Yizikeɛle 12:1-28
12 Gyihova nee me dendɛle bieko kɛ:
2 “Sonla ra, ɛ nee atuadelɛ menli a de a. Bɛlɛ ɛnyelɛ mɔɔ nwu debie la noko bɛnnwu debie, yɛɛ bɛlɛ ɛnzolɛ mɔɔ te edwɛkɛ la noko bɛnde edwɛkɛ+ ɔluakɛ bɛle atuadelɛ menli.+
3 Na wɔmɔ, sonla ra, kyekye wɔ bɔlɛ na yɛ kɛ ɛlɛkɔ akɛlɛzonlenlɛ nu la. Na wɔ alehyenlɛ nu, mekɛ mɔɔ bɛlɛnea wɔ la, kɔ akɛlɛzonlenlɛ nu. Fi wɔ sua nu kɔ akɛlɛzonlenlɛ nu wɔ ɛleka fofolɛ wɔ mekɛ mɔɔ bɛlɛnea wɔ la. Bɛle atuadelɛ menli ɛdeɛ, noko bie a bɛbanwu ye.
4 Ye wɔ bɔlɛ ne finde alehyenlɛ nu kɛ asɛɛ ɛlɛkɔ akɛlɛzonlenlɛ nu la wɔ mekɛ mɔɔ bɛlɛnea wɔ la, na nɔsolɛ nu, mekɛ mɔɔ bɛlɛnea wɔ la, fi ɛkɛ ne kɔ kɛ awie mɔɔ bɛ nee ye ɛlɛkɔ akɛlɛzonlenlɛ nu la.+
5 “Mekɛ mɔɔ bɛlɛnea wɔ la, tu tokule wɔ bane ne anu, na fa wɔ bɔlɛ ne mɔ dua nu kɔ.+
6 Mekɛ mɔɔ bɛlɛnea wɔ la, fa wɔ ninyɛne ne mɔ gua ɛ kɔme zo na soa dua awozinli ne anu kɔ. Keda ɛ nyunlu amaa wɔannwu aze ɔluakɛ melɛfa wɔ meayɛ sɛkɛlɛneɛ meamaa Yizilayɛma.”+
7 Menyɛle mɔɔ ɔhanle ɔhilele me la. Wɔ alehyenlɛ ne anu, menyele me bɔlɛ ne menvindele kɛ mekɔ akɛlɛzonlenlɛ nu, na ye nɔsolɛ nu, menvale me sa mendule tokule wɔ bane ne anu. Na mɔɔ awozinli ne rale la, menvale me ninyɛne ne mɔ, menzoale bɛ me kɔme zo wɔ bɛ nye zo ɛkɛ ne na mengɔle.
8 Aleɛ hyenle la, Gyihova nee me dendɛle bieko kɛ:
9 “Sonla ra, asoo Yizilayɛma, atuadelɛ menli ne, ɛtɛbizale wɔ kɛ, ‘Duzu a ɛlɛyɛ a?’
10 Ka kile bɛ kɛ, ‘Mɔɔ Tumivolɛ Awulae Gyihova ɛha la ɛne: “Nrɛlaleɛ ɛhye fale kpanyinli ne+ mɔɔ wɔ Gyɛlusalɛm la nee Yizilayɛma mɔɔ wɔ suakpole ne azo la amuala anwo.’”
11 “Ka kɛ, ‘Mele sɛkɛlɛneɛ memaa bɛ,+ kɛ mɔɔ menyɛle ye la, zɔhane ala a bado bɛ a. Bɛbahye bɛ bɛahɔ akɛlɛzonlenlɛ nu.+
12 Kpanyinli ne mɔɔ wɔ bɛ avinli la bazoa ye ninyɛne wɔ ɔ kɔme zo na yeavi ɛke awozinli nu. Ɔbadu tokule wɔ bane ne anu na yeazoa ye ninyɛne ne yealua nu yeavinde.+ Ɔbaheda ɔ nyunlu amaa yeannwu aze.’
13 Mebado me asawu ne meagua ɔ nwo zo, na meahye ye wɔ me avonle ne anu.+ Akee mebava ye meahɔ Babelɔn, Kaledeama azɛlɛ ne azo, noko ɔnrɛnwu ye; na nehane a ɔbawu a.+
14 Na bɛdabɛ mɔɔ bɛbɔ ye bɛyia la, ye boavolɛma nee ye ɛlɔnema amuala, mebabɔ bɛ asande meahɔ ɛleka biala;+ na mebahwe konle dadeɛ meavoa bɛ.+
15 Saa mebɔ bɛ asande wɔ maanle maanle ne mɔ anu na mekponde bɛ wɔ azɛlɛ ne mɔ azo a, bɛbanwu kɛ medame a mele Gyihova a.
16 Noko bɛ nuhua ekyi bavi konle dadeɛ nloa, ɛhɔne nee ewulenzane nu anyia bɛ ti, amaa bɛaha bɛ bɛkyi nyɛleɛ ne kɔsɔɔti anwo edwɛkɛ wɔ maanle maanle mɔɔ bɛbahɔ nu la anu; na bɛbanwu kɛ medame a mele Gyihova a.”
17 Na Gyihova nee me dendɛle bieko kɛ:
18 “Sonla ra, fa anwowosolɛ di wɔ aleɛ na fa sulosulo nee adwenleadwenle no wɔ nzule.+
19 Ka kile menli mɔɔ de azɛlɛ ne azo la kɛ, ‘Mɔɔ Tumivolɛ Awulae Gyihova ɛlɛka ahile Gyɛlusalɛmma mɔɔ de Yizilayɛ azɛlɛ zo la ɛne: “Bɛbava adwenleadwenle bɛali bɛ aleɛ na bɛava sulosulo bɛanlo bɛ nzule, ɔluakɛ bɛ azɛlɛ ne badɔ mgbane bɔkɔɔ+ ɔlua menli mɔɔ de zolɛ la amuala basabasayɛlɛ ne ati.+
20 Bɛbazɛkye azuamgbole ne mɔ mɔɔ bɛdede zolɛ la bɔkɔɔ, yɛɛ azɛlɛ ne badɔ mgbane;+ na bɛbanwu kɛ medame a mele Gyihova a.”’”+
21 Na Gyihova nee me dendɛle bieko kɛ:
22 “Sonla ra, ɛrɛlɛ boni a bɛlɛ ye wɔ Yizilayɛ mɔɔ se, ‘Mekɛ ne se kɔ, na ɛnyelɛzodeɛnwunlɛ biala yɛ mgbane’ la ɛ?+
23 Ɛhye ati ka kile bɛ kɛ, ‘Mɔɔ Tumivolɛ Awulae Gyihova ɛha la ɛne: “Mebamaa bɛagyakyi edwɛkɛ ɛhye ɛhanlɛ, na bɛnrɛva bɛnrɛbu ɛrɛlɛ wɔ Yizilayɛ bieko.”’ Noko ka kile bɛ kɛ, ‘Mekɛ ne ɛbikye,+ na ɛnyelɛzodeɛnwunlɛ biala bara nu.’
24 Ɔluakɛ adalɛ ɛnyelɛzodeɛnwunlɛ anzɛɛ mɛlɛbɛla* abisadeɛ biala ɛnrɛra Yizilayɛma avinli bieko.+
25 ‘“Ɔluakɛ medame Gyihova, mebadendɛ. Edwɛkɛ biala mɔɔ mebaha la bara nu mɔɔ ɔnrɛha amozi bieko a.+ O atuadelɛ menli, wɔ bɛ mekɛ zo,+ mebaha edwɛkɛ na meayɛ,” Tumivolɛ Awulae Gyihova a se a.’”
26 Gyihova nee me dendɛle bieko kɛ:
27 “Sonla ra, mɔɔ Yizilayɛma ɛlɛka la ɛne, ‘Ɛnyelɛzodeɛnwunlɛ ne mɔɔ ɔnwu ye la fale mekɛ tendenle bie mɔɔ bara la anwo, yɛɛ ye ngapezo ne fale kenle bie mɔɔ wɔ moamoa la anwo.’+
28 Ɛhye ati ka kile bɛ kɛ, ‘Mɔɔ Tumivolɛ Awulae Gyihova ɛha la ɛne: “‘Me edwɛkɛ biala ɛnrɛha amozi; mɔɔ mebaha biala la bara nu,’ Tumivolɛ Awulae Gyihova a se a.”’”
Ɔbodwɛkɛ
^ Anzɛɛ “adalɛ nganvolɛ.”
