Nihɛmaya 4:1-23
4 Mɔɔ Sanebalate+ dele kɛ yɛlɛto bane ne bieko ala la, ɔvale ɛya na ye ahonle futule kpalɛ,* na ɔhɔle zo ɔgolole Dwuuma anwo.
2 Na ɔhanle ye wɔ ɔ mediema ne mɔ nee Samɛlea ɛlɔnema ne anyunlu ɛkɛ ne kɛ: “Duzu a Dwuuma mɔɔ bɛnlɛ anwosesebɛ la ɛlɛyɛ a? Asoo bɛ ngome bɛbahola bɛayɛ ɛhye? Asoo bɛbabɔ afɔle? Asoo bɛbava kenle ko bɛawie? Asoo bɛbahola bɛava awolɛ mɔɔ ɛyelɛyela mɔɔ ɛyɛ ewula ɛdɔkɛ la bɛayɛ debie kpalɛ?”+
3 Na Amɔnonli+ Tobaya+ mɔɔ ɛnee gyi ɔ nwo ɛkɛ ne la hanle kɛ: “Saa ɛzonlɛ bɔbɔ fo bane ne mɔɔ bɛlɛto la azo a, ɔbabubu yeagua.”
4 O yɛ Nyamenle, tie kɛ bɛlɛgolo yɛ nwo bie a,+ maa bɛ aholoba ne ɛgua bɛdabɛ mumua ne bɛ ti zo,+ na maa bɛve bɛ ninyɛne na bɛyɛ ngɛkɛlɛ wɔ maanle gyɛne nu.
5 Na mmabu ɛ nye ɛgua bɛ fɔlɛlilɛ ne azo anzɛɛ mmakyikyi bɛ ɛtane ne ɛfi ɛ nye zo,+ ɔluakɛ bɛbɔ banetovoma ne aholoba.
6 Ɔti yɛhɔle zo yɛdole bane ne, na bane ne amuala doale zo na yɛdole yɛhɔdwule ye anwumahɔlɛ ne avinli, na menli ne vile bɛ ahonle nu yɛle gyima ne dahuu.
7 Mɔɔ Sanebalate, Tobaya,+ Areleebeama,+ Amɔnoma nee Ahyedɔdoma+ dele kɛ Gyɛlusalɛm bane ne mɔɔ bɛlɛyɛ ye boɛ la ɛlɛkɔ zo na bɛduodua ndenle mɔɔ deda nu* la, bɛvale ɛya kpole.
8 Bɛbɔle kpɔkɛ kɛ bɛba bɛ nee Gyɛlusalɛmma araho na bɛava basabasayɛlɛ bɛara ɛkɛ.
9 Noko yɛzɛlɛle yɛ Nyamenle ne na yɛmaanle sinzavolɛma zinzale yɛ alehyenlɛ nee aledwolɛ.
10 Noko, ɛnee Dwudama ɛlɛka kɛ: “Gyimayɛvoma ne* anwosesebɛ ɛwie yɛɛ ewula dɔɔnwo wɔ ɛkɛ; yɛnrɛhola yɛnrɛdo bane ne ɛlɛ.”
11 Na yɛ kpɔvolɛma ne hɔle zo hanle kɛ: “Bɛ nye zo katete bɛ anzɛɛ bɛkanwu ye la, ɛnee yɛra bɛ nwo zo yɛhu bɛ na yɛmaa gyima ne ɛha ɛkɛ.”
12 Mekɛ biala mɔɔ Dwuuma mɔɔ bikye bɛ kɛra yɛ nwo ɛkɛ la, bɛka ye fane dɔɔnwo bɛkile yɛ kɛ: “Bɛbavi ɛleka ngakyile a bɛara yɛ nwo zo a.”
13 Ɔti memaanle menli gyinlegyinlanle ɛleka mɔɔ wɔ aze wɔ bane ne anzi wɔ ɛleka mɔɔ le wienyi la, na memaanle bɛgyinlanle ye abusua abusua mɔɔ biala lɛ ye konle dadeɛ, ye atwɛ nee ye ɛda a.
14 Mɔɔ menwunle kɛ ɛzulolɛ ɛha bɛ la, mendwazole ndɛndɛ na menzele menli titili+ nee mgbanyima ne mɔ nee menli mɔɔ ɛha la kɛ: “Bɛmmasulo bɛ.+ Bɛhakye Gyihova mɔɔ ɔle bedevinli na ɔ nwo yɛ ɛzulolɛ la;+ bɛho bɛmaa bɛ mediema, bɛ mra mrenyia nee bɛ mra mraalɛ, bɛ ye mɔ nee bɛ azua.”
15 Mɔɔ yɛ kpɔvolɛma ne dele kɛ yɛde mɔɔ bɛlɛyɛ na nɔhalɛ Nyamenle ne ɛzɛkye kpɔkɛ mɔɔ bɛbɔ la, yɛ muala yɛziale yɛhɔdoale bane ne anwo gyima ne azo.
16 Ɔvi kenle zɔhane mɔɔ kɔ la, me menli ne foa ko yɛle gyima+ na foa ko dedɛle atwɛ, enyinlike, ɛda na bɛwulale konle tɛladeɛ. Na ɛnee mgbanyima ne mɔ+ gyigyi Dwudama ne anzi
17 bɛdabɛ mɔɔ bɛlɛto bane ne la. Bɛdabɛ mɔɔ bɛzoale ninyɛne ne la vale bɛ sa ko yɛle gyima na bɛvale ko ne noko bɛlɛle akodeɛ nu.
18 Na ɛnee banetovoma ne anu ko biala konle dadeɛ zia ye foa ko wɔ mekɛ mɔɔ bɛlɛto bane ne la, na mɔɔ bɔ aweɛne ne la+ gyinlanle me nwo ɛkɛ.
19 Akee menzele menli titili nee mgbanyima ne mɔ nee menli mɔɔ ɛha la kɛ: “Gyima dɔɔnwo wɔ bane ne anwo, na yɛ avinli twehwe wɔ bane ne anwo yɛɛ yɛmbikye nwolɛ.
20 Saa bɛte aweɛne ne ane a, bɛraboɔboa bɛ nloa wɔ ɛleka mɔɔ yɛwɔ la. Yɛ Nyamenle ne baho amaa yɛ.”+
21 Ɔti yɛhɔle zo yɛyɛle gyima wɔ mekɛ mɔɔ ɛnee menli ne foa ko dedɛ atwɛ la, ɔvi aleɛbahye kɔkpula kɛ nwɔlɔra kɛvinde la.
22 Mekɛ zɔhane, menzele menli ne kɛ: “Bɛmaa nrenyia biala nee ye sonvolɛ ɛrɛla Gyɛlusalɛm nɔsolɛ nu, na bɛbazinza yɛ nɔsolɛ nu na bɛayɛ gyima alehyenlɛ nu.”
23 Ɔti medame anzɛɛ me mediema ne mɔ, me sonvolɛma+ nee sinzavolɛma mɔɔ lile me nzi la anu biala anye ye tɛladeɛ, na yɛ nuhua ko biala lɛle ye akodeɛ wɔ ɔ sa fema ne anu.
