Nolobɔvo 2:1-26
2 Akee menganle ye me ahonle nu kɛ: “Bɛla maa menzɔ anyelielɛ* menea na menea debie kpalɛ mɔɔ bavi nu ara la.” Na nea, ɛhye noko le mgbane.
2 Menganle ɛzelekɛ nwo edwɛkɛ kɛ, “Ɔle ɛzɛlɛde!”
Yɛɛ menganle anyelielɛ nwo edwɛkɛ kɛ, “Nvasoɛ boni a wɔ zo a?”
3 Menyɛle me adwenle kɛ menea debie kpalɛ mɔɔ vi nwanye ɛnlonlɛ nu ba la,+ noko me nrɛlɛbɛ ne hilele me adenle; menzɔle ngoaseadeyɛlɛ nu bɔbɔ kɛ menea debie kpalɛ mɔɔ ɔwɔ kɛ alesama yɛ wɔ bɛ mekɛ ekyi mɔɔ bɛbali ye wɔ ewiade ye anu la.
4 Menyɛle ninyɛne mgbole.+ Mensisile azua;+ menyɛle vanye egyinli dɔɔnwo.+
5 Menyɛle tola ngakyile na menluale mbaka ngakyile mɔɔ so ma la wɔ nu.
6 Mendule bula mɔɔ mesa nuhua nzule megugua mbaka mɔɔ ɛlɛnyi la azo la.
7 Menyianle azonvolɛ mrenyia nee mraalɛ,+ yɛɛ azonvolɛ mɔɔ bɛwole bɛ wɔ me sua nu la. Eza menyianle nyɛmoa dɔɔnwo—nlankɛ nee mboane+—mendɛlale awie biala mɔɔ limoale me nyunlu wɔ Gyɛlusalɛm la.
8 Memboɔboale dwɛtɛ fufule nee nvutuke,+ arelemgbunli nee maanzinli dɔɔnwo agyapadeɛ nloa.*+ Menyianle mrenyia nee mraalɛ edwɛndolɛma dɔɔnwo, yɛɛ debie mɔɔ maa menli amra mrenyia anye die kpole la—raalɛ, ɛhɛe, mraalɛ dɔɔnwo.
9 Yemɔti menyɛle sonlakpole mendɛlale awie biala mɔɔ limoale me nyunlu wɔ Gyɛlusalɛm la.+ Na me rɛle anvi me nrɛlɛbɛ ne.
10 Meanva debie biala mɔɔ me nye die nwo* la meambɔ me nwo abokɛ.+ Meanva anyelielɛ* debie biala meambɔ me ahonle abokɛ, ɔluakɛ me gyima ɛsesebɛ ne kɔsɔɔti ati, me ahonle lile fɛlɛko, na ɛhye a le me gyima ɛsesebɛ ne kɔsɔɔti anwo ahatualɛ* a.+
11 Mekɛ mɔɔ mendwenlenle gyima kɔsɔɔti mɔɔ meva me sa meyɛ nee gyima ɛsesebɛ kɔsɔɔti mɔɔ mevɛ meyɛ la anwo la,+ menwunle kɛ debie biala le mgbane, ɔle kɛ ɛdoa anwoma la;+ debie biala ɛnle ewiade mɔɔ nvasoɛ wɔ zo a.+
12 Akee menzuzule kɛzi nrɛlɛbɛ nee ɛzɛlɛde yɛɛ ngoaseade de la anwo.+ (Ɔluakɛ, duzu a sonla mɔɔ bali belemgbunli ne anzi ara la bayɛ a? Kyesɛ mɔɔ bɛyɛ ye dɛba la ala.)
13 Na menwunle ye kɛ, nvasoɛ wɔ nrɛlɛbɛ zo tɛla ngoaseade,+ kɛ mɔɔ nvasoɛ wɔ wienyi zo tɛla awozinli la.
14 Nrɛlɛbɛvolɛ anye gyi ɔ ti anwo;*+ noko koasea dua awozinli nu.+ Eza menwunle ye kɛ debie kokye ala a to bɛ muala a.*+
15 Akee menganle ye me ahonle nu kɛ: “Mɔɔ to koasea la a bado medame noko a.”+ Ɛnee duzu nvasoɛ a menyia wɔ nrɛlɛbɛ kpole mɔɔ menwu ye la azo a? Ɔti menganle ye me ahonle nu kɛ: “Ɛhye noko le mgbane.”
16 Ɔluakɛ bɛnrɛhakye nrɛlɛbɛvolɛ anzɛɛ koasea dahuu.+ Mekɛ ɛlɛba mɔɔ bɛ rɛle bavi awie biala a. Kɛ mɔɔ nrɛlɛbɛvolɛ wu la, zɔhane ala a koasea wu a.+
17 Yemɔti mengyile ɛbɛlabɔlɛ,+ ɔluakɛ ɛnee ɔzɔho kɛ debie biala mɔɔ bɛyɛ ye wɔ ewiade la maa medi nyane, ɔboalekɛ debie biala le mgbane,+ ɔle kɛ ɛdoa anwoma la.+
18 Mengyile debie biala mɔɔ menyɛle gyima ɛsesebɛ memkpondɛle ye wɔ ewiade ye la,+ ɔluakɛ ɔwɔ kɛ megyakyi ye wɔ me nzi memaa awie mɔɔ bali me nzi ara la.+
19 Na nwane a ze a, saa ɔkɛyɛ nrɛlɛbɛvolɛ anzɛɛ koasea a?+ Noko ɔbanlea debie biala mɔɔ mebɔ mɔdenle meva me nrɛlɛbɛ mekpondɛ wɔ ewiade la azo. Ɛhye noko le mgbane.
20 Yemɔti menlile nyane wɔ me ahonle nu wɔ gyima ɛsesebɛ kɔsɔɔti mɔɔ mevɛ meyɛ wɔ ewiade la anwo.
21 Ɔluakɛ sonla kola fa ye nrɛlɛbɛ nee ye adwenle yɛɛ ye anwubielɛ* yɛ gyima ɛsesebɛ, noko ɔwɔ kɛ ɔgyakyi ye kyɛfoa ne* ɔmaa awie mɔɔ anvɛ nwolɛ la.+ Ɛhye noko le mgbane nee munzule* kpole.
22 Duzu a sonla nyia ye wɔ gyima ɛsesebɛ kɔsɔɔti mɔɔ ɔyɛ nee adwenle mɔɔ ka ye maa* ɔyɛ gyima ɛsesebɛ wɔ ewiade la anu a?+
23 Ɔluakɛ ye mekɛ kɔsɔɔti anu, ye gyima maa ɔdi nyane na ɔ rɛle bɔ,+ yɛɛ ɔdwu nɔɔzo bɔbɔ a, ye ahonle ɛnla.+ Ɛhye noko le mgbane.
24 Debie kpalɛ biala ɛnle ɛkɛ ɛmmaa sonla kɛ ɔkɛli na ɔkɛnlo na ɔ nye kɛlie* ye gyima ɛsesebɛ nwo.+ Menwu kɛ ɛhye noko vi nɔhalɛ Nyamenle ne ɛkɛ,+
25 ɔluakɛ nwane a didi na ɔnono kpalɛ ɔtɛla me a?+
26 Nɔhalɛ Nyamenle ne maa awie mɔɔ sɔ ɔ nye la nrɛlɛbɛ nee adwenle yɛɛ fɛlɛkolilɛ,+ noko ɛtanevolɛ ɛdeɛ, ɔmaa ɔyɛ gyima ɔboɔboa na ɔkuohua ninyɛne nloa ɔmaa sonla mɔɔ sɔ Nyamenle anye la.+ Ɛhye noko le mgbane, ɔle kɛ ɛdoa anwoma la.
Ɔbodwɛkɛ
^ Anzɛɛ “fɛlɛkolilɛ.”
^ Anzɛɛ “agyapadeɛ mɔɔ arelemgbunli nee maanzinli a nyia la anloa.”
^ Anzɛɛ “kyɛfoa.”
^ Anzɛɛ “fɛlɛkolilɛ.”
^ Hibulu aneɛ nu, “me nye kpondɛle.”
^ Anzɛɛ “bɛ muala bɛ awieleɛ le ko.”
^ Anzɛɛ “anye ɛbuke.”
^ Anzɛɛ “anwosesebɛ.”
^ Anzɛɛ “alɔbɔlɛ edwɛkɛ.”
^ Anzɛɛ “ɔgyakyi debie biala.”
^ Hibulu aneɛ nu, “nee ye ahonle mɔɔ ɔpele.”
^ Anzɛɛ “ɔkɛmaa ye ɛkɛla anye kɛlie.”
