Nihɛmaya 2:1-20
2 Wɔ Naesan* siane ne anu, wɔ Belemgbunli Atazɛzɛse+ tumililɛ ɛvolɛ mɔɔ tɔ zo 20 ne azo,+ ɛnee nwanye gyi ɔ nyunlu ɛkɛ, na kɛ mɔɔ meyɛ ye dahuu la, menvale nwanye ne memaanle belemgbunli ne.+ Noko ɛnee me nyunlu ɛtɛyɛle alɔbɔlɛ alɔbɔlɛ wɔ ɔ nyunlu ɛlɛ.
2 Ɔti belemgbunli ne bizale me kɛ: “Duzu ati a ɛ nyunlu ɛyɛ alɔbɔlɛ alɔbɔlɛ wɔ mekɛ mɔɔ ɛ nwo ɛtɛtole wɔ la ɛ? Tɛ ɛhwee kɛ ahonle nu alɔbɔlɛlilɛ ɔ.” Na ɛzulolɛ kpole hanle me.
3 Na membuale belemgbunli ne kɛ: “Belemgbunli ɛnyi ɛhyɛ! Duzu ati a ɔnle kɛ me nyunlu yɛ alɔbɔlɛ alɔbɔlɛ wɔ mekɛ mɔɔ suakpole ne, ɛleka mɔɔ bɛziele me nenyia mɔ la ɛdɔ mgbane, na bɛva senle bɛyela ye nlenkɛ mgbole ne mɔ la ɛ?”+
4 Na belemgbunli ne bizale me kɛ: “Duzu a ɛkpondɛ a?” Ɛkɛ ne ala menzɛlɛle Nyamenle ne mɔɔ wɔ anwuma la.*+
5 Akee membuale belemgbunli ne kɛ: “Saa belemgbunli anye kɛlie nwo na wɔ sonvolɛ ɛnyia ɛ nyunlu ɛlolɛ a, ɛnee soa me wɔ Dwuda, maa mengɔ suakpole ne mɔɔ bɛziele me nenyia mɔ wɔ ɛkɛ la azo, amaa meakyekye ye bieko.”+
6 Akee belemgbunli ne mɔɔ ɛnee ɔbahyema* ne de ɔ nwo ɛkɛ ne la bizale me kɛ: “Wɔ adendulɛ ne bali kenle nyɛ, na kenlenzu a ɛbazia wɔara a?” Ɔti ɛnee belemgbunli ne anye die nwo kɛ ɔbamaa meahɔ,+ na mengilele ye mekɛ.+
7 Na menzele belemgbunli ne kɛ: “Saa belemgbunli anye kɛlie nwo a, ɛnee ɔmaa bɛmaa me ngɛlata mengɔmaa amɛnladoma mɔɔ bɛwɔ maanzinli mɔɔ wɔ Azule Ne Anzi lɔ* anu la,+ na bɛamaa meapɛ nu too meahɔdwu Dwuda,
8 nee kɛlata ɔmaa mengɔmaa Esafe mɔɔ nea Belemgbunli Ɛhoayelɛ ne azo la, amaa yeamaa me mbaka meayɛ Sua* Ne Aranemgbole ne+ nlenkɛ mgbole ne mgbunla ne mɔ na mealie suakpole ne bane ne mɔ+ na meazi ɛleka mɔɔ mebahɔ la sua ne.” Ɔti belemgbunli ne vale maanle me,+ ɔluakɛ ɛnee me Nyamenle ne kpalɛyɛlɛ ɛsalɛ ne wɔ me nwo zo.+
9 Akee mengɔndwule amɛnladoma mɔɔ bɛwɔ maanzinli mɔɔ wɔ Azule Ne Anzi lɔ anu la ɛkɛ na menvale belemgbunli ngɛlata ne mɔ memaanle bɛ. Belemgbunli ne maanle sogya mgbanyima nee mgbɔnwɔkavoma noko nee me hɔle.
10 Mekɛ mɔɔ Hɔlɔnonli Sanebalate+ nee Tobaya+ mɔɔ le Amɔnoma+ kpanyinli* la dele la, bɛvale ɛya kpole kɛ awie ɛra kɛ ɔbayɛ debie kpalɛ yeamaa Yizilayɛma la.
11 Mengɔndwule Gyɛlusalɛm, na mendɛnlanle ɛkɛ ne kenle nsa.
12 Mendwazole nɔɔzo, me nee menli ekyi bie mɔɔ boka me nwo la, na meanga mɔɔ me Nyamenle ne ɛva ɛwula me ahonle nu kɛ menyɛ memaa Gyɛlusalɛm la meangile awie biala, na ɛnee nane biala ɛmboka me nwo kɛ nane ne mɔɔ mede zo la ala.
13 Na menluale Bɔnza Anlenkɛ Kpole ne+ anu menvindele nɔsolɛ nu, menvale Ɛwɔlɛ Kpole Nzubula ne anyunlu mengɔle Nzonle Anlenkɛ Kpole ne+ anloa, meneɛnleanle Gyɛlusalɛm bane ne mɔ mɔɔ bɛbubu bɛ bɛgua la nee nlenkɛ mgbole ne mɔ mɔɔ bɛva senle bɛyela bɛ la.+
14 Na mendoale zo mengɔle Nzubula Anlenkɛ Kpole ne+ anloa nee Belemgbunli Nzubula ne anwo, ɛnee ɛleka ɛnle ɛkɛ mɔɔ nane ne mɔɔ mede zo la bava a.
15 Noko mendoale zo wɔ bɔnza ne anu wɔ nɔe ne meneɛnleanle bane ne, yemɔ anzi, menvale Bɔnza Anlenkɛ Kpole ne+ anu menziale me nzi.
16 Ɛnee mgbanyima ne mɔ+ ɛnze ɛleka mɔɔ mengɔle nee mɔɔ ɛnee melɛyɛ la, ɔluakɛ ɛnee metɛkanle edwɛkɛ biala metɛkilele Dwuuma, ɛsɔfoma, menli titili, mgbanyima ne mɔ nee gyimayɛvoma mɔɔ ɛha la.
17 Akee menzele bɛ kɛ: “Bɛkola bɛnwu tɛnlabelɛ mɔɔ ɛnle kpalɛ fee mɔɔ yɛwɔ nu la, kɛzi Gyɛlusalɛm ɛdɔ mgbane na bɛva senle bɛyela ye nlenkɛ mgbole ne mɔ la. Bɛrɛla, bɛmaa yɛzia yɛdo Gyɛlusalɛm bane ne mɔ bieko, na nyiane ɛhye andoa zo.”
18 Na menganle kɛzi me Nyamenle ne kpalɛyɛlɛ ɛsalɛ ne wɔ me nwo zo+ nee edwɛkɛ mɔɔ belemgbunli ne hanle hilele me+ la mengilele bɛ. Na bɛhanle kɛ: “Bɛmaa yɛdwazo yɛzi.” Ɔti bɛmaanle bɛ nwo* anwosesebɛ wɔ gyima kpalɛ ne anwo.+
19 Mɔɔ Hɔlɔnonli Sanebalate nee Tobaya+ mɔɔ le Amɔnoma+ kpanyinli* la yɛɛ Areleebeanli Gihyɛm+ dele la, bɛbɔle ɔ bo kɛ bɛgolo yɛ nwo+ yɛɛ bɛhilele kɛ bɛmbu yɛ bie na bɛhanle kɛ: “Duzu a bɛlɛyɛ a? Bɛlɛte belemgbunli ne anwo atua ɔ?+
20 Noko membuale bɛ kɛ: “Nyamenle ne mɔɔ wɔ anwuma la, Yemɔ a ɔbamaa yeawie yɛ boɛ a,+ na yɛdayɛ mɔɔ yɛle ye sonvolɛma la yɛbadwazo yɛazi; noko bɛmɛ bɛnlɛ kyɛfoa anzɛɛ nwolɛ adenle anzɛɛ ngakyedeɛ biala wɔ Gyɛlusalɛm.”+
Ɔbodwɛkɛ
^ Hibulu aneɛ nu, “anwuma Nyamenle ne.”
^ Anzɛɛ “belemgbunli raalɛ.”
^ Anzɛɛ “Yufileti Ne Anzi lɔ.”
^ Anzɛɛ “Ɛzonlenlɛsua.”
^ Hibulu aneɛ nu, “sonvolɛ.”
^ Hibulu aneɛ nu, “bɛ sa.”
^ Hibulu aneɛ nu, “sonvolɛ.”
