na yeawu, na bɛziele ye wɔ ye papa Dwowahye nla ne anu wɔ Abi-yizɛma sua Ɔfela azo.+
33 Mɔɔ Gedɛyɔn wule ala la, Yizilayɛma bɔle ɔ bo nee Beeyale ananze ne mɔ bɔle sunsum nu tuutuu,+ na bɛvale Beeyale-bilete bɛyɛle bɛ nyamenle.+
34 Yizilayɛma angakye Gyihova bɛ Nyamenle ne+ mɔɔ liele bɛ vile bɛ agbɔvolɛ kɔsɔɔti mɔɔ ɛbɔ bɛ nwo ɛyia la asa anu la;+
35 yɛɛ bɛanla ɛlɔlɛ kpundii ali bɛangile Gyɛlubeeyale, mɔɔ le Gedɛyɔn la sua nu amra wɔ ninyɛne mgbalɛ kɔsɔɔti mɔɔ ɔyɛle ɔmaanle Yizilayɛma la anwo.+
Ɔbodwɛkɛ
^ Hibulu aneɛ nu, “bɛ sunsum ne dwole.”
^ Anzɛɛ “ɔluakɛ kɛ mɔɔ nrenyia de la, zɔhane a ye anwosesebɛ de a.”
^ Hibulu aneɛ nu, “bɛangola bɛ ti zo maa.”
^ Anzɛɛ “anzodwolɛ rale azɛlɛ ne azo.”
^ Hibulu aneɛ nu, “nyianle mralɛ mrenyia 70 mɔɔ vi ye ɛzɔlɛ nu vindele.”
