Nihɛmaya 9:1-38
9 Wɔ siane ɛhye ala anu, ye kenle 24 ne azo; Yizilayɛma boɔboale bɛ nloa; bɛhyele ɛhɔne, bɛhedale ɛrele, na bɛvale ndɛtɛlɛ bɛguale bɛ ti zo.+
2 Bɛdabɛ mɔɔ bɛle Yizilayɛ abozoamra la hwenle bɛ nwo vile nyɛvolɛ ne mɔ anwo,+ bɛdwazole na bɛhanle bɛ ɛtane nee bɛ ze mɔ nvonleɛ ne mɔ.+
3 Akee bɛdwazole bɛgyinlanle ɛleka mɔɔ bɛwɔ la na bɛvale dɔnehwele nsa bɛgengale Gyihova bɛ Nyamenle ne Mɛla buluku ne kpole+ wɔ alehyenlɛ ne anu; na bɛvale dɔnehwele nsa noko bɛhanle bɛ ɛtane na bɛbɔle bɛ ti aze bɛmaanle Gyihova bɛ Nyamenle ne.
4 Gyɛhyua, Beenae, Kademeɛle, Hyɛbanaya, Bɛnae, Hyɛlibaya,+ Beenae nee Kɛneenae gyinlegyinlanle Livaema bama ne azo+ na bɛvale ɛnelɛ kpole bɛdeanle nu bɛvɛlɛle Gyihova bɛ Nyamenle ne.
5 Na Livaema Gyɛhyua, Kademeɛle, Beenae, Hahyabenaya, Hyɛlibaya, Hodaya, Hyɛbanaya nee Pɛtahaya hanle kɛ: “Bɛdwazo bɛgyinla na bɛye Gyihova bɛ Nyamenle ne ayɛlɛ dahuu.*+ Na maa bɛye wɔ anyunlunyia duma ne mɔɔ bɛkpogya ye zo bɛdɛla nyilalɛ nee ayɛlɛyelɛ kɔsɔɔti la ayɛlɛ.
6 “Ɛdawɔ ɛ ngomekye a ɛle Gyihova a;+ wɔmɔ a ɛbɔle anwuma, ɛhɛe, anwuma anwuma nee nuhua ɛlɔne kɔsɔɔti, azɛlɛ nee mɔɔ wɔ zo la amuala, nyevile nee mɔɔ wɔ nu la amuala a. Na wɔmɔ a ɛnea bɛ kɔsɔɔti bɛ nwo zo na ɛmaa bɛ ngoane a, na anwuma ɛlɔnema bɔ bɛ ti aze maa wɔ.
7 Wɔmɔ a ɛle Gyihova, nɔhalɛ Nyamenle ne mɔɔ ɛyele Ebilam+ ɛvile Ɛɛle+ mɔɔ wɔ Kaledeama azɛlɛ zo na ɛdonle ye duma Ebileham a.+
8 Ɛnwunle kɛ ɔfi ye ahonle nu ɔdi nɔhalɛ wɔ ɛ nyunlu,+ yemɔti ɛ nee ye yɛle ngyekyeleɛ kɛ ɛbava Keenama, Hɛtema, Amɔlema, Pilɛzema, Gyibɛsema nee Gɛgahyema azɛlɛ ne wɔamaa ye nee ɔ bo zo amra;+ na ɛlile wɔ ɛwɔkɛ zo ɔluakɛ ɛle tenlenenli.
9 “Ɔti ɛnwunle amaneɛ mɔɔ yɛ nenyia mɔ nwunle ye wɔ Yigyibiti la,+ yɛɛ ɛdele bɛ ɛzunlɛ wɔ Nyevile Kɔkɔlɛ ne anloa.
10 Na ɛyɛle sɛkɛlɛneɛ nee nwanwane ninyɛne ɛtiale Falo nee ye sonvolɛma amuala nee menli mɔɔ wɔ ye azɛlɛ ne azo la kɔsɔɔti,+ ɔluakɛ ɛnee ɛze kɛ bɛyɛ anwomemaazo*+ bɛtia bɛ. Ɛliele duma mɔɔ tɛbɔ ɛkɛ badwu ɛnɛ la ɛmaanle ɛ nwo.+
11 Na ɛkpakyele nyevile ne anu wɔ bɛ nyunlu, yemɔti bɛluale azɛlɛ resee zo bɛpɛle nyevile ne,+ na ɛvuandinle menli mɔɔ ɛlɛfoa bɛ la ɛguale kuma ne anu kɛ bolɛ mɔɔ bɛvuandi bɛdo azule mɔɔ ɛlɛtu la anu la.+
12 Ɛluale amungu pila zo ɛhilele bɛ adenle wɔ alehyenlɛ nu, na nɔɔzo, ɛluale senle pila mɔɔ ta la azo ɛhilele bɛ adenle mɔɔ ɔwɔ kɛ bɛdua nu la.+
13 Ɛdwule Saenae Boka ne azo+ na ɛvi anwuma lɔ ɛ nee bɛ dendɛle+ na ɛmaanle bɛ ndɛnebualɛ fɔɔnwo, nɔhalɛ mɛla,* ngyehyɛleɛ kpalɛ nee adehilelɛ.+
14 Ɛmaanle bɛnwunle wɔ Ɛnwomenlelielɛ kenle+ nwuanzanwuanza ne, na ɛluale wɔ sonvolɛ Mosisi anwo zo ɛmaanle bɛ adehilelɛ,* ngyehyɛleɛ nee mɛla.
15 Mɔɔ ɛhɔne ku bɛ la, ɛvale aleɛ ɛvile anwuma ɛrɛlɛle bɛ,+ na mɔɔ nzuhɔne ku bɛ la, ɛmaanle nzule vile bodane ne anu rale,+ na ɛzele bɛ kɛ bɛhɔva azɛlɛ ne mɔɔ ɛhanle ndane* kɛ ɛbava wɔamaa bɛ la.
16 “Noko bɛmɛ, yɛ nenyia mɔ, bɛyɛle anwomemaazo*+ nee anzosesebɛ,*+ yɛɛ bɛanli wɔ mɛla ne mɔ azo.
17 Bɛanyɛ tieyɛ+ yɛɛ bɛangakye wɔ nwanwane gyima ne mɔɔ ɛyɛle ye bɛ nu la, emomu bɛyɛle anzosesebɛ* na bɛkpale awie kɛ ɔli bɛ ti ɔmaa bɛzia bɛhɔ akɛlɛzonlenlɛ nu wɔ Yigyibiti.+ Noko ɛle Nyamenle mɔɔ lɛ ɛhulolɛ kɛ ɛbava ɛtane wɔahyɛ, ɛ kunlu yelɛyela wɔ* yɛɛ ɛse anwunvɔne, ɛkyɛ na wɔava ɛya yɛɛ ɛlɔlɛ kpundii ɛyi wɔ tɛkɛɛ,+ na wɔamkpo bɛ.+
18 Mekɛ mɔɔ bɛyɛle ɛnlankɛ ralɛ ananze na bɛlɛka kɛ, ‘Wɔ Nyamenle ne mɔɔ yele wɔ vile Yigyibiti la ɛne,’+ na bɛambu wɔ fee bɔbɔ la,
19 wɔ anwunvɔnezelɛ kpole ne ati, wɔamkpo bɛ wɔ fienemgbole ne anu.+ Amungu pila ne anvi bɛ nwo zo alehyenlɛ nu kɛ ɔnrɛhile bɛ adenle, yɛɛ senle pila ne noko anvi bɛ nwo zo nɔɔzo kɛ ɔnrɛda ɔnrɛhile bɛ adenle mɔɔ ɔwɔ kɛ bɛdua nu la.+
20 Na ɛvale wɔ sunsum kpalɛ ne ɛmaanle bɛ amaa bɛanyia ndelebɛbo,+ na wɔanye wɔ mana ne noko wɔanvi bɛ nloa anu,+ na mɔɔ nzuhɔne ku bɛ la, ɛmaanle bɛ nzule.+
21 Ɛmaanle bɛ aleɛ ɛvolɛ 40 wɔ fienemgbole ne anu.+ Bɛangyia ɛhwee. Bɛ adɛladeɛ antete+ yɛɛ bɛ gyakɛ abo annwunwu.
22 “Ɛvale arelemgbunlililɛ nee maanle ɛmaanle bɛ, ɛhyehyɛle nu ɛmaanle bɛ,+ ɔti bɛvale Saehɔn azɛlɛ ne+ mɔɔ le Hɛhyebɔn belemgbunli ne azɛlɛ+ la nee Beehyan Belemgbunli Ɔɔgo azɛlɛ ne.+
23 Na ɛmaanle bɛ mralɛ dɔɔnwo kɛ anwuma nwɔlɔra.+ Na ɛvale bɛ ɛrale azɛlɛ ne mɔɔ ɛvale ɛbɔle yɛ nenyia mɔ ɛwɔkɛ kɛ bɛhɔva la azo.+
24 Ɔti bɛ mra hɔvale azɛlɛ ne,+ na ɛmaanle bɛlile Keenama mɔɔ bɛde azɛlɛ ne azo la anwo zo konim,+ na ɛvale bɛ ɛwulale bɛ sa nu, bɛ arelemgbunli nee menli mɔɔ de azɛlɛ ne azo la, na bɛvale mɔɔ bɛkulo la bɛyɛle bɛ.
25 Na bɛhonle bɛvale azuamgbole mɔɔ bɛlie nwolɛ bane+ nee azɛlɛ mɔɔ kye aleɛ+ nee azua mɔɔ ninyɛne mgbalɛ kɔsɔɔti ɛyi nu, bula mɔɔ bɛdu, vanye egyinli, ɔlivi mbaka+ nee mbaka mɔɔ so ma la dɔɔnwo. Ɔti bɛlile na bɛ ko yile na bɛyɛle mbelane, na bɛ nye liele wɔ wɔ kpalɛyɛlɛ kpole ne anu.
26 “Noko, bɛyɛle anzosesebɛ na bɛdele atua bɛtiale wɔ+ yɛɛ bɛhakyile bɛ nzi bɛzile wɔ Mɛla ne.* Bɛhunle wɔ ngapezoma ne mɔ mɔɔ bɔle bɛ kɔkɔ amaa bɛazia bɛara wɔ ɛkɛ ne la, na bɛambu wɔ fee.+
27 Ɛhye ati, ɛvale bɛ ɛwulale bɛ agbɔvolɛ asa anu,+ na bɛhɔle zo bɛhilele bɛ nyane.+ Noko bɛzunle bɛvɛlɛle wɔ wɔ bɛ anwongyelelɛ mekɛ nu, na ɛdele ye wɔ anwuma lɔ; na wɔ anwunvɔnezelɛ kpole ne ati, ɛmaanle bɛ dievolɛma kɛ bɛlie bɛ bɛvi bɛ kpɔvolɛma asa anu.+
28 “Noko saa bɛ nwo tɔ bɛ ala a, bɛyɛ debie mɔɔ ɛnle kpalɛ wɔ ɛ nye zo la bieko,+ na ɛfa bɛ ɛwula bɛ kpɔvolɛma mɔɔ bazie* bɛ la asa anu.+ Na bɛsia bɛbakpondɛ moalɛ wɔ wɔ ɛkɛ,+ na ɛtie bɛ wɔ anwuma lɔ na ɛdie bɛ fane dɔɔnwo ɔlua wɔ anwunvɔnezelɛ kpole ne ati.+
29 Ɛbɔle bɛ kɔkɔ kɛ ɛmaa bɛazia bɛarali wɔ Mɛla ne azo ɛdeɛ, noko bɛyɛle anwomemaazo,*+ bɛanli wɔ mɛla ne mɔ azo; bɛyɛle ɛtane ɔluakɛ bɛanli wɔ ngyehyɛleɛ ne mɔ mɔɔ saa awie di zo a ɔbanyia ngoane la azo.+ Emomu, bɛyɛle anzosesebɛ bɛhakyile bɛ nzi bɛzile wɔ na bɛyɛle bɛ kɔme ketee,* na bɛandie.
30 Ɛnyianle bɛ nwo abotane+ ɛvolɛ dɔɔnwo na ɛhɔle zo ɛluale wɔ sunsum ne azo ɛmaanle wɔ ngapezoma ne bɔle bɛ kɔkɔ, noko bɛandie. Ɛhye ati, ɛvale bɛ ɛwulale menli mɔɔ wɔ azɛlɛ ne azo la asa anu.+
31 Na wɔ anwunvɔnezelɛ kpole ne ati,+ wɔambɔ bɛ bo zo anzɛɛ wɔamkpo bɛ, ɔluakɛ ɛle Nyamenle mɔɔ ɛ kunlu yelɛyela wɔ* na ɛse anwunvɔne a.+
32 “Na kɛkala, O yɛ Nyamenle, Nyamenle bedevinli, tumivolɛ mɔɔ ɛ nwo yɛ ɛzulolɛ, wɔli wɔ ngyekyeleɛ zo na wɔla ɛlɔlɛ kpundii+ ali, mmabu amaneɛ kɔsɔɔti mɔɔ yɛdayɛ, yɛ arelemgbunli, yɛ mgbanyima,+ yɛ ɛsɔfoma,+ yɛ ngapezoma,+ yɛ nenyia mɔ nee wɔ menli ne amuala ɛnwu ye ɔvi Aselea arelemgbunli mekɛ zo+ too badwu ɛnɛ la debie ekyi.
33 Ɛdi benle wɔ mɔɔ ɛra yɛ nwo zo la kɔsɔɔti anu, ɔluakɛ wɔli nɔhalɛ; emomu, yɛdayɛ a yɛbɔ amumuyɛ ɛbɛla a.+
34 Na yɛ arelemgbunli, yɛ mgbanyima, yɛ ɛsɔfoma nee yɛ nenyia mɔ anli wɔ Mɛla ne azo, yɛɛ bɛandie wɔ adehilelɛ* anzɛɛ wɔ ngakyelɛ ne mɔ mɔɔ ɛvale ɛbɔle bɛ kɔkɔ la.
35 Mekɛ mɔɔ bɛ belemgbunlililɛ ɛlɛkɔ zo na bɛnyianle ninyɛne mgbalɛ dɔɔnwo na bɛde azɛlɛ tɛtɛlɛ mɔɔ kye aleɛ mɔɔ ɛvale ɛmaanle bɛ la azo bɔbɔ la, bɛanzonle wɔ+ yɛɛ bɛandwe bɛ nwo bɛanvi bɛ nyɛleɛ ɛtane ne mɔ anwo.
36 Ɛnɛ, yɛmɛ ɛne, yɛyɛ ngɛkɛlɛ+—ɛhɛe, yɛyɛ ngɛkɛlɛ wɔ azɛlɛ ne mɔɔ ɛvale ɛmaanle yɛ nenyia mɔ kɛ bɛli zolɛ ma nee ninyɛne mgbalɛ mɔɔ wɔ zo la azo.
37 Zolɛ ma dɔɔnwo ne ɛyɛ arelemgbunli mɔɔ yɛ ɛtane ti wɔmaa bɛlɛsie yɛ la ɛdeɛ.+ Bɛsie yɛ sonlabaka ne nee yɛ nyɛmoa kɛ mɔɔ bɛdabɛ bɛkulo la, na yɛwɔ amaneɛnwunlɛ kpole nu.
38 “Ɛhye mɔ amuala ati, yɛlɛyɛ ngyekyeleɛ+ yɛahɛlɛ, na yɛ mgbanyima, yɛ Livaema nee yɛ ɛsɔfoma+ ava bɛ sa awula ɔ bo.”
Ɔbodwɛkɛ
^ Anzɛɛ “ɔvi mekɛ mɔɔ ɛnlɛ awieleɛ kɔdwu mekɛ mɔɔ ɛnlɛ awieleɛ.”
^ Hibulu edwɛkɛkpɔkɛ ne eza kile akɛnrasesebɛ mɔɔ ɛnle kpalɛ mɔɔ bɛfa bɛyɛ debie anzɛɛ awie mɔɔ yɛ debie mɔɔ ɔnlɛ adenle ɔnyɛ la.
^ Anzɛɛ “mɛla kpalɛ.”
^ Anzɛɛ “mɛla.”
^ Hibulu aneɛ nu, “ɛmaanle ɛ sa zo.”
^ Hibulu aneɛ nu, “bɛyɛle bɛ kɔme ketee.”
^ Anzɛɛ “ɛle dovolɛ.”
^ Hibulu aneɛ nu, “bɛyɛle bɛ kɔme ketee.”
^ Hibulu aneɛ nu, “bɛvuandinle wɔ Mɛla ne bɛguale bɛ nzi.”
^ Anzɛɛ “babɛtɛ.”
^ Anzɛɛ “anyetele.”
^ Anzɛɛ “ɛle dovolɛ.”
^ Anzɛɛ “mɛla.”
