Yizikeɛle 10:1-22
10 Mekɛ mɔɔ melɛnea la, menwunle debie bie mɔɔ le kɛ safaya bolɛ la wɔ bama ne mɔɔ wɔ kyɛlɔbe ne mɔ ati zo la anwuma, na deɛ ne zɔho belemgbunli ebia.+
2 Akee ɔzele nrenyia ne mɔɔ wula lenen tɛladeɛ ne la kɛ:+ “Kɔwolo ehwili gyakɛ ne mɔ+ mɔɔ wɔ kyɛlɔbe ne mɔ abo la avinli, na fa ɛ sa nwiɔ fula samɛnlakɛ+ fi kyɛlɔbe ne mɔ avinli na fuandi gua suakpole ne azo.”+ Ɔti mɔɔ ɔwolo la, ɛnee melɛnea.
3 Mekɛ mɔɔ nrenyia ne wolole la, ɛnee kyɛlɔbe ne mɔ gyigyi sua ne fema zo, na amungu yile suakunlu alienwo ɛkɛ ne tɛkɛɛ.
4 Na Gyihova anyunlunyia ne+ maanle ɔ nwo zo vile kyɛlɔbe ne mɔ anwo zo hɔle sua ne anlenkɛ ne anloa, na ngyikyingyikyi, amungu yile sua ne tɛkɛɛ,+ na Gyihova anyunlunyia ne dale alienwo ɛkɛ ne amuala.
5 Na ɛnee bɛte kyɛlɔbe ne mɔ andɛba ne mɔ ane wɔ findezo alienwo ɛkɛ ne, ɛnelɛ ne le kɛ Nyamenle Tumivolɛ Bedevinli ne ɛlɛtendɛ la.+
6 Akee ɔzele nrenyia ne mɔɔ wula lenen tɛladeɛ ne la kɛ: “Fa senle fi ehwili gyakɛ ne mɔ avinli, wɔ kyɛlɔbe ne mɔ avinli,” na ɔwolole ɛkɛ ne na ɔhɔgyinlanle ehwili gyakɛ ne mɔ ko anwo.
7 Akee kyɛlɔbe ne mɔ anu ko dendenle ɔ sa wɔ senle ne mɔɔ wɔ kyɛlɔbe ne mɔ avinli ɛkɛ ne la anwo.+ Ɔvale bie ɔguale nrenyia ne mɔɔ wula lenen tɛladeɛ ne la asa nwiɔ ne mɔ anu,+ ɔliele na akee ɔvindele ɔhɔle.
8 Kyɛlɔbe ne mɔ lɛ debie mɔɔ le kɛ sonla sa la wɔ bɛ ndɛba ne mɔ abo.+
9 Mɔɔ melɛnea la, menwunle ehwili gyakɛ nna wɔ kyɛlɔbe ne mɔ anwo ɛkɛ, ehwili gyakɛ ko wɔ kyɛlɔbe ne mɔ ko biala anwo ɛkɛ, na ehwili gyakɛ ne mɔ ta kɛ kelesɔlaete bolɛ la.+
10 Saa ɛnea bɛ a, nna ne amuala zɔho bɛ nwo, bɛle kɛ ehwili gyakɛ mɔɔ vea ehwili gyakɛ nu la.
11 Saa bɛtu bɛ bo a, bɛkola bɛkɔ afoa nna ne ɛleka biala mɔɔ bɛmpɛne bɛ nwo, ɔluakɛ bɛkɔ ɛleka mɔɔ bɛ nye* kile la mɔɔ bɛmpɛne bɛ nwo a.
12 Ɛnyelɛ duodua bɛ nwo amuala, bɛ nzi, bɛ sa, bɛ ndɛba yɛɛ ehwili gyakɛ ne mɔ anwo, na ehwili gyakɛ nna ne mɔɔ bɛlɛ la, biala anwo le ɛnyelɛ ngome.+
13 Mɔɔ fale ehwili gyakɛ ne mɔ anwo la, mendele kɛ ɛnelɛ bie ɛlɛka ahile bɛ kɛ, “Ehwili Gyakɛ!”
14 Ko biala* lɛ ɔ nyunlu nna. Ɔ nyunlu ne mɔɔ limoa la le kyɛlɔbe nyunlu, ɔ nyunlu ne mɔɔ tɔ zolɛ nwiɔ la le sonla* nyunlu, ɔ nyunlu ne mɔɔ tɔ zolɛ nsa la le awenade nyunlu yɛɛ mɔɔ tɔ zolɛ nna la le kɔleɛ nyunlu.+
15 Na kyɛlɔbe ne mɔ maanle bɛ nwo zo—tease abɔdeɛ ɛhye mɔ ala a menwunle bɛ* wɔ azule Kibaa ne anloa la+—
16 na saa kyɛlɔbe ne mɔ tu bɛ bo a, ehwili gyakɛ ne mɔ tu bɛ bo di bɛ foa ko; yɛɛ saa kyɛlɔbe ne mɔ memaa bɛ ndɛba zo na bɛmaa bɛ nwo zo bɛfi azɛlɛ ne azo a, ehwili gyakɛ ne mɔ ɛmpɛne bɛ nwo anzɛɛ bɛnvi bɛ nwo ɛkɛ.+
17 Saa ɛhye mɔ gyinla a, bɛdabɛ noko bɛgyinla; yɛɛ saa ɛhye mɔ maa bɛ nwo zo a, bɛ nee bɛ maa bɛ nwo zo, ɔluakɛ sunsum ne mɔɔ yɛ gyima wɔ tease abɔdeɛ ne mɔ anwo zo la* wɔ bɛ nu.
18 Akee Gyihova anyunlunyia ne+ vi sua ne anlenkɛ ne anloa hɔgyinlanle kyɛlɔbe ne mɔ ati zo anwuma.+
19 Mɔɔ melɛnea la, menwunle kɛ kyɛlɔbe ne mɔ memaanle bɛ ndɛba ne mɔ zo na bɛmaanle bɛ nwo zo bɛvile azɛlɛ ne azo. Mekɛ mɔɔ bɛlɛkɔ la, ɛnee ehwili gyakɛ ne mɔ li bɛ foa ko. Bɛhɔgyinlanle Gyihova sua ne anlenkɛ kpole ne mɔɔ wɔ aduduleɛ la anloa, na ɛnee Yizilayɛ Nyamenle ne anyunlunyia ne wɔ bɛ ti zo anwuma.+
20 Ɛhye mɔ a le tease abɔdeɛ ne mɔ mɔɔ menwunle bɛ wɔ Yizilayɛ Nyamenle ne belemgbunli ebia ne abo wɔ azule Kibaa ne anloa la,+ ɔti menwunle kɛ bɛle kyɛlɔbe.
21 Nna ne amuala lɛ bɛ nyunlu nna, ndɛbalɛ nna yɛɛ debie mɔɔ le kɛ sonla sa la wɔ bɛ ndɛba ne mɔ abo.+
22 Na bɛ nyunlu le kɛ mɔɔ menwunle bɛ wɔ azule Kibaa ne anloa la anyunlu.+ Bɛ nuhua ko biala kɔ ɔ nyunlu fɔɔnwo.+
Ɔbodwɛkɛ
^ Hibulu aneɛ nu, “bɛ ti.”
^ Ɛhye kile, kyɛlɔbe ko biala.
^ Hibulu aneɛ nu, “nrenyia.”
^ Hibulu aneɛ nu, “tease abɔdeɛ ko ne ala a menwunle ye.”
^ Hibulu aneɛ nu, “tease abɔdeɛ ne sunsum ne.”
