Nihɛmaya 13:1-31
13 Kenle ko zɔhane, bɛgengale Mosisi buluku ne bɛmaanle menli ne dele,+ na bɛnwunle kɛ bɛhɛlɛ ye wɔ nu kɛ ɔnle kɛ Amɔnonli anzɛɛ Mowabenli+ biala ba nɔhalɛ Nyamenle ne menli ne anu ɛlɛ,+
2 ɔluakɛ bɛammaa Yizilayɛma aleɛ nee nzule, emomu bɛbɔle Beelam ɛkpa kɛ ɔwa bɛ amonle.+ Noko yɛ Nyamenle ne maanle amowa ne hakyile nyilalɛ.+
3 Mɔɔ bɛdele Mɛla ne ala la, bɛbɔle ɔ bo bɛyele nyɛvolɛ ne mɔ* kɔsɔɔti bɛvile Yizilayɛma anu.+
4 Kolaa na ɛhye azi la, ɛnee ɛsɔfo Yilayahyebe+ mɔɔ ɔ nwo sonla a le Tobaya+ la a nea yɛ Nyamenle ne sua* nu ninyɛnezielɛ ɛleka* ne azo a.+
5 Ɔmaanle bɛzieziele ninyɛnezielɛ ɛleka* kpole ne mɔɔ ɛnee bɛfa Livaema,+ edwɛndolɛma nee nlenkɛ mgbole sinzavolɛma ne mɔ ma afɔlebɔdeɛ, ɛyɛlɛvuanlɛ, ahyɛnze nee ma ngyɛnu bulu anu ko ne, nwanye fofolɛ, nwole+ nee ɛsɔfo ne mɔ ahyɛlɛ ninyɛne ne+ bɛgua ɛkɛ la anu bɛmaanle ye.
6 Mekɛ ɛhye amuala anu, ɛnee menle Gyɛlusalɛm, ɔluakɛ mengɔle belemgbunli ne ɛkɛ wɔ Babelɔn Belemgbunli Atazɛzɛse+ tumililɛ ɛvolɛ 32 ne azo;+ na nzinlii menzɛlɛle belemgbunli ne adenle na menvile ɔ nwo ɛkɛ ne ekyii.
7 Akee membale Gyɛlusalɛm na menwunle ɛtane kpole mɔɔ Tobaya+ ati Yilayahyebe+ ɛyɛ la, kɛ yeziezie ninyɛnezielɛ ɛleka ne mɔ ko anu yemaa ye wɔ nɔhalɛ Nyamenle ne sua nu ɛkɛ.
8 Me nye anlie nwolɛ fee, yemɔti menyele Tobaya sua nu ninyɛne kɔsɔɔti menvile ninyɛnezielɛ ɛleka* ne na menvuandinle bɛ menguale ye lɔ.
9 Ɛhye anzi, memaanle bɛdele ninyɛnezielɛ ɛleka* ne mɔ anwo; na menziale menvale nɔhalɛ Nyamenle ne sua nu ahyɛnze ne+ nee ma afɔlebɔdeɛ ne nee ɛyɛlɛvuanlɛ ne+ menguale sua ne anu bieko.
10 Eza menwunle ye kɛ bɛnva Livaema kyɛfoa ne bɛmmaa bɛ,+ yemɔti Livaema nee edwɛndolɛma ne ɛgyakyi bɛ gyima ne na awie biala ɛzia ɛhɔ ye ɛya nu.+
11 Ɔti mendeanle mgbanyima ne mɔ+ na membizale bɛ kɛ: “Duzu ati a bɛbu bɛ nye bɛgua nɔhalɛ Nyamenle ne sua ne azo ɛ?”+ Akee memboɔboale bɛ nloa na memaanle bɛziale bɛhɔyɛle bɛ gyima ne.
12 Na Dwuda amuala vale ma ngyɛnu bulu anu ko ne, nwanye fofolɛ ne yɛɛ nwole rale+ ninyɛnezielɛ ɛleka ne mɔ.+
13 Akee memaanle ɛsɔfo Hyɛlimaya, kɛlɛhɛlɛvolɛ Zeedɔko nee Livaenli Pɛdaya nleanle ninyɛnezielɛ ɛleka ne mɔ azo, yɛɛ Matanaya ara Zakɛ ara Heenan yɛle bɛ boavolɛ ɔluakɛ ɛnee bɛbu menli ɛhye mɔ kɛ bɛdi nɔhalɛ. Ɛnee bɛ gyima a le kɛ bɛbahyɛ ninyɛne ne mɔ bɛamaa bɛ mediema ne mɔ.
14 O me Nyamenle, kakye me+ wɔ ɛhye mɔ anwo, mmamaa ɛ rɛle fi ɛlɔlɛ kpundii ne mɔɔ mehile ye wɔ me Nyamenle ne sua ne nee ye ɛzonlenlɛ ne anwo la.+
15 Wɔ mekɛ zɔhane, menwunle menli wɔ Dwuda kɛ bɛlɛtwihwi nwanye wɔ Ɛnwomenlelielɛ kenle,+ bɛlɛfa ma mɔɔ bɛkyekye la bɛagua asoaso ne mɔ anzi, yɛɛ bɛlɛfa nwanye, vanye ma, feege nee bɔlɛ ngakyile bɛara Gyɛlusalɛm wɔ Ɛnwomenlelielɛ kenle.+ Yemɔti membɔle bɛ kɔkɔ wɔ kenle zɔhane mɔɔ bɛfa bɛtɔne ninyɛne la anwo.*
16 Na Tayama mɔɔ ɛnee de suakpole ne azo la vale fɛlɛ nee ninyɛne ngakyile dɔɔnwo radɔnenle bɛ wɔ Ɛnwomenlelielɛ kenle+ ne maanle Dwudama wɔ Gyɛlusalɛm.
17 Ɔti mendeanle Dwuda mgbanyima ne mɔ na membizale bɛ kɛ: “Ɛtane boni a bɛlɛyɛ bɛagua Ɛnwomenlelielɛ kenle ne bɔbɔ anwo evinli a?
18 Asoo tɛ ɛhye a bɛ nenyia mɔ yɛle mɔɔ yɛ Nyamenle ne vale munzule ɛhye mɔ amuala rale yɛdayɛ nee suakpole ɛhye azo a? Kɛkala, ɔlua Ɛnwomenlelielɛ kenle+ ne mɔɔ bɛlɛgua nwolɛ evinli la ati, bɛlɛmaa ɛya wuluwulu ne mɔɔ wɔ Yizilayɛ anwo zo la ayɛ kpole.”
19 Menlile mɛla kɛ ɔwɔ kɛ bɛtoto Gyɛlusalɛm nlenkɛ mgbole ne mɔ anu kolaa na maanle nu amua na Ɛnwomenlelielɛ kenle ne abɔ ɔ bo. Eza menganle kɛ bɛmmatukuedukue too kɔkpula kɛ Ɛnwomenlelielɛ kenle ne kɛpɛ nu, na memaanle me sonvolɛma ne bie mɔ gyinlegyinlanle nlenkɛ mgbole ne mɔ anloa amaa bɛanva ninyɛne adɔne bɛamba ɛkɛ wɔ Ɛnwomenlelielɛ kenle.
20 Ɔti gualilɛma ne nee menli mɔɔ tɔne ninyɛne ngakyile muala bie la lale Gyɛlusalɛm bane ne anzi lɔ kenle ko anzɛɛ kenle nwiɔ.
21 Membɔle bɛ kɔkɔ na membizale bɛ kɛ: “Kɛmɔti a bɛda bane ne anzi ɛ? Saa bɛyɛ zɔ bieko a, mebahwe bɛ nzo.” Ɔvi mekɛ zɔhane mɔɔ kɔ la bɛamba ɛkɛ ne wɔ Ɛnwomenlelielɛ kenle bieko.
22 Akee menzele Livaema ne kɛ bɛde bɛ nwo dahuu na bɛrazinza nlenkɛ mgbole ne mɔ na bɛyɛ Ɛnwomenlelielɛ kenle ne nwuanzanwuanza.+ O me Nyamenle, kakye me wɔ ɛhye noko anwo, na nwu me anwunvɔne kɛ mɔɔ wɔ ɛlɔlɛ kpundii ne bebelebe de la.+
23 Mekɛ zɔhane, eza menwunle kɛ Dwuuma bie mɔ ɛgyigya Ahyedɔdo,+ Amɔn yɛɛ Mowabe+ mraalɛ.*+
24 Bɛ mra ne mɔ foa ko ka Ahyedɔdo aneɛ yɛɛ foa ko ka maanle gyɛne zo aneɛ, noko bɛ nuhua biala ɛngola ɛnga Dwuuma aneɛ ne.
25 Ɔti mendeanle bɛ na menganle munzule edwɛkɛ mentiale bɛ na membole bɛ nuhua bie mɔ+ na mendudule bɛ ti enrinli na memaanle bɛvale Nyamenle bɛhanle ndane, na menzele bɛ kɛ: “Bɛmmafa bɛ mra mraalɛ bɛmaa bɛ mra mrenyia agyalɛ, yɛɛ bɛmmadie bɛ mra mraalɛ ne mɔ anu biala bɛmaa bɛ mra mrenyia, na bɛdabɛ noko bɛmmagya bie.+
26 Asoo tɛ ɛhye mɔ a maanle Yizilayɛ Belemgbunli Sɔlɔmɔn yɛle ɛtane a? Ɛnee maanle biala belemgbunli ɛndwu ye;+ na ɛnee ye Nyamenle ne kulo ye,+ yemɔti Nyamenle maanle ɔyɛle Yizilayɛ kɔsɔɔti azo belemgbunli. Noko ɔdaye bɔbɔ, nyɛvolɛ mraalɛ maanle ɔyɛle ɛtane.+
27 Asoo ɔnyɛ nwanwane kɛ bɛanli nɔhalɛ bɛammaa yɛ Nyamenle ne na bɛyɛ ɛtane kpole ɛhye bɛgyigya nyɛvolɛ mraalɛ la ɔ?”+
28 Ɛnee ɛsɔfo kpanyinli Yilayahyebe+ ara Dwɔyada+ amra mrenyia ne mɔ ko le Hɔlɔnonli Sanebalate+ ase nrenyia. Yemɔti menvoanle ye.
29 O me Nyamenle, kakye bɛ, ɔluakɛ bɛgua ɛsɔfolilɛ ne nee ɛsɔfolilɛ ngyekyeleɛ ne yɛɛ Livaema+ ne anwo evinli.+
30 Akee mendele bɛ nwo wɔ nyɛvolɛ nyɛleɛ biala mɔɔ ɛgua bɛ nwo evinli la anwo, na memaanle ɛsɔfoma ne nee Livaema ne gyima, awie biala nee ye gyima,+
31 na menyɛle ɛyɛne+ nee ma mɔɔ kɛlimoa kɛbolo mɔɔ bɛbava bɛara wɔ mekɛ mɔɔ bɛhile anu la anwo ngyehyɛleɛ.
O me Nyamenle, kakye me wɔ adenle kpalɛ zo.+
Ɔbodwɛkɛ
^ Anzɛɛ “menli mɔɔ ɛrafonla bɛ nu la.”
^ Anzɛɛ “ɛzonlenlɛsua.”
^ Anzɛɛ “aleɛlilɛ ɛleka.”
^ Anzɛɛ “aleɛlilɛ ɛleka.”
^ Anzɛɛ “aleɛlilɛ ɛleka.”
^ Anzɛɛ “aleɛlilɛ ɛleka.”
^ Anzɛɛ ɔkola ɔkile, “membɔle bɛ kɔkɔ kenle zɔhane kɛ bɛmmatɔne ninyɛne.”
^ Anzɛɛ “ɛva bɛ ɛhɔ bɛ azua nu.”
