Nolobɔvo 3:1-22
3 Debie biala lɛ ye mekɛ,Gyima biala mɔɔ bɛyɛ ye wɔ ewiade la lɛ ye mekɛ:
2 Awolɛ lɛ ye mekɛ yɛɛ ewule lɛ ye mekɛ;Mekɛ mɔɔ bɛdua debie yɛɛ mekɛ mɔɔ bɛtudu mɔɔ bɛlua la;
3 Mekɛ mɔɔ bɛku yɛɛ mekɛ mɔɔ bɛyɛ ayile;Mekɛ mɔɔ bɛbubu bɛgua aze yɛɛ mekɛ mɔɔ bɛsi;
4 Mekɛ mɔɔ bɛsu yɛɛ mekɛ mɔɔ bɛsele;Mekɛ mɔɔ bɛdi nyane yɛɛ mekɛ mɔɔ bɛsi agole;*
5 Mekɛ mɔɔ bɛfuandi awolɛ bɛgua yɛɛ mekɛ mɔɔ bɛboɔboa awolɛ nloa;Mekɛ mɔɔ bɛyɛ atuu yɛɛ mekɛ mɔɔ bɛnyɛ atuu;
6 Mekɛ mɔɔ bɛkpondɛ debie yɛɛ mekɛ mɔɔ bɛbu ye kɛ yeminli;Mekɛ mɔɔ bɛfa debie bɛsie yɛɛ mekɛ mɔɔ bɛfuandi bɛto ye lɔ;
7 Mekɛ mɔɔ bɛsuosua debie nu+ yɛɛ mekɛ mɔɔ bɛkpomgba;Mekɛ mɔɔ bɛyɛ koonwu+ yɛɛ mekɛ mɔɔ bɛtendɛ;+
8 Ɛlɔlɛ lɛ ye mekɛ yɛɛ ɛkpɔlɛ lɛ ye mekɛ;+Konle lɛ ye mekɛ yɛɛ anzodwolɛ lɛ ye mekɛ.
9 Duzu a gyimayɛvolɛ nyia ye wɔ ye ɛvɛlɛ kɔsɔɔti anwo a?+
10 Menwu gyima mɔɔ Nyamenle ɛva ɛmaa menli mɔɔ bɛgyi nwo bɛlɛyɛ la.
11 Yeyɛ debie biala kɛnlɛma* wɔ ye mekɛ nu.+ Yeva mekɛ mɔɔ ɛnlɛ awieleɛ bɔbɔ la yewula bɛ ahonle nu; noko alesama ɛnrɛnwu gyima mɔɔ nɔhalɛ Nyamenle ne ɛyɛ ɔvi mɔlebɛbo kɔdwu awieleɛ la ɛlɛ.
12 Menwu kɛ debie kpalɛ biala ɛnle ɛkɛ ɛmmaa bɛ tɛla kɛ bɛkɛlie bɛ nye na bɛkɛyɛ kpalɛ wɔ bɛ ɛbɛlabɔlɛ nu,+
13 eza ɔwɔ kɛ awie biala didi na ɔno na ɔ nye die ye gyima ɛsesebɛ kɔsɔɔti anwo. Ɔle Nyamenle ahyɛlɛdeɛ.+
14 Menwu kɛ debie biala mɔɔ nɔhalɛ Nyamenle ne ɛyɛ la badɛnla ɛkɛ dahuu. Bɛngola bɛnva bie bɛmboka nwo yɛɛ bɛngola bɛnye bie bɛnvi nu. Nɔhalɛ Nyamenle ne a ɛyɛ ye zɔ a, amaa menli azulo ye.+
15 Mɔɔ ɛzi la ɛzi dɛba, yɛɛ mɔɔ bara la wɔ ɛkɛ ne dɛba;+ noko nɔhalɛ Nyamenle ne kpondɛ mɔɔ bɛdoa ye la.*
16 Eza menwu ɛhye wɔ ewiade ye anu: Ɛleka mɔɔ ɔwɔ kɛ bɛdi pɛlepɛle la, amumuyɛyɛlɛ a wɔ ɛkɛ a, yɛɛ ɛleka mɔɔ ɔwɔ kɛ bɛyɛ tenlene la, amumuyɛyɛlɛ a wɔ ɛkɛ a.+
17 Yemɔti menganle ye me ahonle nu kɛ: “Nɔhalɛ Nyamenle ne babua tenlenema nee amumuyɛma ndɛne,+ ɔluakɛ gyima biala nee nyɛleɛ biala lɛ ye mekɛ.”
18 Eza menganle menli nwo edwɛkɛ wɔ me ahonle nu kɛ, nɔhalɛ Nyamenle ne bazɔ bɛ anlea na yeamaa bɛanwu kɛ bɛle kɛ nane ala la,
19 ɔluakɛ alesama lɛ bɛ awieleɛ yɛɛ nane lɛ bɛ awieleɛ; bɛ muala bɛ awieleɛ le ko.+ Kɛ mɔɔ ɛhye wu la zɔhane ala a ɛhye noko wu a; na bɛ muala bɛlɛ sunsum ko.+ Yemɔti sonla ɛndɛla nane, ɔluakɛ debie biala le mgbane.
20 Bɛ muala bɛkɔ ɛleka ko.+ Bɛ muala bɛvi ndɛtɛlɛ nu+ yɛɛ bɛ muala bɛsia bɛkɔ ndɛtɛlɛ nu.+
21 Nwane a amgba ze kɛ menli sunsum fo kɔ anwuma na nane sunsum dwu kɔ azɛlɛ ne anu a?+
22 Na menwunle kɛ debie kpalɛ biala ɛnle ɛkɛ ɛndɛla kɛ sonla kɛlie ɔ nye wɔ ye gyima nwo,+ ɔluakɛ ye ahatualɛ* ɛne; na nwane a bahola amaa yeanwu mɔɔ bazi ɔ nzi la ɛ?+
Ɔbodwɛkɛ
^ Hibulu aneɛ nu, “bɛwuluwulu.”
^ Anzɛɛ “pɛpɛɛpɛ; kpalɛ.”
^ Anzɛɛ ɔkola ɔkile, “mɔɔ ɛpɛ nu la.”
^ Anzɛɛ “kyɛfoa.”
