Nolobɔvo 6:1-12
6 Menwu munzule* kpole bieko wɔ ewiade ye anu, na ɔta ɔsi menli avinli:
2 Nɔhalɛ Nyamenle ne maa sonla ne bie anwonyia nee agyapadeɛ yɛɛ anyunlunyia, amaa yeangyia debie biala mɔɔ ɔkulo la;* noko nɔhalɛ Nyamenle ne ɛmmaa ɔnva ɔnlie ɔ nye, emomu ɛyɛvolɛ a badi a. Ɛhye le mgbane yɛɛ ɔyɛ nyane kpalɛ.
3 Saa sonla wo mralɛ ɛya ko na ɔtɛnla aze ɔkyɛ kpalɛ na yeanva ye ninyɛne mgbalɛ ne mɔ yeanlie ɔ nye na ɔwu a, ɛnee mebaha kɛ kakula mɔɔ kɛwu bɛ kunlu la le kpalɛ tɛla ye.+
4 Ɔluakɛ yemɔ ɔrale mgbane na ɔluale awozinli nu ɔhɔle, yɛɛ awozinli ɛheda ye duma ne azo.
5 Yeannwu sɛnzɛne ne, yɛɛ ɔnze ɛhwee ɛdeɛ, noko ɔle kpalɛ ɔtɛla* sonla ne mɔɔ yɛlimoa yɛha ɔ nwo edwɛkɛ la.+
6 Saa ɛtɛnla aze ɛvolɛ apenle nwiɔ na wɔanlie ɛ nye a, duzu nvasoɛ a wɔ zo a? Asoo bɛ muala bɛngɔ ɛleka ko?+
7 Sonla gyima ɛsesebɛ kɔsɔɔti, ɔyɛ ɔmaa ɔ nloa;+ noko ye atiakunluwɔzo* akunlu ɛndwo ɛlɛ.
8 Duzu a nrɛlɛbɛvolɛ fa tɛla koasea a,+ anzɛɛ duzu nvasoɛ a wɔ zo kɛ ehyianli kɛnwu kɛzi bɛbɔ ɛbɛla* la ɛ?
9 Ɔle kpalɛ kɛ ɛbava mɔɔ ɛ nye dua ye la wɔalie ɛ nye tɛla kɛ ɛbabɔ mɔdenle kɛ ɛdi wɔ atiakunluwɔzo nzi.* Ɛhye noko le mgbane, ɔle kɛ ɛdoa anwoma la.
10 Debie biala mɔɔ wɔ ɛkɛ la, bɛbɔ ye duma dɛba, yɛɛ yɛze kɛzi sonla de la; na ɔnrɛhola ɔ nee awie mɔɔ lɛ tumi tɛla ye la ɛnrɛli butule.*
11 Ɛdendɛlɛ so a, ɔmaa bɛka edwɛkɛ mgbane mgbane;* na duzu nvasoɛ a wɔ zo maa sonla a?
12 Nwane a ze debie kpalɛ mɔɔ ɔwɔ kɛ sonla yɛ wɔ ye ngoane mekɛ ezinra ne mɔɔ se ndɛndɛ* kɛ ɛlawolɛ la anu a?+ Na nwane a bahola aha mɔɔ bazi ewiade ye anu wɔ awie ewule nzi la ahile ye a?
Ɔbodwɛkɛ
^ Anzɛɛ “alɔbɔlɛ edwɛkɛ.”
^ Anzɛɛ “ye ɛkɛla angyia ɛhwee.”
^ Hibulu aneɛ nu, “ɔliele ɔ menle ɔdɛlale.”
^ Anzɛɛ “ɛkɛla.”
^ Hibulu aneɛ nu, “kɛzi bɛdua anyewɔzoamra anyunlu.”
^ Anzɛɛ “tɛla kɛ wɔ ɛkɛla baluolua nu.”
^ Anzɛɛ “ɛnrɛli edwɛkɛ.”
^ Anzɛɛ ɔkola ɔkile, “Ninyɛne dɔɔnwo maa ninyɛne mgbane so.”
^ Anzɛɛ “mɔɔ le mgbane na ɔse.”
