Nolobɔvo 10:1-20
10 Kɛ mɔɔ nrɛzenra avunli maa nwole evuanlɛ sɛkye na ɔbɔ la, zɔhane ala a koaseayɛlɛ ekyi sɛkye nrɛlɛbɛ nee anyunlunyia a.+
2 Nrɛlɛbɛvolɛ ahonle maa ɔfa adenle kpalɛ zo,* noko koasea ahonle maa ɔfa adenle ɛtane zo.*+
3 Adenle biala mɔɔ koasea kɛva zo la, ɔda ye ali kɛ ɔnlɛ adwenle,*+ yɛɛ ɔmaa awie biala nwu ye kɛ ɔle koasea.+
4 Saa tumivolɛ bie fa ɛ nwo ɛya a, mmafi ɛ bo zo ne,+ ɔluakɛ ɛsie ɛ nwo dii a, ɔmaa ɛtane mgbole ka aze.+
5 Menwu debie bie mɔɔ yɛ abodelɛ la wɔ ewiade ye anu, nvonleɛ mɔɔ menli mɔɔ lɛ tumi la yɛ la:+
6 Bɛfa ahoasea bɛsie gyinlabelɛ mgbole dɔɔnwo, noko sukoavolɛma* tɛbɔ gyinlabelɛ mɔɔ ka aze la anu.
7 Menwu sonvolɛma kɛ bɛdede mgbɔnwɔ zo, noko menli titili lua aze kɛ sonvolɛma la.+
8 Sonla mɔɔ fu kuma la badɔ nu;+ yɛɛ sonla mɔɔ bubu awolɛ bane la, ɛwɔlɛ baha ye.
9 Sonla mɔɔ kpuke awolɛ la, bie boda ye, yɛɛ sonla mɔɔ kpakye ndaboa la, bie boda ye.*
10 Saa awie akuma tili na yeanzi a, ɔwɔ kɛ ɔfa anwosesebɛ dɔɔnwo ɔyɛ gyima. Noko nrɛlɛbɛ boa maa bɛdi konim.
11 Saa ɛwɔlɛ ka silikyevolɛ kolaa na yeahye ye sili a, ɛnee nvasoɛ biala ɛnle silikyevolɛ ne mɔɔ ɛbe la anwo zo.*
12 Nrɛlɛbɛvolɛ anloa edwɛkɛ maa ɔsɔ menli nye,+ noko koasea anloa edwɛkɛ a sɛkye ye a.+
13 Edwɛkɛ mɔɔ kɛlimoa kɛvi ɔ nloa anu kɛvinde la le ngoaseasɛm,+ yɛɛ ye edwɛkɛ mɔɔ li amozi la le ɛzɛlɛsɛm ngome.
14 Noko koasea kɔ zo tendɛ.+
Sonla ɛnze mɔɔ bazi a; nwane a bahola aha mɔɔ bazi ɔ nzi la ahile ye a?+
15 Koasea gyima ɛsesebɛ maa ɔfɛ, ɔluakɛ ɔnnwu adenle ne bɔbɔ mɔɔ kɔ suakpole ne azo la.
16 Nea kɛzi maanle mɔɔ ye belemgbunli le kakula+ na ye mgbanyima bɔ ɛkponledolɛ bo wɔ nwonlomɔ la banwu amaneɛ a!
17 Saa maanle ne belemgbunli ne le dehelɛ ralɛ na ye mgbanyima di aleɛ wɔ mekɛ kpalɛ nu nyia anwosesebɛ na bɛmbo nza a, nea kɛzi bɛ nye balie la!+
18 Ɔlua mgbovonle ɛyɛlɛ dɔɔnwo ti, sua ne ati zo folo gua nu, yɛɛ ɛsalɛ mɔɔ gua bɛ nwo mgbane la ati, sua ne nwu.+
19 Aleɛ maa bɛsele, yɛɛ nwanye maa ɛbɛlabɔlɛ yɛ anyelielɛ;+ noko ezukoa di ngyianlɛ kɔsɔɔti anwo gyima.+
20 Mmatendɛ ɛtia belemgbunli ne* wɔ wɔ adwenle nu* bɔbɔ,+ yɛɛ mmafea wɔ suakunlu ɛtendɛ ɛtia sukoavolɛ; ɔluakɛ aloma* bahola ahɔha, anzɛɛ abɔdeɛ mɔɔ lɛ ndɛbalɛ la bahola ahɔha mɔɔ ɛhanle la.
Ɔbodwɛkɛ
^ Hibulu aneɛ nu, “wɔ ɔ sa fema zo.”
^ Hibulu aneɛ nu, “wɔ ɔ sa bɛne zo.”
^ Hibulu aneɛ nu, “ye ahonle ɛnyɛ gyima.”
^ Anzɛɛ “noko menli mɔɔ fɛta la.”
^ Anzɛɛ ɔkola ɔkile, “ɔwɔ kɛ ɔnea ɔ nwo boɛ.”
^ Hibulu aneɛ nu, “ɔ tafinlima mɔɔ ɔfa ɔbɛlɛbɛla la azo.”
^ Anzɛɛ “Mmabɔ belemgbunli ne munzule.”
^ Anzɛɛ ɔkola ɔkile, “wɔ ɛkpa zo.”
^ Hibulu aneɛ nu, “abɔdeɛ mɔɔ tu duolua anwomanyunlu la.”
