Nihɛmaya 3:1-32
-
Bɛdole bane ne mɔ bieko (1-32)
3 Ɛsɔfo kpanyinli Yilayahyebe+ nee ɔ mediema ɛsɔfoma ne dwazole na bɛzile Mboane Anlenkɛ Kpole+ ne. Bɛyɛle ye nwuanzanwuanza*+ na bɛduale ye nlenkɛ ne mɔ; bɛyɛle ye nwuanzanwuanza bɛhɔdwule Miya Tawa ne+ anwo, bɛhɔdwule Hananile Tawa ne+ noko anwo.
2 Na ɔvi bɛ nwo zo, Gyɛleko amra+ yɛle bane ne anwo gyima; yɛɛ Yemelae ara Zakɛ noko yɛle bane ne anwo gyima.
3 Hasɛnaya amra ne mɔ zile Fɛlɛ Anlenkɛ Kpole ne;+ bɛzile ye felɛmo ne+ na bɛduale ye nlenkɛ, ye kolɔkolɔ nee ye nlenkɛ nzi mbulalɛ ne mɔ.
4 Ɔvi bɛ nwo zo, Hakɔzo ara Yulaegya ara Mɛlemɔto+ yɛle mɔɔ doa zo la boɛ, ɔvi bɛ nwo zo, Mihyɛzɛbɛle ara Bɛlikaya ara Mɛhyɛlam+ doale zo, ɔvi bɛ nwo zo, Beeyana ara Zeedɔko doale zo.
5 Ɔvi bɛ nwo zo, Tɛkowama+ doale zo, noko bɛ menli titili ne mɔ ambɛlɛ bɛ nwo aze* anzonle bɛ menle mɔ.
6 Pasiya ara Dwɔyada nee Bisodaya ara Mɛhyɛlam yɛle Suakpole Dɛba Anlenkɛ Kpole ne boɛ;+ bɛzile ye felɛmo ne na bɛduale ye nlenkɛ, ye kolɔkolɔ nee ye nlenkɛ nzi mbulalɛ ne mɔ.
7 Ɔvi bɛ nwo zo, Gebɛyɔnonli Mɛlataya+ nee Mɛlononli Gyeedɔn doale zo, bɛle Gebɛyɔnoma nee Mezepama+ mɔɔ bɛwɔ amɛnlado ne mɔɔ wɔ maanzinli mɔɔ wɔ Azule Ne Anzi lɔ* la+ tumi bo.*
8 Ɔvi bɛ nwo zo, Haahaya ara Ɛzeɛle mɔɔ ɔle nvutuke dwinvolɛma ne anu ko la doale zo, na ɔvi ɔ nwo zo, Hananaya mɔɔ ɔyɛ anatele nwo gyima la doale zo; na bɛvale awolɛ bɛguale Gyɛlusalɛm too bɛhɔdwule Bane Tɛtɛlɛ ne anwo.+
9 Ɔvi bɛ nwo zo, Hɛɛ ara Relɛfaya, kpanyinli mɔɔ nea Gyɛlusalɛm maanzinli ne foa ko azo la doale zo.
10 Ɔvi bɛ nwo zo, Halumafe ara Gyedeeya yɛle mɔɔ wɔ ye sua ne anyunlu la boɛ, na ɔvi ɔ nwo zo, Hahyabenaya ara Hatɛhye doale zo.
11 Heelem+ ara Malekaegya nee Peehate-mowabe+ ara Hahyɛbe yɛle foa bie* nee Fonlomo Tawa ne boɛ.+
12 Ɔvi bɛ nwo zo, Halohɛhye ara Hyalɛm, kpanyinli mɔɔ nea Gyɛlusalɛm maanzinli ne foa ko azo la nee ɔ mra mraalɛ ne mɔ doale zolɛ.
13 Heenɛn nee Zanowama+ yɛle Bɔnza Anlenkɛ Kpole ne+ boɛ; bɛdabɛ a bɛzile na bɛduale ye nlenkɛ, ye kolɔkolɔ nee ye nlenkɛ nzi mbulalɛ ne mɔ a, na bɛyɛle bane ne kubit 1,000* boɛ, bɛhɔdwule Nzonle Anlenkɛ Kpole ne+ anwo.
14 Rilikabe ara Malekaegya, kpanyinli mɔɔ nea Bɛte-hakɛlɛm+ maanzinli ne azo la yɛle Nzonle Anlenkɛ Kpole ne boɛ; ɔdaye a ɔzile na ɔduale ye nlenkɛ, ye kolɔkolɔ nee ye nlenkɛ nzi mbulalɛ ne mɔ a.
15 Kɔlehozi ara Hyalɛn, kpanyinli mɔɔ nea Mezepa+ maanzinli ne azo la, yɛle Nzubula Anlenkɛ Kpole ne+ boɛ; ɔdaye a ɔzile na ɔdule zolɛ, ɔduale ye nlenkɛ, ye kolɔkolɔ nee ye nlenkɛ nzi mbulalɛ ne mɔ, na eza ɔyɛle Nzubula+ Kanale ne mɔɔ kɔ Belemgbunli Tola ne+ anu too ɔkɔdwu Kpolike+ mɔɔ tolo ba Devidi Suakpole+ ne azo la boɛ a.
16 Ɔvi ɔ nwo zo, Azebɛke ara Nihɛmaya, kpanyinli mɔɔ nea Bɛte-zɛɛle+ maanzinli ne foa ko azo la doale zo, ɔvi Devidi Azie ne+ anyunlu ɔhɔdwule nzubula+ ne mɔɔ bɛdule la nee Katakyiema Sua ne anwo.
17 Ɔvi ɔ nwo zo, Livaema ne doale zo: Beenae ara Rilihɛm; na ɔvi ɔ nwo zo, Hahyabaya, kpanyinli mɔɔ nea Kaela+ maanzinli ne foa ko azo la yɛle gyima ne bie maanle ye maanzinli ne.
18 Ɔvi ɔ nwo zo, bɛ mediema ne mɔ doale zo: Hɛneedade ara Bavae, kpanyinli mɔɔ nea Kaela maanzinli ne foa ko azo la.
19 Ɔvi ɔ nwo zo, Gyɛhyua+ ara Yizɛ, kpanyinli mɔɔ nea Mezepa azo la yɛle foa bie mɔɔ wɔ Akodeɛ Ɛzielɛleka ne anyunlu mɔɔ fo kɔ Pila+ ne anwo la boɛ.
20 Ɔvi ɔ nwo zo, Zabeeyae+ ara Bɛlɛke vale ye anwosesebɛ kɔsɔɔti yɛle foa bie boɛ, ɔvi Mpila ne anwo too ɔhɔdwule ɛsɔfo kpanyinli Yilayahyebe+ sua ne anyunlu.
21 Ɔvi ɔ nwo zo, Hakɔzo ara Yulaegya ara Mɛlemɔto+ yɛle foa bie boɛ, ɔvi Yilayahyebe sua ne anyunlu ɔhɔdwule Yilayahyebe sua ne ati.
22 Na ɔvi ɔ nwo zo, ɛsɔfoma ne, mrenyia mɔɔ wɔ Dwɔdan maangyeba ne*+ anu la doale zo.
23 Ɔvi bɛ nwo zo, Bɛngyaman nee Hahyɛbe doale zo wɔ bɛ sua ne anyunlu. Ɔvi bɛ nwo zo, Ananaya ara Meeyasaya ara Azalaya doale zo wɔ ɛleka mɔɔ bikye ye sua nu ɛkɛ ne la.
24 Ɔvi ɔ nwo zo, Hɛneedade ara Bɛnuwae yɛle foa bie boɛ, ɔvi Azalaya sua ne anwo too ɔhɔdwule Pila+ ne nee mgbɛnezo ne azo.
25 Ɔvi ɔ nwo zo, Yuzae ara Peelale doale zo wɔ Mpila ne anyunlu nee tawa ne mɔɔ finde Belemgbunli Sua*+ ne anzi, tawa ne mɔɔ wɔ Sinzavolɛma Sua+ ne anwuma la azo. Ɔvi ɔ nwo zo, Peelɔhye+ ara Pɛdaya doale zo.
26 Na ɛzonlenlɛsua ne anu sonvolɛma*+ mɔɔ bɛde Ofɛle+ la doale zo hɔdwule Nzule Anlenkɛ Kpole ne+ mɔɔ wɔ aduduleɛ la anyunlu nee tawa ne mɔɔ finde la anwo.
27 Ɔvi bɛ nwo zo, Tɛkowama+ yɛle foa bie boɛ, ɔvi tawa kpole ne mɔɔ finde la anyunlu too bɛhɔdwule Ofɛle bane ne anwo.
28 Ɛsɔfoma ne doale zo wɔ Ɛkpɔnwɔ Anlenkɛ Kpole ne+ anwuma, awie biala yɛle ye sua ne anyunlu ɛdeɛ ne.
29 Ɔvi bɛ nwo zo, Yemɛ ara Zeedɔko+ doale zo wɔ ye sua ne anyunlu.
Na ɔvi ɔ nwo zo, Hyɛkanaya ara Hyɛmaya mɔɔ ɔnea Aduduleɛ Anlenkɛ Kpole ne+ azo la doale zo.
30 Ɔvi ɔ nwo zo, Hyɛlimaya ara Hananaya nee Zeelafe ara Heenɛn mɔɔ tɔ zo nsia la yɛle foa bie boɛ.
Ɔvi ɔ nwo zo, Bɛlikaya ara Mɛhyɛlam+ doale zo wɔ ye asalo ne anyunlu.
31 Ɔvi ɔ nwo zo, Malekaegya mɔɔ ɔwɔ nvutuke dwinvolɛma eku ne anu la doale zo hɔdwule ɛzonlenlɛsua ne anu sonvolɛma*+ nee gualilɛma sua ne anwo wɔ Ɛnleɛnleanlɛ Anlenkɛ Kpole ne anyunlu, na ɔdoale zo ɔhɔdwule ɛbolɔnsam ne mɔɔ gyi mgbɛnezo ne azo la anwo.
32 Na nvutuke dwinvolɛma nee gualilɛma doale zo wɔ ɛbolɔnsam ne mɔɔ gyi mgbɛnezo ne azo la anwo bɛhɔdwule Mboane Anlenkɛ Kpole ne+ anwo.
Ɔbodwɛkɛ
^ Anzɛɛ “bɛyilale zolɛ.”
^ Hibulu aneɛ nu, “anva bɛ kɔme.”
^ Anzɛɛ “Yufileti Ne Anzi lɔ.”
^ Hibulu aneɛ nu, “bɛle ye ebia ne ɛdeɛ.”
^ Anzɛɛ “foa bie mɔɔ bɛzuzule bɛmaanle bɛ la.”
^ Anzɛɛ ɔkola ɔkile, “maangyeba mɔɔ zua ɛkɛ.”
^ Anzɛɛ “Suakunlu.”
^ Anzɛɛ “Nɛtinɛmma.” Hibulu aneɛ nu, “bɛdabɛ mɔɔ bɛva bɛ bɛmaa.”
