Yizikeɛle 11:1-25
11 Na sunsum ne maanle me zo na ɔvale me ɔrale Gyihova sua ne aduduleɛ anlenkɛ kpole ne, anlenkɛ ne mɔɔ anye wɔ aduduleɛ la anloa.+ Menwunle mrenyia 25 wɔ anlenkɛ kpole ne anloa, na ɛnee Azɛ ara Gyeeyazanaya yɛɛ Bɛnaya ara Pɛlataya, mɔɔ bɛle maanle ne anu mgbanyinli la boka nwolɛ.+
2 Na ɔzele me kɛ: “Sonla ra, menli ɛhye mɔ a bɔ adwenle ɛtane na bɛtu folɛ ɛtane wɔ suakpole ɛhye azo* la.
3 Bɛka kɛ, ‘Asoo tɛ mekɛ mɔɔ ɔwɔ kɛ yɛsisi azua la ɛne?+ Suakpole* ne a le danesɛne* ne,+ yɛɛ yɛmɛ a yɛle fɛlɛ ne a.’
4 “Ɔti ka ngapezo tia bɛ. Sonla ra, ka ngapezo.”+
5 Akee Gyihova sunsum ne rale me nwo zo,+ na ɔzele me kɛ: “Ka kɛ, ‘Mɔɔ Gyihova ɛha la ɛne: “Mɔɔ bɛha la le nɔhalɛ, O Yizilayɛma, na meze mɔɔ bɛlɛdwenle nwolɛ la.*
6 Bɛmaa menli dɔɔnwo ɛwu wɔ suakpole ɛhye azo, yɛɛ bɛmaa avunli ɛyi ye awɔdenle ne mɔ azo.”’”+
7 “Ɛhye ati mɔɔ Tumivolɛ Awulae Gyihova ɛha la ɛne: ‘Avunli ne mɔ mɔɔ bɛkponde bɛ wɔ suakpole ne azo la a le fɛlɛ ne, yɛɛ suakpole ne a le danesɛne ne.+ Noko bɛmɛ, bɛbaye bɛ bɛavi zo.’”
8 “‘Bɛsulo konle dadeɛ,+ noko konle dadeɛ a mebava meara bɛ nwo zo a,’ Tumivolɛ Awulae Gyihova a se a.
9 ‘Mebaye bɛ meavi zo na meava bɛ meawula nyɛvolɛ asa anu na meabua bɛ ndɛne.+
10 Bɛbadɔ amolɛ nu wɔ konle dadeɛ nloa.+ Mebabua bɛ ndɛne wɔ Yizilayɛ ɛweɛne zo,+ na bɛbanwu kɛ medame a mele Gyihova a.+
11 Suakpole ne ɛnrɛyɛ bɛ danesɛne, yɛɛ bɛdabɛ noko bɛnrɛyɛ fɛlɛ mɔɔ wɔ nuhua la; mebabua bɛ ndɛne wɔ Yizilayɛ ɛweɛne zo,
12 na bɛbanwu kɛ medame a mele Gyihova a. Ɔluakɛ bɛanlua me mɛla ne mɔ anu yɛɛ bɛanli me ndɛnebualɛ ne mɔ azo,+ emomu bɛhɔlile maanle maanle mɔɔ ɛbɛnga bɛ ɛyia la ndɛnebualɛ nzi.’”+
13 Mɔɔ menganle ngapezo ne ala la, Bɛnaya ara Pɛlataya wule, na menvale me nyunlu membutule aze na menvale ɛnelɛ kpole mendeanle nuhua kɛ: “O Tumivolɛ Awulae Gyihova! Ɛbɔ Yizilayɛma mɔɔ ɛha la abo zo bɔkɔɔ ɔ?”+
14 Gyihova dendɛle hilele me bieko kɛ:
15 “Sonla ra, Gyɛlusalɛmma ɛha ɛhile ɛ mediema ne mɔ, wɔ mbusuafoɔ mɔɔ bikye wɔ kpalɛ la nee Yizilayɛma amuala kɛ, ‘Bɛhwe bɛ nwo bɛvi Gyihova anwo bɛhɔ moamoa. Azɛlɛ ne le yɛ ɛdeɛ; bɛva bɛmaa yɛ kɛ yɛ agyapadeɛ.’
16 Ɛhye ati ka kɛ, ‘Mɔɔ Tumivolɛ Awulae Gyihova ɛha la ɛne: “Meye bɛ mehɔ maanle maanle mɔɔ wɔ moamoa la anu yɛɛ mebɔ bɛ asande mehɔ azɛlɛ ne mɔ azo ɛdeɛ,+ noko mebayɛ ɛzonlenlɛsua meamaa bɛ wɔ mekɛ ekyi bie anu wɔ azɛlɛ ne mɔ mɔɔ bɛhɔ zolɛ la azo.”’+
17 “Ɛhye ati ka kɛ, ‘Mɔɔ Tumivolɛ Awulae Gyihova ɛha la ɛne: “Medame noko mebaye bɛ meavi maanle ne mɔ anu na meaboɔboa bɛ nloa meavi azɛlɛ ne mɔ mɔɔ membɔle bɛ asande mengɔle zolɛ la azo, na meava Yizilayɛ azɛlɛ ne meamaa bɛ.+
18 Na bɛbazia bɛahɔ ɛkɛ na bɛayeye kyibadeɛ ninyɛne nee bɛkyi nyɛleɛ kɔsɔɔti bɛavi ɛkɛ.+
19 Na mebamaa bɛ ahonle ko,+ na meava sunsum fofolɛ meawula bɛ nu;+ na mebaye bolɛ ahonle ne meavi bɛ sonlabaka ne mɔ anu+ na meamaa bɛ nwonane ahonle,*+
20 amaa bɛalua me mɛla ne mɔ anu na bɛali me ndɛnebualɛ ne mɔ azo na bɛayɛ tieyɛ. Akee bɛbayɛ me menli, na medame noko meayɛ bɛ Nyamenle.”’
21 “‘“Noko bɛdabɛ mɔɔ bɛzi bɛ ahonle kɛ bɛdi bɛ kyibadeɛ ninyɛne nee bɛ bɛkyi nyɛleɛ ne mɔ anzi la ɛdeɛ, mebava mɔɔ bavi bɛ ndenle ne mɔ anu ara la meagua bɛ ti zo,” Tumivolɛ Awulae Gyihova a se a.’”
22 Akee kyɛlɔbe ne mɔ memaanle bɛ ndɛba ne mɔ zo, na ɛnee ehwili gyakɛ ne mɔ bikye bɛ,+ na ɛnee Yizilayɛ Nyamenle ne anyunlunyia ne wɔ bɛ ti zo anwuma.+
23 Akee Gyihova anyunlunyia ne+ maanle ɔ nwo zo vile suakpole ne azo na ɔhɔgyinlanle boka ne mɔɔ wɔ suakpole ne aduduleɛ afoa nu la azo.+
24 Sunsum ne maanle me zo—wɔ Nyamenle sunsum ne ɛnyelɛzodeɛnwunlɛ ne anu—na ɔvale me ɔrale menli mɔɔ bɛva bɛ bɛhɔ akɛlɛzonlenlɛ nu wɔ Kaledea la anwo ɛkɛ. Akee ɛnyelɛzodeɛnwunlɛ ne mɔɔ menyianle la vile me nwo zo hɔle.
25 Na menganle ninyɛne mɔɔ Gyihova yele hilele me la amuala anwo edwɛkɛ mengilele menli mɔɔ wɔ akɛlɛzonlenlɛ nu la.
Ɔbodwɛkɛ
^ Anzɛɛ “bɛtu folɛ ɛtane bɛtia suakpole ɛhye.”
^ Hibulu aneɛ nu, “Ɔdaye,” Gyɛlusalɛm suakpole ne, ɛleka mɔɔ ɛnee Dwumaa ne suzu kɛ bɛbanyia banebɔlɛ la.
^ Anzɛɛ “danesɛne anloa kpole.”
^ Anzɛɛ “ninyɛne mɔɔ ba bɛ sunsum ne anu la.”
^ Ɛhye kile, ahonle mɔɔ di Nyamenle adehilelɛ nzi.”
