Yizikeɛle 13:1-23
13 Gyihova nee me dendɛle bieko kɛ:
2 “Sonla ra, ka ngapezo tia Yizilayɛ ngapezoma,+ na ka kile bɛdabɛ mɔɔ bɛbɔ bɛ ti anu bɛka ngapezo*+ la kɛ, ‘Bɛdie Gyihova edwɛkɛ.
3 Mɔɔ Tumivolɛ Awulae Gyihova ɛha la ɛne: “Ngapezoma ahoasea mɔɔ bɛdi bɛdabɛ bɛ nzuzulɛ* nzi wɔ mekɛ mɔɔ bɛtɛnwunle ɛhwee la, bɛ gyakɔ!+
4 O Yizilayɛ, wɔ ngapezoma ɛyɛ kɛ azɛlɛ mɔɔ ɛdɔ mgbane la azo ɛzonlɛ.
5 Bɛnrɛhɔ suakpole ne bane ne mɔ ɛleka mɔɔ ɛbubu la kɛ bɛkayɛ bɛ boɛ bɛamaa Yizilayɛma,+ amaa Yizilayɛma ahɔ zo agyinla konle nloa wɔ Gyihova kenle ne.”+
6 “Bɛnwu adalɛ ɛnyelɛzodeɛnwunlɛ yɛɛ bɛha adalɛ edwɛkɛ bɛdo ɛkɛ, bɛdabɛ mɔɔ bɛka kɛ, ‘Gyihova se,’ wɔ mekɛ mɔɔ Gyihova mumua ne ɛtɛsoanle bɛ, na bɛkendɛ kɛ bɛ edwɛkɛ ne bara nu la.+
7 Asoo tɛ adalɛ ɛnyelɛzodeɛnwunlɛ a bɛnwunle ye yɛɛ tɛ adalɛ edwɛkɛ a bɛhanle bɛdole ɛkɛ wɔ mekɛ mɔɔ bɛse, ‘Gyihova se,’ wɔ mekɛ mɔɔ metɛkanle ɛhwee la?”’
8 “‘Ɛhye ati mɔɔ Tumivolɛ Awulae Gyihova ɛha la ɛne: “‘Kɛmɔ bɛha adalɛ edwɛkɛ na bɛ ɛnyelɛzodeɛnwunlɛ ne mɔ ɛnle nɔhalɛ la ati, nea meyɛ bɛ kpɔvolɛ,’ Tumivolɛ Awulae Gyihova a se a.”+
9 Mebadende me sa meadea ngapezoma mɔɔ nwu adalɛ ɛnyelɛzodeɛnwunlɛ na bɛka adalɛ edwɛkɛ bɛto ɛkɛ ne la.+ Bɛnrɛboka menli mɔɔ me nee bɛ lɛ agɔnwolɛvalɛ la anwo; na bɛnrɛhɛlɛ bɛ aluma wɔ Yizilayɛma buluku ne anu; yɛɛ bɛnrɛzia bɛnrɛra Yizilayɛ azɛlɛ ne azo; na bɛbanwu kɛ medame a mele Tumivolɛ Awulae Gyihova a.+
10 Ɔ muala a le kɛ bɛmaa me menli ne ɛvo adenle na bɛka kɛ, “Anzodwolɛ wɔ ɛkɛ!” wɔ mekɛ mɔɔ anzodwolɛ biala ɛnle ɛkɛ ne la.+ Saa bɛto bane mɔɔ ɛnlɛ anwosesebɛ la a, bɛpenti ye fufule.’*+
11 “Ka kile menli mɔɔ ɛlɛpenti nwolɛ fufule la kɛ ɔbabubu yeagua. Ezule kpole bie badɔ, ezuawolɛ badɔ* yɛɛ ahumuakyima kpole babubu ye agua aze.+
12 Saa bane ne bubu gua a, bɛbabiza bɛ kɛ, ‘Mɔɔ bɛvale bɛhanle nwolɛ la wɔ ni?’+
13 “Ɛhye ati mɔɔ Tumivolɛ Awulae Gyihova ɛha la ɛne: ‘Mefa ɛya kpole a mebamaa ahumu kpole adu, na meamaa ezule kpole adɔ wɔ me ɛyavalɛ nu, na me ahonle futu a meadɔ ezuawolɛ meamaa yeazɛkye ninyɛne.
14 Mebabubu bane ne mɔɔ bɛpenti ye fufule la meagua ye aze bɔkɔɔ, na ye adiabo ne anwo bala ɛkɛ. Saa suakpole ne sɛkye a, bɛ bo zo babɔ wɔ ɛkɛ; na bɛbanwu kɛ medame a mele Gyihova a.’
15 “‘Saa mewola me ɛya ne kɔsɔɔti megua bane ne nee bɛdabɛ mɔɔ bɛvale penti fufule ne bɛhanle nwolɛ la anwo zo a, mebaha meahile bɛ kɛ: “Bane ne ɛnle ɛkɛ ne bieko yɛɛ bɛdabɛ mɔɔ bɛpentile nwolɛ la ɛnle ɛkɛ ne bieko.+
16 Yizilayɛ ngapezoma ɛnle ɛkɛ ne bieko, bɛdabɛ mɔɔ bɛka Gyɛlusalɛm anwo ngapezo nee bɛdabɛ mɔɔ bɛnwu ɔ nwo anzodwolɛ ɛnyelɛzodeɛnwunlɛ, wɔ mekɛ mɔɔ anzodwolɛ biala ɛnle ɛkɛ ne la,”’+ Tumivolɛ Awulae Gyihova a se a.
17 “Na wɔmɔ sonla ra, tu ɛ nye sie wɔ menli ne amra mraalɛ ne mɔ mɔɔ bɛbɔ bɛ ti anu bɛka ngapezo la anwo, na ka ngapezo tia bɛ.
18 Ka kile bɛ kɛ, ‘Mɔɔ Tumivolɛ Awulae Gyihova ɛha la ɛne: “Mraalɛ mɔɔ kpomgba debie kyekye ɛsalɛ* kɔsɔɔti na bɛyɛ bɛ ti zo aguzo bɛmaa etile ngakyile kɔsɔɔti kɛ bɛfa bɛazua ɛhane bɛahye menli ne ngoane* la gyakɔ! Bɛsua ɛhane bɛahye me menli ne ngoane* na bɛalie bɛmɛ bɛ nwo ngoane* ɔ?
19 Bɛbalie baale bɛ sa ko nee paano sinli ekyi na bɛagua me nwo evinli wɔ me menli ne anu,+ bɛabɔ adalɛ bɛahile me menli ne mɔɔ tie bɛ adalɛ ne mɔ la na bɛahu bɛdabɛ* mɔɔ ɔnle kɛ bɛwu la na bɛagyakyi bɛdabɛ* mɔɔ ɔnle kɛ bɛtɛnla ngoane nu la ɔ?”’+
20 “Ɛhye ati mɔɔ Tumivolɛ Awulae Gyihova ɛha la ɛne: ‘O mraalɛ, melɛdwazo meatia ninyɛne mɔɔ bɛkpomgba bɛkyekye ɛsalɛ na bɛfa bɛkye menli* kɛ asɛɛ bɛle nloma la, yɛɛ mebatete nu meavi bɛ sa anwo na meagyakyi bɛdabɛ mɔɔ bɛlɛkye bɛ kɛ nloma la meamaa bɛahɔ.
21 Mebatete bɛ ti zo aguzo ne mɔ anu na mealie me menli ne meavi bɛ sa nu, na bɛnrɛyɛ debie mɔɔ bɛbahye ye wɔ bɛ ɛhane nu la bieko; na bɛbanwu kɛ medame a mele Gyihova a.+
22 Ɔluakɛ bɛbɔ adalɛ bɛmaa tenlenenli asa anu ɛdo+ wɔ mekɛ mɔɔ memmaa ɔnli nyane la, yɛɛ bɛmaa amumuyɛnli anwosesebɛ+ la ati ɔndwe ɔ nwo ɔnvi ye adenle ɛtane ne anwo na yeanyia ngoane.+
23 Ɛhye ati, bɛmɛ mraalɛ bɛnrɛnwu adalɛ ɛnyelɛzodeɛnwunlɛ bieko yɛɛ bɛnrɛyɛ abisadeɛ bieko;+ na mebalie me menli ne meavi bɛ sa nu na bɛbanwu kɛ medame a mele Gyihova a.’”
Ɔbodwɛkɛ
^ Anzɛɛ “bɛka ngapezo mɔɔ vi bɛdabɛ mumua ne bɛ ahonle nu.”
^ Hibulu aneɛ nu, “bɛ sunsum.”
^ Ɛhye kile, bɛto bane mɔɔ ɛnlɛ anwosesebɛ la wɔ sua ne akunlu lɔ na bɛpenti ye fufule kɛ asɛɛ ɔ nwo yɛ se la.
^ Hibulu aneɛ nu, “na wɔmɔ, O ezuawolɛ.”
^ Ɛhye kile, ngonyia debie mɔɔ bɛfa bɛbɛkɛbɛka bɛ sa kpɔkɛ anzɛɛ bɛ sa akɔme anu la.
^ Anzɛɛ “ɛkɛla.”
^ Anzɛɛ “ɛkɛla.”
^ Anzɛɛ “ɛkɛla.”
^ Anzɛɛ “ɛkɛla.”
^ Anzɛɛ “ɛkɛla.”
^ Anzɛɛ “ɛkɛla.”
