Nihɛmaya 6:1-19
6 Mɔɔ bɛhanle bɛhilele Sanebalate, Tobaya,+ Areleebeanli+ Gihyɛm nee yɛ kpɔvolɛma mɔɔ ɛha la kɛ medo bane ne bieko+ na adenle ɛnla ye ɛleka biala ala la (mekɛ zɔhane ɛnee metɛtuoduale nlenkɛ ne mɔ bɔbɔ),+
2 Sanebalate nee Gihyɛm vale nrɛlaleɛ ɛhye rɛlɛle me ɛkɛ ne ala kɛ: “Bɛla maa yɛhile mekɛ na yɛyia Ono Azɛlɛ Sɛsɛ ne+ azo namule ne mɔ ko azo.” Noko ɛnee bɛbɔ adwenle kɛ bɛyɛ me ɛtane.
3 Ɔti mendule ɛbɔfoɔma memaanle bɛhɔzele bɛ kɛ: “Melɛyɛ gyima kpole bie, na menrɛhola ba. Duzu ati a ɔwɔ kɛ megyakyi gyima ne meba bɛ nwo lɔ na gyima ne ka ɛkɛ a?”
4 Bɛvale nrɛlaleɛ ko ne ala bɛrale fane nna, na medame noko menvale mualɛ ko ne ala memaanle bɛ.
5 Akee Sanebalate vale nrɛlaleɛ ko ne ala zoanle ye sonvolɛ ne fane nnu ne azo wɔ me nwo ɛkɛ, na ɛnee ɔlɛ kɛlata mɔɔ bɛtɛsɔle ɔ nloa la ɔ sa nu.
6 Bɛhɛlɛ ye wɔ nu kɛ: “Bɛde ye wɔ maanle maanle ne mɔ anu, yɛɛ Gihyɛm+ noko ɛlɛka bie kɛ, ɛdawɔ nee Dwuuma ɛlɛbɔ adwenle kɛ bɛte atua.+ Ɛhye ati a bɛlɛto bane ne a; na amaneɛbɔlɛ ɛhye mɔ kile kɛ ɛbayɛ bɛ belemgbunli.
7 Eza wɔkpa ngapezoma kɛ bɛha ɛ nwo edwɛkɛ wɔ Gyɛlusalɛm amuala kɛ, ‘Belemgbunli bie wɔ Dwuda!’ Na bɛbaha ɛhye bɛahile belemgbunli ne. Ɔti bɛla maa yɛzuzu nwolɛ.”
8 Noko, memaanle bɛhɔbuale ye kɛ: “Mɔɔ ɛlɛka la amuala ɛnle nɔhalɛ; ɛdawɔ mumua ne a wɔbɔ ɛ ti anu* ɛlɛka a.”
9 Ɔluakɛ ɛnee bɛ muala bɛlɛbɔ mɔdenle kɛ bɛnwunlonwunla yɛ, na ɛnee bɛlɛkeha kɛ: “Bɛ sa nu bado, bɛnrɛhola gyima ne yɛ.”+ Noko menyɛle asɔne kɛ: Nyamenle, mmamaa me sa nu to.+
10 Akee mengɔle Mɛhɛtabɛle ara Dɛlaya ara Hyɛmaya sua nu wɔ mekɛ mɔɔ ɔvea sua nu la. Ɔzele me kɛ: “Maa yɛhile mekɛ na yɛyia nɔhalɛ Nyamenle ne sua nu, wɔ ɛzonlenlɛsua ne anu, na yɛtoto ɛzonlenlɛsua ne nlenkɛ ne mɔ anu, ɔluakɛ bɛlɛba bɛarahu wɔ. Nɔɔzo yɛɛ bɛbara bɛarahu wɔ a.”
11 Noko menganle kɛ: “Asoo ɔwɔ kɛ sonla mɔɔ le kɛ medame la nriandi? Asoo awie mɔɔ le kɛ medame la bahola ahɔ ɛzonlenlɛsua ne anu na yeadɛnla ngoane nu?+ Menrɛhɔ!”
12 Na menwunle kɛ tɛ Nyamenle a ɛzoa ye a, emomu, Tobaya nee Sanebalate+ a ɛbɔ ye ɛkpa kɛ ɔha ngapezo ɛhye ɔtia me a.
13 Bɛbɔ ye ɛkpa kɛ ɔnwunlonwunla me na ɔmaa menyɛ ɛtane, amaa bɛanyia debie bɛagyinla zo bɛazɛkye me duma na bɛadendɛ bɛatia me.
14 O me Nyamenle, mmamaa ɛ rɛle fi Tobaya+ nee Sanebalate nee nyɛleɛ ɛhye mɔ, na kakye ngapezonli raalɛ Nowadaya nee ngapezoma mɔɔ ɛha mɔɔ bɔle mɔdenle dahuu kɛ bɛmaa ɛzulolɛ aha me la noko.
15 Ɔti yɛdole bane ne yɛwiele wɔ Yilɛle* kenle 25 ne azo, ɔlile kenle 52.
16 Mɔɔ yɛ agbɔvolɛ kɔsɔɔti dele na maanle maanle mɔɔ ɛbɔ yɛ ɛyia la kɔsɔɔti nwunle ye ala la, bɛbɔle anyiemgba kpole,*+ na bɛnwunle kɛ yɛ Nyamenle ne a ɛboa yɛ ɛmaa yɛyɛ gyima ɛhye a.
17 Mekɛ zɔhane, Dwuda menli titili+ ne mɔ hɛlɛhɛlɛle ngɛlata dɔɔnwo hɔmaanle Tobaya, na Tobaya noko hɛlɛle bie rɛlɛle bɛ.
18 Menli dɔɔnwo mɔɔ wɔ Dwuda la hanle ndane kɛ bɛgyi ɔ nzi, ɔluakɛ ɛnee ɔle Elaa+ ara Hyɛkanaya ase nrenyia, na ɛnee ɔ ra nrenyia Gyehoheenan gya Bɛlikaya ara Mɛhyɛlam+ ara raalɛ.
19 Bieko, ɛnee dahuu bɛka ɔ nwo edwɛkɛ kpalɛ bɛkile me na bɛahɔha mɔɔ mekɛha la bɛahile ye. Na Tobaya hɛlɛle ngɛlata kɛ ɔfa yeanwunlonwunla me.+
Ɔbodwɛkɛ
^ Hibulu aneɛ nu, “ɔvi wɔ ahonle nu a.”
^ Hibulu aneɛ nu, “bɛdɔle aze kpole wɔ bɛdabɛ mumua ne bɛ nye zo.”
