Yizikeɛle 17:1-24
17 Gyihova nee me dendɛle bieko kɛ:
2 “Sonla ra, kye agyebɛ na bu ɛrɛlɛ mɔɔ fale Yizilayɛma anwo la.+
3 Ka kɛ, ‘Mɔɔ Tumivolɛ Awulae Gyihova ɛha la ɛne: “Kɔleɛ kpole ne+ mɔɔ lɛ ndɛbalɛ mgbole, ye ndɛkɛ wowale na ɔ nwo amuala le ndɛkɛ kɔla ngakyile la rale Lɛbanɔn+ na ɔrabule sida baka ne ati dɛkɛdɛkɛ ne bie.+
4 Ɔbule ɔ ti dɛkɛdɛkɛ kpalɛ ne na ɔvale ɔrale gualilɛma* azɛlɛ ne azo na ɔluale ye wɔ gualilɛma suakpole ne azo.+
5 Akee ɔvale azɛlɛ ne azo ma ne mɔ bie+ na ɔluale ye wɔ azɛlɛ mɔɔ kye aleɛ la azo. Ɔluale ye kɛ azule nloa baka wɔ ɛleka mɔɔ nzule dɔɔnwo wɔ la.
6 Ɔti ɔfifile na ɔyɛle vanye ezinra, ɔdɛlɛdɛlɛle mɔɔ ɛnee ye nya ne mɔ ɛbelebele na ye ndinli ne mɔ wɔ ɔ bo a. Ɔti ɔyɛle vanye+ na ɔkpukele ɛnyelɛ na ɔkpakyele ngane.+
7 “‘“Na kɔleɛ kpole bieko+ mɔɔ ɔ ndɛba le mgbole na ye ndɛkɛ ne mɔ le mgbole la noko rale ɛkɛ.+ Akee vanye ɛhye denrɛdenrɛle ye ndinli ne mɔ anu ndɛndɛ wɔ ɔ nwo zo, ɔvile kofie ne mɔɔ bɛluale ye wɔ nu la anu, na ɔdendenle ye ngane nee ye nya ne mɔ amuala wɔ ɔ nwo zo amaa yeagugua zolɛ nzule.+
8 Ɛnee bɛlua ye wɔ azɛlɛ kpalɛ mɔɔ bikye ɛleka mɔɔ nzule dɔɔnwo wɔ la azo, amaa yeakpakye ngane, yeazo ma na yeayɛ vanye baka kpole.”’+
9 “Ka kɛ, ‘Mɔɔ Tumivolɛ Awulae Gyihova ɛha la ɛne: “Asoo ɔbayɛ kpalɛ? Asoo awie ɛnrɛdudu ye ndinli ne mɔ+ ɛnrɛmaa ye ma ne ɛnrɛkpɔlɔ na ɔnrɛmaa ye nya ne mɔ ɛnrɛnwoso ɔ?+ Ɔbagyengye kpalɛ mɔɔ ɔnrɛhyia ɛsalɛ mɔɔ anwosesebɛ wɔ nu anzɛɛ menli dɔɔnwo amaa bɛadu ɔ bo a.
10 Bɛdule bɛhɔluale ɛdeɛ, noko asoo ɔbayɛ kpalɛ? Saa aduduleɛ anwoma ne bɔ ye a, asoo ɔnrɛgyengye bɔkɔɔ ɔ? Ɔbagyengye wɔ kofie ne anu, ɛleka mɔɔ bɛluale ye la.”’”
11 Gyihova nee me dendɛle bieko kɛ:
12 “Mesɛlɛ wɔ, biza atuadelɛ menli ne kɛ, ‘Bɛnde ɛhye mɔ abo ɔ?’ Ka kɛ, ‘Bɛnlea! Babelɔn belemgbunli ne rale Gyɛlusalɛm na ɔvale ye belemgbunli ne nee ye mgbanyima ne mɔ na ɔziale ɔhɔle Babelɔn.+
13 Yeanga ye zɔ, ɔvale alehelɛ ne mɔ anu ko*+ ɔ nee ye yɛle ngyekyeleɛ na ɔmaanle ɔhanle ndane.+ Akee ɔvale menli titili mɔɔ de azɛlɛ ne azo la ɔ nee bɛ hɔle,+
14 amaa bɛaha belemgbunlililɛ ne aze na yeangola yeammaa ɔ nwo zo, na saa ɔdi ye ngyekyeleɛ ne azo a, yɛɛ belemgbunlililɛ ne bagyinla a.+
15 Noko belemgbunli ne dele ɔ nwo atua,+ ɔzoanle ɛbɔfoɔma wɔ Yigyibiti kɛ bɛhɔkpondɛ mgbɔnwɔ+ nee ɛlɔnema dɔɔnwo bɛvi bɛ ɛkɛ.+ Asoo ɔbawie ye boɛ? Asoo ahenle mɔɔ ɛlɛyɛ ɛhye mɔ la ɛnrɛnyia anzohwenlɛ biala? Asoo ɔbahola yeazɛkye ngyekyeleɛ ne na yeava ɔ nwo yeali ɔ?’+
16 “‘“Mekɛ ala mɔɔ mede aze la,” Tumivolɛ Awulae Gyihova a se a, “ɔbawu wɔ Babelɔn, ɛleka mɔɔ belemgbunli ne* mɔɔ vale ye* ziele belemgbunli, ahenle mɔɔ ɔdonle ye ndane ne na ɔzɛkyele ye ngyekyeleɛ ne wɔ la.+
17 Na saa Babelɔnoma kuohua ɛnwea* na bɛto bane bɛbɛnga ye bɛyia kɛ bɛsɛkye menli* dɔɔnwo a, Falo ɛlɔne kpole ne nee ye sogyama dɔɔnwo ne ɛnrɛhola ɛnrɛboa bɛ wɔ konle ne anu.+
18 Yedo ndane na yezɛkye ngyekyeleɛ. Ɔbɔle ɛwɔkɛ* ɛdeɛ, noko yeyɛ ninyɛne ɛhye mɔ amuala, na ɔnrɛvi ɛsalɛ.”’
19 “‘Ɛhye ati mɔɔ Tumivolɛ Awulae Gyihova ɛha la ɛne: “Mekɛ ala mɔɔ mede aze la, mebava mɔɔ bavi me ndane ne mɔɔ yedo+ nee me ngyekyeleɛ ne mɔɔ yezɛkye ye anu ara la meagua ɔ ti zo.
20 Mebado me asawu ne meagua ɔ nwo zo, na meahye ye wɔ me avonle ne anu.+ Mebava ye meara Babelɔn na ɔlua nɔhalɛ mɔɔ yeanli yeammaa me la ati, mebabua ye ndɛne wɔ ɛkɛ.+
21 Bɛbava konle dadeɛ bɛahu ye ɛlɔnema mɔɔ banriandi la amuala, na bɛdabɛ mɔɔ bɛbaha la, mebabɔ bɛ asande meahɔ ɛleka biala.*+ Akee bɛbanwu kɛ medame Gyihova a meha a.”’+
22 “‘Mɔɔ Tumivolɛ Awulae Gyihova ɛha la ɛne: “Mebabu sida baka kɛnlɛma ne ati dɛkɛdɛkɛ ne bie+ na meahɔlua, mebabu ɔ ti dɛkɛdɛkɛ kpalɛ ne,+ na medame mumua ne meahɔlua ye wɔ boka tendenle kpole bie azo.+
23 Mebalua ye wɔ Yizilayɛ boka tendenle ne azo; na ɔbakpakye ngane na yeazo ma na yeayɛ sida baka kpole. Na nloma kɔsɔɔti bara ɔ bo na bɛadɛnla ye nya ne mɔ alubo ne abo.
24 Na ɛbɔ nu mbaka kɔsɔɔti banwu kɛ medame, Gyihova a meha mbaka ndendenle aze na memaa mbaka nzinrenzinra zo a;+ memaa mbaka amolɛ ɛgyengye yɛɛ memaa mbaka welera ɛfifi.+ Medame Gyihova a meha a, yɛɛ meyɛ noko.”’”
Ɔbodwɛkɛ
^ Hibulu aneɛ nu, “Keena.”
^ Hibulu aneɛ nu, “ma ne anu ko.”
^ Ɛhye kile, Nɛbukadenɛza.
^ Ɛhye kile, Zɛdikaya.
^ Anzɛɛ “awolɛ.”
^ Anzɛɛ “ɛkɛla.”
^ Hibulu aneɛ nu, “Ɔvale ɔ sa ɔmaanle.”
^ Hibulu aneɛ nu, “anwoma biala anu.”
