Sɔlɔmɔn Edwɛne 8:1-14
-
Bɛlɛra (1-4)
-
“Saa ɛle kɛ me diema nrenyia” (1)
-
-
Bɛlɛra ne amediema mrenyia (5a)
-
‘Nwane a nee ye kulovolɛ ne dedɛ bɛ sa la?’
-
-
Bɛlɛra (5b-7)
-
“Ɛhulolɛ anwo yɛ se kɛ ewule” (6)
-
-
Bɛlɛra ne amediema mrenyia (8, 9)
-
“Saa ɔle bane a, . . . noko saa ɔle anlenkɛ a, . . .” (9)
-
-
Bɛlɛra (10-12)
-
“Mele bane” (10)
-
-
Mboaneneavolɛ (13)
-
“Maa mende ɛ ne”
-
-
Bɛlɛra (14)
-
“Maa ɛ nwo ɛyɛ ndɛ kɛ kɛtɛboɛ”
-
8 “Saa ɛle kɛ me diema nrenyia,Mɔɔ nlonle me mame anyɛfo a,
Anrɛɛ menwu wɔ wɔ alienwo a, mebavo ɛ nloa anwo,+Na awie biala ɛnrɛha nwolɛ edwɛkɛ.
2 Anrɛɛ mebali ɛ nyunlu;Meava wɔ meahɔ me mame sua nu,+Ahenle mɔɔ ɔhilehilele me la.
Anrɛɛ mebamaa wɔ nwanye mɔɔ debie evuanlɛ wɔ nu la meamaa wɔanlo,Pɔmegelanate nu nzule fofolɛ.
3 Me ti bala ɔ sa bɛne ne azo,Yɛɛ ɔ sa fema ne babɛla me.+
4 O Gyɛlusalɛm mraalɛ, meka ndane meado bɛ nwo kɛ:
Bɛmmatwe me adwenle bɛkɔ ɛhulolɛ zo kɔkpula kɛ ye mekɛ kɛdwu.”+
5 “Nwane a le raalɛ ɛhye mɔɔ vi fienemgbole ne anu ɛlɛba,Mɔɔ nee ye kulovolɛ ne dedɛ bɛ sa la?”
“Mendunwuele wɔ wɔ ampolo baka ne abo.
Ɛleka mɔɔ wɔ mame ako hanle ye la.
Ɛleka mɔɔ ahenle mɔɔ wole wɔ la dele awolɛ nyane la.
6 Fa me yɛ ɛyɛlɛ sɔ wɔ ahonle ne anloa,Fa yɛ ɛ sa anwo nzonlɛ,Ɔluakɛ ɛhulolɛ anwo yɛ se kɛ ewule,+Yɛɛ nɔhalɛlilɛ* gyi ye pi kɛ Nla.*
Ye senle ne sɔ kpole, Gyaa* sendɔlɔra.+
7 Azule mɔɔ ɛlɛtu la ɛngola ɛnnua ɛhulolɛ,+Yɛɛ azule ɛngola ɛnva ye ɛngɔ.+
Saa sonla fa ye sua nu anwonyia kɔsɔɔti kɛ ɔfa yeadɔ ɛhulolɛ a,Menli anye ɛnrɛlie nwolɛ* fee.”
8 “Yɛlɛ yɛ diema raalɛ ekyi bie,+Na ɔtɛsuozuale nyɛfonlɛ.
Duzu a yɛbayɛ yɛamaa yɛ diema raalɛ neWɔ kenle mɔɔ awie babiza ye agyalɛ la ɛ?”
9 “Saa ɔle bane a,Yɛbava dwɛtɛ fufule yɛayɛ debie yɛado ɔ ti zo,Noko saa ɔle anlenkɛ a,Yɛbava sida ndaboa yɛadua ye.”
10 “Mele bane,Yɛɛ me nyɛfo le kɛ tawa la.
Yemɔti ɔ nye zo aMele kɛ awie mɔɔ lɛ anzodwolɛ la.
11 Ɛnee Sɔlɔmɔn lɛ vanye egyinli bie+ wɔ Beeyale-heemɔn.
Ɔvale ɔwulale menli sa nu kɛ bɛnlea zo.
Ɛnee bɛtete ma ne a, bɛ nuhua ko biala fa dwɛtɛ fufule apenle ko ba.
12 Melɛ me ti anwo vanye egyinli.
O Sɔlɔmɔn, dwɛtɛ fufule apenle ko ne le wɔ ɛdeɛ,Yɛɛ ɛya nwiɔ le bɛdabɛ mɔɔ bɛnea zo la ɛdeɛ.”
13 “O wɔmɔ mɔɔ ɛwɔ tola ne anu,+Agɔnwolɛma ne ɛlɛkendɛ adie ɛ ne.
Maa mende ɛ ne.”+
14 “Me kulovolɛ, ka ɛ nwo,Na maa ɛ nwo ɛyɛ ndɛ kɛ kɛtɛboɛ+Anzɛɛ weɛlɛ kakulaWɔ ninyɛne evuanlɛ awoka ne mɔ azo.”
Ɔbodwɛkɛ
^ “Gyaa” le Gyihova duma ne mɔɔ bɛpɛ ye sinli.
^ Anzɛɛ “Sheol,” ɛhye kile, alesama nla. Nea Edwɛkɛbohilelɛ.
^ Anzɛɛ “anwofamaa.”
^ Anzɛɛ ɔkola ɔkile, “ɛnrɛlie ɔ nwo.”
