Nihɛmaya 8:1-18
8 Na menli ne amuala liele dole nu na bɛyiale gua ne azo wɔ Nzule Anlenkɛ Kpole ne+ anyunlu, na bɛzele kɛlɛhɛlɛvolɛ Ɛzela+ kɛ ɔva buluku ne mɔɔ Mosisi Mɛla ne+ mɔɔ Gyihova vale maanle Yizilayɛma+ kɛ bɛli zo wɔ nu la ɔrɛla.
2 Ɔti ɛsɔfo Ɛzela vale Mɛla ne rale asafo ne anyunlu,+ ɛleka mɔɔ mrenyia, mraalɛ nee bɛdabɛ mɔɔ bɛkola bɛtie edwɛkɛ na bɛte ɔ bo kɔsɔɔti ɛyia la, wɔ siane ne mɔɔ tɔ zo nsuu+ la kenle mɔɔ limoa la anu.
3 Na ɔgengale ye kpole+ wɔ gua ne azo wɔ Nzule Anlenkɛ Kpole ne anyunlu, ɔvi aleɛbahye ɔhɔdwule sɛnzɛngyinla ɔhilele mrenyia, mraalɛ nee bɛdabɛ mɔɔ bɛkola bɛte edwɛkɛ bo la amuala; na menli ne diele Mɛla buluku ne anu edwɛkɛ ne kpalɛ.+
4 Na ɛnee kɛlɛhɛlɛvolɛ Ɛzela gyi taboa bama bie mɔɔ ayia ne ati bɛyɛle la azo; na ɛnee Matetaya, Hyima, Anaya, Yulaya, Helekaya nee Meeyasaya gyi ye fema zo; yɛɛ Pɛdaya, Mehyeeyɛle, Malekaegya,+ Heehyɛm, Hahye-badena, Zɛkalaya nee Mɛhyɛlam noko gyi ye bɛne zo.
5 Mɔɔ Ɛzela bukele buluku ne anu la menli ne kɔsɔɔti nwunle ye ɔluakɛ ɛnee ɔwɔ anwuma ɔtɛla menli ne amuala. Mɔɔ ɔbukele nu la, menli ne kɔsɔɔti dwazole gyinlanle.
6 Akee Ɛzela yele nɔhalɛ Nyamenle Gyihova, Mɔɔ le bedevinli la ayɛlɛ, na menli ne kɔsɔɔti liele zo “Amen!* Amen!”+ na bɛmemaanle bɛ sa zo. Bɛhotole Gyihova anyunlu na bɛbutubutule bɛ nyunlu aze.
7 Na Gyɛhyua, Beenae, Hyɛlibaya,+ Gyeemen, Akɛbe, Hyabɛtae, Hodaya, Meeyasaya, Kɛlaeta, Azalaya, Dwozabade,+ Heenan nee Pɛlaya mɔɔ bɛle Livaema la hilehilele Mɛla ne anu hilele menli ne+ wɔ mekɛ mɔɔ ɛnee menli ne gyigyi ɛkɛ ne la.
8 Na bɛdoale zo bɛgengale buluku ne mɔɔ nɔhalɛ Nyamenle ne Mɛla ne wɔ nu la kpole, bɛhilehilele nu kpalɛ bɛmaanle nuhua lale ɛkɛ ne wienyi; yemɔti bɛboale menli ne bɛmaanle bɛdele mɔɔ bɛgengale la abo.*+
9 Na Nihɛmaya mɔɔ ɛnee le amɛnlado* wɔ zɔhane mekɛ ne, Ɛzela+ mɔɔ ɛnee le ɛsɔfo nee kɛlɛhɛlɛvolɛ nee Livaema mɔɔ ɛlɛkilehile menli ne la, zele menli ne amuala kɛ: “Ɛnɛ kenle ye le kenle nwuanzanwuanza maa Gyihova yɛ Nyamenle ne.+ Bɛmmadi nyane yɛɛ bɛmmasu.” Ɔluakɛ ɛnee menli ne kɔsɔɔti ɛlɛsu wɔ mekɛ mɔɔ bɛdele Mɛla ne anu edwɛkɛ ne la.
10 Ɔzele bɛ kɛ: Bɛhɔ, bɛhɔli aleɛ mɔɔ yɛ fɛ* kpalɛ la na bɛnlo debie menlemenle, na bɛva aleɛ ne bie+ bɛmaa bɛdabɛ mɔɔ bɛnlɛ bie la; ɔluakɛ ɛnɛ kenle ye le kenle nwuanzanwuanza maa yɛ Awulae, bɛmmadi nyane, ɔluakɛ fɛlɛkolilɛ ne mɔɔ Gyihova fa maa la le bɛ anwosesebɛ.”*
11 Na ɛnee Livaema ne ɛlɛkyekye menli ne kɔsɔɔti arɛle kɛ: “Bɛmmasu! ɔluakɛ ɛnɛ kenle ye le kenle nwuanzanwuanza, yɛɛ bɛmmadi nyane.”
12 Ɔti menli ne kɔsɔɔti hɔlile na bɛnlonle na bɛvale aleɛ ne bie bɛmaanle awie mɔ, na bɛ nye liele kpole kpalɛ,+ ɔluakɛ bɛdele edwɛkɛ ne mɔɔ bɛhanle bɛhilele bɛ la abo.+
13 Ye kenle nwiɔ ne azo, mbusua mgbanyima kɔsɔɔti, ɛsɔfoma nee Livaema boɔboale bɛ nloa hɔle kɛlɛhɛlɛvolɛ Ɛzela anwo ɛkɛ amaa bɛade Mɛla ne anu edwɛkɛ ne abo kpalɛ.
14 Na bɛnwunle kɛ bɛhɛlɛ ye wɔ Mɛla ne anu kɛ Gyihova luale Mosisi anwo zo hanle kɛ saa bɛlɛdi siane nsuu ɛvoyia ne a, ɔwɔ kɛ Yizilayɛma tɛnlɛdɛnla kpɔda bo,+
15 na ɔwɔ kɛ bɛbɔ ye nolo+ na bɛka ye wɔ bɛ azuamgbole kɔsɔɔti nee Gyɛlusalɛm azo kɛ: “Bɛhɔ awoka ne mɔ azo bɛhɔkpondɛ ɔlivi mbaka nya, paane mbaka nya, mɛtɛle nya nee arɛlɛ mrɛlakɛ nee mbaka gyɛne nya bɛva bɛrabo kpɔda kɛ mɔɔ bɛhɛlɛ ye la.”
16 Ɔti menli ne hɔvale bie rale na bɛvale bɛbole kpɔda wɔ bɛ azua ne mɔ ati zo, wɔ bɛ alienwo ɛkɛ, wɔ nɔhalɛ Nyamenle ne sua ne alienwo ɛkɛ,+ wɔ gua zo wɔ Nzule Anlenkɛ Kpole ne+ yɛɛ Yifelaem Anlenkɛ Kpole ne+ anwo ɛkɛ.
17 Ɛhye ati, menli mɔɔ vi akɛlɛzonlenlɛ nu rale la kɔsɔɔti bole kpɔda na bɛdɛnlɛdɛnlanle kpɔda bo, ɔluakɛ Yizilayɛma ɛtɛyɛle ɛhye bie ɛlɛ ɔvi Nɛn ara Dwɔhyua+ mekɛ zo too badwu kenle zɔhane, na bɛ nye liele kpole kpalɛ.+
18 Ɔvi kenle mɔɔ limoa kɔdwu kenle mɔɔ li awieleɛ la, ɛnee bɛkenga nɔhalɛ Nyamenle ne Mɛla buluku ne kenle ko biala.+ Na bɛlile ɛvoyia ne kenle nsuu, na ye kenle mɔtwɛ ne azo, bɛyɛle ayia nwuanzanwuanza, kɛ mɔɔ mɛla ne se la.+
Ɔbodwɛkɛ
^ Anzɛɛ “Ɔyɛ ɛkɛ!”
^ Anzɛɛ “bɛmaanle ndelebɛbo rale ɛgengalɛ ne anu.”
^ Hibulu aneɛ nu, “ninyɛne mɔɔ ɛlɔ.”
^ Hibulu aneɛ nu, “aranemgbole.”
